Yowaho 2
2
Faha fino tohawaha
1Oda amoni famamakiya, Kana Karireya‑ya oda‑ka owa fanebona, fare marine‑ya Yeso madi sawe,
2Marina hidi oda‑ya himane, Yeso eyehe oda sawemaroni.
3Fino tosiyoya, Yeso‑ya madi hiyara,
“Mai‑ka fino tosiyoni.” Ati na,
4“Ami, hini yamata‑ba owa‑ya haatiniti? Owa ene kitabote mai awa kanibote raboneni.” Yeso ati nemarine.
5Fanebona‑ka yo‑yose mai‑ya Mariya hiyara,
“Yeso ati‑ya dai tokadabahi.” Ati na,
6Faha wiye webote 6 kana wademaroni. Wiye yati wamani toha, wiye one 80 ritoro toha, wiye one 120 ritoro toha na, fara ai yehe so‑sorokari‑ka faha wiye amani.
7“Faha dai kabiniya, yama wiye nafi dai nakibahi.” Yeso ati nemarine.
Faha‑ya mai kabina, yama wiye‑ya mai nakibi amosamaroni.
8“Yama wiye bide‑ya dai kabikaniya, dai towakamahi, fino‑ya mai da‑daa mai‑ka hidi‑ya.” Yeso ati ne,
Ati‑nima mai namaroni.
9Faha fino tohawaha‑ya mai daana, fino‑ya hidi to‑tomine,
“Se! Fino fawi amosini.” Atibodi ati nemarine.
Fanebona‑ya hidi haanemarine. (Yeso ene‑ya hidi watore, faha‑ya mai kabina yama‑ya mai watobisamaroni.)
10Fanebona‑ya hidi hiyare,
“Fino fawi amosa ai daani baha, mai towe tohi bide tohiya, fino fawi to‑tobaramana ai daanamakitasateni. Ai owa ene‑nima tiwa ene ra, fino fawi amosa‑ya tinayotoneni.” Ati nemarine.
11Kana Karireya‑ya Yeso ene kitabote daidi oda awa, Yeso amosabote oda watowaha, ati oda nofemarine.
12Marina hawa tohiya, Yeso, Yeso madi, Yeso sohori mai toha, Yeso‑ya oda da‑daba oda toha, oda na, kafanaho‑ya oda tokawaha, Kafanaho‑ya oda amoni fa‑famaraba namaroni.
Yeso mai‑ya kananihi
13Yodeo oda toha oda yorotokanaboneni, Ka‑kariwa‑ya oda marinabonehe. Fara ihi Yerosare‑ya Yeso oda eyehe tokomakimarine.
14Deoso‑ka yobe‑ya Yeso toke, Deoso‑ka yobe‑ya bowi mai‑ya mai daa, kaneiro mai‑ya mai daa, wayomata mai‑ya mai daa, yinero bare‑ya mai daa, mai na, mai‑ya Yeso awemarine.
15Mado‑ya ko‑kosi‑ya wamane, yama‑ya mai da‑daa mai nafi‑ya kananihimarine, bowi mai toha, kaneiro mai toha, mai naro. Yinero‑ya mai da‑daa mai‑ka yinero‑ya nanahaba, mai‑ka mesa‑ya fatatokawiti nemarine.
16Wayomata mai‑ya mai da‑daa, mai‑ya hiyare,
“Wayomata mai dai towakamahi. Okobi‑ka yobe‑ya yama‑ya dai daanamariyahi.” Ati nemarine.
17Yeso‑ya oda da‑daba Deoso‑ka yama hani ati oda watowama,
“Deoso‑ka yobe onofi nafi, yobe noko·oni nafeboneni.” Deoso‑ka yama hani ati neni. Fare Yeso tamine amane.
18Yeso ene‑ya mai awa, mai one yawa,
“Hini yamata‑bone mai‑ya kanatinihi? Deoso ene‑mona tina, Deoso ene kitabote oda awahi.” Oda‑ka hidi mai ati namaroni.
19“Deoso‑ka yobe‑ya dai nanahabiya, mahi 3 tohe‑ya yobe wama·onamatasaboneni.” Yeso ati nemarine.
20“Tiwa ohare yobe haa‑nima ne wamatiwameya, mahi 3 tohe‑ya hawa tinimakarabana? Faha fowe 46 kani‑ya Deoso‑ka yobe‑ya mai wamanamaroni.” Oda‑ka hidi mai one ati namaroni.
21Hini abano tamine‑bona‑ya hiyaremarine.
22Yeso abe, kitame, oda awe, ati oda watowame, ati oda nofawahe, Deoso‑ka yama hani ati oda nofawahamaroni.
23 # 2:23 Ka‑kariwa feriado oni amani. Faha fowe‑nima ka‑kariwa koboniya, mai yorotokana, mai mariteni. Ka‑kariwa kobona, Yerosare‑ya oda marini‑ya Yeso ene kitabote‑ya mai awa, Yeso ati‑ya mai dama mai nofawahamaroni.
24Mai atibodi ati‑ya Yeso wato, mai ati‑ya nofaremarine.
25Ai nafi atibodi ati‑ya wato, ai atibodi ati ai kaminara‑ya wato nemarine.
वर्तमान में चयनित:
Yowaho 2: jaaNT
हाइलाइट
शेयर
कॉपी
Want to have your highlights saved across all your devices? Sign up or sign in
