Ruuka 15
15
Ëkërëngyö ikya ringʼöndi reno ryaasirrë
(Mataayo 18:12-14)
1Mbe, abhaghööti abha righööti abhaaru na abhantö abhandë bhano bhaamanyekaini igha, m-ba ëbhëbhë, bhonswe igho bhaashanga ku-Yëësu, okore bhamwitegherre. 2Urusikö urwöndë, Abhafarisaayo na abhëëghya abha amaraghërryö agha Mosa, bhakaibhëmbëërya, bhakaghamba igha, “Ömöntö ono, ndarra m-mösërëënia uwa abha ëbhëbhë? Kora nkosanga arë nabho!”
3Mbe, ku bhuyö Yëësu akabharëngëngya ëkërëngyö igha, 4“Hano oraanyoore ömöntö aana amangʼöndi righana, rimwë risire, iyakë araakore? Nda naraatighe hayö amangʼöndi merongo kenda na kenda ghayö mö-kërëësyö, aghende ukutuna reno risirrë, okohekera hano araarinyoore? 5Na hano yaarinyoora, nkushomerwa arë, aresambeka ko-mareko. 6Hano yahika naryo ka, nkobherekera arë abhamenyani abhaaye na abhasaani abhaaye abhatëëbhi igha, ‘Tushomerwe, ko bhoora nyöörrë ringʼöndi iryane reno ryaarë risirrë.’
7“Ndabhatëëbhya igha, ni-igho ërë mu-ryobha, hano ömöntö ömwë uwa ëbhëbhë, yaahongora ëbhëbhë ibhyaye. Ukushomerwa kuyö, n-konene okokera ukwa abhantö abha heene merongo kenda na kenda, bhano bhatatöniibhwi na okohongora ëbhëbhë ibhyaho.
Ëkërëngyö ikya ehera eno yaasirrë
8“Mwitegherre ghwiki ëkërëngyö ikyëndë. Hano oraanyoore omokari nyabhorebhe aana seehera ikömi,#15:8 Seehera ikömi. Mu-Kiyunaani, serabherekerwa igha darakima. Edarakima ëmwë yaisanga rihaki irya ömököri uwa emeremo ku-rusikö örömwë. ëmwë isire, taaghööti etara kora eeye inyumba yonswe igho, akore omotono ughwa ukughituna bhuuya, okohekera hano araaghinyoore? 9Na hano yaghinyoora, nkobherekera arë abhamenyani abhaaye na abhasaani abhaaye, abhatëëbhya igha, ‘Tushomerwe hamwë, ko bhoora nyöörrë ehera iyaane eno yaarë isirrë.’
10“Ndabhatëëbhya igha, ni-ighoigho, kora Waryobha na abhamaraika abhaaye bhonswe igho, nkushomerwa bharë, hano ömöntö ömwë uwa ëbhëbhë, yaahongora ëbhëbhë ibhyaye.”
Ëkërëngyö ikya omoona ömötëëyu
11Yëësu akaghëndërrya okobharëngërya igha, “Yaare-ho ömöntö uwöndë, ono yaarë na abhamura bhabhërë. 12Umumura omoke, akatëëbhya suwaabho igha, ‘Taata, ntwenera umwandö ughwane.’ Ku bhuyö suwaabho, akabhatwenania bhonswe igho bhabhërë, ëbhëntö ibhyaye.
13“Sekaheta sinsikö nke igho, umumura omoke uyö akakoma ëbhëntö ibhyaye bhyonswe igho, akaghya ikyaro ikya ahare. Akanyamorra iyö ëbhëntö ibhyaye shwe, ko-bhoraaghëri ubhwaye. 14Hano yaamarrë ëbhëntö bhyonswe igho, inshara ëndörö kai, ekaghoota ikyaro kiyö. Akanyoora inyanko! 15Ku bhuyö akaghya kö-möntö uwöndë uwa ikyaro kiyö, akamosabha emeremo. Ömöntö uyö, akamuhira mu-righöri iryaye, okore arëësinga sëmbëëshë.#15:15 Abhayahudi nkosera bharë bhököngʼu sëmbëëshë. 16Umumura uyö, akabha araighomba okorya amakanda ghayö sëmbëëshë syaaryanga, kasi taaho ömöntö ono yaamohaayë ibhyakorya hë.
17“Ho yaahiitirë, akaighambera mo-motwe ughwaye igha, ‘Abhaköri abha emeremo abha taata, nkorya bharë igho bhetama. Kasi öni hano, ndanyahaareka na umweko bhosa igho! 18Bhoono tigha nkyore ko-taata, mmötëëbhi igha, “Taata uwëëtö, naakosarrya, kora naakora ëkëbhë ku-Waryobha. 19Tiningʼarëëyi okobherekerwa mura uwaaho hë. Nkora kya abhaköri abha emeremo abhaaho.” ’
20“Mbe, akatanora, akakyora ku-suwaabho. Hano yaarë akërëngë ahare na yeeka waabho, suwaabho akamomaaha, akamwabhera. Akakenyerra umumura uwaaye uyö, akamwibhaara. 21Umumura uyö, akatëëbhya suwaabho igha, ‘Taata uwëëtö, naakora ëkëbhë ku-Waryobha, na uwe wonswe naakosarrya. Tiningʼarëëyi okobherekerwa igha, m-mura uwaaho ndë hë.’
22“Kasi suwaabho akatëëbhya abhaghorwa abhaaye igha, ‘Mwangöhi engansho inshiiya mömötööri. Mömötööri ikitwangʼa ku-kyara ikyaye, na mömötööri na ebheraatö. 23Moreete rikööhë rinöru, momoghooghere toraaghere tushomerwe. 24Ko bhoora mura uwaane ono, yaarenga kya ono akuurë, kasi bhoono m-möhöru. Yaarenga asirrë, kasi bhoono atöökirë.’ Ho bhayö bhonswe igho, bhakarya inyangi iyö, bhashömëëywë.
25“Enkaagha iyö, waanyöörrë mura uwaabho ömöntö ömökörö, nkö-möghöndö yaarë. Hano yaakyörrë, akuhika haangʼë na yeeka, akaighwa abhantö bhararëëtya na ukubhina. 26Akabherekera ömököri uwa emeremo, akamöbhöörya igha, ‘N-kë kebhaayë ka hayö?’ 27Ömököri uwa emeremo akamohonshora igha, ‘Mura uwëënyu we akyörrë, na suwëënyu, amöghööghëëyë rikööhë rinöru, ko bhoora akyörrë möhöru.’ 28Umumura ömöntö mökörö akarerra, akaingʼëntya okosoha yeeka. Suwaabho akarishoka kebhara, akamosaasaama asohe.
29“Kasi umwene akahonshora suwaabho igha, ‘Neena imyoka imyaru ndakokorra emeremo. Tenakakösarëëyi ko-maraghërryö aghaaho kora hake hë. Kasi tuwakangʼaayë kora akaghorohe, okore öni wonswe, nshomerwe na abhasaani abhaane. 30Kasi omoona uwaaho ono yaasarya ëbhëntö ibhyaho ko-bhasooraare, bhuyö atashirë hano igho, ömöghööghëëyë rikööhë rinöru.’
31“Suwaabho akamohonshora igha, ‘Moona uwaane, uwe wikaraini na öni sinsikö syonswe igho hano, na ëbhëntö bhyonswe bheno neenabhyo, ni-bhyaho. 32Kasi mura uwëënyu ono, ni-igha tomokorre inyangi, tushomerwe hamwë bhonswe igho. Ko bhoora, yaarenga kya ono akuurë, kasi bhoono m-möhöru. Yaarenga asirrë, bhoono atöökirë.’ ”
वर्तमान में चयनित:
Ruuka 15: ssc
हाइलाइट
शेयर
कॉपी
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
