ADUNHEL 2

Jiuli-Kangthir Kiwang Alam

1Konam kep phongo adin kamai, lake Pentikos-kamai arni adungo, anali ahuwit inan ilong along chingrumsi kido. 2Aro labang aporsi tomon akithe badi isi arki suneng para wangsi, anali daksi ahem iningsi kido, labang ahem chituluk hulo. 3Laparake anali angot mebadi me ade olesi, prek prek si abangten athak chiklango aro me ade lahel athak wang sangsi dolo. 4Anali ahuwit yokta Jiuli-Kangthir plengo, aro ajiuli kipathan badisi prek prek ajat alamthe pen lam thanpono. 5Minoke lalong la-apor suneng arhum kido ahuwit ajat asitem para kiwang Jihudi adhorom arleng hel Jerusalem long kido. 6Aro labang arki arjusi rat ako-ong chingrum mo aro anali ihik-bihik chiplango, piyok pu tene abang tenta labang ajat ten alamthe pensi, adun hel lam kithan arjulo. 7Anali bismat aro asombhik hlong detsi, anali pu lo, “Langot, inghosi lam thansido anali ahuwit Galili alam kithan abang kalek ma? 8Aro ili pot badi ili bithang alongri alamthe kithan arju hlongdo? 9Ilike Parthiya, Mediya, Alomiya, Mesopotamiya, Judiya aro Kapadokiya, Pontas aro Asia, 10Phergiya, Pamphiliya, Ijip aro Libiya alongri kido, Kuruniya angbong para kiwang arlengta do, aro bang alongri kido, Roman para kiwang Jihudi hel, aro Jihudi adhorom ki-en kamprek ajat abangta kido, 11Krete pen Arobiya para ili wang-kido yongta, ili ahuwit ta ibithang alam pen Arnam akithe asal tikilo pusi anali kithan alam ili arju do.” 12Ahuwit asombhik hlong detno, aro chiron irsi, ihut para ihutyok chipujo lo, “Labang kipu acho alam poke pot te?” 13Manta angkhan ke chongnekngo aro pulo, “Kijunme asok ahorsi anali ingri-do.”

Pitor po Ratyok Kithan Alam

14Manta la-amunsi Pitor po bang kere isi adun hel pen arjapsi, asi pathesi thano aro rat ayok pulo, “Ei Jihudi arleng hel, aro O Jerusalem long kido abang, nali labang than-un nange aro ne kipu alam onenot. 15Piyok pu tene, nali potsi chirondo, labang arleng hel hor kangri ke kalek; piyok pu tene minon adap baji sirkep detsi chokdo. 16Ladi kalek, Joyel turki po labadi kithan, lake: 17‘Arnam pudo, ki-or arni ke, abangten munusi ajat athak ne jiuli liye, la-amun nali oso ojang hel turki si pahare, aro nali sohel aro so pemar kachimangka pahare, aro nali akisar hel ke apharlo theknge. 18Labang arni ne murkiya hel athak, ne Jiuli liye; aro anali turki alamthe pahare. 19Aro suneng pe athak asombhik asin, aling kido pirthimipe long ajat-jat asin, lake awi, me aro mihik karthak anghun paklange. 20Hemphu labang akithe aro jortang kido arnipe kiwangwe ango, arnipe ingtinge, aro chiklope awi badi chiplange. 21Laparake abangten ingho Hemphu amenpen pingkit, anang joknge.’ 22“O Israyel arleng hel, nali labang alam onenot : Najaret Jisu kihal asal, asombhik asin, aro angtar hel pensi nali phan Arnam para aporman kido munusi, anang pensi Arnam nali sitem ahuwit asal tikilo— 23Labang Jisu yoksi Arnam ango arwaltangsi kahonjok aro aporong katurki agiyan atengsi champi tango, nali kros along taro aro kanong kangwe ateng sotonga hel arideng marilo. 24Manta Arnam anangyok kithi aduk kicho along para pajoksi pangthur phakngo, piyok pu tene anangyok kithi apharan bam un-eh. 25Piyok pu tene Dabhit po anang lam pudo, ‘Ne Hemphu yok arnita nemahang long thekngo, ne kiklemkle yok anang ne ancho-ari aga doman; 26Lasi neneng arong, aro ne lamthehel anang arong ongo; layok ta nebang a-ok chiha chotsi arjapme. 27Piyok pu tene nang kithi thiri long ne jiuli tikangke ye, lale nang kangthir poyok panghonhe ye. 28Nang ne-jiubong aduwar paklango; nang mahang semsemsi neneng arong paplenge.’ 29“Ei Israyel korte hel, Apa agijing Dabhit po alam nalingo thandak une, lake anang thilo, aro anangyok thiri along bilo, aro anang thiri minihok ili sitem do. 30Anang turki chiplangsi, aro anang agijing para ihut ayok anang recho anghol kapangning yok, Arnam semetang si anang ango potsi pang-akngo, 31labang ango hrel theksi, kiwange asot langsi Khristo kibur alam kithan, ladi pudo, ‘anangyok jom alongta tite yongo, aro anang abangpo thuthe yongo.’ 32Labang Jisu ayok Arnam kithi para paburo, aro anang hakhi hali ahuwit ta do. 33Lasi Arnam ancho-ari aga kithechot pangningo, aro Jiuli-Kangthir alam Apa para ajortang hlongsi, anang potsi thekngo aro arjudo, labangpo Jiuli-Kangthir lisi pilo. 34Piyok pu tene Dabhit po athakyok thurthe yong, manta anang abithang pulo, ‘Hemphu si, ne Hemphu yok pulo, 35ne nang huturhel yok nang kengpak arlo bibe lengke, ne ancho-ari aga iningne do.’ 36Lasi, la Jisu yok nali kros long taro, anangyok Arnam ke Hemphu aro Khristo pangningo, Israyel arleng hel bangpo khanangsi thek nange.

Hajar Kithom Arleng Kachikruk

37Minon anali labang alampo arjusi, anali angthin sojino aro anali Pitor po pen kamprek adun helyok pulo, “Ei korte hel, minon hali pot te tiki nang?” 38La-amun Pitor po analiyok pulo, “Nali pap hel kachikol aphan neng chipharlep mot, aro Jisu Khristo amen pen abang ten baptist chiplangot; tangsi nali Jiuli-Kangthir abor-eh hlonge. 39Piyok pu tene nali phan aro naliso hel aphan, aro akaholo kido ahuwit abang ayok ili Hemphu Arnam tarame, lahel ahuwit aphan ta seme-tangdo.” 40Mehel yongta Pitor po ako-ong alam hakhi pilo, aro anali yok neng kirung alam thansi pulo, “Labang kangho owe para chipajok.” 41Lasi konbak arleng anang lam mengo, anali ke baptist chiplango. Aro la-arnisi hajar kithom bak arleng anali pen chilokngo. 42Anali kangthir-adun hel para kapaklang, kachirdom, him kangbeng, aro pingkit jongsi dolo.

Kikrol Abang Kido-Kithak Alam

43La-amun ahuwit arleng kaphere wango, aro kangthir-adun hel arideng ako-ong asombhik asal aro asin paklango. 44Ahuwit kikrol abang angtum dosi ahuwit abihini hel ilongsi chibilo; 45Anali lungle aro bihini apuruhel chijorsi, ingho kanange do, ladisi ahuwityok thak pono. 46Arni ta, anali Arnam ahem along chipangrum damsi dolo, lahel adonten him ingbengo, aro nengrong cho-juno aro neng wakdaksi chipi chipahlelo, 47Arnam yok parklamsi, aro ahuwit arleng aneng ingsamsi dolo. Aro arnita kijoktang abangyok Hemphu long anali pen chingchongsi pado duno.

वर्तमान में चयनित:

ADUNHEL 2: AMRI-BSI

हाइलाइट

कॉपी