Roka 10
10
72 mai kana mai‑ya Yeso yose
1Makobote mai one 72 mai kana Yeso hini tokomakibona‑kaya mai‑ya yosebona mai‑ya hiyare,
“Mai tabori‑nima dai fa‑famiyahi.
2 # 10:2 Deoso‑ka yamata Deoso ati‑ya mai watora mai tamine amani. Deoso ati‑ya mai wata mai damara, Deoso ati‑ya mai wata mai dodama, mai one‑ya mai kanawatoya, yama amosabone, fara tamine amani. Deoso‑ka yamata dama marafakana, yamata‑ya mai tonaka mai damara, Deoso dai hiyarahi, mai one tokomakibakaro, Deoso‑ka yamata‑ya mai kakamabonehe.
3Owati dai mitahi. Dai tokiya, kaneiro bidi mai‑nima dai nahi, dai hamariyahi. Yome hame‑nima mai na, mai‑ya dai oyose, dai noko wadiyahi.
4Dai tokiya, yinero dai towakariyahi, yamasi dai weyerihi, sanidariya dai kakibirihi, dai nahi. Dai tokiya, mai‑ya dai koboniya, dai maanamariyahi. Hini dai toka, dai tokiyahi.
5Mai‑ka yobe‑ya dai tokiyomiya, dai ati yananiyahi.
‘Ahi‑ya dai wi‑wina Deoso dai‑ya kasomebonane.’ Dai ati niyahi.
6Yobe hidi ati someya, yobe‑ya mai sawe mai‑ya Deoso kasomebonane. Yobe hidi ati amosareya, mai sawe mai‑ya Deoso kasomarebonane.
7Mai tabori‑ya dai koboniya, Yobe ohari‑ya dai wina, dai dayoriyahi. Dai tefe‑bone‑ya mai daaniya, dai tafiyahi. Hini mai daahini‑ya dai fawiyahi. Mai‑ka yama ai anina, ai‑ka yama manakone‑ya mai daateni.
8Mai tabori‑ya dai koboni‑ka dai‑ya mai ati nofa, dai tefe‑ba mai daaniya, dai tafiyahi.
9 # 10:9 “Deoso ai nafi‑ka hidi kitabote tohawahebona dai‑ya sawine.” I‑di Yeso bofe‑ya sawi tamine amane. Mai tabori‑ka mai kiyana, mai‑ya dai nakitamiyahi.
‘Deoso ai nafi‑ka hidi kitabote tohawahebona dai‑ya sawine.’ Dai ati niyahi.
10Mai tabori‑ya dai koboni‑ka dai‑ya mai nofariya, mai‑ka hawi‑ya dai demenariya, mai‑ya dai hiyariyahi.
11‘Dai‑ka wami hibakori oda teme kiha oda nanahabineni, dai atibodi yama‑ya kadikabonehe. Deoso ai nafi‑ka hidi kitabote tohawahebona dai‑ya kobone, dai nofarene.’ Mai‑ya dai hiyara, dai ati niyahi.
12Owati dai mitahi. Hibati‑ya Sodoma‑ya mai wi‑wina Deoso mai‑ya nanahabematamonane. Ai nafi ene‑ya Deoso kadikeya, mai‑ya bisinamatasebonane. Owa tamine dai kamina, dai ati‑ya mai nofara mai‑ya Deoso bisini kitabisebonane.
13Ka! Korasi‑ya dai wi‑wina, Besaida‑ya dai wi‑wina, dai na, dai ene manakone wadani. Owa ene kitabote‑ya dai awamaro, owati‑ya dai nofaramaroni. Tiro‑ya mai wi‑wina‑mete, Sidoho‑ya mai wi‑wina‑mete, mai na, Deoso ati‑ya mai tokadabara, tabora fami‑ya Deoso nanahabematamonane. Owa ene kitabote‑ya mai awi bahamete‑mani, mai atibodi amosawama nemeteni.
14Hibati‑ya Tiro‑ya mai wi‑wina‑mete, Sidoho‑ya mai wi‑wina‑mete, mai na, ai nafi ene‑ya Deoso kadikeya, mai‑ya weenamataseya, Deoso dai‑ya weeni kitabisebonane.
15Kafanaho‑ya dai wi‑wina neme‑ya dai winabone dai ati na, yama hirini‑kaya dai sawibisaboneni.” Yeso ati nematane.
16Hika mai da‑daba mai‑ya hiyare,
“Dai ati‑ya mai tokadaba owati‑ya mai tokadabahareni. Dai ati‑ya mai nofara owati‑ya mai nofaharirani. Owati‑ya mai nofara owa‑ya yose‑mari ati‑ya mai nofaharirani.” Yeso ati nematane.
17Mai toka, Yeso ati‑ya mai kaminameteni. Makobote 72 mai kana mai kamatasa, mai ya‑yaini nafi, Yeso‑ya mai hiyara,
“Ayo, tiwa oni oda kamina, madi towe mai kananani.” Mai ati nameteni.
18“Satanasi bofe‑ya sone oawene. Bahi yebekane‑nima soninene.
19Owati dai mitahi. Dai okasomabone, maka dai tainisa, yomasa dai tainisa niya, dai‑ya yama komaraboneni. Owa ene dai kiti nafe, Satanasi kiti bi‑bidi nibisane. Yama towe dai‑ya komaraboneni.
20Dai ati ene madi towe mai kananamone, dai ya‑yaini nafiriyahi. Neme‑ya dai oni‑ya Deoso kanahano ene dai ya‑yaini nafibisahi.” Yeso ati nematane.
21Mai‑ya hiyareya, Deoso‑ka Doni ene Yeso ya‑yaine, ati yanane,
“Abi Deoso, bofe‑ka hidi tiha, neme‑ka hidi tiha, tiwa ene ya‑yai·oneni. Yama‑ya mai wa‑wato‑mone mai ati na tiwa ene‑ya mai watorani. Madehe‑nima mai na, yama‑ya mai watoramone mai ati na, tiwa ene‑ya mai watobisineni. Tiwati‑maro‑nima yama nineni.” Yeso ati nematane.
22Yeso ati yananamatase,
“Okobi ene yama nafi okayafawahineni. Owa‑ya dai wato nafira, owa‑ya Okobi watobisane. Okobi owato oteni. Owati ihi Okobi‑ya dai one watomake, dai‑ya okasomara‑mani, Okobi dai watora neni.” Yeso ati nematane.
23Hika mai da‑daba mai‑ya kiinawame, hi‑hiyararamamatane, ati mai one himitarebonaha.
“Dai ya‑yainahi, owa dai awaro.
24Owati dai mitahi. Hibati‑ya Deoso ati‑ya mai mi‑mita‑mete mai toha, mai‑ka hidi webote‑mete mai toha, mai na, owa‑ya mai awabone mai ati namete, owa‑ya mai awi awirameteni. Owati‑ya mai mitabone mai ati namete, owati‑ya mai miti awirameteni.” Yeso ati nematane.
Samaritano tamine‑ya Yeso hiyare
25 # 10:25 Ai abaterabone‑kaya: Deoso tabaro tamine amane. Makobote Mose‑ka yama hani ati‑ya ka‑kanawato Yeso‑ya kaki,
“Owa ene Yeso ati tosawaribonane.” Atibodi ati ne, Yeso‑ya hiyare,
“Yeso, hini yamata‑nima owa ene nibati, ai abaterabone‑kaya osawebonehe?” Ati nematane.
26“Mose‑ka yama hani tikadika, eme ati titi?” Yeso ati nematane.
27“‘Ai‑ka hidi webote i‑di Deoso dai nofi nafihi. Yama one dai nofi nafiriyahi. Deoso‑ta dai nokotonibisahi. Hini tiwa‑ya tinofi‑nima dai yakari‑ya mai sawe mai tinofiyahi.’ Deoso ati tene.” Mose‑ka yama hani ati‑ya ka‑kanawato ati nematane.
28“Fara amani. Tiwati‑nima tiniya, ai abaterabone‑kaya tisaweboneni.” Yeso ati nematane.
29Mai nafi‑ya nofare, ati yananamatase,
“‘Dai yakari‑ya mai sawe mai tinofiyahi.’ Yama hani ati na,
ebeni‑ke tamine amanati?” Ati nematane.
30Maki‑ya Yeso kanawatobona hiyare,
“Yerosare‑ya ai owa wine, Yeriko‑ya toke, hawi‑ya yakaneya, yama‑ya mai bo‑boti mai warahine, mai bisihine, borone mai hiwake, tohomakosane, abi yananeri.
31Deoso‑ka yama‑bone‑ya da‑daa hawi‑ya yakane, maki home‑ya awe, dodikose, tokane.
32 # 10:32 Refi‑ka nodi Yodeo mai toha, Deoso‑ka yobe‑ya yama‑ya mai aninametemoneni. Samaritano Yodeo mai toharametemoneni. Nowati‑ya Refi‑ka nodi kamaki, maki home‑ya awe, dodikose, tokomakitasane.
33Mai nowati‑ya Samaritano mai‑ka owa kamaki, maki home‑ya awe, fai‑ya nofe,
34hemedi‑ya hikatee, bora‑ya sokihikane, bani mese‑ya hiwatari, oteo‑ya hiwakame, hikasomane.
35Yama wahabisari‑ya oteo hidi‑ya hiyare,
‘Mai bisihine tikasomaho. Manakone daa·oni bahe. Okomatasiya, manakone kote onahabamakibonane.’ Ati nane.
Mahi fame‑ya yama‑ya ai anina manakone‑nima yinero ne‑ya daanane.
36Mai 3 kana maki‑ya mai awani. Tiwati omitahi. Ebeni‑ke yama hani ati‑nima ene nihi?” Yeso ati nematane.
37“Maki‑ya kasome, yama hani ati‑ya tokadababisane.” Ati nematane.
“Fare ene‑nima tiwa ene nahi.” Yeso ati nematane.
Maata‑ya Yeso kanawato
38Yeso mai eyehe toke, tabora one‑ya mai kobona, Maata ati ihi hika yobe‑ya mai sawemeteni.
39Maata‑ka asima i‑di Mariya Yeso yowi‑ya itaremeteni, Yeso ati‑ya mitabonehe.
40I‑di Maata mai tafebone anini‑ya nokotonihe, ati yanana,
“Ayo, owa hare yama‑ya ani·ona, owa tiawahi. Oka asima tiyosehi, owa‑ya kasomabonehe.” Maata ati nameteni.
41“Maata, Maata, yama anini dama‑ya nokotini kitineni.
42I‑di Mariya owati‑ya mitabone itare, oyoseteraboneni. Owati‑ya no‑nofa amosi nafibisineni. Owa tefe‑bone‑ya wamana amosi bi‑bidi neni.” Yeso ati nematane.
वर्तमान में चयनित:
Roka 10: jaaNT
हाइलाइट
शेयर
कॉपी
Want to have your highlights saved across all your devices? Sign up or sign in
