If you have would like a copy of this version please contact info@davarpartners.org

The Gaddi New Testament

This work is licensed under Creative Commons Attribution-ShareAlike 4.0 License.

तियां दिना मन्ज यूहन्‍ना बपतिस्मा दिणैबाळा यहूदिया रै बियावान जगह मन्ज ईच्ची करी ऐह प्रचार करना लगा “अपणै पापा थऊँ मन फेरा, क्ओकि स्वर्गा रा राज्य नेड़ै चली आ।” ऐह सो ही हा जसेरै बारै मन्ज यशायाह भविष्‍यवक्तै बल्लुरा थू :
“बियावान जगह मन्ज कोई हक्का पऊ करदा कि,
प्रभु रा रस्ता तैयार अतै सिधा करा।”
यूहन्‍ना ऊँटा री ऊन रै कपड़ै लाऊरै भुन्दै थियै, अतै अपणी कमर मन्ज चमड़े रा पटका बनी रखदा थू। सो टिड्ड़ी अतै मखीर खान्दा थू। ता यरूशलेम, यहूदिया अतै यरदन रै अखै-ब्रखा रै सब जगह रै मणु तैस बल्लै आये। तिन्यै अपणै-अपणै पापा जो मनी करी यरदन नदी मन्ज यूहन्‍नै थऊँ बपतिस्मा लैऊ।
जैहणै तिनी मतै सारै फरीसी अतै सदूकि जो बपतिस्मा लैणैं तांऐ अप्पू बल्लै इन्दै हेरू, ता तियां जो बलदा, “तुहै जहरीलै कीड़ै सांईयै दुष्‍ट हिन, तूसु जो कुणी दस्सी दिता कि प्रमात्मैं रै ईणैबाळै गुस्सै थऊँ नह्ही पैय्आ। ठेरै तांयें सवूत देय्आ कि तुहै अपणै मन पापा थऊँ फेरै। पर अपणै-अपणै मना मन्ज ऐह सोचणा छड़ी देय्आ कि अब्राहम तून्दा पिता हा; क्ओकि अऊँ तूसु सोगी सच बलदा, कि प्रमात्मां ईयां पत्थर थऊँ अब्राहम तांयें औलाद पैदा करी सकदा। अतै अबै प्रमात्मैं रै न्याय री कुहाड़ी रूखा रै मोळा पुर रखी दितुरी हा, ठेरै तांयें जैडा रुख खरा फळ ना दिन्दा तैस बड्‍ड़ी करी अगी मन्ज फूकी दिन्दै।”
“अऊँ ता तुसिओ पाणी सितै मना फेरनै रा बपतिस्मा दिच्छु करदा, पर जैडा मेरै बाद ईणैबाळा सो मिन्जो थऊँ भी शक्तिशाली हा; अऊँ तसेरै जुटै रै तस्मै खोलणै रै भी काबल निय्आ, तैस तुसिओ पवित्र आत्मा अतै अगी रा बपतिस्मा दिणा। तिनी अपणै हथै त्रोंगळा पकडुरा, अतै तैस अपणी बगड़ी जो खरा करी साफ करना, अतै कणक ता तैस पेडू मन्ज कठेरनिआ पर भू तैस तैहा अगी मन्ज फुकणा जैड़ी कदी भी ना हिहणी।”


तैस टैमैं यीशु गलील जिलै थऊँ यरदन नदी मन्ज यूहन्‍नै थऊँ बपतिस्मा लैऊ। पर यूहन्‍ना ऐह बल्ली करी तैसिओ रोकणा लगा, कि “हे गुरू मिन्जो ता तून्दै हत्थै बपतिस्मा लैणा चहिन्दा थू, अतै तुहै मिन्जो बलै आये?”
यीशुऐ ऐह जवाव दिता, कि “हबजुं ता ईयां ही भूणा दे, क्ओकि असिओ ऐस तरीकै ही प्रमात्मैं री इच्छा जो पुरा करना ठीक हा”, ता यूहन्‍नै तसेरी गल्ल मनी लेई।
यीशु बपतिस्मा लेई करी पाणी थऊँ बाहर आ, अतै तैस तांयें स्वर्ग खुली गो; अतै तिनी अप्पू पुर प्रमात्मैं री आत्मा कबूतरा रै रूपा मन्ज अपणै ऊपर इन्दै हेरू। अतै अम्बरा थऊँ ऐह आकाशवाणी भूई, “ऐह मेरा प्यारा पुत्र हा, जैस थऊँ अऊँ बड़ा खुश हा”।

Hallgasd meg मत्ती 3