Noo Ean 10
10
CAB. X
1Dy firrinagh firrinagh ta mee gra riu, Eshyn nagh vel goll stiagh er y dorrys ayns bwoaillee ny geyrragh, agh ta drappal seose er aght ennagh elley, t’eh shen ny vaarliagh as ny roosteyr. 2Agh eshyn ta goll stiagh er y dorrys, ta’n fer cheddin bochilley ny geyrragh. 3Dasyn ta’n dorrysser fosley; as ta ny kirree clashtyn e choraa: as t’eh geamagh er e chirree hene lurg nyn ennym, as dy leeideil ad magh. 4As tra t’eh cur magh e chirree hene, t’eh goll rhymboo, as ta ny kirree geiyrt er: son ta enney oc er e choraa. 5As joarree cha n’eiyr ad er, agh roie-ee ad er-chea veih: son cha vel enney oc er coraa joarree. 6Yn coraa-dorraghey shoh loayr Yeesey roo: agh cha hoig ad shen ny v’eh er loayrt roo. 7Eisht dooyrt Yeesey roo reesht, Dy firrinagh firrinagh ta mee gra riu, Mish dorrys ny geyrragh. 8Ta ooilley ny haink roym’s, nyn maarlee as nyn roosteyryn: agh cha dug ny kirree geill daue. 9Mish y dorrys: liorym’s my ta dooinney erbee goll stiagh, bee eh er ny hauail, as hed eh stiagh as magh, as yiow eh fassaghey. 10Cha vel y maarliagh cheet agh dy gheid, as dy varroo as dy stroie: haink mish dy voddagh bea y ve oc, as dy voddagh eh y ve oc ayns mooarane palchey. 11Mish y bochilley mie: ta’n bochilley mie cur e vioys son ny kirree. 12Agh eshyn ta failt, as cha nee yn bochilley hene, as nagh vel ny kirree lesh hene, t’eh fakin yn moddey-oaldey cheet, as t’eh faagail ny kirree, as roie er-chea: as ta’n moddey-oaldey dyn dayrtyn ad, as skeayley ny kirree. 13Ta fer-ny-failley chea, er-y-fa dy nee fer-failt eh, as nagh mooar-lesh son ny kirree. 14Mish y bochilley mie, as ta enney aym er my chirree, as ta enney ocsyn orrym’s. 15Myr ta enney ec yn Ayr orrym’s, shen myr ta enney aym’s er yn Ayr: as ta mee scarrey rish my vioys son ny kirree. 16As kirree elley t’aym, nagh vel jeh’n woaillee shoh: ad shen neesht shegin dou y chur lhiam, as cluinnee ad my choraa; as bee un woaillee ayn, as un vochilley. 17Shen-y-fa ta my Ayr graihagh orrym’s, er-yn-oyr dy vel mee scarrey rish my vioys, dy voddym y ghoaill reesht eh. 18Cha vel dooinney erbee dy ghoaill voym eh, agh m’aigney hene eh dy scarrey rish: Ta pooar aym dy scarrey rish, as ta pooar aym dy ghoaill reesht eh. Yn sarey shoh hooar mee veih my Ayr.
19Va streeu er-y-fa shen reesht mastey ny Hewnyn son ny raaghyn shoh. 20As dooyrt ymmodee jeu, Ta drogh-spyrryd ayn, as t’eh ass e cheeayl; cre’n-fa ta shiu geaishtagh rish? 21Dooyrt feallagh elley, Cha vel ad shoh goan fer ta drogh-spyrryd ayn: Vod drogh-spyrryd sooillyn ny doail y osley?
22As haghyr shoh ec Jerusalem, ec feailley casherickey yn chiamble; as nish va’n geurey. 23As va Yeesey shooyl ayns y chiamble ayns porch Solomon. 24Eisht haink ny Hewnyn mygeayrt-y-mysh, as dooyrt ad rish, Caïd t’ou freayll shin fo mee-ourys? My she yn Creest oo, insh dooin dy ynrick. 25Dreggyr Yeesey ad, Ta mee er n’insh diu hannah, as cha ren shiu my chredjal: ta ny obbraghyn ta mee dy yannoo ayns ennym my Ayrey gymmyrkey feanish jee’m. 26Agh cha vel shiuish credjal; er-yn-oyr nagh vel shiu jeh my hioltane, myr dooyrt mee riu. 27Ta my chirree clashtyn my choraa, as ta enney aym orroo, as eiyree ad orrym. 28As ta mee cur daue yn vea veayn, as cha jean ad dy bragh cherraghtyn, as cha n’ghow fer erbee ad ass my laue er-niart. 29Ta my Ayr hug dou ad, pooaral erskyn ooilley: as cha jarg fer erbee y ghoaill ad ass laue my Ayrey. 30Ta mish as my Ayr unnane. 31Eisht hrog ny Hewnyn claghyn reesht dy chlaghey eh. 32Dreggyr Yeesey ad, Shimmey yn obbyr vie ta mee er hoilshaghey diu veih my Ayr; son quoi jeh ny obbraghyn cheddin ta shiu ry-hoi m’y chlaghey? 33Dreggyr ny Hewnyn eh, gra, Son obbyr vie cha vel shin dy dty chlaghey; agh son goan-mollaghtagh, as er-yn-oyr dy vel uss, ta dty ghooinney, jannoo oo hene Jee. 34Dreggyr Yeesey ad, Nagh vel eh scruit ayns y leigh eu, Dooyrt mee, She Jeeghyn shiu? 35My t’eh genmys adsyn Jeeghyn, dauesyn va goo Yee er ny choyrt, as nagh vod y scriptyr v’er ny rassey: 36Vel shiu gra mychionesyn ta’n Ayr er chasherickey, as er choyrt gys y theihll, T’ou loayrt goan-mollaghtagh; er-yn-oyr dy dooyrt mee, She Mac Yee mee? 37Mannagh vel mee jannoo obbraghyn m’Ayrey, ny cred-jee mee. 38Agh my ta mee jannoo ad, ga nagh gred shiu mish, cred-jee ny obbraghyn: dy vod shiu toiggal as credjal, dy vel yn Ayr aynym’s, as mish aynsyn. 39Er shoh v’ad reesht son y ghoaill eh: agh chossyn eh ass nyn laueyn, 40As hie eh roish reesht er cheu elley dy Yordan, gys y boayl raad ren Ean hoshiaght bashtey; as duirree eh ayns shen. 41As va ymmodee cheet huggey, as gra, Cha ren Ean mirril erbee: agh va dy chooilley nhee loayr Ean jeh’n dooinney shoh firrinagh. 42As ren ymmodee credjal ayn ayns shen.
वर्तमान में चयनित:
Noo Ean 10: NEan
हाइलाइट
शेयर
कॉपी
Want to have your highlights saved across all your devices? Sign up or sign in
© Sheshaght y Vible 1936, 2017
© British and Foreign Bible Society 1936, 2017
