मत्ती 9
9
दरंगो मरीज़ ठीक करनअ
(मरकुस 2:1-12; लुका 5:17-26)
1तेखअ नाठअ ईशू तिधा का किश्ती दी पार आपणीं नगरी लै। 2ता तिधी आऐ कई लोग तिन्नैं आणअ दरंगे बमारी आल़अ ईशू सेटा लै बछ़ाऊणैं प्रैंदै च़की, ईशू बोलअ तिन्नों विश्वास भाल़ी करै तेऊ दरंगे मरीज़ा लै, “ज़ुआन मणछा, हैल़अ निं करी, तेरै पाप हुऐ माफ।”
3इहअ शूणीं करै तिधी आऐ दै कई शास्त्री लागै सोठदै कि अह ता परमेशरे कदर बी निं करदअ?
4ईशू बी हेरी तिन्नें मनें गल्ल भुझ़ी, और तिन्नां लै बोलअ, “तम्हैं लोग आपणैं मनैं बूरअ किल्है सोठा? 5सान गल्ल किज़ै आसा, एऊ दरंगे मरीज़ा लै इहअ बोल़णअ कि तेरै पाप हुऐ माफ, या एऊ लै इहअ बोल़णअ कि ‘उझ़ू हांढदअ फिरदअ लाग?’
6 “ज़िहअ करै तम्हां का थोघ लागे कि मुंह मणछे शोहरू लै आसा पृथूई दी पाप माफ करनैओ हक।”
तेखअ बोलअ ईशू तेऊ दरंगे मरीज़ा लै, “हुंह बोला ताल्है, उझ़ू आपणैं एऊ बछ़ाऊणैं च़क संघा डेऊ आपणैं घरा लै।”
7सह मरीज़ उझ़ुअ तेभी खल़अ संघा नाठअ आपणीं ज़ांघा हांढी आपणैं घरा लै। 8एऊ च़मत्कारा भाल़ी करै फिरअ लोगा हैल़अ और तिंयां लागै सोभ तेऊ परमेशरे भज़ना करदै, ज़ुंणी मणछा लै इहअ हक दैनअ।
मत्ती शादणअ
(मरकुस 2:13-17; लुका 5:27-32)
9तिधा का आजू डेऊई करै भाल़अ ईशू एक मत्ती नांओं मणछ कारै गराहणें थल़्ही दी बेठअ, सह करा त सरकारी कारै गराहणैओ काम, ईशू बोलअ तेऊ लै “मुंह पिछ़ू एछ।” सह बी लागअ ईशू पिछ़ू हांढदअ।
10ज़ांऊं ईशू घरा भितरी रोटी खांदअ बेठअ, ता बडै भारी पापी लोग आऐ तेऊ सेटा लै और तेऊए च़ेल्लै संघै बेठै रोटी खांदै। 11इहअ भाल़ी करै बोलअ फरीसी और शास्त्री ईशूए च़ेल्लै लै, “थारअ गूरू पापी और कारै गराहणै आल़ै मणछा संघै किल्है खाआ-पिआ?”
12इहअ शूणीं बोलअ ईशू तिन्नां लै, “बैईद निं राम्बल़ै मणछा लै एछदअ, पर बमारा सेटा लागा तेऊ पुजणअ ज़रूरी। 13एता लै तम्हैं डेओआ और एतो मतलब शिखल़ा ‘हुंह निं बल़ीदान च़ाहंदअ पर हुंह च़ाहा झींण।’ किल्हैकि हुंह निं धर्मीं शधाणूं आथी आअ द, पर हुंह आसा पापी शधाणूं आअ द।” (होशा 6:6)
ब्रत करनैओ सुआल
(मरकुस 2:18-22; लुका 5:33-39)
14तेखअ आऐ युहन्ना डुबकी दैणैं आल़े च़ेल्लै ईशू सेटा लै संघा लागै इहअ बोलदै, “इहअ किल्है आसा कि हाम्हैं और फरीसी पंथे लोग करा एतरअ ब्रत, पर तेरै च़ेल्लै निं ब्रत करदै?”
15ईशू दैनअ तिन्नां लै ज़बाब, “ज़ेभै तैणीं लाल़अ बरातू संघै रहा, तेभै निं तिंयां ब्रत करदै। एक बगत एछणअ इहअ बी कि लाल़अ करनअ तिन्नां का ज़ुदअ और तेभै करनअ तिन्नां ब्रत।
16 “नऊंऐं झिकल़ैओ शाटअ निं पराणैं झिकल़ै दी कोहै लांदअ, किल्हैकि झिकल़ै धोंदी बारी धेल़ा सह नऊंअ शाटअ तेऊ पराणैं झिकल़ै होर बी खास्सअ।
17 “ठीक इहअ ई लोग निं नऊंअ अंगूरो रस पराणैं खाल्हल़ै दी डाहंदै। किल्हैकि इहअ करी करै फुटा तिंयां खाल्हल़ै और अंगूरो रस और तिंयां हआ इहअ करै दुहै गल्ला बरैबाद। पर नऊंअ अंगूरो रस भरा नऊंऐं खाल्हल़ै दी इहअ करै हआ तिन्नां दुही गल्लो बच़ाअ।”
मूंईं दी शोहरी और बमार बेटल़ी
(मरकुस 5:21-43; लुका 8:40-56)
18ईशू त तिन्नां लोगा का इना गल्ला करदअ ई लागअ द कि हेरा तिधी आअ एक फौज़ो सरदार। तेऊ टेक्कअ ईशू सेटा माथअ। संघा बोलअ तेऊ इहअ, “हे प्रभू, मेरी शोहरी गई एभै-एभै बरैबाद; पर तूह च़ाल्ल मेरै घरा लै और तेसा दी डाह आपणअ हाथ, तै जाणीं सह ज़िऊंदी हई।”
19ईशू बी उझ़ुअ और आपणैं च़ेल्लै संघी लागअ तेऊ पिछ़ू हांढदअ। 20बाता हांढदी आई एक बेटल़ी; तेसा आसा ती बारा साला ओर्ही लोहू बगणें बमारी लागी दी। तेसा पिछ़ू का एछी करै ईशूए झिकल़ैओ पाल्लअ छ़ुंअ। (मत्ती 14:36) 21किल्हैकि सह सोठा ती आपणैं मनैं इहअ, “ज़ै हुंह ईशूए झिकल़ै बी छ़ुंईं सके, तै जाणीं हुंह एसा बमारी का बच़ी।”
22ईशू भाल़अ पिछ़ू फिरी करै तेसा बाखा लै और तेसा लै बोलअ, “डरै निं आथी, तंऐं किअ विश्वास कि हुंह सका ताह ठीक करी और मंऐं हेरी तूह एसा बमारी का राम्बल़ी करी।” इहअ करै भेटअ तेसा बेटल़ी तेसा बमारी का छ़ुटकारअ।
23ज़ांऊं ईशू तेऊ सरदारे घरै पुजअ ता तिधी ज़ांऊं लोग लेरदै-पकारदै और हाल्लै-गोल्लै करदै भाल़ै, तेखअ बोलअ ईशू तिन्नां लै, 24“दूर हआ, शोहरी निं मूंईं आथी! पर अह आसा सुत्ती दी।” एसा गल्ला शूणीं लागै तिंयां ईशू लै हास्सदै।
25ईशू बोलअ तिधी कठा हुऐ दै लोगा लै घरा का बागै डेऊणा लै। तेखअ नाठअ ईशू पांडा भितरा लै ज़िधी शोहरी आसा ती सताऊई डाही दी। ईशू ढाकअ तेसा शोहरीओ हाथ और सह हुई तेभी ज़िऊंदी। 26ता अह गल्ल पुजी तेऊ सारै देशै कई ज़ैगा।
दूई कांणै मणछ ठीक करनै
27ज़ांऊं ईशू तैहा शोहरीए घरा का आजू नाठअ ता दूई कांणै मणछ आऐ तेऊ पिछ़ू एही हाक्का-पकारा लांदी, “हे दाबेदे लुआद ईशू, हाम्हां लै बी कर झींण।”
28ज़ांऊं सह घरै पुजअ, ता तिंयां दूई कांणै बी आऐ तेऊ सेटा लै और ईशू बोलअ तिन्नां लै, “तम्हां कै इहअ विश्वास आसा कि हुंह सका इना ठीक करी?”
तिन्नैं बोलअ तेऊ का इहअ, “हाँ प्रभू।”
29तेखअ बोलअ तेऊ तिन्नें आछी छ़ुंईं करै, “ज़िहअ तम्हैं विश्वास किअ कि हुंह सका तम्हां राम्बल़ै करी, तिहअ ई लोल़ी तम्हां लै हुअ।”
30तिन्नें आछी का लागअ तेभी शुझदअ। तेखअ बोलअ ईशू तिन्नां लै एही चतैनगी दैई, “हेरे, धैन डाहै एसा गल्लो निं होरी कोही का लोल़ी थोघ लागअ।” 31पर तिन्नैं खोज़ी तिधा बागै डेऊई करै ईशूए ईंयां गल्ला सारै लाक्कै कई ज़ैगा।
एक टाट्टअ ठीक करनअ
32ज़ांऊं तिंयां दूई मणछ ठीक हई बागै तै डेऊंदै लागै दै, ता हेरा तिधी आणअ लोगै ईशू सेटा लै एक टाट्टअ मणछ। तेऊ दी त भूत शाचअ द। 33ज़ांऊं तेऊ टाट्टै का भूत पोर्ही निखल़अ ता सह टाट्टअ लागअ गल्ला करदअ; और तिधी सोभ लोग हुऐ रहैन कि इहअ च़मत्कार निं एऊ इस्राएल देशै आझ़ तैणीं कधि भाल़अ।
34पर फरीसी पंथे लोग लागै इहअ बोलदै, “अह काढा भूते राज़ै राख्से शगती करै भूत।”
लऊंदै आसा थोल़ै
35पर ईशू रहअ कई नगरी और गराऊंऐं डेऊई तिन्नें आराधना सभा दी शिक्षा दैंदअ और स्वर्ग राज़े खुशीए समादा खोज़दअ लागी और सोभी रंगे दाह-खिज़ा दूर करदअ लागी।
36ज़ांऊं ईशू खास्सै लोग भाल़ै ता तेऊ फिरी तिन्नां लै बडी भारी झींण, किल्हैकि तिंयां तै एही भेडा ज़िहै डरै दै और कबाता पेठै दै, ज़सरअ कोई फुआल निं आथी। (1 राज़ा 22:17)
37तेखअ बोलअ तेऊ आपणैं च़ेल्लै लै, “मुंह दी विश्वास करना लै आसा खास्सै लोग न्हैल़ै लागै दै पर तिन्नां सेटा खुशीए समादा पजैल़णैं आल़ै आसा थोल़ै। तिंयां आसा एही खास्सी फसला ज़िहै ज़ुंण लऊंणा लै गई हई पर लऊंणै आल़ै आसा थोल़ै। 38एता लै करा खेचे मालका का अरज़ कि होर मज़दूर छ़ाड।”
Trenutno odabrano:
मत्ती 9: OSJNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
This work is licensed under Creative Commons Attribution-ShareAlike 4.0 License.