Serer Version Eglise luthérienne du Sénégal (Non-Drama)

NQAARIIT NE ROOG

No mberaand naa, yaaga dara sakafulaand fa Lay fee a reeƭa. Fa Lay fee fa Roog a reeƭu, too fa Lay fee Roog sax sax a reeƭu. Fa Roog a reeƭu no mberaand naa. Roog a saktin fop. Dara kaa sakeena too reefandaand no ten jegee meen. No ten o ñoow ole a reeƭu, too o ñoow oleene reeƭu a qoolaand no wiin we. A qoolaand ale koy, kaa dalfoox o naagit dañ kam o niɓaan ole, too o niɓaan ole waag’iran o ñuf.
A jeg’a sax koy o kiin oxaa Roog a luliid’ina, ta ne’el Saŋ. Kaa gar’u ndax ta ref o seede, a lay ke ta andna na qoolaand ale ndax fop a mbaag o ngim na pexey fa lay um. Ten fa xoox um koy reeƭee a qoolaand aleene. Kaa gar’u soom ndax ta ref o seede, a lay ke ta andna na qoolaand ale. A qoolaand aleene koy reeƭu a tiindigil ale andoona yee kaa gar a xooland o kiin oo kiin ye ta rokiidna na adna.
A qoolaand ale a reeƭa kam adna fee, ndaa ke adna fee a reefandeena no ten fop oo anddiran. Kaa gar me no wiin um, da mbañin, a mbesin a cinj. Kaa koy, Roog a fi’a jam boo we njaɓuuna fop, a ngim no gon um, ta ci a den da ndefat xa ƥiy Roog axaa ndimtaandeena nen o kiin, too itam a yaaw cer gartiran mbaat buge-buge no kiin, ndaa da ngat a ngat na Roog.
Fa Lay feene koy a xawooxa, a jegat cer no kiin, soo a gar a gen fa in, a may muut fa yirmande fo ndigil. In o mat, i nga’a o ndam um, refna o ndam onqe ta daawitna na Faap fee nen o Ƥeem o leng kut. Saŋ a seede’anaan a qool qac ee:
«Oxeeke mat ne’oogum ye layuuma yee: ‹Oxe na reefaniidaxam hupaxam yaam yaa ta refna yaaga rimafulaandeem.› »
I ndaawa koy no paax ke ta garitna fop, ta ref yirmande took yirmande. Kebil ke Roog kaa ndaawtel na Moyiis, yirmande fo ndigil a ndaawtel na Yeesu Kiristaa. O leng koy mosee o ga a Roog. Roog o Ƥiy o leng kut onqe rimeena, too a moƴ o mat a Faap fee, andnoorun.


Keeke refu a ƭelem ake Saŋ a seede’antuuna ye Yaawuur we a mbodna Yeerusaleem, a lul saasadax fo Leelewi ndax da laamtin ee:
«Wo o mat, an refo?»
Maaga, Saŋ a doona a den, too ɗasnee dara yee:
«Refiim Kiristaa fee, o Muumucil oxe regteena.»
A ndakooxaan o laamit ee:
«O refangee Kiristaa fee, andum wo refu Eliya.»
A laya yee:
«Ha’aa, refinum.»
A laamtan ee:
«Ndax wo refu o Tuleer oxe?»
A weera na:
«Ha’aa.»
Ngoor kaa a layaan ee:
«Coo, an refo koy? Xar i laykaa we lulna a in? Xar layo na xoox of?»
Saŋ a doona yee:
«Mi refu o ñuxur ole na falalooxaa kam a koƥ-a-ƥor alaa yee:
‹Njofandanyo o Yaal oxe a ƭat!›
Keene o mat refu ke o tuleer Esayi a yegnitna.»
We luliid’eena koy, a inoora me no Farisiya we. A laamtaan ee:
«A soƥangaa koy ee refiro Kiristaa fee, o Muumucil oxe regteena, refiro Eliya, refiro o Tuleer oxe, ñaal o yeng a jalan xar taxu o batiise’aa?»
Saŋ a doona a den ee:
«Mi, mexe batiise’taa foofi. A jega koy oxaa refna a ndeer nuun, too nu andiran. Ten refu oxe na reefaniidaxam, too fekit xa ñaaƭ um sax a jombaxam.»
Keene xaa xewit’a Betani, kaltaa o xuluɓ ole Yordaan, maa Saŋ a batiise’toogna.

No feet olaa, Saŋ a ƴooka a Yeesu ta xotiidaa maa ten. Maaga, a laya yee:
«Nga’yo o Mbaal onqe Roog na watnaa bakaad adna. Oxeene mat ne’oogum ye layuuma yee: ‹A jega oxaa na reefaniidaxam ndaa o ten hupaxam, yaam yaa ta refna yaaga rimafulaandeem.› Mosinum o and, ndaa kaam gar batiise’it foofi, ndax Isra’el a anddin.»
Saŋ a dakooxaan o seede’an ee:
«Kaam ga Yiif le Roog a fudoortiidaa na asamaan, a saxit nen a nuukuur, soo a gar a dong took um. Mosinum o and, ndaa oxe luliidaxama ndax um batiise’it foofi kaa lay’aam ee: ‹Oxe Yiif le Roog a dongkaa took um yaa ta fudooritna na asamaan refu oxe na batiise’itkaa Yiif Tedu le.› Ga’aam, too seede’anaanum ee o ten refu o Ƥeenqe Roog.»

No feet olaa ahin Saŋ a maad’a maaga, ten fo daalbe um ɗik. Yaa ta ga’na Yeesu a joonaa, a laya yee:
«Nga’yo o Mbaal onqe Roog!»
Daalbe ɗik waa a nana a ƭelem akaaga, soo a ndeefan a Yeesu. Yeesu a wiƈaqilooxa, a ga a den. Ye ta ga’na yee kaa ndeefanan, a laya a den ee:
«Xar nu mbaaƭaa?»
Ngoor kaa a ndoonaan ee:
«Rabi (kaa tekit ‹o Caajangin oxe›), mam geno yee?»
A laya a den ee:
«Ngaryo nga’an a qoox nuun.»
A ndeta boo me ta genoogna, soo da moof fo ten ñaal naaga fop. Kaaga xe xew’a a cinj kirandax.
Andare fee o ndeɓ Simoŋ Piyeer a reeƭa o leng no ɗik waa nan’ina a ƭelem akaa Saŋ, too a ndeefan a Yeesu. Andare a eeta o fad maa Simoŋ fee o maag um, soo a layin ee:
«Yegaa fo and ee i nga’a Oxe Roog a dodna.» (Kaa tekit ‹Kiristaa fee›.)
A ɓisaan maa Yeesu itam. Yaa Yeesu a ga’uuna, a layaan ee:
«Wo refu Simoŋ o ƥiy Saŋ, ndiiki koy, feranaaxong Kefaas.» (Kaa tekit ‹o ƥil›).

No feet olaa, Yeesu a waaja a tet Galile, soo a xet fa Filip, a layin ee:
«Reefaam!»
Filip oxe gen’a Betsayda. Andare fa Piyeer na teeru faaga a ngen’u itam. Filip oo, a xeta fa Natana’el, soo a layin ee:
«I nga’a oxe Moyiis a bindna no kebil ke, duleer we a lay kaa jofna no ten, ta ref Yeesu o Naanasaret oxe, o ƥiy Yoseef.»
Natana’el a foola, a layin ee:
«Coo! Paax a waaga waag o inoor Nasaret?»
Filip a doonaan ee:
«Koo gari ga!»
Yaa Yeesu a ga’na a Natana’el a garaa me ten, a laya kaa jofna no ten ee:
«Kene refu o Ii-isra’el tigi, mbi’akaan leng refee no ten.»
Natana’el a layaan ee:
«Ndi mam andtaxamo boo layaa kene?»
Yeesu a doonaan ee:
«Yaaga Filip xoyafulirang, a soƥ o ref yoora ndun naa ga’oong.»
Natana’el a doonaan ee:
«O Caajangin oxe! Wo o mat refu o Ƥeenqe Roog, ref o maad Isra’el.»
Yeesu a doonaan ee:
«Ke layoonga yee ga’aaxoong, a soƥ o ref yoora ndun naa soom taxu o gim! Xan o ga kaa hupna keene toox de!»
Yeesu a doona taaga yee:
«No ndigil, no ndigil, xan nu nga’ataa asamaan a wetoox, soo malaaka ke Roog a ŋaayaa, a mbudooxaa me o Ƥeenqe no kiin oxe a refna.»

सुनें - Saŋ 1