Luku 24
24
Yesu aku'i ho ti'ehina
Mt 28:1-10; Mk 16:1-8; Yn 20:1-10
1To yalo etehi folugu'i ana ana'magi tu mesebe hiti to tu bina kifina hiti li loloba hite mele'ahana lilete'ani Yesuhi gufa'a mele'ahana efaha mulito bi'ahana. 2To sipi efatu'i muli kasiha'alo i hekini le'ahana ali behe hu he'mi'ahago hokolo huto ni'igo bu ge'ahana. 3Ya hilete enali ana muli kasito bilete he'mi ete'ahana nebelusalo bu gana Sipi Bo Yesuhi gufa'a meni'igo bu ge'ahana. 4Ya hu'ehigo enali enekesa yigi fato fato hilete negi nagi nete nehago bo loemo ana lebato ho ti'aha'ina to etali gukete'atitiuba fi besa lo baga i'ehina yabe. 5Enali ana ana'i enelesa'ani ligo koli hilete melugu lipi gehesa i baga i'ahana. Ya nehago etali ana ana'i lu epi'aha'ina: Lenali hena hibe lite fili'ahana bona'magi hepalugu aho ti'ehina bomofi kumu'i sa sa nehabe? 6Ai malo menohibe. Ai aho ti'ehibe. Ai Galili kapolo lenali hiti nohuto ma luto lu lepi'ehina kaga molo lenali lenekesa yigilo. 7Enali Kokulumaguti limi'ehina Bo foipa bomagihi enayanugu binogo malipu yafalo henogo filito loegi monegi yupahi ho tilina'mu yabe luto lu lepi'ehinamo ni'ibe. 8Ya la'igo enali ana ana'i Yesu koyapa'i lu epi'ehina ka'a enekesa hokolo hu'ehina yabe. 9Ya higo enali ana muli efa kapo he'mite i behe hite bi'ahana. Ya hilete enali bite aposolo pana'a nayahi luga luga su hoto nigigusagati mone heleko malago nehanamagi hiti to asaga bona'i luga'a hiti asaga kaga lu epi'ahana. 10To ana ana'i enali anana huto hina bu ge'ahanaya Malia ya'ma Magatala hepato a'i yagi Yoana yagi to Malia, Yemesihi ito'afu yagi to luga'a ana'i hiti bite bu ge'ahanamagi Yesuhi aposolo pana'a ya huto asaga'na huto hu'ehibe lite lu epi'ahana yabe. 11Ya lite lu epigo enali aposolo pana'amagi kilihe ka beto hu nelimibe lite ana ka'ani li lataha'anigu memele'ahana. 12To aku'i Pitau ho tito hololu luto buto ana Yesuhi he'mi ete'ahana mulito neheti'ehina. Ya huloto ai lipito ana muli kapoluga bu golago tina Yesuhi sa gi ete'ahana kata'ago ni'igo bu go'ehina. Ya huloto ai aku'i i behe huto hepatoga buloto ya'mana huto hu'ehinanamu'i ekesa keheli keheli hu'ehina yabe.
Emeasi hepa kapolo loe bomale'i Yesuhi bu ge'aha'ina
Mk 16:12-13
13Ana yupahi Yesuhi pana'alobo'a loemo kapo melete lagaso hepa'i mone Emeasi yabe lilata nehanalo bi'aha'ina. Ana hepa'i Yelusaleti foto huka huto nina hepato yabe. 14Etali kapo melete nebite asaga'na huto nohinanamofihi ka'a beto hite bi'aha'ina. 15Etali kaga beto hite nebite ana kaga ai lu emigo ai lu emigo hite neba'igo Yesu ai'a oto folagaha'atitigu huto hulago li moneko hite moneka bi'ahana yabe. 16To etali ai abu ga'inaya to ai Yesu nohibe lite okaba'a bu go fe lite hite bu mege'aha'ina. 17To ai ma luto etoloka ho'ehina: Letali henana'mu kaga lime lime nebite kapo nemala'ibe? Ya ligo etali etiginaga fina bole mopo mehise ho ti fefe hi'aha'ina. 18Ya hilete mone bo gi'a Kiliopasi yabe lite gi'a nehana bouba ma luto lu emi'ehina: Babu bona'i fato fato hepatoti li nupa hite yatai Yelusale hepato nehabe. To kai mone'isimaka asaga'na Yelusale hepalugu yatai kana'agu huto hu'ehinanaya mekeheli'ahapihe? 19Ai ya luto loka hago Yesu ma luto loka ho'ehina: Henana huto hu'ehibe? Kai lu nimibo. Etali ma lite lu emi'aha'ina: Ya'mana Nasalete bo Yesu aito huto hu'ehinana yabe. Ai ka lu yege hose bo nohuto ai asaga boana enubulo hiti to Hu'mamofihi bulo hiti amuya lili'na liloto to amuya kaga lu epi'ehina bo yabe. 20To enali sipi mono boti to enali enikibina botimagi enali gamani bomagihi enayanugu mele'ahana yabe. Ya hago enali malipu yafalo ho fili'ahana yabe. 21Ya hu'ehina lali koyapa'i ma luto lekesa yigi emi'ohuta. Ai ya'mana bouba Isilaeli boana'i enubuto bito enele'mo hetofa kapogu malalibe luto keheli'ohuta yabe. To mone kaya ma huto ni'ibe. Asaga'na ahuto hu'ehina kana'aya yatai loegi monegi yupahi lolo hilube'mu nohibe. 22To yatai etehi folugu'i ana'i luga'a lali nagaluguti mulito bite Yesuhi gufa'a sa sa hana minigi'ehigo enali i behe hite ete ana kaga lu limigo lali topa hoto tili hu'ohuta yabe. 23To enali ya hite ete lalitoga ma lite li'ahana yabe: Lali agelo bomagihi enemeha'ani bu gonogo ana agelouba ma luto lu limi'ehina: Ai aho tito nohinagihe luto lu'ehina yabe. 24To lalitiguti bo luga'amagi ana hite bite ana Yesuhi mele'ahana muli'i bu ge'ahana ya'a ana'magi li'ahana suhi lite Yesuhi gufa'a bu mege'ahana yabe.
25Ya luto lulago Yesu ma luto lu etimi'ehina: Letaliya negi ne'aha'ibe. Koyapa'i lu huto huto bona'magi ge'ahana ka'animu letali keheli fulu hite li latahatitigu mele'aha'ibe. 26Henabe lutobe? Mesiahi yata'a gabu foya kofiloto su henogo Hu'mau le'mo ho tigo alihi Hu'mamofihi fana mehena'agu ti'ehibe, luto, 27to ai Moseu hiti to lu huto huto bomagi hiti ai kumu fayahi koyapa'i ge'ahanaloti mono kaga silaga'namo hapi fito luto tiloto etegekesa lu hokolo hu'ehina.
28Ya ligo enali kapo melete bite etali nemina'ina hepato tilu'ibe'mu neha'igo Yesu ai etimi'i molo ka huloto kapogago'i bu bebe salube'mu hu'ehina yabe. 29Ya nohigo etali yato lite le'mo melelete ma lite lu emi'aha'ina: Yege alimi folose'na nohina sinihi gilina'mu yagi kai le'ali hiti buto kalune. Ya la'igo Yesu etali nonuga tite mine'ahana yabe. 30Alihi enali nose'na nalune'mu nehite Yesu etali hiti moneto mine'ahana. Ya huloto ai beleti nose'na liloto Hu'mamofitoga fokehi ho emiloto gofa hoto etimi'ehina yabe. 31Ai ya nohigo etali etubu'atiti i fana tago Yesuhi bu gete akeheli'aha'ina yabe. Ya neha'igo ana'asilo Yesu etali etubulo minigi'ehina yabe. 32To etali kaga li'aha'ina: Le'ali kapo moloto noo'igo ai mono kamofihi hapa hapa'a lu le'emi'ehina nohigo ana kanalo komopati'agu sabiyana lolo hu le'eto'ehina yabe.
33Etali ya lite lilete ana'asilo ho tite i behe hite Yelusale hepatoga bi'aha'ina. Etali nehetilete nayahi luga luga su hoto nigigusagati mone heleko malago Yesuhi aposolo pana'a hiti to luga'a bona'i hiti li nupa hite nehago bu enege'aha'ina. 34To enali lu etimi'ahana: Lusiga luto Sipi Boti aho ti'ehibe. Simoniu ai'a abu go'ehibe. 35Enali ya lago etalitoga ana hite kapo melete neba'igo Yesu etubulo huto hu'ehina kaga ana hite beto hite lu neepite to ya huto beleti nose'na lito gofa hoto le'emigo bu go bati hu'ohu'ibe, lite lu epi'aha'ina yabe.
Aposolo pana'magi Yesuhi bu ge'ahana
Mt 28:16-20; Mk 16:14-18; Yn 20:19-23; Apo 1:6-8
36Enali ya'mana kaga beto kato hite lu keheli fa keheli hite nehago Sipi Bo ai'a folagaha'anigu huto hu'ehina: Fuluna lenalitoga mineno, luto Yesu lu epi'ehina. 37Ya higo enali topa hete sipi koli hilete fele noabe lite keheli'ahana. 38Ya nehago Yesu ma luto lu epi'ehina: Lenali henabe lite topa nehabe? To lenali henabe lite lenekesa yigi yigi nehabe? 39Lenali nigi nayaha'ni bu galo. Nani'ni nohube. Lenali nani nugufalo li kehelite, bu galo. Ai felemofihi gufa'a hiti felisa'a hiti meminolata nohibe. To naniya nugufa'ni hiti felisa'ni hiti ni'igo bu negabe. 40Yesu ya luto lu epiloto ai yaha'a hiti gigusa'a hiti enelepi'ehina. 41Ya ligo enali enegelo gofa bilete Yesuhi ka'a li lataha'anigu memelese ai nohibe lite mekeheligo Yesu enoloka ho'ehina: Lenali nose'na mele'ahafihe? 42Ya ligo enali laita hi'ahana faya'i nekisa mele'ahanana li emi'ahana. 43Ya hago ai ana faya'i liloto enubulo no'ehina yabe.
44Ya huloto ai ma luto lu epi'ehina: Koyapa'i nani lenali hiti nohuto'ni alu lepi'ohuna yabe. Asaga kaga nani kumu lite Mosehi bukugufi to lu huto huto bomagi bukugufi to nama li'ahana bukugufi koyapa'i fayahi ge'ahana asaga ya'mana kagauba legeya'a mana'a huto hilibe luto lu lepi'ohuna yabe. 45To ai ya luto lu epito enegekesa lu hokolo higo enali Hu'mamofihi ka'a fayahi go'ehina keheli bebe se'ahana. 46Ya hago ai lu epi'ehina: Mono kagu ma luto nina yabe. Mesiau gabu gise'na li kofito fililoto loegi monegi yupanugu aku'i kene keliguti ho tilina'mu yabe. 47To ai gi'alo Yelusale hepatoti hapi filete kaga'a lite noto noto bona'i asaga kapoga lu yege henogo ai gi'alo komopa'ani i gelehe hilete foipana'ani'guti mino bati hinogo Hu'mau foipana'ani li he'mi epalalibe. 48Lenaliya ya'ma lu nolepuna kaga li futili katili hite yege yege bona'i lu epilana'mu yabe. 49Ya nehinogo Afo'nifu ka molo yofo hu'ehinana nani'ni lenalitoga ho lifinogo'ni limilina'mu. Lenali ya'mana nohi hepalugu geba hite nehinogo kokulumamofihi amuyana'a lenalitoga alina yupahi hapi filina'mu yabe.
Hu'mau Yesuhi kokulumalugu le'moto ti'ehina
Mk 16:19-20; Apo 1:9-11
50Ya huto lu epiloto ai enele'mo bululu huto hepaluguti fegutoga limilete Betani enele'moto bu'ehina yabe. Ya huloto ai yahi li saga huloto lusa gi epolo'ehina yabe. 51Ai lusa'a gi epoloto nohigo Hu'mau fulu fulu huto kokulumalugu le'mo saga hu'ehina yabe. 52To enali Yelusale hepa'ani i gelehe hite nebite enegelo bime bime bi'ahana yabe. 53Ya hilete enali asaga yupahi sipi mono nonugu nehite Hu'mamofihi gi'a liyafa hiba hiba hite mine'ahana yabe.
वर्तमान में चयनित:
Luku 24: bef
हाइलाइट
शेयर
कॉपी
Want to have your highlights saved across all your devices? Sign up or sign in
© 1982, Wycliffe Bible Translators, Inc. All rights reserved.
