لوقا 3
3
یحیی راه ره هِموار کانده
1در پانزدهمین سال فِرمانروایی تیبِریوسِ قیصر، اون زِمان که پُنتیوس پیلاتُس فِرماندارِ یهودیه بی‌یِه، هیرودیس حاکمِ جلیل، و وِنه بِرار فیلیپُس حاکمِ ایتوریه و تراخونیتیس، لیسانیوس حاکمِ آبیلینی، 2و حَنّا و قیافا کاهنان اعظم بینه، کِلام خِدا در بیابون بر یحیی، زِکریا ریکا نازل بَییه. 3پس یحیی به سرتاسرِ نِواحیِ اردن شی‌یه و مردِمِسّه موعظه کارده که توبه هاکانِند و تعمید بَیرین تا شِمه گِناه بخشیده بَووهه. 4در این باره در کتابِ اِشعیایِ نبی بی‌یَموهه که:
«صدایِ اون کس که بیابونِ دِله داد کَشِنه که
راه ره خِداوند وِسّه آماده هاکانین!
مسیرِ وِره هِموار بسازین!
5همۀ دره‌ها پِر، و همۀ کوهها و تپه‌ها پست وونه
راههایِ کج راست و مسیرهایِ ناهِموار هِموار وونه.
6اون لحظه تِموم مردِم نجات خِدا ره وینّه.»
7یحیی به مردِمی که تعمید بَییتِنِسّه وِنه پَلی اِمونه، بائوته: «اِی افعی‌زاده‌ها، کی شِما ره آگاه بِساته که از غضبی که در پیش دَره، فِرار هاکانین؟ 8پس اون میوه‌هایی که لایقِ توبه هسّه، بیارین و شه پَلی نایرین که: ‹اَمه پی‌یِر ابراهیم هسّه، پس اِما نجات ره داریمبی›. اینِسّه که شِما ره گامبه، که خِدا قادر هسّه این سنگا جه وَچه‌هایی ابراهیمِسّه دِرِست هاکانه. 9الان تیشه بر ریشۀ دارها بَزوهه بَییه. هر داری که خارِ میوه نده، بَوریه وونه و تَشه دِله دَشِنیه وونه.»
10مردِم وِنجه بَپِرسینه: «پس چکار وِنه هاکانیم؟» 11یحیی جِواب هادا: «اون که دِتا جِمه دارنه، اَتّا رِه هاده به اونتا که نِدارنه. و اونکه غِذا دارنه هِم، اینتی هاکانه.» 12باجگیرون هِم بی‌یَمونه تا تعمید بَیرِند. وِنجه بَپِرسینه: «اِستا، اِما چکار وِنه هاکانیم؟» 13ویشونه بائوته: «از اونچه که قِرار هسّه، ویشتِر مالیات نَیرین.» 14سربازها هِم وِنجه بَپِرسینه: «اِما چکار هاکانیم؟» یحیی بائوته: «بِزور کسی جه پول نَیرین و هیچ کس ره تهمِت نَزَنین و به شه حقوق قانع بوئین.»
15مردِم مشتاقانه منتظر بینه، شه پَلی فکر کاردِنه و گاتِنه «آیا ممکن هسّه یحیی همون مسیح بوئه؟» 16جِواب یحیی به همۀ ویشون این بی‌یِه: «مِن شِما ره با اوو تعمید دِمبه، امّا اَتّا نَفِر مِجه گَتتِر اِنه که مِن لیاقِت نِدارِمبه حتی وِنه بند کُش ره واز هاکانِم. وِه شِما ره با روحِ خِدا و تَش تعمید دِنه. 17وِه شه کَج‌بیل ره شه دست دِله داننه تا شه کَسو ره پاک هاکانه و گَندِم ره شه اِنبار دِله ذخیره هاکانه. امّا کَمِل ره با تَشی که خاموش نَوونه، سوزِندِنه.»
18و یحیی با خَله پندها مردِم ره بشارت داهه. 19امّا وقتی هیرودیسِ حاکم، بخاطر رابطه با هیرودیا، شه بِرارزَن و هِم کِثافِت‌کاریهای دیگه‌یی که هاکارده بی‌یِه، از طَرِف یحیی توبیخ بَییه، 20یحیی ره زندان دِله دِمبِدا و اینتی خطایی دیگه بر شه خطاها اضافه هاکارده.
تعمید و اصل و نسب عیسی
21اون زِمان که همۀ مردِم تعمید گِتِنه، عیسی هِم تعمید بَییته. در همون موقع که وِه دِعا کارده، آسمون واز بَییه 22و روحِ خِدا اَتّا کَوتِر واری وِنه سر هِنیشته و صدایی آسمون جه بی‌یَموهه که گاته: «ته هسّی مه جانِ ریکا و مِن ته جه راضی هسِّمه.»
23عیسی حِدود سی ساله بی‌یِه که شه خدمِت ره شِروع هاکارده. وِه به گمان مردِم یوسفِ ریکا بی‌یِه و یوسف هِلی ریکا بی‌یِه، 24هِلی مَتّات ریکا بی‌یِه، مَتّات لاوی ریکا بی‌یِه، لاوی مِلکی ریکا بی‌یِه، مِلکی یَنّا ریکا بی‌یِه، یَنّا یوسف ریکا بی‌یِه، 25یوسِف مَتّاتیا ریکا بی‌یِه، مَتّاتیا عاموس ریکا بی‌یِه، عاموس ناحوم ریکا بی‌یِه، ناحوم حِسْلی ریکا بی‌یِه، حِسْلی نَجّی ریکا بی‌یِه، 26نَجّی مَعَت ریکا بی‌یِه، مَعَت مَتّاتیا ریکا بی‌یِه، مَتّاتیا سِمِعین ریکا بی‌یِه، سِمِعین یُسِک ریکا بی‌یِه، یُسِک یهودا ریکا بی‌یِه، 27یهودا یوحَنان ریکا بی‌یِه، یوحَنان ریسا ریکا بی‌یِه، ریسا زروبابِل ریکا بی‌یِه، زروبابِل شِئَلتیئیل ریکا بی‌یِه، شِئَلتیئیل نیری ریکا بی‌یِه 28نیری مِلکی ریکا بی‌یِه، مِلکی اَدّی ریکا بی‌یِه، اَدّی قوصام ریکا بی‌یِه، قوصام اِلمادام ریکا بی‌یِه، اِلمادام عیر ریکا بی‌یِه، 29عیر یوشَع ریکا بی‌یِه، یوشَع اِلعازار ریکا بی‌یِه، اِلعازار یوریم ریکا بی‌یِه، یوریم مَتّات ریکا بی‌یِه، مَتّات لاوی ریکا بی‌یِه، 30لاوی شَمعون ریکا بی‌یِه، شَمعون یهودا ریکا بی‌یِه، یهودا یوسف ریکا بی‌یِه، یوسف یونام ریکا بی‌یِه، یونام اِلیاقیم ریکا بی‌یِه، 31اِلیاقیم مِلیا ریکا بی‌یِه، مِلیا مِنّا ریکا بی‌یِه، مِنّا مَتّاتا ریکا بی‌یِه، مَتّاتا ناتان ریکا بی‌یِه، ناتان داوود ریکا بی‌یِه، 32داوود یَسا ریکا بی‌یِه، یَسا عوبید ریکا بی‌یِه، عوبید بوعِز ریکا بی‌یِه، بوعِز سَلمون ریکا بی‌یِه، سَلمون نَحشون ریکا بی‌یِه، 33نَحشون عَمّیناداب ریکا بی‌یِه، عَمّیناداب رام ریکا بی‌یِه، رام حِصْرون ریکا بی‌یِه، حِصْرون پِرِص ریکا بی‌یِه، پِرِص یهودا ریکا بی‌یِه، 34یهودا یعقوب ریکا بی‌یِه، یعقوب اسحاق ریکا بی‌یِه، اسحاق ابراهیم ریکا بی‌یِه، ابراهیم تارَح ریکا بی‌یِه، تارَح ناحور ریکا بی‌یِه، 35ناحور سِروج ریکا بی‌یِه، سِروج رِعو ریکا بی‌یِه، رِعو پِلِج ریکا بی‌یِه، پِلِج عِبِر ریکا بی‌یِه، عِبِر شِلَخ ریکا بی‌یِه، 36شِلَخ قینان ریکا بی‌یِه، قینان اَرفَکشاد ریکا بی‌یِه، اَرفَکشاد سام ریکا بی‌یِه، سام نوح ریکا بی‌یِه، نوح لَمِک ریکا بی‌یِه، 37لَمِک مَتوشالَح ریکا بی‌یِه، مَتوشالَح خَنوخ ریکا بی‌یِه، خَنوخ یارِد ریکا بی‌یِه، یارِد مَهَلَلئیل ریکا بی‌یِه، مَهَلَلئیل قینان ریکا بی‌یِه، 38قینان اَنوش ریکا بی‌یِه، اَنوش شِیث ریکا بی‌یِه، شِیث آدم ریکا بی‌یِه، آدم خِدا ریکا بی‌یِه.
वर्तमान में चयनित:
لوقا 3: Maz
हाइलाइट
शेयर
कॉपी
Want to have your highlights saved across all your devices? Sign up or sign in
© Mazanmedia
