LUKA 23
23
1Mba chizavu cho cheswe akatukile, amutwalile kuli Pilatu. 2O aputukile kumusuma ngwo, Twawanyine yono mutu nikuhengesa vungu lietu, nikukanjisa kufweta lijimu kuli Sesare, chikwo ngwenyi, Kristu mwanangana yami mwene. 3Pilatu wamuhulile ngwenyi, Mwanangana wa A-Yunda yena, nyi? Iye wakumbulwile ngwenyi, Yena unambe. 4Pilatu wambile kuli asasendote akwa lutwe ni mbunga ngwenyi, Chawanyine chitela nichimwe muli yono mutu. 5Alioze ashinjikile kuhiana chikolo, ngwo, Kakuvundula atu eswe, nikulongesa kweswe mu Yundeya, nikuputuka ku Ngalileya ndo ku kuno.
6Alioze muze Pilatu evwile ngwo, Ngalileya, wahulile kachi mwe lunga, Ka-Ngalileya. 7Muze asele chinyingi ngwe kanakatuka ku chifuchi cha Heronde, wamutumine kuli Heronde, se iye mwene wapwile ku Yerusaleme ha matangwa aze. 8Achi, muze Heronde amwene Yesu, wawahililile chikolo; mumu ha shimbu linene wazangile kumumona, mumu wevwile kulu ha kutwala kuli iye; iye wataliletalile akamumone kulinga chilayi chimwe. 9Iye wamuhulile ni maliji anji; alioze kakumbulwile nichimwe. 10Asasendote akwa lutwe ni akwa kusonyeka amanyine nikumusuma chikolo. 11Heronde hamwe ni mbunga ya maswalale jenyi amulelesele, amulenyene, nikumujika hina lia mukambo lia uhenya, amuhilwishile nawa kuli Pilatu. 12Heronde ni Pilatu alikwachile usepa ha tangwa lize liene; mumu kunyima apwile ni kole hakachi ko.
13Pilatu muze hakungulula asasendote akwa lutwe ni akwa kuyula ni atu, 14wambile kuli ayo ngwenyi, Nwanehanga kuli yami yono mutu, ngwe umwe wakuhengesa atu; alioze yami, se namusopesanga kumeso jenu, chawanyine chitela nichimwe muli yono mutu, ha kutwala ku yize yuma nunamusumu nayo. 15Chipwe Heronde nawa, ka: mumu namutumanga kuli iye; kumanyi, nichimwe chakutela kufwa kachilingile. 16Kashika mungumulamba ni shikote, mungumutusula. 17(Achi, chamutamba kutusula mutu umuwika kuli ayo ha chiwanyino.)
18Alioze akololokele hamuwika ngwo, Chizenu yono, ututuswile Mbarapa. 19Mwenawo ha vunda yimwe alingile mu limbo, ni ha ungalwe, amumbilile mu zuwo lia ususu. 20Pilatu wahanjikile kuli ayo cheka nawa, nikuzanga kutusula Yesu. 21Alioze akalumiokene, ngwo, Muhachilenu ha kulusu, muhachilenu ha kulusu. 22Iye wambile kuli ayo chisuho chamuchitatu ngwenyi, Kuchi te, chipi chika hanalingi? Chawanyine chitela cha kufwa muli iye, nichimwe; mungumulamba ni shikote, ngumutusule. 23Alioze ashinjikile ni kukololoka chinene, nikumwita akamuhachile ha kulusu. Ni maliji jo akumbile. 24Mba Pilatu Wapatwile chikapwe ngwe azangile. 25Iye watuswile yoze ha vunda ni ungalwe amumbilile mu zuwo lia ususu, yoze amwichile; alioze wakunjikile Yesu, ku upale wo.
26Shimbu machimutwala, akwachile umwe Semone, Ka-Serene, kanakatuka ku minda, o amutwikile kulusu, ayimbate kunyima lia Yesu. 27Chizavu chinene cha atu ni cha mapwo amukawile, eno te kanalili mbimbi, nikulinyenga hali iye. 28Alioze Yesu, nikutewulukila kuli ayo, wambile ngwenyi, Yenu mapwo ja Yerusaleme, kanda nungulilila yami, alioze lililenu yenwene ni ana jenu. 29Mumu matangwa meza kwiza muze makamba ngwo, Kawaha miumba, ni majimo aze kasemene nilimwe tangwa, ni mele aze kaamwishine nilimwe tangwa. 30Hohene makapuluka kwamba ku milundu ngwo, Holokelenu hali yetu; ni ku mindundena ngwo, Tufukenu. 31Mumu kachi malinga yino yuma ha mutondo wa wisu, kuchi makalinga ha mutondo umu?
32Kwapwile nawa aali akwo, yingulungulu, aatwalile hamwe nenyi akaashihe. 33Muze ejile kuma kuze anavulukako ngwo, Kavwale, kuze kwene amuliachilile ha kulusu, ni yingulungulu, umwe ku chindume, ni mukwo ku chimeso. 34Yesu wambile ngwenyi, Tata, uakonekene kama; mumu kanyingikine chize analingi. O, nikulianyina mazalo jenyi hakachi ko, atele chela. 35Atu amanyine nikutala. Akwa kuyula nawa amukekwine, ngwo, Walamwinyine akwo; alilamwine mwene kachi yono mwe Kristu ya Zambi, yoze hanamutongola. 36Maswalale nawa amulenyene, nikukundama kuli iye, nikumwaha vinagre. 37Ngwo, Kachi mwe Mwanangana wa A-Yunda yena, Ulamwine yena mwene. 38Kwapwile nawa chisoneko helu lienyi ngwo, Yono Mwe Mwanangana wa A-Yunda.
39Mba umwe wa kuli yingulungulu waze aasukikile, wamusawile ngwenyi, Kachi mwe Kristu yena, Ulamwine yena mwene ni yetu nawa. 40Alioze mukwo nikukumbulula wamukanjishile ngwenyi, Yena kushi woma chipwe wa Zambi, nyi? Se uli ni uhiso umuwika. 41Yetu chamwenemwene chinatute; mumu tunatambula fweto ya kutela yitanga yetu; alioze yono kalingile nichimwe cha kupiasuka. 42Iye wambile kuli Yesu ngwenyi, Mwene, ngwiwuluke kama muze muwiza mu wanangana we. 43Wambile kuli iye ngwenyi, Pundu, ngwami, Musono uno kumukapwa hamwe ni yami mu Paraisu.
44Hapwile ngwe #23.44 Tangwa ha muchima. ola yamuchisambano, ni milima yejile hashi heswe ndo #23.44 Chingoloshi, tangwa kuliendala.ola yamuchilivwa. 45Tangwa lialayile, ni chikalakala cha hina cha tembele chapulikile mukachi. 46Yesu, nikutambika ni liji linene, wambile ngwenyi, Tata, mu moko je ngunakunjika Spiritu yami; muze te hamba chino, watulile mwono wenyi. 47Muze kapitau amwene chize alingile, wachichimiekene Zambi ngwenyi, Chamwenemwene yono mukwa ululi. 48Mbunga jize jeswe akungulukile ku chitala chino, muze amwene yuma yize alingile, ahilukile, nikulamba tulo jo nikupihilila. 49Ni waze eswe amunyingikine, ni mapwo waze amukawile ku Ngalileya, amanyine kusuku, nikumona yino yuma.
50Mba umwe lunga, jina lienyi José, mwenawo wapwile mukwa kuyula, iye lunga mupema, mukwa ululi. 51(Yono katayijile ku upatwilo wo ni chitanga cho), wa ku Arimatea, limbo lia mu Yunda; mwenawo wapwile nikutatatata wanangana wa Zambi: 52yono wayile kuli Pilatu mukwita mujimba wa Yesu. 53Iye wausunwishine, wauvungile mu hina lia linyu, wamusele mu fuka lia kutota mu liwe, muze kanda achipomba niumwe nilimwe tangwa. 54Lize liapwile tangwa lia kululika, ni tangwa lia Sambata liakundamine. 55Mapwo waze akatukile hamwe nenyi kulu ku Ngalileya, akawile kunyima, amwene fuka, ni ngwe chize asele mujimba wenyi. 56O ahilukile, alulikile mbuto ya vumba lipema ni yitumbo yipema ya kukwita.
Ha tangwa lia Sambata anamine nikulita ni liji lia shimbi.
वर्तमान में चयनित:
LUKA 23: Csa
हाइलाइट
शेयर
कॉपी
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
