Lúkas 17
17
Ku pahavwi taraksase pahavwi, igi uti mbeynenek
Mt 18.6,21; Mk 9.42; Ro 1.32; 1Ko 9.12; 2Ped 2.1,18
1Ayteke ig Kiyavwiye Jesus awna ta gitkis giwatnivwi:
— Avanenekwa kadahan arikna danuhne wot adahan utaraksasepten ay amadga inin. Heneme ku pahavwi hiyeg taraksase pahavwi, ig katiwnihninek, ig hiyap mbeyne ka aynsimanek. 2Ku ig taraksase pahavwi bakimni nopsesniye, ig utinek mbayka pi mbayte akiw giw pahavwi ku pariye wanekwika gibitamna akak pohow tip nopsadnano adahan givedkepka parahwokwate.
Bayahminanay ku pariye wages gihiyekemni ariw gitaraksan
Mt 18.21
3— Avuriwnabay ku samah yihiyekemni. Ku pikebyi tarakse pikak, amawka pis akka gitaraksan git. Ku ig awna: “Henewa nah tarakse”, ku ig wagese gihiyekemni, uya bayahminig ariw ini gitaraksan. 4Ku ig tarakse pikak ntewnehkervut abet pahaynene hawkri, heneme ku ig ayta bayahminasaw pit ntewnehkervut ig awna: “Nah wagese nuhiyekemni”, ayge nikwe amawka ku pis bayahminig kiberevut ariw ini gitaraksan.
Wake wis kamaxwa aynesnibe akiw, wayapni humaw wotkam
Mt 17.20, 21.21; Mk 11.23
5Ayteke ariwnteke ini igkis giwatnivwi kinetihwenes gikak Kiyavwiye Jesus, igkis awna git:
— Kiyavwiye, uya kiyesih ukamaxwan givitit Uhokri.
6Igme awna gitkis:
— Wake yis kamaxwa givitit aynesnibe akiw, madikte yayapni humaw yitkam. Hiyawa yikamaxwan nopsesa, ayesi kewa paha amutri ayakbe, ke “mostad” ayakbe, hiyawa in aynesawa, heneme yayapni humaw yitkamnek. Yis ikkam adahan yis awna gut nor ah akat nopsadnano, “Ah, pis higihwa ayteke payak akak pihampabet. Su mutuhwa tahan parahwokwat.” Ku aysaw yis awna inaknikam, eg higihwakam ayteke.
Wixwiy Uhokri gibukvig
7— Ku pahavwi ibukti kewne gikivara giwasra, ku kawk ku ig avuriwne givig muwtoh, ku aysaw ner ibukti diyuhe aytontak wasamdeketak ig gikivara ka awna git: “Barewba ax.” 8Kawa. Ig awna git: “Ba ayta sakahwa nudahan. Wihwa adahan pis ewk nutuh numana. Pis avuriwhun he ku aysaw nah pisenwa naxni akak nuhigvan. Ayteke butte pisme ax pisme higap.”
9Ku ig gibuk iha inakni giwn, ig gikivara ka kabayha gibuk adahan ini gihpan, mmanawa ig he kehnenenwa gannivwi.
10Yis hawata ku aysaw yis keh madikte ku pariye Uhokri aya yit, amawka yis awna: “Usuh ka ariknawnema. Usuh he ibuktinen. Usuh he kehnenenwa ku pariye muwakapka adahan usuh keh.”
Jesus makniwa madikawku awaykemni axpusakare avit busukne
11Ayteke ig Kiyavwiye Jesus gitepkemni arimkat Jerusalém. Ig mpiye ayegbiw Samariyamnaw akak Galileyamnaw.
12Ig danuh ta avitit paha paytwempu. Ayge ig patiptak gikakkis madikawku gikebikis awaykemni ku pariye axpusakare avit busukne. Igkis tabirbet piyawakte aynesa.
13Igkis kabiman git:
— Kiyavwiye Jesus, uya amnih usuh!
14Ig timapni hene, ig kaytwa giwnkis:
— Nah amnihyi. Su yi akka yivit tahan gitkis muwvegviyene kahadbe igkis iwasavyi, igkis hiyap ku yis kuwis makniw.
Igkis timapni hene, igkis tivikwiyes tahan gitkis muwvegviyene. Ayge amun ini gitepkemnikis, pahaye adahan igkis makniwbet.
15Pahavwi gaytakkis ig hiyapni ku ig makniw, ig diyuhe gimkanit Kiyavwiye Jesus. Ig kabayha Uhokri akak madikte giwakemni.
16Ig danuh atere git Kiyavwiye Jesus, ig tuguhkiswe mabuw gitivut, ig kabayhig atere. Ner awayg ig ka judeyenema ig hiyeg samariyene.
17Ig Kiyavwiye Jesus hiyapni hene, ig wakaymni. Ig awna:
— Nah makniwe madikawku gikebikis. Kineyki gikebyuvwi? 18Mmah nah ka hiyavgikis igkis ayta diyuh kabayha Uhokri? Ignewa ner hiyeg kane judeyenema ig kibeyhene Uhokri ay.
19Ayteke nikwe ig awna git:
— Kannikaw. Hiyawa pis tivik. Pikamaxwan keh pis makniw.
Uhokri gikumadukan in ay uvit
20Ayteke gaytakkis farizewkis danuh atere git Kiyavwiye Jesus. Igkis ayavgi:
— Kabet Uhokri gikumadukan danuh atan?
Igme kaytwa giwnkis:
— Wis ka hiya wisma hiya Uhokri gikumadukan akak wowtyak. 21Wis ka hiya wisma awna: “Iveg ayta ku kiney Uhokri gikumadukan. Inin gikumadukan aytakihan.” Ine wis kawnata hiya wisma awna: “Inetra gikumadukan ayntehan nawenyewa paytwempu.” Kawa. Mmanawa Uhokri gikumadukan in ay uvit.
Jesus gaytni kahayak wotwiynek kabayntiwa
Mt 24.23; Mk 13.21; Lk 21.25; 1Tes 4.15; 2Tes 1.5
22Ayteke ig awna gitkis gikannuhnivwi. Giwn:
— Aysawnemenek yis ka aynsima kadnibdi nuharit nah ku pariye wageswe awayg amadgaya inin. Avim ini yis hiyepkereviye nuhivak. Yis awnanek: “Wake ig danuh adahan pahaywowa hawkribe.” Heneme yis ka hiyavun ayge. 23Avim ini pahavwi awna yitnek: “Kuwis Cristo ay kuwis.” Pahavwime awnanek: “Ig ayntehan nawenyewa paytwempu.” Ka ba yi iha inakni giwnkis. Ka ba yi ivegvan atere. 24Ku aysaw nuhawkanavrik danuhnek adahan naytni nah, ku pariye wageswe awayg amadgaya inin, ini naytni kahayak yitnek kabayntiwa. In kahayak ke ugugunebe ku pariye hamahwa danuhte pahambakat. 25Heneme avit in danuhnek amawka nah hiyap mbeyne ka aynsima ay. Amawka ku nah tukuhptepka gavitkis hiyeg neras amedgenenvwi inin.
Yuma hiyeg ahiyekten ku kavim Jesus danuh atan akiw
Mt 24.36; Mk 13.32; At 1.6; 1Tes 5.2; 2Ped 3.3
26— Nah ku pariye wageswe awayg amadgaya inin, ku aysaw nah danuhnek atan akiw, hiyeg gihiyekemnikis hawata kewa hiyeg minikweknevwibe gihiyekemnikis ku kavim amekene Noé amadgate inin.
27 Avim ini igkis ka aminama giw Uhokri. Igkis axnes, higepnes, maripkewnes, ku samah inpawa gikehnikis he ku aysaw ini hawkri danuhe adahan ig amekene Noé kataptew amadgat ginawya. Ayteke un digisase waxri in aniksase neras hiyeg madikte.
28Hawata akiw ku aysaw nah danuh atan akiw, hiyeg gihiyekemnikis kewa hiyeg minikweknevwibe gihiyekemnikis ku kavim amekene Ló amadgate inin. Avim ini igkis kawnata aminama giw Uhokri. Igkis axnes, higepnes, igkis piyuknes, isimwiri, igkis mutuhnes giwasrakis, igkis paytya, ka aminama.
29Heneme ku kavim ig amekene Ló pese avititak paytwempu Sodoma, ayge nikwe tiket payegbitak akak ini pisukempiye ku pariye bixihwanene arihri in tuguhe inuriktak. In tuguh ka aynsima ke muwokbe waykempiyebe. In umahave neras hiyeg madikte.
30Aysawnemenek in hawata danuh ke minikwakbe, ku aysaw nah, ku pariye wageswe awayg amadgaya inin, nah hiyapkiswa akiw.
31Avim ini yis ka muwaka wakaymni aharit yewkanbet amedgene inin. Ku pahavwi ay givin higiwmadga, ig ka muwaka wakaymni aharit gewkanbet ku pariye arikunene givin adahan ig parak atere iwepni. Ku pahavwi aynte amadga giwasra ig kawnata muwaka diyuh atak givinwat akiw.
32Kiyeminahnabay gumin amekene Ló gihayo. Eg ka wiwhkere guyakni avititak paytwempu Sodoma, eg biyuke.
33Ku pahavwi ka wiwhkere giyakni ariw gihiyekemni amadgaya inin, igi biyuk akak gaymahwannek giwntak Uhokri. Heneme ku pahavwi wiwhwa ariw gihiyekemni amadgaya inin, igi darih gaymahwannek giwntak Uhokri adahan avanenekwa.
34Henewa nukebyuvwi. Avim ini hawkri nudawnhan, piyana gikebikis awaykemni himakwak amadga paheknene iwetrit tiyegem. Pahavwi iwepkanek, pahavwime ikiswika. 35Hawata akiw piyana gukebikis tinogben kukwanos payak. Pahavu iwepkanek, pahavume ikiswika.
36Hawata akiw piyana gikebikis awaykemni ay amadga giwasrakis. Pahavwi iwepkanek, pahavwime ikiswika.
37Igkis gikannuhnivwi timapni hene, igkis awna git Kiyavwiye Jesus:
— Kineyvahki inakni danuhnek, Kiyavwiye?
Igme kaytwa giwnkis akak pahat iwit patuwesbuhka. Ig awna:
— Ku kiney wis hiyap isuw wagewe, wis hiyakni kuwis ku arikna miyaviye ayge. Hawata naytninek, yis hiyapni huwewehenek. Avim ini metakwa yis hiyakninek.
वर्तमान में चयनित:
Lúkas 17: pluPB
हाइलाइट
शेयर
कॉपी
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
