Ruuka 17
17
Amëëghyö agha Yëësu ko-mangʼana agha amashaasho na ukwabherana
(Mataayo 18:6-7, 18:21-22; Maariko 9:42)
1Mbe, hano ghayö ghaahööyë, Yëësu akatëëbhya abheegha abhaaye igha, “Amashaasho ghano ghakoghera abhantö bharakora ëbhëbhë, ngaraabhe-ho igho ukughya iyö. Kasi haahö ömösëmöri uwa amashaasho ghayö. 2Nyakara ömöntö uyö, abhoherwe mö-bhëghöti oroghena oronene urwa okoseera, amare arekerwe mu-nyansha, kasi atakaaghira abhantö nyamukumo mötëntëëru, bhakore ëbhëbhë. 3Ku bhuyö, mwiyangarre motakaakora igho.
“Hano umukumya murikyaho yaakosarrya, uwe omokaani. Na hano araaikërri obhosarya ubhwaye, umwabhere. 4Nakakosarrya hare muhungatë ku-rusikö, kera hano yaakosarrya, aasha akötëëbhya igha, ‘Nikërëëyi obhosarya ubhwane,’ uwe umwabhere.”
Obhotoro ubhwa umukumo
5Ho abhatomwa bhaatëëbhëri Omonene igha, “Otatwëngërërrya umukumo.”
6Akabhahonshora igha, “Hano mokaabhaayë na umukumo omoke igho, nokaanyoora n-kya akatetere akake aka omoharadaari, mokaatëëbhëri ömökö ghono igha, ‘Eheka ughi wëëmibhwi mu-nyansha,’ nagho ngokaabhaighwërëëyë.”
Emeremo ighya abhaköri abha emeremo abha Yëësu
7Yëësu akaghëndërrya okoghamba igha, “Hano oraanyoore ömöntö aana omoghorwa uwa okomoremera, handë aramörëësërya amangʼöndi. Hano omoghorwa uyö araakyore ka, omonene uwaaye naamötëëbhya igha ‘Nshö wikare hano oraaghere’? Tamötëëbhi igho hë! 8Kasi keno araamötëëbhi ni-igha, ‘Nsëëmërya ibhyakorya ndaaghere. Onganye hano ndaamare okorya na ukunywa, bhoono uwe wonswe oraaghere.’ 9Tamukumi ko bhoora igha, akörrë ghaara akutunwa igha akore.
10“Bhëënyu bhonswe ni-ighoigho, hano momarrë okokora ghano moraghërribhwi, moghambe igha, ‘Bhëëtö m-baghorwa igho törë. Ntökörrë keno tötëëbhibhwi igha tokore.’ ”
Yëësu arahwënia abhaghenge ikömi
11Enkaagha iyö Yëësu yaaghyanga Yërusarëëmu, yaahëtëëyë mo-sentonga isya omokowa ughwa Samaaria na ughwa Ghariraaya. 12Akasoha mu-kishishi ikyëndë, akasikana-mo na abhaghenge ikömi. Abhaghenge bhayö, bhaarenga bhaimërëëyë ahare na Yëësu. 13Bhakakonga bhököngʼu igha, “Yëësu, Omonene uwëëtö, otatwabhera.”
14Yëësu akabhamaaha, akabhatëëbhya igha, “Moghende mwiyöröki ko-bhasëngëri igha muhwënirë.”#17:14 Maaha mo-ketabho ikya Ruuka 5:14. Bhakasaabhuurwa bhakëërëngë ko-nshera bharaghya.
15Omoghenge ömwë hano yaarööshë igha ahwënirë, akakyora ku-Yëësu, na eno aratöönia Waryobha bhököngʼu. 16Hano yaahikirë ku-Yëësu, akairekera hansë bhubhuumaayë, ko-maghörö aghaaye hayö, aramukumya. Na ömöntö uyö, m-Mosamaaria yaarë.
17Mbe, Yëësu akabhöörya igha, “Kana, te-bhantö ikömi bhasaabhuurrwë! Bhoono abhandë kenda bho hai bhaghëëyë? 18Bho tebhakyörrë ökötöönia Waryobha hë! Nö-möghëni ono umwene igho we akyörrë?” 19Yëësu akamötëëbhya igha, “Emoka oghende hano ukughya. Keno këghërrë uhwënirë, nu-mukumo ughwaho.”
Ghano gharyebhoka hano Omoona uwa Ömöntö ariisha
(Mataayo 24:23-28, 24:37-41)
20Urusikö nyabhorebhe Abhafarisaayo bhaabhöörri Yëësu igha, “Obhokama ubhwa Waryobha n-dööhë bhuriisha?” Yëësu akabhahonshora igha, “Ukuusha ukwa Obhokama ubhwa Waryobha, tëkërëngë ëkëntö ikya ukwitaaha na amaiso hë. 21Abhantö tebhareghamba igha, ‘Momaahe n-hano bhörë,’ handë igha, ‘Momaahe n-haara bhörë bhamurë.’ Kasi Obhokama ubhwa Waryobha, mö-bhëënyu bhörë.”
22Ho Yëësu yaatëëbhëri abheegha abhaaye igha, “Enkaagha iriihika-ho, eno muriighomba okomaaha urusikö, ndokaabha örömwë, urwa sinsikö isyane öni Omoona uwa Ömöntö, kasi temoreromaaha hë. 23Abhantö mbarebhatëëbhyanga igha, ‘Momaahe Omoona uwa Ömöntö n-goora eera,’ handë igha ‘Momaahe n-goono hano.’ Kasi abhantö kya bhayö, motakaabhaharra. 24Nembatëëbhëri ghayö, ko bhoora hano Omoona uwa Ömöntö ndikyora, nindiisha kya örömësyö urwa enkobha, hano rwamësya, nkömërëkya rörë ahasë honswe igho ighörö iyö. 25Kasi ni-igha, tangata öni Omoona uwa Ömöntö nnyoore inyaanyi, kora nangwe na abhantö abha rekora reno.
26“Kya bhoora yaarë ko-nkaagha iya Nuhu,#17:26 Maaha mo-ketabho ikya Okosemoka 6:14-22, 7:1-24. ni-igho erebha kora ko-nkaagha iya ukukyora, ukwa öni Omoona uwa Ömöntö. 27Ko-nkaagha iya Nuhu eera, abhantö na-mangʼana aghaabho ghaabhatönëri. Mbaanywanga na okorya, bharateta na okotetwa, okohekera urusikö roora Nuhu yaasöhirë mo-safina. Ëhöörö ekaasha ekabhasikya bhonswe igho.
28“Kora ko-nkaagha iya Ruutu, amangʼana m-buyöbhuyö ghaarë.#17:28 Maaha mo-ketabho ikya Okosemoka 19. Abhantö abha Sodoma, mbaaryanga na ukunywa, bharaghora na ököghörya, bhararema na ukwëmya, kora mbaahaghaashanga. 29Kasi urusikö roora Ruutu yaaruurë mu-mughi ughwa Sodoma, omorro ömörörö kai, ghokaharatoka, kya imbura eno ekotwa ukurwa mu-ryobha, ghokabhasikya bhonswe igho.
30“Ni-igho erebha urusikö urwa okohonyorwa ukwane öni Omoona uwa Ömöntö. 31Urusikö ruyö, ömöntö ono urinyoora arëngë kwi-rongo, na ëbhëntö ibhyaye bhërëngë mu-nyumba, atakaika abhesoore-mo. We keno araakore no-kokenya. Na ono urinyoora arëngë kö-möghöndö, atakaakyora yeeka okoghegha kyokyonswe keera. We akenye. 32Motakeebha ghaara ghaaghwërëëyë mokaa Ruutu.#17:32 Waryobha yaashibhiri mokaa Ruutu bhörrö, ko bhoora omokari uyö yaaighömbirë ukukyora Sodoma. Umughi ghono Waryobha yaarenga amarrë okoghobhotorra ikiina ikya ukughusikya. Maaha mo-ketabho ikya Okosemoka 19:26. 33Ömöntö wowonswe ono araashaashe okoroonerra ëbhëntö ibhya öbhöhöru ubhwaye, uyö nkubhusikya arë. Na ömöntö ono atakoroonerra ëbhëntö ibhya öbhöhöru ubhwaye, uyö we aköhönia öbhöhöru ubhwaye.
34“Ndabhatëëbhya igha, ubhutikö ubhwa urusikö ruyö, nurinyoora abhantö abhabhërë bharaayë kö-bhörrë. Waryobha nareghegha ömwë, atighe hayö uwöndë. 35Urusikö ruyö, nurinyoora abhakari abhabhërë bharasya hamwë. Waryobha nareghegha ömwë, atighe hayö uwöndë. [36Abhashaasha bhabhërë, nurinyoora bharakora emeremo kö-möghöndö, Waryobha nareghegha ömwë, atighe hayö uwöndë.]#17:36 Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani.”
37Abheegha abhaaye bhakamöbhöörya igha, “Omonene uwëëtö, ghayö hayi gharikorra?”
Akabhahonshora ku-kibhisirë igha, “Ahasë hano ikihundughu kërëngë, ho amatöönyi ghakosanga. Ku bhuyö, amangʼana ghayö ngaryörökya igha, umuhiko ughwa ekebhara kyonswe igho, haangʼë ghörë.”
वर्तमान में चयनित:
Ruuka 17: ssc
हाइलाइट
शेयर
कॉपी
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
Ruuka 17
17
Amëëghyö agha Yëësu ko-mangʼana agha amashaasho na ukwabherana
(Mataayo 18:6-7, 18:21-22; Maariko 9:42)
1Mbe, hano ghayö ghaahööyë, Yëësu akatëëbhya abheegha abhaaye igha, “Amashaasho ghano ghakoghera abhantö bharakora ëbhëbhë, ngaraabhe-ho igho ukughya iyö. Kasi haahö ömösëmöri uwa amashaasho ghayö. 2Nyakara ömöntö uyö, abhoherwe mö-bhëghöti oroghena oronene urwa okoseera, amare arekerwe mu-nyansha, kasi atakaaghira abhantö nyamukumo mötëntëëru, bhakore ëbhëbhë. 3Ku bhuyö, mwiyangarre motakaakora igho.
“Hano umukumya murikyaho yaakosarrya, uwe omokaani. Na hano araaikërri obhosarya ubhwaye, umwabhere. 4Nakakosarrya hare muhungatë ku-rusikö, kera hano yaakosarrya, aasha akötëëbhya igha, ‘Nikërëëyi obhosarya ubhwane,’ uwe umwabhere.”
Obhotoro ubhwa umukumo
5Ho abhatomwa bhaatëëbhëri Omonene igha, “Otatwëngërërrya umukumo.”
6Akabhahonshora igha, “Hano mokaabhaayë na umukumo omoke igho, nokaanyoora n-kya akatetere akake aka omoharadaari, mokaatëëbhëri ömökö ghono igha, ‘Eheka ughi wëëmibhwi mu-nyansha,’ nagho ngokaabhaighwërëëyë.”
Emeremo ighya abhaköri abha emeremo abha Yëësu
7Yëësu akaghëndërrya okoghamba igha, “Hano oraanyoore ömöntö aana omoghorwa uwa okomoremera, handë aramörëësërya amangʼöndi. Hano omoghorwa uyö araakyore ka, omonene uwaaye naamötëëbhya igha ‘Nshö wikare hano oraaghere’? Tamötëëbhi igho hë! 8Kasi keno araamötëëbhi ni-igha, ‘Nsëëmërya ibhyakorya ndaaghere. Onganye hano ndaamare okorya na ukunywa, bhoono uwe wonswe oraaghere.’ 9Tamukumi ko bhoora igha, akörrë ghaara akutunwa igha akore.
10“Bhëënyu bhonswe ni-ighoigho, hano momarrë okokora ghano moraghërribhwi, moghambe igha, ‘Bhëëtö m-baghorwa igho törë. Ntökörrë keno tötëëbhibhwi igha tokore.’ ”
Yëësu arahwënia abhaghenge ikömi
11Enkaagha iyö Yëësu yaaghyanga Yërusarëëmu, yaahëtëëyë mo-sentonga isya omokowa ughwa Samaaria na ughwa Ghariraaya. 12Akasoha mu-kishishi ikyëndë, akasikana-mo na abhaghenge ikömi. Abhaghenge bhayö, bhaarenga bhaimërëëyë ahare na Yëësu. 13Bhakakonga bhököngʼu igha, “Yëësu, Omonene uwëëtö, otatwabhera.”
14Yëësu akabhamaaha, akabhatëëbhya igha, “Moghende mwiyöröki ko-bhasëngëri igha muhwënirë.”#17:14 Maaha mo-ketabho ikya Ruuka 5:14. Bhakasaabhuurwa bhakëërëngë ko-nshera bharaghya.
15Omoghenge ömwë hano yaarööshë igha ahwënirë, akakyora ku-Yëësu, na eno aratöönia Waryobha bhököngʼu. 16Hano yaahikirë ku-Yëësu, akairekera hansë bhubhuumaayë, ko-maghörö aghaaye hayö, aramukumya. Na ömöntö uyö, m-Mosamaaria yaarë.
17Mbe, Yëësu akabhöörya igha, “Kana, te-bhantö ikömi bhasaabhuurrwë! Bhoono abhandë kenda bho hai bhaghëëyë? 18Bho tebhakyörrë ökötöönia Waryobha hë! Nö-möghëni ono umwene igho we akyörrë?” 19Yëësu akamötëëbhya igha, “Emoka oghende hano ukughya. Keno këghërrë uhwënirë, nu-mukumo ughwaho.”
Ghano gharyebhoka hano Omoona uwa Ömöntö ariisha
(Mataayo 24:23-28, 24:37-41)
20Urusikö nyabhorebhe Abhafarisaayo bhaabhöörri Yëësu igha, “Obhokama ubhwa Waryobha n-dööhë bhuriisha?” Yëësu akabhahonshora igha, “Ukuusha ukwa Obhokama ubhwa Waryobha, tëkërëngë ëkëntö ikya ukwitaaha na amaiso hë. 21Abhantö tebhareghamba igha, ‘Momaahe n-hano bhörë,’ handë igha, ‘Momaahe n-haara bhörë bhamurë.’ Kasi Obhokama ubhwa Waryobha, mö-bhëënyu bhörë.”
22Ho Yëësu yaatëëbhëri abheegha abhaaye igha, “Enkaagha iriihika-ho, eno muriighomba okomaaha urusikö, ndokaabha örömwë, urwa sinsikö isyane öni Omoona uwa Ömöntö, kasi temoreromaaha hë. 23Abhantö mbarebhatëëbhyanga igha, ‘Momaahe Omoona uwa Ömöntö n-goora eera,’ handë igha ‘Momaahe n-goono hano.’ Kasi abhantö kya bhayö, motakaabhaharra. 24Nembatëëbhëri ghayö, ko bhoora hano Omoona uwa Ömöntö ndikyora, nindiisha kya örömësyö urwa enkobha, hano rwamësya, nkömërëkya rörë ahasë honswe igho ighörö iyö. 25Kasi ni-igha, tangata öni Omoona uwa Ömöntö nnyoore inyaanyi, kora nangwe na abhantö abha rekora reno.
26“Kya bhoora yaarë ko-nkaagha iya Nuhu,#17:26 Maaha mo-ketabho ikya Okosemoka 6:14-22, 7:1-24. ni-igho erebha kora ko-nkaagha iya ukukyora, ukwa öni Omoona uwa Ömöntö. 27Ko-nkaagha iya Nuhu eera, abhantö na-mangʼana aghaabho ghaabhatönëri. Mbaanywanga na okorya, bharateta na okotetwa, okohekera urusikö roora Nuhu yaasöhirë mo-safina. Ëhöörö ekaasha ekabhasikya bhonswe igho.
28“Kora ko-nkaagha iya Ruutu, amangʼana m-buyöbhuyö ghaarë.#17:28 Maaha mo-ketabho ikya Okosemoka 19. Abhantö abha Sodoma, mbaaryanga na ukunywa, bharaghora na ököghörya, bhararema na ukwëmya, kora mbaahaghaashanga. 29Kasi urusikö roora Ruutu yaaruurë mu-mughi ughwa Sodoma, omorro ömörörö kai, ghokaharatoka, kya imbura eno ekotwa ukurwa mu-ryobha, ghokabhasikya bhonswe igho.
30“Ni-igho erebha urusikö urwa okohonyorwa ukwane öni Omoona uwa Ömöntö. 31Urusikö ruyö, ömöntö ono urinyoora arëngë kwi-rongo, na ëbhëntö ibhyaye bhërëngë mu-nyumba, atakaika abhesoore-mo. We keno araakore no-kokenya. Na ono urinyoora arëngë kö-möghöndö, atakaakyora yeeka okoghegha kyokyonswe keera. We akenye. 32Motakeebha ghaara ghaaghwërëëyë mokaa Ruutu.#17:32 Waryobha yaashibhiri mokaa Ruutu bhörrö, ko bhoora omokari uyö yaaighömbirë ukukyora Sodoma. Umughi ghono Waryobha yaarenga amarrë okoghobhotorra ikiina ikya ukughusikya. Maaha mo-ketabho ikya Okosemoka 19:26. 33Ömöntö wowonswe ono araashaashe okoroonerra ëbhëntö ibhya öbhöhöru ubhwaye, uyö nkubhusikya arë. Na ömöntö ono atakoroonerra ëbhëntö ibhya öbhöhöru ubhwaye, uyö we aköhönia öbhöhöru ubhwaye.
34“Ndabhatëëbhya igha, ubhutikö ubhwa urusikö ruyö, nurinyoora abhantö abhabhërë bharaayë kö-bhörrë. Waryobha nareghegha ömwë, atighe hayö uwöndë. 35Urusikö ruyö, nurinyoora abhakari abhabhërë bharasya hamwë. Waryobha nareghegha ömwë, atighe hayö uwöndë. [36Abhashaasha bhabhërë, nurinyoora bharakora emeremo kö-möghöndö, Waryobha nareghegha ömwë, atighe hayö uwöndë.]#17:36 Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani.”
37Abheegha abhaaye bhakamöbhöörya igha, “Omonene uwëëtö, ghayö hayi gharikorra?”
Akabhahonshora ku-kibhisirë igha, “Ahasë hano ikihundughu kërëngë, ho amatöönyi ghakosanga. Ku bhuyö, amangʼana ghayö ngaryörökya igha, umuhiko ughwa ekebhara kyonswe igho, haangʼë ghörë.”
वर्तमान में चयनित:
:
हाइलाइट
शेयर
कॉपी
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.