Matius Matiusti mome tobogne sembe tibin nenerop yubu palilamap
Matiusti mome tobogne sembe tibin nenerop yubu palilamap
Mome toro pibog yubu eneag Matiusti Allah yubu walinge lag nembarelamsiog nena, Allahri Yesus wepto, “Nimi taluro saelbamsululam,” aro poghogne sembe ambatsiog. Allahri, “Taluro saelbamsululam,” aro webogne poneko sembe Yahudi nimiri Ibrani yubu lelamekne, “Mesias,” alamek (Yohanes 1:41, apna 4:25). Yunani yubuag, “Kristus,” alamek. Samenag agha elag wana palirop nimiag Allahri, “Yepto taulbahinun,” aro yubu nikne salag pibogti, ni salag pibogne taneko sunsunum uro Yesus pere agha elag wana palirop nimi talulamsil. Yesus sik uro Yahudi nimiri mangaroba mangarobari mangkahiek nimiag agha mangap taogti, sin nusamag ua ulamog. Yahudi nimi wamog aghana, Allahri yubu walinge ene ot Yahudi nimi mo sembe kom. Tala-tala wamang nimi agha nimi etneri elag wana palilamla tanena, Yesus pere agha talulamsil.
Matiusti yubu ene wali uro o'obaogti, mome toro pibog. Mome alnirobag pibog nena, Yesus mangap taogne sembe pibog. Amikne Yohanesti maghag pelengkaogpa, phia sikini nubungeri Yesus mibogne sembe pibog. Yesus mibogpa, wana khapto wamogti, Galilea nimi nusamag naiktop nimi wali nenelamsiogti, yubu ambarelamsiogne sembe Matiusti mome toro pibog. Yesus Galilea so'oag wamogne laplobi agha as Yerusalem piogti, ulamogha sembe mome toro pibog. Mome komobanebagna, nimiri Yesus kalag sipto ya'ag obekpa, teptop nimiag agha kamag taogne sembe mome toro pibog.
Mome toro pibog yubu eneag, Yesusna Allah yubu ambatsirop nimi nubu sirikne wamlange sembe Matiusti lag nembatsiog. Lag nembatsiog nena, Allahri mikipne Yesusag pibog andarina, Allahri nimi saelba ulamsilne sembe babe, Allahri aruksirop yubu Musaag ambarogne sembe babe, Yesusti sik uro yubu kiki telekto tibin nenero ambarelamsiog. Yahudi nimiri seneraglamek nena, Musari Allah Yubu mome wa'amogtoba lambareag mome toro pibog. Ane saog uro, Yesusti Allah yubu ambarelamsiog yubu babe Matiusti wilniro lambare nembaogti, mome toro pibog. Selek nena, Yesus yimag wamogti, Allahri saelba ulamsil nimi wamnepneap, sindi ulamnepneap sembe ambatsiog yubu mome toro pibog (pasal 5-7). Phendep nena, Yesusti eldi yubu ka'ero neleptop nimiag, “Undo-undo ulamlulom,” aro ambatsiog yubu sembe mome toro pibog (pasal 10). Wilindip nena, Allahri nimi saelba ulamsilne sembe Yesusti likiptop yubu ambatsiogha Matiusti mome toro pibog (pasal 13). Tom nena, Yesusti eldi yubu ka'ero nelebanepne sembe ambatsiog yubu Matiusti mome toro pibog (pasal 18). Lam nena, wene wamap ko'o komobanepneap, Imagneri nimi saelba ulamsinepneap sembe ambatsiog yubu mome toro pibog (pasal 24-25).
Matiusti mome tobog yubu lomag wamlange
1:1—2:23 - Yesus ilisang yabori mangarobari likto palamogpa, mangap taogha
3:1-12 - Nimi maghag pelengehiropne Yohanesti yubu ambarelamsiogha
3:13—4:11 - Yesus maghag pelengkaogpa, phia sikiniri Yesus mibogha
4:12—18:35 - Galilea so'oag wamek nimi nusamag yubu ambatto yeplamsiogha
19:1—20:34 - Galilea so'o laplobi agha as Yerusalem piogha
21:1—27:66 - Tebanep ko'oag Yesus as Yerusalem peram so'oag wamogpa obeka
28:1-20 - Yesus kamag taogti, nimi whingag lag nenep taogha
वर्तमान में चयनित:
Matius Matiusti mome tobogne sembe tibin nenerop yubu palilamap: kklKOS
हाइलाइट
शेयर
कॉपी
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.