Gimpuunan 12
12
Tinawag Diyus si Abram
1Taynguna, magkun ti Panginuun sa kan Abram, “Tayaki kanmu nasyun, hanggan kanmu manga katawuhan, una ti magtal-anakan nimu ama, bag-u pag ati kawu sa ipakakit niku pag rugar sa kanmu. 2Buwatun niku bantug pag nasyun kanmu linahi. Papaladan niku kawu ag bumaliw bantug kanmu ngaran. Sa panab-anan nimu, mayamu ti makatanggap papalad. 3Papaladan niku ti magpapalad sa kanmu. Dapat saadan waydi niku ti magsaad sa kanmu. Sa panab-anan nimu, papaladan niku ti tanan tawu sa kalibutan.”
4-5Nakan nighit ngani si Abram sa Haran ag inmati sa Kanaan, angay sa sinabi Panginuun sa kanya. Si Abram 75 yi ka timpu tunda katpung. Tinaban niya kay asawa si Saray, hanggan si Lut kay anak niya patar-ari. Ti tanan nida manga kasiyunan hanggan manga natipun suruguun sa Haran dara di.
Pagras-ug nida sa Kanaan, 6naparargu sida tugka sa inmaput sida sa daka puun kayu#12:6 daka puun kayu: Mahimu, puun kayu insina. Pagpaniwalaan nida banal inda pag puun kayu. Muri ati sa Sikim. (Ati katpung, ati di waya ti manga Kananiyu.) 7Bag-u napakakit ti Panginuun sa kan Abram ag magkun, “Inda pag daga ipakaun niku sa kanmu manga linahi.” Nakan nagbuwat harandugan si Abram para sa Panginuun imaw ti napakakit sa kanya. 8Siyun ginan, napahalin sida atabug sa bantud sa may butlakan Bitil, ag ati sida pag nagpatindug turda, sa karaw-an Bitil bag-u Hay. Ti Bitil sa may isalpan ag ti Hay sa may butlakan waydi. Nagbuwat diman harandugan ati si Abram ag nagsamba sa Panginuun. 9Ud dinmugay, napahalin maan sida. Naparargu maan sida sa kanda lakaw atabug sa Nigib.
Nag-ati sa Ihiptu si Abram
10Taynguna, nagkaimaw masyadu pag lun-us sa Kanaan, nakan nag-ati si Abram sa Ihiptu hampay ati dap pag mangulian. 11Pagka magras-ug yi sida sa Ihiptu, magkun si Abram sa kay asawa, “Saray, alam niku marinu kawu pag babayi. 12Nu makitan kawu manga Ihipsiyu sabihun nida kawu kang asawa, nakan matyun nida aku hampay mab-ul kawu. 13Mayad waya siguru kanmu sabihun sa kanda magtar-ari kita hampay balaw nida aku matyun ag hampay mayad kanda pakiusa sa kangku dahil sa kanmu.”
14Nakan igu rinmas-ug sida sa Ihiptu, nakitan manga Ihipsiyu marinu gid si Saray. 15Ag pagka nakitan siya manga takinan hari,#12:15 hari: sa Hibriyu, Paraun. Katunda diman sa talata 17, 18, 20. itinultul nida sa hari nu kabitay siya kay ka rinu. Nakan dinara si Saray ati sa balay hari. 16Dahil sa kan Saray, mayad gid kay magpakiusa hari sa kan Abram ag pinakan-an waya siya manga karanidu, manga kambing, manga baka, manga asnu, manga kamilyu hanggan manga suruguun lalaki ag babayi.
17Dapat pinadarahan Panginuun madala pag karamdaman ti hari hanggan kay manga tawuhan sa balay hari dahil sa kan Saray. 18Pagka naalaman hari kay dahilan inda tanan, ipinatawag niya si Abram ag pinaingana, “Hintay inda kanmu binwat sa kangku? Hayga kawu ud nagsabi siya maaw kanmu asawa? 19Hayga kanmu sinabi magtar-ari kamu? Nakan bin-ul niku siya hampay kang asawan-un. Taynguna, inda kanmu asawa, bul-a nimu siya ag pag-ighit yi kamu!” 20Siyun gin, nagsugu ti hari sa kay manga tawuhan kuntay paighita yi sida. Nakan dinara nida si Abram tag sa luwas sa tunda pag daga ag pinaighit kaibahan kay asawa hanggan ti tanan kasiyunan niya.
Chwazi Kounye ya:
Gimpuunan 12: HNN
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Copyright © 2023 by OMF International, Philippines