Mutendeko 6
6
Ubendezi wa munthu
1Para ŵanthu ŵakamba kwandana mu charu, ndipo ŵana ŵanakazi ŵakababika kwa iwo,#Yob 1.6, 2.1 2ŵana ŵa Chiuta#6.2 ŵana ŵa Chiuta: Mazgu agha ghakung'anamula kuti, “ŵangelo” panji “vinkhara”. ŵakawona kuti ŵana ŵanakazi ŵa ŵanthu mbakutowa. Ndipo ŵakajitorera ŵanakazi kuŵa ŵawoli ŵawo mwa awo ŵakasankhapo. 3Ndipo Fumu yikati, “Mzimu wane uti ukharenge mu munthu muyirayira chara, pakuti iyo ndi thupi ilo likufwa. Virimika vyakhe viti viŵenge 120.” 4Mu mazuŵa ghara ndiposo na pamanyuma, ŵaNefilimu ŵakaŵa mu charu. Iwo ŵakababika mu ŵana ŵanakazi ŵa ŵanthu, ŵana ŵanarume ŵa Chiuta ŵati ŵanjiramo mwa iwo na kubabamo ŵana. Ŵeneaŵa ndiwo ŵakaŵa vinkhara vya kale, ndiposo na viŵanthu vya lumbiri.#Kup 13.33
5 Fumu yikawona kuti uheni wa munthu ukaŵa ukuru mu charu na kuti malanguruko ghose gha maghanoghano gha mtima wakhe ghakaŵa ghaheni pera rutaruta.#Mat 24.37; Luk 17.26; 1 Pet 3.20 6Fumu, yikaŵa na chitima kuti yikalenga munthu mu charu, ndipo ichi chikaŵinyiska mtima wakhe. 7Ntheura Fumu yikati, “Nditi ndiparanye pa charu munthu uyo ndili kumulenga, munthu na chinyama, vyakukhwaŵa na viyuni vya mudera, pakuti ndili na chitima kuti nkhavilenga.” 8Kweni Nowa wakasanga uchizi pa maso pa Fumu.
Nowa wakuzenga ngaraŵa
9Iyi ndi ndondomeko ya umoyo wa Nowa. Nowa wakaŵa murunji na wambula kalema mu muwiro wakhe. Iyo wakendanga na Chiuta.#2 Pet 2.5 10Nowa wakababa ŵana ŵanarume ŵatatu, Shemu, Hamu, na Yafeti. 11Sono charu chikaŵa chakwanangika panthazi pa Chiuta ndipo chikazura na chitimbaheti. 12Chiuta wakawona umo charu chikanangikira pakuti ŵanthu wose pa charu wakananga nthowa zawo.
13Chiuta wakati kwa Nowa, “Ndadumula kumara ŵanthu wose, pakuti charu chazura na chitimbaheti chifukwa cha iwo. Sono nditi ndiŵamare pamoza na charu. 14Uzenge ngaraŵa ya mathabwa gha mulombwa. Uŵikemo vipinda mu ngaraŵa ndipo uyimate na phula mukati na kuwaro wuwo. 15Kazengero kakhe ndi aka, mu utali ngaraŵa yiŵe na mamita 133, mu usani yiŵe mamita 22, ndipo mu kukwera kwakhe yiŵe mamita 13. 16Upangirepo mtenje pa ngaraŵa, ndipo ureke mwanya wa masentimita 44 pakati pa ngaraŵa na mtenje. Uŵike muryango mu mphepete mwa ngaraŵa. Uyipange kuti yiŵe na vipinda vitatu vyakudikanya, cha pasi, cha pakatikati na cha pachanya nkhanira. 17Sono ine nditi nditume chigumura cha maji pa charu, kumaramo chilengiwa chose icho chili na umoyo cheneicho chili kusi ku mtambo. Kanthu kose ako kali mu charu kati kafwenge. 18Kweni ine nditi ndimike phangano na iwe. Iwe uti unjirenge mu ngaraŵa pamoza ŵana ŵako ŵanarume, muwoli wako ndiposo na ŵakamwana ŵako. 19Ndipo pa mtundu wose wa vyamoyo uti utorepo viŵiriviŵiri, chanarume na chanakazi, na kuvinjizga mu ngaraŵa, mwakuti visungike vyamoyo pamoza na iwe. 20Viyuni kwakuyana na mtundu wakhe na wakhe, vinyama mtundu wakhe na wakhe, ndiposo na vyakukhwaŵa vyose, mtundu wakhe na wakhe, vizenge kwa iwe viŵiriviŵiri umo uliri mtundu wakhe na wakhe, kuti visungike vyamoyo. 21Utoreso vyakurya vya mtundu uliwose ivyo vikwenera kuryeka, ndipo usunge mwenemumo. Uku kuŵenge kurya kwa iwe na kwa vyamoyo vira.” 22Ntheura ndimo wakachitira Nowa. Wakachita chose icho Chiuta wakamulangula.#Heb 11.7
वर्तमान में चयनित:
Mutendeko 6: Tumbuka
हाइलाइट
शेयर
कॉपी
Want to have your highlights saved across all your devices? Sign up or sign in
Bible Society of Malawi