YOANO 1
1
1Ha uputukilo hapwile Liji, ni Liji liapwile hamwe ni Zambi, ni Liji liapwile Zambi. 2Mwenawo wapwile ha uputukilo hamwe ni Zambi. 3Yuma yeswe yatangiwile ku tachi jenyi; katangile nichimwe chuma chize atangile shina kuli iye. 4Muli iye mwapwile mwono; ni mwono wapwile pangu lia atu. 5Ni pangu yilipanguka mu milima; ni milima kuyakumbilelio.
6Kwapwile mutu wa kutumiwa kuli Zambi, jina lienyi Yoano. 7Mwenawo wejilile Shindakenyo, hanga akashindakenye ha pangu, hanga eswe ku Shindakenyo yenyi akafuliele. 8Iye kapwile lie pangu, alioze hanga akashindakenye ha pangu.
9Pangu liamwenemwene liapwile lize, ha kwiza hano hashi, mulipangulwisa atu eswe. 10Iye wapwile hano hashi, ni hashi hatangiwile kuli iye, ni akwa hashi kamunyingikineko. 11Wejile ku yuma yenyi mwene, ni atu jenyi mwene kamutambwileko; 12alioze kuli waze eswe amutambwile wahanyine chiyulo cha kupwa ana a Zambi, te kuli waze akufuliela ku jina lienyi; 13aze asemukine hi ku manyinga ko, chipwe ku upale wa musunya, chipwe ku upale wa lunga, ka, alioze kuli Zambi.
14Mba Liji walipwishile musunya, Watwamine hakachi ketu wa tò ni vumbi ni umwenemwene (twatalile uhenya wenyi, uhenya ngwe wa mwe Mwana wa wika wa kuli Tata).
15Yoano washindakenyene hali iye, wakololokele ngwenyi, yono iye nambile ngwami, Yoze meza kunyima yami iye kulutwe liami: mumu iye waliangile. 16Mumu cha ku kulumbama chenyi yetu eswe hitunatambula, ni vumbi ha vumbi. 17Mumu ahanyine shimbi ku kwoko lia Mose; vumbi ni umwenemwene yejile kuli Yesu Kristu. 18Niumwe wamwene Zambi niumwe mwaka; mwe Mwana wa wika, yoze uli mu kondo ya Tata, iye hanamusolola.#1.18 ya chingoloshi.
19Yino ye Shindakenyo ya Yoano, muze A-Yunda atumine ku Yerusaleme asasendote ni A-Levi, hanga akamuhule ngwo, Yena iya? 20Iye Watayijile, kalikalileko; Watayijile ngwenyi, Hi Kristu ko. 21O amuhulile ngwo, Mba kuchi, yena uli Eliya, nyi? Iye yamba ngwenyi, Hi yami ko. Ngwo, Yena uli mwe profeta, nyi? Iye wakumbulwile ngwenyi, Ka. 22Ambile kuli iye kashika ngwo, Yena iya? Hanga tukahane kumbululo kuli waze anakatutuma; kuchi wakulivuluka yena mwene? 23Wambile ngwenyi, Yami nguli liji lia yoze unakololoka mu puya ngwo, Lulamisenu jila ya Mwene, ngwe ambile profeta Izaia.
24O atumiwine kuli A-Fwariseu. 25Amuhulile, ngwo, Mba kuchi te wakupapachisa atu, kachi yena hi uli mwe Kristu ko, chipwe Eliya, chipwe mwe profeta? 26Yoano waakumbulwile ngwenyi, Yami nakupapachisa mu meya; alioze umwe kanamana mukachi kenu, yoze kunwamunyingikine, 27iye yoze meza kunyima yami, lusapo wa luhaku wenyi chatelele kumujitula. 28Alingile yino yuma mu Mbetaniya kuze-kanda lia Yordau, kuze apwile Yoano nikupapachisa.
29Muze hikwacha yamona Yesu kaneza kuli iye, neye yamba ngwenyi, Talenu mwe Mwana-panga wa Zambi, yoze machiza shili ya akwa hashi! 30Yono yoze nambile ngwami, Kunyima yami kumeza lunga, mwenawo kapwa kulutwe liami; mumu waliangile. 31Ni yami te chamunyingikine; alioze hanga akamusolole kuli A-Izalele, kashika nejile nikupapachisa mu meya. 32Yoano washindakenyene ngwenyi, Ngunakamona Spiritu kanahulumuka mwilu ngwe katele; kanakatwama hali iye. 33Ami chamunyingikine; alioze yoze wangutumine mukupapachisa mu meya, wambile kuli yami ngwenyi, Hali mweswawo mukamona Spiritu kanahulumuka nikutwama hali iye, mwenawo yoze mapapachisa muli Spiritu Musandu. 34Hingunamono; hingunashindakenya ngwami, Yono mwe Mwana Zambi.
35Cheka nawa muze hikwacha, Yoano te kanamana, ni aali a kuli tumbaji twenyi; 36iye watalile kuli Yesu shimbu anende, yamba ngwenyi, Talenu mwe Mwana-panga wa Zambi! 37Tumbaji aali amuvwile nikuhanjika, o akawile Yesu. 38Yesu watewulukile, waamwene nikukaula, yamba kuli ayo ngwenyi, Kuchi nunafupu? O ambile kuli iye ngwo, Rapi (linalumbunuka ngwo, Longeshi), kulihi watwama? 39Yamba kuli ayo ngwenyi, Tweyenu, nutale. Ayile kashika, amwene kuze atwamine; o atwamine hamwe nenyi tangwa lize: mumu hapwile ngwe ola #1.39 ya chingoloshi.amuchikumi. 40Umwe wa kuli waze aali evwile Yoano, amukawile, iye Andeleu, mwanakwo wa Semone Petulu. 41Iye hatangu yawana yayo Semone, yamba kuli iye ngwenyi, Hitunawane Mesaya (linalumbunuka ngwo, Kristu). 42Iye wamutwalile kuli Yesu. Yesu watalile kuli iye, wambile ngwenyi, Yena uli Semone, mwana Yona; kumakuluka ngwo, Sefwa (linalumbunuka ngwo, Petulu).
43Muze hikwacha, Yesu wazangile kuya ku Ngalileya, iye yawana Fwilipe; yamba kuli iye ngwenyi, Ngukaule. 44Achi, Fwilipe wapwile wa ku Mbeteseta, lie limbo lia Andeleu ni Petulu. 45Fwilipe yawana Natanele, yamba kuli iye ngwenyi, Hitunawane yoze asonekene Mose mu mikanda ya shimbi, ni aprofeta nawa, Yesu wa ku Nazare, mwana José. 46Natanele yamba kuli iye ngwenyi, Chuma chipema muchihasa kukatuka ku Nazare, nyi? Fwilipe yamba kuli iye ngwenyi, Tweya utale. 47Yesu wamwene Natanele kaneza kuli iye, yamba ha kutwala kuli iye ngwenyi, Talenu Ka-Izalele wamwenemwene, muli iye wakuhi kalimbalimba niumwe! 48Natanele yamba kuli iye ngwenyi, Kulihi yena unangunyingikina? Yesu wamukumbulwile, ngwenyi, Muze te Fwilipe kanda akutambika, muze wapwanga mushi lia mukuyu, nakumonanga. 49Natanele wamukumbulwile ngwenyi, Longeshi, mwe Mwana Zambi yena; mwe Mwanangana wa Izalele yena. 50Yesu wamukumbulwile ngwenyi, Mumu hinamba kuli yena ngwami, Nakumonanga mushi lia mukuyu, unafuliela, nyi? Kumukamona yuma yinene yahiana yino. 51Yamba kuli iye ngwenyi, Pundu, pundu, ngunambe kuli yena ngwami, Chize ku haliapwila ndo kulutwe kumukamona lilu liakwazulula, ni angelo ja Zambi nikuzezuka nikuhulumuka hali mwe Mwana Mutu.
वर्तमान में चयनित:
YOANO 1: Csa
हाइलाइट
शेयर
कॉपी
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
