Roka 23
23
1Birato‑ya Yeso‑ya mai towakamameteni, mai nafi.
2Yeso tamine‑ya keyehe‑ya mai hirina,
“Yeso ene ai one dama kofeno ati‑ya mai nofamarani.
‘Sesa‑ka yinero‑bona dai daariyahi.’ Yeso ati nihi,
‘Deoso‑ka Ka‑kadika ama·oni. Hidi webote ama·oni.’ Yeso ati nihi tene.” Mai ati nameteni.
3“Yodeo mai‑ka hidi webote amatiraniha?” Birato ati ne,
“Tiwati‑nima, fara ama·oni.” Yeso ati nematane.
4Deoso‑ka yama‑bone‑ya mai da‑daa mai‑ka hidi mai toha, mai dama mai toha, mai na, mai‑ya Birato hiyare,
“Yeso ene towe tohi awirene.” Ati nematane,
5Birato ati‑ya mai mita, mai ati fawara,
“Karireya‑ka mai‑ya hiyaremari, Yodeya‑ka mai‑ya hiyaramakine, ati ene kofeno ati‑ya mai nofamarani.” Mai ati nameteni.
6Karireya tamine‑ya Birato mite, mai‑ya hiyare,
“Karireya Yeso tabaro tohe awane.” Birato ati ne,
7“Hehe, Karireya‑ya tabaro tohane.” Mai ati nameteni.
Karireya‑ka mai‑ka hidi i‑di Erodi tohematane. Hibayata Yerosare‑ya i‑di Erodi sawi,
“I‑di Erodi‑ya dai towakamaho.” Birato ati nematane.
8Yeso‑ya mai towakama, Yeso‑ya i‑di Erodi awe, ya‑yainane. Hibati‑ya Yeso tamine‑ya Erodi mite, atibodi yama‑ya kadike,
“Yeso oawiya, Yeso ene kitemona mai ati na, ene oaweba awane.” Atibodi ati nematane.
9Yeso ati‑ya Erodi mitebona, hiyari dame, Yeso ati yanarematane.
10Deoso‑ka yama‑bone‑ya mai da‑daa mai‑ka hidi mai toha, Mose‑ka yama hani ati‑ya mai ka‑kamina mai toha, mai na, Yeso ene towemona tamine‑ya Erodi‑ya keyehe‑ya mai hirina, mai ati kitameteni.
11I‑di Erodi, hika sodado mai eyehe Yeso‑ya hahakane, hidi webote‑ka bora‑ya Yeso‑ya weyenihematane. Birato‑ya mai hiwakamatasematane.
12Hibati‑ya i‑di Birato i‑di Erodi mai ibi ka‑kako, hibayata mai ibi nofawahameteni.
13Birato ati ene mai yorotokana, Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai toha, hidi mai tohara mai toha, mai na, mai yorotokanameteni.
14Birato mai‑ya hiyare,
“Yeso ati ene kofeno ati‑ya mai dami nofamaramone dai ati na, Yeso ati omite, dai ati‑nima ene re, ati sibarene.
15Erodi Yeso weehire, hiniya hiyosematasane. Owati dai mitahi. Yeso ene towe wadare, abarayaho.
16Owati ihi Yeso‑ya mai bisiniya, mai seekanebonane.” Birato ati nematane.
17(Ka‑kariwa‑ya mai marini‑ya mai‑ka owa‑ya Birato seekaritene.)
18Birato ati‑ya mai mita,
“Yeso abaho. Barabasi‑ta seetikanahi.” Mai ati nameteni.
19Kofeno‑ka yo‑yose mai‑ya Barabasi bisine, maki‑ya nanahaba ne, hini ene mai hiwate, kadeya‑ya mai hinafoyawahematane.
20Yeso‑ya Birato seekanebona, mai‑ya hiyaramatasematane.
21Birato ati‑ya mai nofara,
“Awa‑ya baakanaho. Awa‑ya baakanaho.” Mai ati na, mai ati kitameteni.
22“Hini yamata ihi baa·okabati? Yeso ati omite, Yeso ati sibarene. Yeso ene towe wadare, abarayaho. Owati ihi Yeso‑ya mai bisiniya, mai seekanebonane.” Birato ati nematane.
23Mai ati kita,
“Abaho. Awa‑ya baatikanahi.” Mai ati na, mai ati damameteni.
Mai ati fawani watora, Birato atibodi kitamare,
24mai ati‑nima sodado mai‑ya Birato yosenematane.
25Barabasi kofeno‑ka yo‑yose mai‑ya bisine, maki‑ya nanahaba ne, hini ene mai hiwate, kadeya‑ya foyemari, Birato ati ene mai seehikanematane. Sodado mai‑ya Birato yosematane, Yodeo mai‑ka hidi mai ati‑nima yama nabonehe.
Yeso‑ya mai baakana
26Yeso‑ya mai towakamameteni, Yeso‑ya mai baakanabonehe. Simaho Sireni‑ke kabani‑kaya kame, mai warahine, Yeso ewene‑bona‑ya diwanematane. Yeso dai tohe, nowati‑ya Simaho Sireni‑ke yotomatane.
27Yeso nowati‑ya mai dama mai tokomake, Yeso tabiyo mai fanawi ohina, hini mai‑ya mai batanameteni.
28Mai fanawi‑ya Yeso hiyare,
“Yerosare‑ya dai wi‑wina owa tabiyo dai ohiriyahi. Dai abano toha, dai‑ka madehe toha na, tabiyo dai ohinibisahi.
29Yama towe kobonabone, yama koboniya, dai ati yananabone,
‘Ai‑ka ewe awire‑mana, yama sibara neni. Madehe mai kihara mai sibabisarineni.’ Dai ati naboneni.
30Adami webote‑ya mai hiyarabone,
‘Oda‑ya tisohi, oda‑ya baritikanaba.’ Mai ati naboneni.
31 # 23:31 Awa yati Yeso tamine amane, mai hinahabebonaha. Awa bote Yerosare‑ka mai tamine amani. Mai ihi towe toha mai ihi manakone koboneya, mai kome kiti nafeboneni. Hibayata awa yati‑ya mai sarikana, awa bote hirini kitaboneni.” Yeso ati nematane.
32Mai ihi towe mai fama mai‑ya mai towakamakemeteni, Yeso eyehe mai ababonehe.
33Ai tati tone wai‑ka adami‑ya mai kobona, Yeso‑ya mai baakanameteni. Mai ihi towe mai fama Yeso‑ya mai dabameteni. Yeso mano kanika‑ya owa mai baahikana, Yeso mano sayo‑kaya owa mai baahikana hinematane.
34“Abi Deoso, yama‑ya mai watorini. Mai‑ya weetiriyahi. Mai‑ya tiwati somahi.” Yeso ati nematane.
Yeso borone‑ya sodado mai‑ka owa kayafebona, yati bide‑ya mai werenameteni.
35Mai nahokosa Yeso baakane‑ya mai kakatomameteni. Yeso‑ya mai‑ka hidi mai weena,
“Mai one‑ya kasomemari, Kirisito‑mona, Deoso‑ka Ka‑kadika‑mona, hini‑ya kasome ai awahi.” Mai ati nameteni.
36Yeso‑ya sodado mai weenahare, fino kofate‑ya mai daanameteni, Yeso hifebonehe.
37“Yodeo mai‑ka hidi webote tiwa‑mone, tiwa tikasomahi.” Mai ati nameteni.
38Yeso tati neme‑kaya yama hani kawana,
“Yodeo mai‑ka hidi webote amane.” Yama hani ati nameteni.
39Maki mai baahikane, Yeso‑ya weene,
“Deoso‑ka Ka‑kadika tiwa‑mone, ai tikasomahi. Ai kisamaboneni.” Ati nematane.
40Mai baahikane owa ati yanane,
“Deoso tinayofina awini? Tiwati arabanahi. Yeso‑ya mai nanahababone‑nima ai‑ya mai nanahabahareboneni.
41Ai ene amosara, ai ene manakone ai kayafineni. Yeso ene amose hinama amane.
42Yeso, oda nafi‑ka hidi kitabote tihawahiya, owa‑ya tiwatibodi kadikiyahi.” Maki owa ati nematane.
43“Owati timitahi. Hibayata tabora amosabote‑ya okomabone, owa‑ya tisawebani.” Yeso ati nematane.
44Mahi nokorise‑ya mahi wehene fawane, 3 ora‑ya wehene yananamatasematane.
45Deoso‑ka yobe‑ka bora baye winamaro, fara kebemeteni.
46Yeso haane,
“Abi, owa korimari tikayahi.” Ati nematane.
Ati hawa tohe, abawahematane.
47Mahi wehene fawane‑ya sodado mai‑ka hidi awe, Yeso ati‑ya mite,
“Deoso ene amane.” Atibodi ati ne,
“Yeso ene amosabisane.” Ati nematane.
48Yeso‑ya sodado baakane‑ya mai dama mai awamaro, mahi wehene fawane‑ya mai awa, mai ati‑ya mai mita na, mai atibodi a‑arira, mai tokomameteni.
49Ahiyata to‑toha ni‑ya Yeso‑ka mai dama mai naha, mai‑ya mai kakatomameteni. Mai fanawi sawe, fara hibati‑ya Karireya‑ya Yeso‑ya mai dabamaro, Yeso tokeya, mai tokomakemeteni.
50Yose Yodeo mai‑ka hidi bidi owa tohe, ene amose, Deoso ati‑ya nofematane.
51Deoso ai nafi‑ka hidi kitabote tohawahebona‑ya nimanematane. Hidi mai one Yeso‑ya mai weena, mai ati‑nima Yose ati ni awirematane. Yodeya‑ya tabora one toha, oni Arimateya toha, fara‑ya Yose wiinematane.
52I‑di Birato‑ya Yose toke, Yeso abo‑ya haanematane, hikamebonaha.
53Yeso abo‑ya i‑di Yose idibase, bora wefe wamani‑ya hikatafematane. Ai temene‑ka yati hodi‑bone mai wamahinamete, fara ai abo nafoyateri‑ka hodi‑ya Yeso abo‑ya nafoyematane.
54Deoso‑ka feriado kobonabone, yama‑ya mai a‑animara‑ka koboni yanatonameteni.
55Hibati‑ya Karireya‑ya Yeso‑ya mai fanawi dabamaro, Yeso tokeya, mai tokomakemaro, fara mai fanawi Yeso abo‑ya Yose towakame‑ya mai tokomake, yati hodi‑ya Yeso foye‑ya mai awameteni.
56Makobote tabora‑ya mai fanawi tokomameteni, yama mahi amosa‑ya mai wamanabonehe. Mose‑ka yama hani ati ihi feriado‑ya yama‑ya mai anini awirameteni.
वर्तमान में चयनित:
Roka 23: jaaNT
हाइलाइट
शेयर
कॉपी
Want to have your highlights saved across all your devices? Sign up or sign in
