Ruuka 13
13
Motahongora ëbhëbhë motakaasika
1Enkaagha iyö, abhantö bhaatëëbhëri Yëësu kya bhoora Piraato yaitirë Abhaghariraaya nyabhorebhe. Amaanyinga agha abhantö bhayö, akaghaishooghania na amaanyinga agha situgho isya ikimwenso keno bhaamwenseranga Waryobha. 2Yëësu akabhatëëbhya igha, “Kasi nkokanya mörë igha, Abhaghariraaya bhayö, mbaarë na ëbhëbhë, okokera Abhaghariraaya bhonswe igho, kiyö nkyo kyaaghërrë bhakakwa uruku kya ruyö? 3Ti-igho hë! Ndabhatëëbhya igha, kasi na bhëënyu bhonswe hano motaahongore ëbhëbhë ibhyënyu, m-buyöbhuyö murisikibhwa. 4Kasi morahiita-ko abhantö ikömi na monaane bhaara, bhano bhaaghwërëëywë na omonara Sirowamu eera, bhakakwa? Kasi nkokanya mörë igha në-bhëbhë bhaarë nabhyo okokera abhamënyi bhonswe igho abha Yërusarëëmu? 5Ti-igho hë! Ndabhatëëbhya igha, hano motaahongore ëbhëbhë ibhyënyu, bhëënyu bhonswe m-buyöbhuyö murisikibhwa!”
Ömötë ghono ghotakwama sehagho
6Hano Yëësu yaamarrë okobhatëëbhya amangʼana ghayö, akabharëngërya ëkërëngyö keno igha, “Yaare-ho ömöntö, ono yëëmëri ömötë ughwa umutiini#13:6 Umutiini nö-mötë ughwa sehagho isya sitiini. Ëmëtë ghiyö m-yaru Isiraëri iyö. Ömötë ghuyö mara kaaru ghoreemererra Abhaisiraëri. Maaha mo-ketabho ikya Yeremia 24. kö-möghöndö ughwaye. Hano yaaghëëyë ukutwa sehagho kö-mötë kuyö, akanyoora teseeko hë. 7Mbe, akatëëbhya omokaraabhërri uwa ömöghöndö ughwaye igha, ‘Maaha mbe, naarë kuushanga kö-mötë ughwa umutiini ghono, ku imyoka etatö ghyonswe igho, okore ntwe-ko sehagho, kasi tenakatuurë-kö hë. Bhoono ghogheeshe ghotakaaghëndërrya okosarya rirobha bhosa.’
8“Kasi omokaraabhërri uyö uwa ömöghöndö, akamohonshora igha, ‘Omonene, otaghutigha ko-mooka ghono tomaahe, okore ngwaaghere bhuuya, na okoghotorra emborea. 9Hano ghuryama, m-buuya. Hano ghuryanga ukwama, bhoono oghogheeshe.’ ”
Yëësu arahwënia omokari urusikö urwa Obhotooro
10Urusikö urwa Obhotooro, okanyoora Yëësu arëëghya abhantö mu-nyumba iya esango iya Abhayahudi. 11Mu-nyumba iya esango iya Abhayahudi iyö, yaare-mo omokari ömwë, ono yaarë na risambwa imyoka ikömi na monaane. Waanyöörrë risambwa ryaamwikumbya omoghongo, tiyaatoranga okoghorroka hë.
12Hano Yëësu yaamörööshë, akamobherekera aashe ko-we. Yëësu akamötëëbhya igha, “Nyakörö, uhwënirë öbhörööyë ubhwaho, uruurë mo-kebhohe.” 13Yëësu akamosambekera amabhoko, ömörööyë uyö akaimerra kamwë igho. Akasimya ökötöönia Waryobha.
14Omonene uwa inyumba iya esango iya Abhayahudi akarerra, ko bhoora urusikö ruyö Yëësu yaahwënëri omokari uyö, nu-urwa Obhotooro rwaarë. Akatëëbhya abhantö igha, “Kera iwiiki, neena sinsikö isansabha isya emeremo. Ku bhuyö muushenga ukuhwënibhwa ku-sinsikö siyö, kasi motakaasha igha muhwënibhwi, urusikö urwa Obhotooro!”
15Omonene Yëësu akamohonshora igha, “Bhare bhaihunaania! Temokotashoranga sengʼombe handë sitikërë isyënyu ukurwa mu-righo, mughya ukunywënsya urusikö urwa Obhotooro? 16Bhoono omokari ono, uwa eka iya Ibhurahimu, yaamara imyoka ikömi na monaane ariishirwe na Oghosambwa, mbe, wonswe tiyaarë aingʼarëëyi aruusibhwi mo-kebhohe kiyö urusikö urwa Obhotooro?”
17Hano Yëësu yaaghambirë ghayö, bhano bhonswe igho bhaamunyeeranga senkaani, bhakasooka. Kasi abhandë bhonswe igho, mbashömëëywë bhököngʼu, ko okoghera iya amangʼana amaiya agha amakono ghano Yëësu yaakoranga.
Ëkërëngyö ikya orotetere oroke
(Mataayo 13:31-33; Maariko 4:30-32)
18Ho Yëësu yaabhöörri igha, “Obhokama ubhwa Waryobha n-kë bhutuubhaini nakyo? N-kë nkabhorengʼania nakyo? 19Mbutuubhaini na akatetere aka omoharadaari, kano ömöntö yaaghëghirë, akakëëmya kö-möghöndö ughwaye. Akatetere kakamera, kakabha ömötë omonene. Ibhinyönyi bhekaasha, bhekahaghaasha amasu ko-masagharya aghaako.”
20Yëësu akabhöörya ghwiki igha, “N-kë nkabhutuubhania nakyo Obhokama ubhwa Waryobha? 21Mbutuubhaini na ehamiira, eno omokari yaaghëghirë, akaghishooghania mo-bhose ubhwa engano ubhwa ebherengo bhitatö. Ehamiira iyö, ekaghera obhose ubhwa engano bhuyö bhokabhimba, bhokebhokerra.”
Waryobha takutuna abhanyanku mo-Bhokama ubhwaye hë
(Mataayo 7:13-14, 7:21-23)
22Hano Yëësu yaaghyanga Yërusarëëmu, yëëghyanga abhantö abha mu-mighi na mu-bhishishi bhiyö yaahetanga-mo. 23Urusikö nyabhorebhe, ömöntö akamöbhöörya igha, “Ore Omonene uwëëtö, abhantö bhano bharëtööribhwa, m-bake igho bharebha?”
Yëësu akamohonshora igha, 24“Mwiköngʼërri okoheta mo-kesaku ikinyintu, ko bhoora m-baaru bharishaashya okosoha, kasi tebharetora hë. 25Enkaagha eno umwene inyumba urinyoora amarrë ukusiika-ho ekesaku, muriimerra kebhara, morabherekera na okosaasaama igha, ‘Ore Omonene uwëëtö, otatweghorra-ho!’ Kasi narebhahonshora igha, ‘Tembamanyirë hë, kora temanyirë hasë murwërëëyë hë!’
26“Bhëënyu mörëëmötëëbhya igha, ‘Ndarra ntwaaryanga na ukunywa hamwë na uwe! Na mu-bhishishi ibhyëtö, mo waatwëghëri!’ 27Kasi umwene areebhahonshora igha, ‘Tembamanyirë hë, kora temanyirë hasë murwërëëyë hë. Mundwere-ho, bhëënyu abhakora amaghogho.’
28“Ho muriikuura na okokaaraatya amaino, ko bhoora moremaaha Ibhurahimu, Isaaka, Yaakobho, na abharööti bhonswe igho, bharëngë mo-Bhokama ubhwa Waryobha. Kasi bhëënyu, nurinyoora mörëkëëywë kebhara. 29Abhakyaro, mbariisha ukurwa mbaara syonswe igho, isya ko-kebhara kono, röghörö na nyansha, ghöösi na syömya, bhaikare ku-nyangi iya Obhokama ubhwa Waryobha.
30“Mbe, mwighwe mbatëëbhi, abhantö bhano bhataana ubhwera bhoono igho, mbo bharebha na ubhwera. Na bhano bhaana ubhwera, tebharebha na ubhwera hë.”
Yëësu arakoorra umughi ughwa Yërusarëëmu
(Mataayo 23:37-39)
31Ko-nkaagha iyöiyö, Abhafarisaayo nyabhorebhe, bhaaghëëyë ku-Yëësu, bhakamötëëbhya igha, “Tanora urwe hano, oghende ahasë ahandë, ko bhoora, omokama Herode Antipa, nkutuna arë akwite.”
32Yëësu akabhahonshora igha, “Herode omoghashyaghashya#13:32 Omoghashyaghashya. Mu-Kiyunaani ni-igha, nyamobhwe. Nyamobhwe ereemererra ömöntö omongʼaini, omoghashaghasha ono akoghasheka amangʼana. uyö, të-këntö ku-öni hë. Moghende mömötëëbhi igha, ‘Reero na isho, na-masambwa nkwata ko-bhantö, na ukuhwënia abharööyë, kasi urusikö urwa katatö nendemarërrya emeremo ighyane.’ 33Ni-igha ngëndërri na oroghendo urwane urwa ukughya Yërusarëëmu reero na isho na ishörrya, ko bhoora ti-bhuuya ömörööti ukukwera kebhara iya Yërusarëëmu.”
34Mbe, Yëësu akaghamba igha, “Bhëënyu abhantö abha Yërusarëëmu, bhëënyu bhano mukwita abharööti, na okotema amaghena abhantö bhano Waryobha yaatoma. N-kaaru naakora omotono ughwa okobhakomania, kya hano engoko ekokoma ibhishuushu mo-mabhabha aghaayo, kasi mwanga. 35Maaha mbe! Bhoono möghënirë. Mbe, ndabhatëëbhya igha, temoreemmaaha röndë hë, okohekera hano moreghamba igha, ‘Waryobha akongʼoore ono akuusha ko okohetera iriina irya Omonene Waryobha.’#13:35 Maaha mo-ketabho ikya Zabhuri 118:26.”
वर्तमान में चयनित:
Ruuka 13: ssc
हाइलाइट
शेयर
कॉपी
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
