Babanki - 2017 CABTAL (NT) Non Drama

Babanki - 2017 CABTAL (NT) Drama

Yesò ə nlu li ə sə jèʼè dyʉ̀, ə yen wìʼ ə tsen mu ghə̀ nfyɨfəli mibu və sə bwi wen. Ndzɨ̀mtə̀sə bàm ə wensə toŋtə wen ə bèm a wen la, “Ndìʼsə̀, à nè mbyɨ ndò la wìʼ ghèn fyɨf to fa bwi a, ghə̀ tiʼi wen wenə lì wen mu no to ghə̀ wen lo?”
Yesò ə bwensə gàʼ la, “A ko diʼ byìʼì mbyɨ wen, a ko andiʼ byìʼì ghə̀ tìʼ ə wen wenə lì wen. Kənyʉ̀ na kènkə ə fʉ ndiʼ viʼi yen mwetə kəvu kə shyèʼ kə kaynə kə Nyìngòŋ a wen a wèn. Vəghəŋ diʼ ə nè to shyèʼ ə wìʼ yì a ghə̀ tɨmə mo, a zhʉ kəbəŋ kə bo baynə byìʼàndo kəbəŋ kə sə fenə vi, a diʼ əzhʉ̀ mu wìʼ zizi ko ghə̀ lu be shyèʼ kənyʉ̀ tsu. Ma diʼ ə ne nku əbayn a viʼi mbyi ə zàʼa to ando mà bo diʼ a mbyi.”
Yesò ə gàʼ ali, ə chʉ̀ mənte a nse, ə tu kəbyìʼ ə zuʼtə ashi ə wù kənfyɨf na ghèn, ə gàʼ a wen la, “Dyʉ̀ shʉ̀ ashɨ ə wu a kətsèm kə Silwàm.” Silwàm na ghèn ə ndiʼ a gaʼa lòʼ la, “tɨm.” Wìʼ ghèn ə dyʉ̀ shʉ̀ ə sə bwenə ə pfwo mu ghə̀ sə yenə əshi.
Viʼi vi a və ntsi boʼsə ə wen nə̀ viʼi a və tə nyenə wen ghə̀ loynə loynə ə mu sə bèmə la, “a ko diʼ wìʼ ghèn a ghə̀ tə ŋwʉʼʉ loynə to loynə li lo?”
Viʼi vətsenvə sə byɨmə gàʼa la à diʼ wen, vətsevə tensə gàʼa la, “jòʼ ghə̀ fɨsə fɨsə.”
Nò wìʼ a ghèn fa wen ngeŋ ə gàʼ la, “A diʼ to no mò a ghèn a mà tə loynə li.”
Vəwenə bèm a wen la, “Wù jèʼ ale sə yenə shì luwen a?”
Wìʼ a ghèn ə gàʼ la, “Wìʼ ə yi a və toŋtə la Yesò li ə yi tutə kəbyìʼ ə zuʼ a mo ashɨ, ə gàʼ la mà dyʉ̀ shʉ̀ ashɨ ə ghomə a kətsèm kə Silwàm, no zhʉ ko a ma dyʉ̀ ə shʉ, mu sə yenə əshi luwen.”
Vəwenə bèm a wen la, “Wìʼ a yì ye?”
Ghə̀ gàʼ la ghə̀ ko kɨ.

Və lyɨ̀ dyʉ̀ nə̀ wìʼ na yi a və chʉ̀ li a viʼi Falàsi A ndiʼ ali mu Yesò tutə kəbyìʼ a kì, ə chʉʼ wìʼ ə na ghèn a kətsi kə tʉʼ lòʼ. Viʼi Falàsi a vi ə bèm a wìʼ na ghèn la ghə̀ jèʼ ale sə yenə shì lo? Ghə̀ gàʼ la, “Ghə̀ tə tutə kəbyìʼ ə zuʼtə a mo ashi, ma dyʉ̀ shʉ̀ a shɨ ghomə no zhʉ̀ko, mu zìtə̀ sə yenə ə shi.”
Viʼi Falàsi vətsenvə gàʼ la, “Wìʼ a ghèn ko diʼ wù ə Nyìngòŋ byìʼàndo ghə̀ ko bamə tebè kətsi kə tʉʼ lòʼ.”
Alì vətsevə sə gàʼa la wù nyʉ̀ ə byɨvə zizi ko ghə̀ lu ə nè nyʉ̀ kaynə və alə. Nò zhʉ̀ko, kəngəsə kə fʉ̀ a və wenə a ntìntìn.
Və laʼtə to alə, vəwenə be bwensə bèm a wìʼ ghèn a Yesò ə chʉʼ li la, “Nò wù ə kwoʼtə la gho kumə wen a? A ko ghə̀ tə chʉʼ ashɨ a wu.”
Wìʼ ghèn ə bwensə la, “Ghə̀ diʼ nshə̀ʼtə̀ ə ghoʼo.”
Viʼi Jus və tsenəvə nko byɨmə la wìʼ a ghèn ndiʼ mu ghə̀ ə fyɨfəli mibu be sə yenə. Kə ne vəwenə dzàŋ tìʼ wen nə̀ lì wen, ə bèm a vəwenə la, “A ghèn diʼ wàyn ghə̀ŋ, a diʼ ə yi a ghə̀ŋ gàʼ la və sə bwi wen to mu ghə̀ fyɨfəli, ghə̀ lə jèʼ ale sə yenə shì luwen a?”
Vəwenə byɨmə ə gàʼ la, “yès ə kɨ la ghə̀ diʼ wàyn yès, kɨ la və ə sə bwi wen mu ghə̀ fyɨfəli. Alì yes ko kɨ la, ghə̀ jèʼ ale ə sə yenə shì luwen lò, ko yès lu kɨ la, à chʉʼ ndò nchʉʼ wen lò. Ghə̀ŋ bèm a wen, ghə̀ ko be diʼ wàyn bwaʼa. Nò tèbe wen zizi ghə̀ shə̀ʼtə̀ kənyʉ̀ kì a kə fʉ̀.” Tìʼ wen wenə lì wen ə ngàʼa alə byìʼàndo vəwenə ə nfwaynə viʼi Jus venə. Vəwenə ndiʼ mu və ə ghʉ̀ li la no ndò a ghə̀ byɨmə la Yesò diʼ wìʼ ə yi a və tsuʼ li ghʉ̀, mu və a dzɨ̀m ə wen, ko ghə̀ lu be kwen tebè a ngə̀ŋ ntsèntə̀. Kenkə ndiʼ kənyʉ̀ ki a kə ne tìʼ wen wenə lì wen mu gaʼa la, “Ghə̀ ko be diʼ wàyn ə bwaʼa. Ghə̀ŋ bèm a wen.”
Vəwenə na be nkumtə dzàŋ wen ə gàʼ a wen la, “Kàynə li zhiʼ ə Nyìngòŋ la wù gàʼa to nəmwèʼè. Yès ə kɨ la wìʼ ghèn diʼ wu nyʉ̀ ə byɨvə.”
Ghə̀ be bwensə la, “Ko ghə̀ diʼ wu nyʉ̀ ə byɨvə, kò ghə̀ ko diʼ, ma kɨ to kənyʉ̀ kə mùʼ la, ma ko tə yenə əshi ə sə yenə luwen!”
Vəwenə be bèm la, “Ghə̀ ə nè no ghò a wù, wù ə sə yenə shi a?”
Wìʼ ghèn ə gàʼ la, “Mà sə diʼ mù ma shə̀ʼtə̀ li a ghə̀ŋ, ko ghə̀ŋ lu kòŋ ə zhʉ. Ghə̀ŋ be bèmə ə ne gho tsu a? Kə diʼ la ghə̀ŋ kəŋ be ndiʼ ndzɨ̀mtə̀sə bàm ə wen mu?”
Vəwenə sə telə wen gàʼa la, “A diʼ wu diʼ ndzɨ̀mtə̀ bàm ə wìʼ na ghèn! yès ə diʼ ə ndzɨ̀mtə̀sə bàm ə Mosìs. Yès ə kɨ li la Nyìngòŋ ə ngaʼa li a Mosìs, ali yès ko kɨ no tèbe la wìʼ ə ghèn lù fa fe lo?”
Wìʼ aghèn ə bwensə la, “A diʼ kənyʉ̀ kə kaynəkə la ghə̀ŋ ko kɨ la ghə̀ lù fa fe, ali mu ghə̀ nè li la, ma ə yenə shi! Vəghəŋ ə kɨ la Nyìngòŋ ko zhʉ viʼi nyʉ̀ ə byɨvə, ali zhʉ viʼi vyi a və gumlə wen, jèʼe to ando ghə̀ kəŋ. Ghə̀ŋ ko tɨmə zhʉ no fa chʉʼ a və shətə mbyi la və bwi wìʼ, ko ghə̀ lu yen əshi, wìʼ ə nè ghə̀ sə yenə. Wìʼ na ghèn ə tu faŋ ke ndiʼ wu ə Nyìngòŋ, mu ghə̀ zizi ko ghə̀ lu nè kənyʉ̀ alə̀.”
Viʼi a vi ə gàʼ la, “Wù diʼ alə̀ mu və nə̀ bwi wù a ntìntìn mbyɨsə, wù kwi kuʼ to tsu ə sə kəŋ ə ziʼi yès.” To ando vəwenə gàʼa ali no zhʉ̀ko ə dzɨ̀m shisə wen fa ngə̀ŋ ntsèntə̀.

Yesò ə zhʉ̀ li la və dzɨ̀m li ə shisə wìʼ yi a ghə̀ tə chʉʼ li fa ngə̀ŋ ntsentə, ə kəŋ ə dyʉ̀ nə̀ wen, ə bèm a wen la, “Wù lə byɨmə li a wàyn Wìʼ a?”
Wìʼ ə ayi ə bwensə la, “Wàyn Wìʼ a yì diʼ ndò a Tikəbəŋ? Shə̀ʼtə̀ a mò ndiʼ mà byɨmə a wen.”
Yesò ə gàʼ a wen la, “Wù sə diʼ mù wù yen li wen. A diʼ tò no wen a ghə̀ gaʼa a wù lə.”
Wìʼ a ghèn mù gàʼ la, “Ma byɨmə li a Bobo!” ə sə kuʼsə Yesò.
Yesò ə mu gàʼ a wen la, “Mà vi a mbyi ashə ə làynsə a shɨ viʼi, ə nè la viʼi və fyɨfkəvə ə yenə, viʼi a və yenə, kə və be yenə.”
Viʼi Falàsi vətsenvə a və ndiʼ tsu ə bèm a wen la, “Wù gaʼa, kə diʼ la yès be fyɨfkə mu?”
Yesò ə gàʼ a vəwenə la, “Ghə̀ŋ tu əbyɨmə la ghə̀ŋ ko yenə, mu mbyɨ shəŋsə ko be diʼ a ghə̀ŋ a kətʉ. Alì, luwen to ando ghə̀ŋ sə ghʉ la ghə̀ŋ ə yenə, mbyɨ shəŋsə faŋ li to faŋ.”

Hallgasd meg Joyn 9