Лукастар 3

Іоанн Боладо кійсітинел о дром ле Ісусоскє

1Про дешупанчто берш, кана Тіберій есас імператоріс, Понтій Пілат управлінелас андро Іудєя, а о Ірод есас владаріс-тетрархос#3.1 Тетрархос — владаріс, саво гіно хулай про штарто котор андро государство. андре Галілєя, а лескєро пграл о Філіпп есас владаріс-тетрархос андре Ітурея те андро Трахоніцько пгув, а о Лісіній есас владаріс-тетрархос андро Авілінея. 2Кана есас єкг баредер рашая о Аннас те о Каяфа, есас о лав ле Девлескєро ко Іоанн, Захаріяскєро ча, андре пустиня. 3І преґейля ов пал цейлі пгув паже ріка Іордан. Іоанн проповідінелас ле манушенґє, гой те покаїненпес і те болавенпес, гой о Дейл те одмукєл ленґє о бійні. 4Сар пісіме андре кніжка ко пророкос Ісая:

«Шундьол ганґос андре пустиня:

"Кійсітинен о дром ле Раєскє,

ровнярен о дром прекал Лесте!

5Сако яркос мі зачівен,

і сако брегос те о грункос мі помукєнпес тейле,

а банґє дрома мі ачен ровне,

а харакєре дрома мі ачен гладке.

6І сако джівдо дикгєла ратипе ле Девлескєро"».

7Акор Іоанн вакєрелас ле бутенґє, саве авенас кє лесте те болавенпес:

— Родос сапенґєро! Ко диня туменґє те джянен, гой тумен те денашен ле холятар, саві авел пре туменде? 8А канакє сікавен тумаро покаяніє одалега, со тумен кєрен. І на думінен те вакєрен андре песте: «Амаро дад Авраам». Бо пгенав туменґє, со о Дейл шай кадале барендар ваздел чавен ле Авраамоскє. 9Іма те о тговер пажо кореня дубоскєре пашльол. Сако єкг дубос, саво на анел лачо плодос, ейла чінґєрдо, і чівена лес андре яґ.

10І пгучелас лестар о нийпос:

— Со аменґє те кєрен?

11А ов ленґє отпгендя:

— Кє касте гін дуй ґада, мі дел єкг одалескє, кас нане, і кє касте гін о хабен, мі кєрел те ов авка.

12Мануша, саве іскіден налогі, авле те болавенпес кє лесте, і пгучле лестар:

— Танітов, со аменґє те кєрен?

13А ов ленґє пгендя:

— На марен аврі ле манушендар бутередер, сар туменґє тгодо.

14І пгученас лестар те о суґлядя:

— А аменґє со те кєрен?

Іоанн ленґє пгендя:

— Нікастар ле зорага на зален о лове, і на вінінен нікас, те ода на чачібе, а радисальон одалескє, со тумен зароден.

15Нийпос іґєн ужарелас, кана авела Хрістос, і думінелас андро пескєро їло, чі на Іоанн гіно Хрістос#3.15 Хрістос — грєчесько лав, саво обозначінел «помакгло олєйога». Ода есас мануш, савонес о Дейл іскіделас прекал Лескєрі воля.. 16Іоанн про ода саворенґє пгендя:

— Ме болавав тумен ле панєга, но авел Зораледер мандар, Савонескє ме на сом достойно те пгутерен о сірімос про Лескєре камашлі. Ов болавела тумен Свентне Духога те ле яґага. 17Андре Лескєро васт гіні лопата, і Ов жувжарела Пескєро дів. І скідела е дів андре Пескєрі комора, а о пгуса лабарела ле яґага, саві ніґда на мурдальол.

18Бут со ов акор вакєрелас, і убіждінелас ле нийпос, і вакєрелас Радишаґоскєро Гійрос.

19Кана ов кєздиндя те вакєрен андро якга ле Іродоскє, саво есас владаріс-тетрархос, кай ов іля пескє важ ромні ле Іродіада, пгралескєра ромня, і важ саворо авер подліпе, саво ов кєрдя. 20А Ірод ко саворо ода подліпе додиня минґ єкг, со ле Іоанн тгодя те бешен андре тюрма.

Ісусоскєро болавіпе

21Акор, сар боладяпес саворо нийпос, а те Ісус боладяпес ленца. Ов терділя андре молітва пало болавіпе, і акор пгутердяпес о нєбос, 22і Свентно Духос авля пре Лесте андро тєлоскєрі подоба, сар голубос. І шунділя о ганґос андал о нєбос:

— Ту сал Мійро Чаворо камадо, Ту сал Мійро радишаґос!

Ісусоскєро родос

23Кана Ісус кєздиндя Пескєро совґалніпе, Лескє есас вай транда берш. Сар думінде, Лескєро дад есас Йосип, а лескєре папі есас Ілій, 24Матфат, Лєвій, Мелхій, Іаннай, Йосип, 25Маттафія, Амос, Наум, Еслій, Наггей, 26Мааф, Маттафія, Шімій, Іосіх, Іодай, 27Іоаханан, Рісай, Зоровавель, Шеалтііл, Нірій, 28Мелхій, Аддій, Косам, Елмадам, Ір, 29Іосій, Елієзер, Іорім, Матфат, Лєвій, 30Сімеон, Іуда, Йосип, Іонам, Еліакім, 31Мелєай, Маінай, Маттафай, Нафан, Давід, 32Ієссей, Овід, Боаз, Сала, Нахшон, 33Амінадав, Адмін, Арній, Хецрон, Парец, Іуда, 34Яков, Ісаак, Авраам, Тєрах, Нахор, 35Сєруґ, Реу, Фалєґ, Євер, Шелах, 36Каінан, Арпахшад, Сім, Ной, Ламех, 37Мафусал, Єнох, Іаред, Малєлєіл, Каінан, 38Єнос, Сіф, Адам, Дейл.

वर्तमान में चयनित:

Лукастар 3: ЗРБ

हाइलाइट

कॉपी