Roka 19
19
1Yeriko‑ya Yeso yakane,
2tamine‑ya Sakeo mite, Yeso‑ya awebona tokomematane. Sakeo kofeno‑ka yinero‑bona‑ya ha‑haa mai‑ka hidi owa amane. Yinero nafi‑ya kihematane.
3Yeso‑ya awebona tokome, wai da‑daone, noko mai dama mai barihikanematane.
4Hawi‑ya awa wai‑ya awe, kanani dai towame, awa‑ya tokomisematane, Yeso‑ya awebonaha.
5Yeso kamaki, noko tokomise, Sakeo‑ya awe, Sakeo‑ya hiyare,
“Sakeo, tikisamahi. Tika yobe‑ya okaboneni.” Yeso ati nematane.
6Yeso ati‑ya Sakeo mite, kisama kanibote ne, ya‑yainematane. Hika yobe‑ya Yeso‑ya towakamematane.
7Sakeo‑ka yobe‑ya Yeso tokebona‑ya mai awa, Yeso‑ya mai weena,
“Ati kasiro‑ka yobe‑ya Yeso tokiyomebanane.” Mai ati nameteni.
8Sakeo waa kanibote ne, Yeso‑ya hiyare,
“Ayo, owati timitahi. Mai‑ka yama wadara mai‑ya oka yama beheri daa·onaboneni. Mai‑ka yama one obotemaro, mai‑ka yama 4 kanabone daa·onamatasaboneni.” Sakeo ati nematane.
9 # 19:9 Abaraho‑ka nodi Sakeo tohe, Yeso ati ne, Abaraho Deoso ati‑ya nofemata‑nima i‑di Sakeo ne, Deoso ati‑ya nofawahane. “Sakeo, Abaraho‑ka nodi tihawaha, hibayata Deoso tiwa‑ya kayawane.
10Bofe‑ya dai wi‑wina dai‑ya okemaro, Deoso hawine dai watora dai‑ya siba·onaboneni, dai okayafabonehe.” Yeso ati nematane.
11Yeso ati‑ya mai mitiya,
“Yerosare yakari‑ya Yeso kobonane. Deoso ai nafi‑ka hidi kitabote tohawahebona‑ya yama yana kanibote naba awineni.” Mai atibodi ati nameteni.
Mai atibodi ati‑ya Yeso wato, mai‑ya kanawatobona, mai‑ya hiyare,
12“Owati dai mitahi. Ai tabaro yaka‑ya hidi webote wai‑ya mai‑ka hidi bi‑bidi ne tokebona ati nene. Hidi webote hikasomebona, kiti ba‑basi nebona ati nene. Yananebona,
13hika mai yo‑yose mai 10 kana mai‑ya haane. Mai‑nima mai‑ka yinero webote oharirine‑ya daane, mai‑ya hiyare,
‘Owa nowati‑ya oka yinero dai tonanafiyahi. Okomatasiya, oka yinero owa‑ya dai daanamaboneni.’ Maki ati nane.
14Maki‑ya mai one kaka, mai ati ihi mai‑ka yo‑yose mai tokomake, hidi webote‑ya mai hiyara,
‘Tiwati ihi maki kiti ba‑basi rebonane.’ Mai‑ka yo‑yose mai ati nineni.
15Hidi webote ati ene maki kiti ba‑basi ne, maki kameya, hika yo‑yose yinero‑ya mai na‑nawada mai‑ya haane,
‘Dai‑ka yama anini tamine omitaboneni.’ Ati ne,
16‘Ayo, yinero ohari owa‑ya daatinamaro, yinero 11 tohawahane.’ Hika yo‑yose owa ati nane.
17‘Tiwa ene amosa, hibati‑ya tika yama bide daa·onamaro, owati‑nima tina, owati ihi tika yama damawahaboneni. Mai tabori 10 kana mai‑ka hidi tihawahaboneni.’ Hidi ati nane.
18Hika yo‑yose owa kamaki,
‘Yinero ohari owa‑ya daatinemari, yinero 6 tohawahane.’ Hika yo‑yose owa ati ne,
19‘Owati ihi mai tabori 5 kana mai‑ka hidi tihawahaboneni.’ Hidi ati nane.
20Hika yo‑yose owa kamaki,
‘Hibaha, yinero owa‑ya daatinamaro, tikayahamatasahi. Bora‑ya kini·okane, okahemamaroni.
21Tiwati ihi owa habo siitonineni. Tiwa eme kitateni. Mai one ihi tika yinero dodame, yinero nafi tikayahateni. Awa‑ya anitira, yamata marafakaniya, yamata tikayahateni.’ Ati nane.
22-23‘Hini yamata ihi oka yinero bahako‑ya daatini awiriti? Oka yinero bahako‑ya daatina‑mani, okomiya, oka yinero‑ya mai daanamatasa, mai‑ka yinero kote‑ya mai daanahare neni. Owa eme kitatemone tina, mai one ihi oka yinero dodame, yinero nafi okayahatemone tina, awa‑ya ani·ora, yamata marafakaniya, yamata okayahatemone tinani. Tiwati‑nima yama naboneni.’ Hidi ati nane.
24Mai yorona mai‑ya hiyare,
‘Yinero ohari dai kayafe, yinero 10 kani‑ya kihe‑ya dai daanahi.’ Hidi ati nane.
25‘Hika yinero 10 kane, hini yamata‑nima neba yinero‑ya mai daatonamakibati?’ Mai ati nineni.
26‘Hika yama toha, hika yama one daa·onaboneni. Hika yama awira oka yama‑ya damanamaterebonane.
27 # 19:11-27 Yeso ai nimaniya, Deoso‑ka yama‑ya ai aninahi. Yeso kamataseya, ai ene amosa manakone‑ya daanebonane. Yeso‑ya mai nofara mai‑ya Yeso weeni kitebonane. Owa‑ya mai kakamaro, mai‑ka hidi ohi awirabone, mai ati namaro, owa noko‑ya mai dai nanahabahi.’ Hidi ati nane.” Yeso ati nematane.
Boho yetene mese‑ya Yeso itari
28Yeso hiyari hawa toheya, yananamatasematane, Yerosare‑ya tokomorosebonaha.
29Orifera adami yakari‑ya tabora bi‑bidi na, Betaniya toha, Befaki toha na, fara yakari‑ya Yeso mai kobona, Yeso hika mai da‑daba mai fama mai‑ya yosematane.
30“A‑ahi‑ya mai tabori‑ya dai towakahi. Mai tabori‑ke boho yetene yaditone dai awiya, dai disawaheya, dai kakamayaho. Hibati‑ya boho yetene mese‑ya mai itariterani.
31‘Hini yamata‑bone boho yetene‑ya dai disawahiti?’ Mai ati niya,
‘Ai‑ka hidi haahinene.’ Dai ati niyahi.” Yeso ati nematane.
32Mai hiyose, mai towaka, tabora‑ya mai kobokana, Yeso ati‑nima yama na‑ya mai awameteni.
33Boho yetene‑ya mai disawaha, boho‑ka hidi ati yanane,
“Hini yamata‑bone boho yetene‑ya dai disawaha?” Ati nematane.
34“Ai‑ka hidi haahinene.” Mai ati nameteni.
35Boho yetene‑ya mai kakama, boho yetene mese‑ya mai‑ka bora‑ya mai sookanire, Yeso‑ya mai nawitariwahameteni.
36Mai toka, Yeso hawine‑ya mai‑ka bora‑ya mai nawiyameteni.
37Yerosare yakari‑ya mai yakana, Orifera adami‑ya mai tokofawaha, mai dama mai‑ya mai daba mai ati yanana, mai ati kita, mai ya‑yaina, Yeso ene kite‑ya mai awamaro Yeso ene‑mari tamine‑ya mai hiyara, Deoso‑ya mai kahiyarameteni.
38“Oda‑ka hidi webote amatini. Deoso tiwa‑ya yose, tiwa‑ya kasomayaho, oda ati nineni. Deoso ati somane, Deoso neme‑ke ai kahiyarineni.” Mai ati nameteni.
39Mai ati‑ya fariseo mai mita, Yeso‑ya mai hiyara,
“Yeso, tiwati ihi mai ati fawanahi.” Fariseo mai ati nameteni.
40 # 19:40 Boho bidi yetene mese‑ya Yerosare hidi itari‑ya kamebonane. Deoso‑ka yama hani ati na, fara yama hani ati‑nima yama yanana, mai ya‑yaini nafemetemoneni. Yeso ai one kahiyari awira‑mani, Deoso ati ene yati ati yana nani, Yeso‑ya kahiyarabonehe. Fariseo mai‑ya Yeso hiyare,
“Owati dai mitahi. Mai ati fawana‑mani, yati ati yanana neni.” Yeso ati nematane.
Yerosare‑ya Yeso awe, ohinane
41Yerosare yakari‑ya Yeso kobone, mai tabori‑ya awe, ohinawahematane.
42“Deoso ati somawama‑bona‑ka yama dai wata‑mani, yama sibara neni. Hibayata dai wato awiraboneni.
43Yama kobonabone tamine okaminaboneni. Dai‑ya mai kaka, Yerosare‑ya mai kakidikosabone, awayara mai wamanaboneni, dai fidotorabonehe.
44Dai‑ya mai nanahababone, dai‑ka yobe‑ya mai nanahababone, yati fama demenare wadamateraboneni. Hibayata Deoso dai‑ya sawi, dai watore ene dai abawahaboneni.” Yeso ati nematane.
Deoso‑ka yobe‑ya Yeso toke
45Deoso‑ka yobe‑ya Yeso toke, yama‑ya mai da‑daa mai‑ya kananihi,
46mai‑ya hiyare,
“‘Oka yobe‑ya owa‑ya mai hiyaraboneni.’ Deoso‑ka yama hani ati na,
dai ene yama‑ya mai bo‑boti mai‑ka yobe‑nima yobe nawawahane.” Yeso ati nematane.
47Mahi‑nima Deoso‑ka yobe‑ya Yeso mai‑ya kanawatomatane. Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai bi‑bidi na mai toha, mai na, Yeso‑ya mai nanahababone, mai ati nameteni.
48Mai dama Yeso ati‑ya mai nofi nafe, mai ihi mai‑ya mai nayofina, Yeso‑ya mai nanahabi awirameteni.
वर्तमान में चयनित:
Roka 19: jaaNT
हाइलाइट
शेयर
कॉपी
Want to have your highlights saved across all your devices? Sign up or sign in
