ILOOWALI 15
15
Daantia lo Allahu Taa̒ala wolei Abram
1Lapatao̒ uito tei Abram lololimo bibilohe wau loo̒dungohe Eeya lotahuda mai olio, “Diila mao̒ oohe, Abram, Wau̒ mamoduo̒lai olemu monto baala, wau mongohi mai olemu wuupa udaa̒.”
2-3Bo tei Abram malo loi̒ya, “Eeya Taa Laba-labaalo molanggato, Eeya diila longohi mai walao̒ ode watotia. Taa umaa mowalisi mao̒ halata lo watotia bo tei Elieser wambao̒, wato lo watotia lonto Damusiki. Oditolio wolo hunalio Eeya mongohi mai wuupa ode watotia?”
4Lapatao̒ tei Abram loo̒dungohe Eeya luli lotahuda mai to olio, “Diila watomu tamaa mowali ahali lo walisiimu, bo walao̒ mongo lolai̒mu lohihilao.” 5Eeya lodelo olei Abram ode bulemengio tulusi lotahuda mao̒ olio, “Bilohi mola hulungo wau nte leekenia mola popoo-liyamaalo; yio̒ mamowali owali mai daatalio debo odelo popoo-liyamaalo boito.”
6Tei Abram palacaya to Eeya, wau sababu uito Eeya lololimo olio odelo taa u moe̒engahe hilaa-Lio.
7Lapatao̒ Eeya luli lotahuda olio, “Wau̒lo Eeya tamalodelo olemu yilumulai lonto lipu lo Ur to Babilonia, u mongohi mai huta botie to olemu mowali milikiimu.”
8Bo tei Abram malohintu, “Yaa, Eeya Taa Laba-labaalo molanggato, woloolo mola otaawa lo watotia deu̒ huta boito mamowali haku lo watotia?”
9Tahuda mao̒ lo Eeya, “Hamaalo mao̒ duo̒lo-U̒ sapi bilango tuwau, batade bilango tuwau, wau batede ulai̒ tuwau, tinggai o umulu tolo taunu wau olo bulungi tarakuku tuwau, wau bulungi poombo tuwau.” 10Lapatao̒ tei Abram malohama mai bibii-natangiyalo boito duo̒lo Allahu Taa̒ala. Sapi, batade wau himba boito tuwau-tuwau bilutai̒o lowali duluo, wau timii̒du butai̒o boito pilopo dutulio mao̒ tinggai tataalua todelomo dulo baalisi. Bo bubuu-lungiyalo boito diila bilutai̒o. 11Tapu boito pilotitae̒a lo bubuu-lungiyalo u mongongala pateelio, bo tei Abram malomuhu mao̒.
12Tou̒ mato lodulahu mahe tumolopa mota, tei Abram malei nuloto daa̒. Debolo tio yilanggubei lou̒ laasa moohe daa̒. 13Eeya lotahuda mai ode olio, “Eelailo mao̒, waliimu mai mamowali tau deli tolipu wewo; timongolio mamowali wato mola teto wau madeehelio ngotilonggadu wopato hetuto lotaunu mola hiheolio. 14Bo bangusa tamopowato waliimu boito mahukuu-maniyo-U̒ wau towakutu waliimu mololaa mao̒ lipu boito, timongolio mamodelo halata upango dadaata. 15Yio̒ lohihilao mamoo̒oma umulu u molanggato; yio̒ maamate mao̒ wolo duo̒-duo̒oto, lapatao̒ lobungolio. 16Lapatio mao̒ wopato waliimu mai, walao̒ wombumu mamuli mohualingai odia, kalana wau̒ diila tamopo hinggi taulo Amori tou̒ timongolio diipo mowali odito leetio tilinggula palalu hukuu-maniyolo.”
17Tou̒ dulahee mahui mai, debolo yilumenetai anglo tuwau u opolipio̒ wau morongo u lei̒-lei̒ita, lapatao̒ yilumaodeo̒ to hiyango lotapu u mahi olo-olonga boito. 18Tou̒ boitolo Eeya lohutu mai daantia wolei Abram. Tahuda lo Eeya, “Wau̒ modanti mai mamongohi ode waliimu ngoilanggubu huta botie, tumulalo mao̒ monto sipatana lipu lo Masiri demola dutulaa Eperat, 19meituwoto olo huta taulo Keni, Kenas, Kadmon, 20Het, Peris, Rapaim, 21Amori, Kanaa̒n, Girigasi wau Yebus.”
वर्तमान में चयनित:
ILOOWALI 15: LAIGOR
हाइलाइट
शेयर
कॉपी
Want to have your highlights saved across all your devices? Sign up or sign in