Yakkha 2023 WBT/NEBS  (NT) Drama

न्‍हाङा येसुङा उका चेलाचि पार्थाना न्‍जोङ्‌नुङ्‌नि, निरास न्‍लेङ्‌निन्‍निभोङ् एको खाॽलाना ताप्‍चेॽया लुचि, “एको साहारबे निङ्‌वाफुमानुङ् मेङ्‌गिसिखुबा न्‍हाङ् इसा चा आदार मेन्‍जोक्‍खुबा एको निरिक्‍राङ्‌बा वाया॥ न्‍ना साहारबे एको लाङ्‌निमा चा वाया॥ न्‍ना लाङ्‌निमा निरिक्‍राङ्‌बागाबे खेसाङ् ‘का खिमा लाप्‍खुबानुङ् आका उलुम्‍बे निरिक चोक्‍ताब्‍या’ भोङ् लुनेसुक्‍सा॥ न्‍ना निरिक्‍राङ्‌बाङा ओन्‍दाङ्-ओन्‍दाङ् गो लाङ्‌निमागा चेॽया खेम्‍मायि ङ्‌खेप्‍सुन, ङ्‌खाॽनिङ्‌गो मिहेक्‍साङ् उङा उनिङ्‌वाबे खाॽला मिता, ‘का निङ्‌वाफुमा नुङ् चा ङ्‌गिसिमेङान, याॽमिचि चा आदार न्‍जोग्‍वान्‍चिङान, ङ्‌खाॽनिङ्‌गो ना लाङ्‌निमाङा तुक्‍नुङ् तुखि पियाङ्‌नाङा नागा निरिक चोङ्‌बिॽमा तायाना, मानुङ्‌गो न्‍ना तान्‍नुङ्‌मेहोङ् तुखि पिन्‍सिमेङ्‌ना॥’”
न्‍हाङा हाङ्‌बा येसुङा लुचि, “न्‍ना इसिॽना निरिक्‍राङ्‌बाङा इ कायाना, ङ्‌खाभाङ् चिन्‍दानि॥ इना निङ्‌वाफुमाङा उङ्‌नुङ् सेॽनि-लेॽनि हाप्‍साङ् पार्थाना चोक्‍खुबा उका याॽमिचिगा निरिक न्‍जोक्‍तुबिवान्‍चिन्‍हायि? इना उङा निरिक मेन्‍जोङ्‌बिॽले खेप्‍सुनेस्‍वाहा से लोप्‍पि? का न्‍निङ्‌दा लुमेॽनेनिन, निङ्‌वाफुमाङा उका याॽमिचि हानि निरिक चोक्‍तुबिवाचिहा॥ ङ्‌खाॽनिङ्‌गो याॽमिगा उच्‍या ताम्‍दाङ्‌फुमाबे ताम्‍मेॽनिङ् इना उङा बिस्‍वास चोक्‍खुबाचि तुप्‍स्‍वाच्‍याहा लोप्‍पि?”

का से धार्मोतिङान मिखुबाचि नुङ् हेकोहा याॽमिचि इच्‍चा मेनिन्‍हा मिखुबा याॽमिचि येसुङा ना ताप्‍चेॽया लुचि, “हिप्‍पाङ् याॽमिचि निङ्‌वाफुमापाङ्‌बे पार्थाना चोक्‍से ख्‍याचि॥ ङ्‌खाचि एको फारिसि नुङ् हेकोना तिरो पोक्‍खुबा सायाचि॥ फारिसि ओतोखुमाक येबाहोङ् उनिङ्‌वाबे खाॽला कासाङ् पार्थाना चोगा, ‘ओ निङ्‌वाफुमा आप्‍पा, का न्‍दा नुनिङ्‌वा पिमेॽनेन, इजाङ्‌बाङ्‌निङ् का हेकोहा याॽमिचि लोॽवा पोहोङ् नुङ् याॽमिचि इसिखुबा मेॽङान, का ब्‍याभिचार चा न्‍जोगामाङान, न्‍हाङा ना तिरो पोक्‍खुबा लोॽवाना चा मेॽङान्‍ना॥ का हाप्‍ताबे हिप्‍मा उपाबास युङ्‌मेङ्, न्‍हाङ् का चोगुङ्‌हा नुङ् तोक्‍तुङ्‌हा घाक थोक्‍का दासाम्‍सा न्‍दा पिमेॽनेन॥’
“ङ्‌खाॽनिङ्‌गो न्‍ना तिरो पोक्‍खुबाङा च्‍हेन माङ्‌दु येबाहोङ् वालोकपोटि चा मेन्‍सोॽले उछात्‍ति उप्‍साङ्, हाप्‍साङ् खाॽला लु, ‘ओ निङ्‌वाफुमा आप्‍पा, का दाया चोगाङ्, का गो पापिङान!’ का न्‍निङ्‌दा लुमेॽनेनिन, न्‍ना फारिसि हाक्‍निङ् तिरो पोक्‍खुबा च्‍हेन धार्मोति लेक्‍साहोङ् उपाङ्‌बे लासाना॥ इसाङा का माङान कामे, न्‍ना मि लेङ्‌मे न्‍हाङ् का मिङान काखुबा च्‍हेन मा लेङ्‌मेॽना॥”


येसुगा उमुकङा तोक्‍तिचिहोङ् आसिक पिचिनिभोङ् याॽमिचिङा उङ्‌चि पिछानाछाचि येसुगाबे न्‍दाचि॥ खा न्‍निसुहोङ् येसुगा चेलाचिङा ङ्‌खाचि न्‍थिन्‍दुचि॥ ङ्‌खाॽनिङ्‌गो येसुङा ङ्‌खा पिछानाछाचि काचिहोङ् उका चेलाचि खाॽला लुचि, “पिछानाछाचि काबे तामा पियानुम्‍चिम, ङ्‌खाचि ङ्‌ङोन्‍दानुम्‍चिम्‍निन इजाङ्‌बाङ्‌निङ् निङ्‌वाफुमागा राज्‍या खाॽलाहाचिगा माङ् ओम॥ जेप्‍पा का न्‍निङ्‌दा लुमेॽनेनिन, इसाङा पिछानाछाचिङा लोॽवा निङ्‌वाफुमागा राज्‍या सुइकार न्‍जोग्‍वान, न्‍ना याॽमि हेॽनिङ्‌चा न्‍नाबे उमा न्‍दोक्‍त्‍वान्‍ना॥”


एको तायेन्‍राङ्‌बाङा येसु छिम्‍दु, “ओ नुना चिन्‍खुबा, हेॽनिङ्‌चा मेन्‍सिमाना हिङ्‌लुङ् तोक्‍मागा का इ चोक्‍ङा?”
येसुङा न्‍ना पोलोवा पि, “इजाङ् का नुना चिन्‍खुबा लुमेङ्‌गाना? नुना गो निङ्‌वाफुमा सेॽना॥ निङ्‌वाफुमागा ब्‍यावास्‍थाबेॽहा आग्‍गे गो न्‍दा था वान्‍ने, ब्‍याभिचार मेन्‍जोक्‍मा, याॽमिचि मेन्‍सिमाचि, मेङ्‌खुमा, मेन्‍हा चेॽयाबे इसा चा आप्‍दिक मेएम्‍माचि न्‍हाङ् पा-मा आदार चोक्‍माचि॥”
न्‍ना याॽमिङा पोलोवा पि, “ङ्‌खा घाक आग्‍गे गो का पिछा नाहाङ्‌तोमाङ् येनुक्‍तुक्‍सुङ्‌हा॥”
खा खेप्‍सुहोङ् येसुङा न्‍ना याॽमि खाॽला लु, “न्‍दा चोक्‍माना काम हाकुचा एको वेॽना, न्‍दानुङ् वेॽहा घाकथोक इनुचोघोङ् इहाचा मेवाखुबा तुखिसुम्‍बाचि हाप्‍सुबिचि, न्‍हाङ् न्‍दा वालोकपे याङ्‌सा तोक्‍त्‍वाघा, न्‍हाङा न्‍दा आहेक्‍साङ् लाचोगा॥” ङ्‌खाॽनिङ्‌गो खा चेॽया खेप्‍सुहोङ् न्‍ना तायेन्‍राङ्‌बाङा उनाचिक कुइम चोगु, इजाङ्‌बाङ्‌निङ् उङ् इब्‍बे-इब्‍बे थुङ्‌दुना याॽमि सा॥
न्‍हाङा येसुङा न्‍ना याॽमि सोसाङ् खाॽला काया, “थुङ्‌दुहा याॽमिचि निङ्‌वाफुमागा राज्‍याबे उमा इखिङ् छाक्‍हा! थुङ्‌दुना याॽमि निङ्‌वाफुमागा राज्‍याबे उमा हाक्‍निङ्‌गो ओओक लुॽमेगा होङ्‌बे उमा साजिलो लेङ्‌मेॽना॥”
खा चेॽया खेम्‍खुबाचिङा येसु न्‍छिम्‍दु, “ङ्‌खाॽलाभोङ् इसाङा मुक्‍ति तोक्‍मा यास्‍वाना?”
उङा ङ्‌खाचि खाॽलाना पोलोवा पिचि, “याॽमिचिङा चोक्‍मा मेयामाहा काम चा निङ्‌वाफुमाङा च्‍हेन चोक्‍मा यास्‍वाहा॥”
न्‍हाङा पात्‍तुरुसङा लु, “सो, कानिङ् गो आनिङ्‌गा घाक थोक नाओम्‍ङाहोङ् ङ्‌गा हेक्‍साङ् लामिमिङ्‌हा॥”
येसुङा ङ्‌खाचि खाॽला लुचि, “जेप्‍पा का न्‍निङ्‌दा लुमेॽनेनिन, इसाङा निङ्‌वाफुमागा लागि उपाङ्, उहिङ्‌खुमा, उप्‍पा-उमा, उफु-उनुन्‍छा, उच्‍याचि नाॽवाचि, न्‍नाङा ना हिङ्‌लुङ्‌बे ङ्‌खा हाक्‍निङ्‌चा प्‍याक तोक्‍त्‍वा, न्‍हाङ् तायेॽना युगपे च्‍हेन मेन्‍सिमाना हिङ्‌लुङ् तोक्‍त्‍वाना॥”


येसुङा उका एहिच चेलाचि मियोरोक काहेतुचिहोङ् खाॽला लुचि, “खेप्‍सानुम, हाकु कानिङ् यारुसालेमबे खेॽमासिइवा॥ निङ्‌वाफुमाभाङ् चेक्‍खुबाचिङा याॽमिगा उच्‍यागा उतुम्‍बे न्‍छेप्‍तुहा घाक चेॽया न्‍नाबे पुरा लेङ्‌मेहा॥ उङ् हेकोहा जातिचिगा मुकपे आमे, न्‍हाङ् ङ्‌खाचिङा उङ् खिजे न्‍जात्‍वा, इसिॽनुङ् न्‍जोग्‍वा, न्‍थोक्‍त्‍वा, कोर्राङा म्‍मोक्‍त्‍वा न्‍हाङ् न्‍सिस्‍वा, ङ्‌खाॽनिङ्‌गो उङ् सुम्‍ना लेनबे स्‍यानाभाङ् हिङ्‌गिलिक लेङ्‌मेहोङ् पोङ्‌मेॽना॥”
ङ्‌खाॽनिङ्‌गो चेलाचिङा खा चेॽया एको चा ङ्‌ङासुनिन, इजाङ्‌बाङ्‌निङ् खा चेॽयागा तुम्‍बिला ङ्‌खाचिभाङ् चुमिॽयामासा, न्‍हाङामाङ् खा चेॽया उङ्‌चि निङ्‌वाबे मिॽयाङ् चा मिॽमा ङ्‌यासुनिन॥


इलेन येसु यारिहो बाङ्‌ना साहारगा उयुम्‍बे तासु॥ ङ्‌खिङ्‌बेला न्‍नाबे एको मिक्‍सुरुम्‍बा लाम्‍बुगा उयुम्‍बे युङाहोङ् नाङ्‌चामास्‍या॥ न्‍नाङा प्‍याक याॽमिचि उयुम्‍भाङ् ङ्‌खेॽमास्‍याहा था तोक्‍तुचिहोङ् छिम्‍दुचि, “इले लेङ्‌मासिम्‍मेहा बा?”
याॽमिचिङा न्‍लु, “नासारातपेॽना येसु नाहाङ् खेॽमासिम्‍मेॽना॥”
खा चेॽया खेप्‍सुहोङ् न्‍ना मिक्‍सुरुम्‍बा खाॽला कासाङ् ओक्‍ता, “ओ हाङ् दाउदका उच्‍या येसु, का दाया चोगाङ्॥” ओन्‍दाङ्-ओन्‍दाङ् लाम्‍खुबाचिङा उङ् स्‍वाक वाया लुसाङ् न्‍थिन्‍दु, ङ्‌खाॽनिङ्‌गो न्‍ना झान खाॽला कासाङ् तुक्‍नुङ् ओक्‍ता, “ओ हाङ् दाउदका उच्‍या येसु, का दाया चोगाङ्!” येसु लाम्‍मास्‍यानुङ् येबाहोङ् “न्‍ना आयुम्‍बे तायानुम” लुचि॥ न्‍ना उयुम्‍बे तायाहोङ् येसुङा छिम्‍दु, “का ङ्‌गा लागि इ चोङ्‌बिॽनेन बाङ्‌ना मिम्‍मेकाना?”
न्‍ना मिक्‍सुरुम्‍बाङा लु, “हाङ्‌बा का निमा यासुङ्‌नि॥”
न्‍हाङा येसुङा लु, “न्‍दा निमा याखुबा लेक्‍सा, इजाङ्‌बाङ्‌निङ् ङ्‌गा बिस्‍वासङा न्‍दा नुमेतामागाना॥” ङ्‌खिङ्‌बेलामाङ् उङ् निमा याखुबा लेक्‍साहोङ् निङ्‌वाफुमागा पार्साम्‍सा चोक्‍साङ् येसुगा हेक्‍साङ् लाचोगा॥ खा चेॽया न्‍निसुहोङ् घाक याॽमिचिङा चा निङ्‌वाफुमागा पार्साम्‍सा न्‍जोगु॥

सुनें - लुका 18