Utandiko 1
1
Leza waumba ivintu vyonsi
1Pa kutandika Leza waumvile iyulu ni nsi. 2Lelo insi itali mwa mwata umwi nupya yali iyaulwa kantu kamwi. Imfinzi yandatile pi ziya lyonsi na Mupasi wakwe Leza wazyundanga pa manzi.
3 #
2Kol 4:6
Alino Leza avwanga ati, “Kakuye uluswepo,” nu luswepo iluyako. 4Lyene Leza alola ukuti camuzanzya, nga apaatula uluswepo ukufuma ku mfinzi. 5Alino Leza atemela uluswepo ati, “Umusanya” nga imfinzi nayo ati, “Usiku.” Nga kuya manguzi na katondo, uu wali uwanda wakutandika.
6 #
2Pet 3:5
Leza avwanga ati, “Kakuye ulwelele lwa kupaatukanya amanzi mu vifulo viili ivipusane,” nga cicitika vivyo kwene. 7Avino Leza wacisile ulwelele lwa kupaatukanya amanzi ya pisika lya lwelele na papela yaluko. 8Nga Leza atemela ulwelele ati, “Iyulu.” Nga kuya manguzi na katondo, uu wali uwanda wakwe ciili.
9Nupya Leza avwanga ati, “Amanzi ali pisika ya lwelele yakolongane pa cifulo conga kuti kuye musili,” nga cicitika vivyo kwene. 10Alino Leza atemela musili ati, “Insi,” nga na manzi ali pa cifulo conga ati, “Yemba.” Lyene Leza alola ukuti camuzanzya. 11Nupya Leza avwanga ati, “Insi imezye vimelwa vya misango yonsi, ivikakwata impece ni vikaseeka iviseekwa umuli impece.” Nga cicitika vivyo kwene. 12Caleka insi imezya vimelwa vya misango yonsi ivikakwata impece. Lyene Leza alola ukuti camuzanzya. 13Nga kuya manguzi na katondo, uu wali uwanda uwalenga yatatu.
14Nupya Leza avwanga ati, “Kakuye vyakupeela uluswepo mwi yulu vyakupaatukanya musanya nu usiku nga ni vimanyililo vyakulenga kutandika kwa nsita, amanda ni myaka ni nsita zyamu myaka. 15Kavyawala mwi yulu nu kupeela uluswepo pa nsi.” Nga cicitika vivyo kwene. 16Avino Leza waumvile vyakupeela uluswepo viili ivikulu, ilanzi lyawala musanya nga nu mwezi wawala usiku. Nga aumba ni ntanda kwene. 17Aviika mwi yulu kuti vyapeela uluswepo pa nsi, 18nu kuti vyawala, conga musanya ni cuze usiku, nga nu kupaatukanya uluswepo ni mfinzi. Lyene Leza alola ukuti camuzanzya. 19Nga kuya manguzi na katondo, uu wali uwanda wakwe cini.
20Nupya Leza avwanga ati, “Mu manzi kamuye viumbwa vya umi vya misango ni misango musenyantumba.” Nga ni vyunyi vyapapuka mu lwelele. 21Avino Leza waumvile viumbwa vikulu vyamuli yemba, ni misango yonsi ya viumbwa vya umi vyamu manzi, nga ni misango yonsi ya vyunyi. Lyene Leza alola ukuti camuzanzya. 22Nga Leza apolelela viumbwa nga avwanga ati, “Vyalanini, musandane muzule maziya. Ni vyunyi navyo visandane panonsi.” 23Nga kuya manguzi na katondo, uu wali uwanda uwalenga yasano.
24Nupya Leza avwanga ati, “Umu nsi muye viumbwa vya misango yonsi, iviteekwa, ivikasela nga ni nyama zya mpanga, cila ciumbwa nu musango wakweco.” Nga cicitika vivyo kwene. 25Acino Leza aumba inyama zya mpanga cila nyama nu musango wakweyo, iviteekwa nu musango wakwevyo, nga ni viumbwa vyonsi ivikasela nu musango wakwevyo. Lyene Leza alola ukuti camuzanzya.
26 #
1Kol 11:7
Nupya Leza avwanga ati, “Katuumbe umuntu mu cata citu, aye wakwe sweswe. Wene alaangalila inswi, ni vyunyi ivikapapuka, iviteekwa ni nyama zya mpanga, nga ni vikasela vyonsi.” 27#Uta 5:1, 2 #Mat 19:4; Mk 10:6 Avino Leza waumvile umuntu mu cata cakwe. Leza wayaumvile umonsi nu mwanaci. 28Nga Leza ayapolelela, ayanena ati, “Muvyalane muvule mulimbe insi yonsi nu kuyangalila. Namupeela uwangalizi pa nswi, ivyunyi ivikapapuka ni nyama zyonsi zyamu nsi.” 29Nupya Leza avwanga ati, “Lolini, namupeela vimelwa vya misango yonsi, ivikakwata impece ni vikaseeka iviseekwa umuli impece kuti mwalya. 30Lelo ku nyama zyonsi zyamu mpanga nga ni vyunyi vyonsi ivikapapuka, visela vyonsi, viumbwa vyonsi vyaumi, natimpeela mulemvwe na mafwa kuti vyalya. Nga cicitika vivyo kwene.” 31Lyene Leza alola vyonsi vino waumvile ukuti ivisuma wakwe cimwi. Nga kuya manguzi na katondo, uu wali uwanda uwalenga mutanda.
वर्तमान में चयनित:
Utandiko 1: MamL13
हाइलाइट
शेयर
कॉपी
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013