Pɛ́ ɡɔ ḿbí Yɛ́su tʉ́sɔŋ-Mbɛ́tɛ́lɛ́hɛm tsɛt pɑk-ŋɡɔŋ-Judɛ̂, ɛ́ pɔ́ ŋkɑ́ Ɛlɔ̂dɛ ḿbɔ́nɛ fɔɔ. Ɛ́ pɔ́ ŋkɑ́ ɛ̂yɑ́, pɛcɔ́ pɑjí nu nǔu pɛcʉ̈ɔ́Ꞌ-sɑŋ fú lɑ́Ꞌ pɔ́p ɡúŋ-sɑ́Ꞌnɛm ńtɔ́ Yɛlúsɑlɛm, ḿbɔ́ ŋ́kɑ́t ḿbíkŋɛ ŋɡɔ: «Fɔɔ-pɑyúdɑ ẅí pɛ́ kɑ pínɛ lɑ́ pɔ́ ɡɔ́? Pɛk kɑ tʉ́ʉ lɑ́Ꞌ pɛk ɡúŋ-sɑ́Ꞌnɛm ńjʉ́ɔ sɑŋ wɛ, pɛk tɔ́ pɑ́Ꞌɑ nɛɡɑ́ mɛkuꞋ mɛ́.»
Pɔ́p pɔ́ ŋ́kɑ́t ḿbíkŋɛ pɔ́Ꞌɔ, nu ɛ̂yɑ́ vu mɛtúutɛ́ fɔɔ Ɛlɔ̂dɛ, ḿbuu ńtsuꞋ tú yɛ́, tsuꞋ tú-pʉɔ tsʉʉ tsɛt tʉsɔ́ŋ-Yɛlúsɑlɛm. Fɔɔ Ɛlɔ̂dɛ ɡɔ́ɔ ŋ́kɛ́ ɛ́fúŋ pɛtɑ́tndɑ́-pɑnɔŋpɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ tsɛt lɑ́Ꞌ, ḿbíkŋɛ wɔ́p ŋɡɔ: «Pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ pɛ́ ɡʉ ńdɑ́Ꞌ ḿbí Nzɑ́Ꞌŋkʉ ẅí Sɛ́ kɑ kɑꞋnɛ lɑ́ ɡɔ?» Pɔ́p sẅíi wɛ́ ŋɡɔ: «Pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ pɛ́ ɡʉ ńdɑ́Ꞌ ḿbí wɛ́ Mbɛ́tɛlɛhɛ̂m, pɔ tsɛt ŋɡɔŋ-Judɛ̂ wɔ, mbíꞋŋɡɔ pɛŋɡɛ́mndʉ̈ɔ́Ꞌ-Sɛ́ kɑ ŋwɑꞋnɛ ŋɡɔ:
“Ɛ́ ɡʉ nǔu ɡu Mbɛ́tɛlɛhɛ̂m, tsɛt pɑk-ŋɡɔŋ-Judɛ̂,
ɔ kɑ́ pɔ́ tsɛtsɛt mɛtʉ́sɔŋ-pɑyúdɑ ŋ́ɡɔ́ɔ ḿbɔ́ pɔ ndẅiknzʉʉ pɔ́,
mbíꞌŋɡɔ fɔɔ ẅí ɑ ɡʉ ńdɑ́Ꞌ ɛ́sɑ́Ꞌ pʉɔ pɑ́ɑ pɑíslɑyɛ̂l ɡʉ ńdɑ́Ꞌ ńcẅɛt pɔ tsɛtsɛt pʉʉ.”»
Ɛlɔ̂dɛ zúꞋ pɔ́Ꞌɔ, ɛ́fúŋ pɑjí nu nǔu pɛcʉ̈ɔ́Ꞌ-sɑŋ, pɔ́p pɛ́pɔ́p tʉ́ʉ ntsɛm, ɑ píkŋɛ wɔ́p ŋɡɔ: «Pʉʉ kɑ zɛ nɛjʉ́ɔ wɔ cʉ̈ɔ́Ꞌ-sɑŋ tɛ ɛ́fú shʉ́n?» Pɔ́p pɛ́ɛtɛ ɛ́sẅíi wɛ́. A ɡɔ́ɔ ŋ́kɛ́ ńtúu wɔ́p Mbɛ́tɛlɛhɛ̂m, ńcú mbɔ̌ pɔ́p ŋɡɔ: «Pʉʉ ɡʉ ńcʉ nút ńdɔɔ mɔ́ɔ ɛ̂wɑ́ tɛ ńjʉ́ɔ wɛ́, ńtɔ́ ɛ́sẅíi wɑ́ɑ, ŋ ɡʉ yɑ́ɑ ŋ́ɡɑ́ mɛkuꞋ mɛ́.»
Pɑjí nu nǔu pɛcʉ̈ɔ́Ꞌ-sɑŋ zúꞋ nu yí fɔɔ Ɛlɔ̂dɛ cúnɛ, ńcʉ́ɔ sɛ̂ndúŋ, ḿbɛn ńzɛ nɛjʉ́ɔ cʉ̈ɔ́Ꞌ-sɑŋ ẅí pɔ́p kɑ jʉ́ɔnɛ lɑ́Ꞌ pɔ́p lɑ́. A pɔ́ mbi ńnɛn pɔ́p nɛn, ŋ́ɡʉ tɛ ŋ́kúu zʉꞋ yí mɔ́ɔ zúꞋu ŋ́ɡɔ́ɔ ńtʉ́ʉ, mbɔɔ kíi ŋ́ŋɑtnɛ pɔ́. Pɔ́p pɛn jʉ́ɔ cʉ̈ɔ́Ꞌ-sɑŋ ɛ̂wɑ́, ńtsɑ́ɑtɛ tɛꞋ, ńnɛn tɛ ńjɛ́Ꞌ ŋ́kúu tsɛt ndɑ́, ńjʉ́ɔ mɔ́ɔ pɔ́p mɑ́ wɛ Mɑlíyɑ, ŋ́kẅíꞋlɛ sɛ́, ŋ́ɡɑ́ mɛkuꞋ-mɔ́ɔ ḿbɛn ńtɑꞋ pɑɑ yɔ́p, ńníꞋ shɔŋ-mɔ́ɔ nɛ́ yúu pɑ́Ꞌ tʉ́n-ŋɡɔ̂l pɔ́p yɛcɔ́ tʉʉndɛn lii ntɛ́ yɛ́pɑ́. Pɔ́p nɑ́ŋ tɛ ḿbɔ́ ḿbɛn nzʉʉ, Sɛ́ lɔk njʉɔ ɛ́sẅíi wɔ́p ŋɡɔ: «Pɔ́p pɑ́ɑ nɛpɛn ńdɛɛ nɛjɔ́ŋ fɔɔ Ɛlɔ̂dɛ.» Pɔ́p ɡɔ́ɔ ŋ́kɛ́ ńtsʉ́Ꞌ ńdɛɛ pɔ ndúŋ ndɛꞋ lɑ ḿbɛn nɛ́ lɑ́Ꞌ pɔ́p.

Pɔ́p pɔ́ tɛ ŋ́ɡʉ, Yɔsɛ̂p lɛ́ njʉɔ, ńjʉ́ɔ wɛcɔ́ Cʉ̈ɔꞋ-Sɛ́ tɔ́, ńcú mbɔ̌ wɛ́ ŋɡɔ: «Lɔ sɛ́, ńtíi mɔ́ɔ, pʉʉ pɔ́p pɛ́ mɑ́pfu kʉɔ, ŋ́ɡʉ nɛ́ tsɛt ŋɡɔŋ-Ɛɡíptɔ, ńnɑ́ŋ zúꞋu. Mɔ, ŋ ɡʉ ŋ́ɡɛ ɛ́sẅíi wú nɛ́ ŋkɑ́ yi ɔ ɡʉ ḿbɛn nzʉʉ. MbíꞋŋɡɔ Ɛlɔ̂dɛ ɡʉ ńdɔɔ mɔ́ɔ wɑ́ nɛjẅí wɛ́.» Yɔsɛ̂p lɔ sɛ́ pɔ nɛtúꞋ, ńtíi mɔ́ɔ, pɔ́p pɛ́ mɑ́pfu ɡʉ nɛ́ tsɛt ŋɡɔŋ-Ɛɡíptɔ, ńdɑ́Ꞌ ńnɑ́ŋ zúꞋu tɛ fɔɔ Ɛlɔ̂dɛ pfú. Mɔnɛ mɛnu lɔk ḿbuutɛ nǔu pɑ́Ꞌ Tsɑpʉɔ Sɛ́ kɑ zɑ́Ꞌnɛ njí ńdɔk ntsu-Ŋɡɛ́mndʉ̈ɔ́Ꞌ wɛ ńcú ŋɡɔ: «Mɔ, ŋ ɡʉ ŋ́ɡɛ Mɔ́ɔ wɑɑ fú tsɛt ŋɡɔŋ-Ɛɡíptɔ ḿbɛn nzʉʉ.»

Ɛlɔ̂dɛ pɔ́ tɛ ńjʉ́ɔ ŋɡɔ pɑjí nu nǔu pɛcʉ̈ɔ́Ꞌ-sɑŋ kɑ fʉ́klɛ wɛ́, ńzɑ́ŋ lɔ́ŋ tɛꞋ, ŋ́ɡɔ́ɔ ńtúu pʉɔ ŋɡɔ pɔ́p ɡʉ tʉ́sɔŋ-Mbɛ́tɛ́lɛ́hɛm tɛ mbɑ mɛpɑt-tʉ́sɔŋ, ḿbuu ńjẅítɛ mbɔ́ŋkʉ̈ɔ́ tsʉʉ pinɛ pɔ́p kuꞋnɛ ŋɡuꞋ yɛ́pɑ́ mbɑ pi pɔ́p pɛ́t kɛ́ kuꞋ ŋɡuꞋ yɛ́pɑ́, ńdɔk ńdʉŋtɛ pɔ́Ꞌɔ, nǔu ŋkɑ́ yi pɔ́p kɑ sẅíinɛ wɛ́ ŋɡɔ cʉ̈ɔ́Ꞌ-sɑŋ kɑ cẅɛt lɑ́. Ɛ́ lɔk pɔ́Ꞌɔ, ḿbuutɛ nǔu nu yí Yɛlɛmî, Ŋɡɛ́mndʉ̈ɔ́Ꞌ-Sɛ́ kɑ zɑ́Ꞌnɛ njí ńcú ŋɡɔ:
«pɛ́ zúꞋ pɛ́ pɔ́ tʉ́sɔŋ-Lɑ́mɑ ńcʉ ŋɡuŋ,
ḿbɔ́ ŋ́kʉ́ɔꞋ nɛvú, ńdɑɑ. Ɛ́ pɔ́ Lɑshɛl ɑ lɑɑnɛ mbɔ́ŋkʉ̈ɔ́ pɛ́, mbíꞋŋɡɔ pɔ́p pfútɛ.
A pɔɔ ḿbɔ́ ŋ́kɔŋ ŋɡɔ pɛ́ jíi ŋki-mík mɛ́ pɔ́.»

Ɛlɔ̂dɛ kɑ pɔ́ tɛ ḿpfú, Yɔsɛ̂p lɛ́ njʉɔ Ɛɡíptɔ, ńjʉ́ɔ wɛcɔ́ Cʉ̈ɔꞋ-Sɛ́ tɔ́, ńcú mbɔ̌ wɛ́ ŋɡɔ: «Lɔ sɛ́, ńtíi mɔ́ɔ, pʉʉ pɔ́p pɛ́ mɑ́pfu pɛn nzʉʉ nɛ́ tsɛt ŋɡɔŋ-Íslɑyɛ̂l. MbíꞋŋɡɔ pʉɔ pinɛ pɔ́p kɑ pɔ́ ńdɔɔ nɛjẅí mɔ́ɔ kɑ pfútɛ mɔ.»
Yɔsɛ̂p lɔ sɛ́, ńtíi mɔ́ɔ, pɔ́p pɛ́ mɑ́pfu pɔ́ ḿbɛn nzʉʉ nɛ́ tsɛt ŋɡɔŋ-Íslɑyɛ̂l, ɑ zúꞋ ŋɡɔ Alkɛlɑẅís tsʉ́Ꞌnɛ ɛ́sɑ́Ꞌ pɑk-ŋɡɔŋ-Judɛ̂, tɛ ɛ́fú pɑ́Ꞌ tɑ́t wɛ Ɛlɔ̂dɛ kɑ pfúnɛ, ḿbɔ́ ńcʉ̈ɔꞋ nɛɡʉ Judɛ̂, ŋ́ɡɛ ńdɛ́ njʉɔ, Tsɑpʉɔ ɡɑ́ wɛ́ nɛ́ ntík. A tsʉ́Ꞌ ŋ́ɡʉ pɔ nɛ́ tsɛt pɑk-ŋɡɔŋ-Ŋɡɑlilɛɛ, ŋ́ɡʉ tɛ ŋ́kúu zúꞋu, ḿbɔ́ ńtswɛ́ tsɛt yɛcɔ́ tʉ́sɔŋ, pɛ́ fúŋ nɛ́ Nɑ̌ɑzɑlɛt, ɛ́ lɔk ḿbuutɛ nǔu pɑ́Ꞌ ŋɡɛ́mndʉ̈ɔ́Ꞌ-Sɛ́ kɑ zɑ́Ꞌnɛ njí ńcú nu nǔu Nzɑ́Ꞌŋkʉ ŋɡɔ: «pɛ́ ɡʉ ńdɑ́Ꞌ ɛ́fúŋ wɛ́ nɛ́ ŋu-Nɑ̌ɑzɑlɛt.»

Hallgasd meg Mɑtʉ̈ɔ 2