Joawh 20
20
Jesus kannikew
Mt 28.1; Mk 16.1; Lk 24.1
1Ayteke paka abet kabeyweke misanpewkarihte eg kiyavuno Mahi Madalena danuh atere arit Kiyavwiye Jesus gimew. Ayge eg hiyap gimew asabwat ayiva wokepka.
2Eg hiyapni hene, eg sigise eg danuh git Simawh Pedru. Nah Joawh ayge gikak. Eg awna gitkis:
— Igkis wiwhe Ukivarawiy arikutak gimew. Usuh ka hiyak ku kite igkis sarayhpig.
3Ig Pedru timapni hene, ig tivik atere. Nah hawata tivigwata. Usuh atere iwasene gimew.
4 Usuh piyamate sigise atere. Nah sigiste giw Pedru. Nahkit danuh giw.
5 Nah darakaw nah iwasa atere, nah hiyap Kiyavwiye Jesus gidagmanvit kihubete ariku gimew. Heneme nah ka parak atere.
6Igme Pedru danuh nuhavuh butte akak givarakan. Ayge ig hiyap gidagmanvit kihubete 7payak akak giwanratiw. Heneme ini giwanratiw ka kennesnima arimkat gidagmanvit. In kahimuke avawyewa niw.
8Nah hawata ku pariyekit danuh nah pareke atere butte. Nah iwasa yumahe givit ayge. Ayge nah ihe ku ig Kiyavwiye Jesus kuwis kannikew.
9Mmanawa avit ini usuh kote pukuhpate ini Uhokri gannasan ku samah in awna ku amawka ig kannikaw ariw gimiremni.
10Ayteke pisenwa usuh tivik uvinekut.
Jesus hiyapkiswa gut Mahi Madalena
Mt 28.9; Mk 16.9
11Egme kiyavuno Mahi Madalena danuh atere ku kiney ig sarayhpika, eg tabir ayge ahumwa gimew. Eg tihano ayge. Eg tihano, eg darakaw. Eg iwasa arikut gimew.
12Ayge eg hiyap piyana gikebikis ahj kasimsavuwave seyne. Igkis batabdawak, pahavwi gitiwhaptak, pahavwime gikataptak ku kiney Kiyavwiye Jesus gidukwen.
13Igkis awna gut:
— Kiyavuno, mmahki pis tihavu ayge?
Egme kaytwa giwnkis:
— Awaku igkis iwe nukivara. Nah ka hiyak ku kit igkis sarayhpig.
14Eg awna inakni eg wagestaw eg hiyap Kiyavwiye Jesus ayge, heneme eg ka hiyakgi ba ig Jesusma.
15Ayge ig awna gut:
— Kiyavuno, mmahki pis tihavu ayge? Pariye pivegvan?
Egme guvewkankam ku ig amutri akavriwtenkam. Eg awna git:
— Kiyavwiye, ku pis iwevgi, uya akki nutuh ku kit pis sarayhpig kahadbe nah atere iwevgi.
16Igme Kiyavwiye Jesus kanum guw.
— Mahi.
Eg timapni hene eg wagestaw. Eg murotvi git. Eg awna guwnavrik:
— Rabôni.
Inakni wownavrikwiy “Kiyavwiye nukannuhten”.
17Igme awna gut:
— Ka ba daxtan, mmanawa nah kote wagahte git Niguh. Su atak gitkis nukebyuvwi. Uya akki gitkis ku nah me wagehemet git Niguh gitwata Yig, git nuwohkiga, gitwata yiwohkiga.
18Eg timapni hene eg aytwe gitkis gikannuhnivwi. Eg danuh gitkis, eg awna:
— Nah kuwis hiyap Ukivarawiy.
Ayge eg ekke gitkis inakni ku pariye Kiyavwiye giwn gut.
Jesus hiyapkiswa gitkis gikannuhnivwi
Mt 28.16; Mk 16.14; Lk 24.36
19Abetnewa ini hawkri paka aygete gikannuhnivwi pahadguvu ariku pahaykunene xam. Alapota sabutip mmanawa usuh avise gibohrikis neras judeyenevwi giwewkistenkis. Pahaye adahan Kiyavwiye Jesus hiyapkiswe tabir ayge ubetuh. Ig awna gitkis:
— Uhokri gabay yikaknek.
20Ig awna hene, ig ekke gitkis giwak akak gimuhri. Ayge usuh bateke unaktin ka aynsima ku samah usuh hiyap Ukivara akiw.
21Igme awna gitkis akiw:
— Ka yi muwaka kiyimwihwa avit yiyakni. Ku samah Niguh awahkiswen hawata nah awahkisyi.
22Ig awna hene, ig puhe uvitit. Ig awna gitkis:
— Amavanay Uhokri Gitip.
23 Kuri hiyawa yis awna gitkis hiyeg nuwntakwa. Ku aysaw yis akki gitkis ku Uhokri bayahminigkis ariw gitaraksankis, ayge nikwe igkis bayahminapka. Ku aysaw yis akki gitkis hiyeg ku Uhokri ka bayahminigkis ariw gitaraksankis, ayge nikwe igkis ka bayahminaka.
Jesus hiyapkiswa git Tome
24 Henneki ig Kiyavwiye Jesus hiyapkiswa gitkis. Heneme pahavwi gaytakis giwatnivwi kewye Tome Abes ig ka hiyavgi mmanawa ig yuma ayge avim ini ku aysaw Kiyavwiye Jesus hiyapkiswe gitkis.
25Ayteke nikwe usuh atere ekke git. Usuh danuh atere, usuh awna git:
— Usuh kuwis hiyap Ukivarawiy. Ig kuwis kannikew akiw.
Igme kaytwa wown:
— Nah ka iha inakni. Ku ka nahwatma hiyap akakwa nuwtyak ini pudubdu adukwen giwaku, ku ka nahwatma idis nuwakuh arikut ini pudubdu adukwen, ku ka nahwatma idis nuwaku gimuhrikut, nikwe nah ka iha inakni yiwn aynesnima ku ig kannikew.
26Ayteke ariwnteke ini adahan pahay paka akiw, gikannuhnivwi pahadguvu ariku payt akiw. Ig Tome ayge gikakkis. Pahaye adahan, lapot sabutipnene, ig Kiyavwiye Jesus hiyapkiswe gitkis akiw. Ig tabir ayge ubetuh. Ig awna:
— Uhokri gabay yikaknek.
27Ayge ig awna git Tome:
— Iveg nuwakuwit. Hiyawa pis uduk piwak atere kuri. Hiyawa pis uduk piwak atan numuhrikut hawata akiw. Ka muwaka tuguhkis pikamaxwan. Kamaxwanaba nuvitit.
28Ig Tome hiyapni hene, ig awna git:
— Kiyavwiye, pisnewa nukivara. Pisnewa nuwohkiga.
29Ayteke ig Kiyavwiye Jesus awna git:
— Tome, pis kamaxwa nuvitit awaku ku samah pis hiyavun. Heneme ignes ku pariye kane hiyavun igkis kamaxwa nuvitit, ini gikamaxwankis kabayte mpiya pidahan. Aysawnemenek igkis uti ka aynsima kabaykanek.
Inakni iwit tamakka adahan hiyeg kamaxwa givitit Jesus
30Ig Kiyavwiye Jesus keh ka aynsima annut akiw ay giwtrikis gikannuhnivwi. Nah ka akkin madiktema amadgatak inin karta.
31Heneme nah anniri inakni iwit ku pariye nanhan ay kahadbe yis iha ku ig Kiyavwiye Jesus ignewa Cristo, ig Uhokri gikanyan adahan ukumaduketniwiy. Kahadbe yis iha ku ignewa Kiyavwiye Uhokri gikamkayh. Ku yis kamaxwa givitit, yis aymuhwanek gimun Kiyavwiye Uhokri adahan avanenekwa.
वर्तमान में चयनित:
Joawh 20: pluPB
हाइलाइट
शेयर
कॉपी
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
