Text: © New Life Computer Institute Audio: ℗ 2022 Hosanna

Shekhawati 2017 NLCI (NT)  Non Drama

ईसु एक न्याव म बेठर दरिआव क परलै नाकै खुदकी नगरी कफरनूम म आग्या। जणा लोग एक भाळ भेयड़ा मिनखनै खाटली म घालर बाकन ल्याया। ईसु बाका बिस्वासनै देखर बि हवा भेयड़ा मिनखनै ओडायो, “हिमत राख, तेरा पाप धुपगा!” जणा क्युंक सास्तरानै सीखाबाळा यहूदि मिनख आपसरी म बतळाबा लाग्या, “ओ अंय्यां बोलर परमेसर की बुराई करै ह।” ईसु बाकी हिया की बातानै जा'णर बाऊँ बोल्यो, “थे थारा हिया म बुरो क्युं सोचो हो? सोरो काँई ह? के अंय्यां ओडाबो ‘तेरा पाप धुपगा’ नहिस अंय्यां ओडाबो, ‘खड़्यो होर डोल-फिर?’ जिऊँ थे आ जाण सको की इ धरती प पाप धोबा को हक मिनख का बेटा कनै ह।” इकै पाछै ईसु बि हवा भेयड़ा मिनखनै बोल्यो, “खड़्यो होर तेरी खाटलीनै लेर तेरै घरा चल्योजा।” बो मिनख खड़्यो होर आपकै घरा चलेगो। लोग आ देखर डरग्या। बे परमेसर की जे-जैकार करबा लाग्या क बे मिनखनै ताजूब का काम करबा को हक दिओ ह।


जद ईसु बठैऊँ जार्यो हो जणा बे चुंगी चोकी प एक मिनखनै बेठ्या देख्या। बिको नाम मत्ती हो। ईसु बिऊँ बोल्यो, “मेरै गेल होले।” जणा बो खड़्यो होर बाकै गेल होलिओ। अर जद ईसु आपका चेला क सागै मत्ती क घरा रोटी खाबा ताँई बेठ्या जणा बठै बाकै सागै रोटी खाबा ताँई चुंगी लेबाळा अर पापी मिनख बी बेठ्या। बानै सागै बेठ्या देखर क्युंक फरिसी ईसु का चेलानै खया, “थारो गरूजी तो चुंगी लेबाळा अर पापी मिनखा क सागै खावै अर उठा-बेठी करै ह?” आ सुणर ईसु बाऊँ बोल्यो, “निरोगा मिनखानै बेद की जुर्त कोनी होवै, रोगलानैई बेद की जुर्त पड़ै ह। इ ताँई थे जाओ अर सास्तर म मांडेड़ा इ बचन को मतबल काँई ह बिनै समजो, ‘म बलिदान कोनी चाऊँ पण दया चाऊँ हूँ। म धरम्या ताँई कोनी आयो पण पाप्यानै बुलाबा आयो हूँ।’”


इकै पाछै यहून्ना बतिस्मो देबाळा का चेला ईसु कनै गया अर बानै बुजबा लाग्या, “थारा चेला बरत क्युं कोनी करै? जदकी म्हें अर फरिसी बार-बार बरत करां हां।” जणा ईसु बानै खेबा लाग्या, “ब्या की टेम जद बिंद आपका भाईला क सागै ह जणा बिका भाईला दुख मनावै ह के? पण बे दिन आसी जद बनड़ो बाऊँ न्यारो कर्यो जासी जणा बे बरत करसी। कोईबी पुराणा गाबा प नया सुती गाबा की कारी कोनी लगावै, अर ज कोई लगा बी ले जणा नई कारी भेळी होर बि गाबल्यानै दुणो पाड़ गेरै। अंय्यांई नई अँगूरी पुराणी बखाल म कोनी भरी जावै क्युं क ज्युँ-ज्युँ बा उठै जणा बा अँगूरी पुराणी बखालनै पाड़गेरै अर अँगूरी अर बखाल दोन्युई खराब हो जावै। इ ताँई लोग नई अँगूरी नई बखाल मई भरीं हीं।”


ईसु जद अ बाता बानै बतार्याई हा क अत्ता मई एक यहूदि सभा को एक परधान बाकन आयो अर बाकै धोक खार बाऊँ अरदास करतो बोल्यो, “इबी-इबी मेरी छोरी मरी ह। ज थे चालर बिकै उपर हात धरद्‍यो जणा बा ओज्यु जी ज्यासी।” बिकी बाता सुणर ईसु खड़्यो होर आपका चेलानै सागै लेर बिकै सागै चालबा लाग्यो। बठै एक लूगाई ही जिकै बारा बरसाऊँ न्याह्णी को रोग हो। बा ईसु क गेलनै आर बाका कुर्ता की कोर क हात अड़ा दिनी। क्युं क बा सोच्या करती ही क, “ज म ईसु का कुर्ता की कोर क हात अड़ा देस्युँ जणा म निरोगी होज्यास्युं।” गेलनै मुड़र ईसु बिनै देखर बोल्यो, “बेटी हिमत राख। तू तेरा बिस्वास की बजेऊँ निरोगी करी गई ह।” अर बा लूगाई जदकी जद निरोगी होगी। जद ईसु बि यहूदि परधान क घरा पुग्या जणा बे देख्या क लोग बि छोरी क मरबा की बजेऊँ रोइ पिटी करबा लागर्या हीं। जणा ईसु बा मिनखाऊँ बोल्या, “थे अठैऊँ बारनै चल्या जाओ आ छोरी मरी कोनी पण सोवै ह।” आ सुणर लोग बाको मजाक उडाबा लाग्या। अर जद लोगानै बठैऊँ बारनै काड दिओ गयो जणा ईसु मांयनै जार बि छोरी को हात पकड़्यो जिऊँ बा छोरी जीगी। इ बात की चरचा च्यारूमेर फेलगी।

अर जद ईसु बठैऊँ जार्या हा जणा दो आँदा मिनख बाकै गेल होलिआ अर हेलो देर खेबा लाग्या, “हे दाऊद का बेटा, म्हारै प दया कर।” अर जद ईसु घर क मांयनै बड़गा जणा बे मिनख बी बाकन गया। बानै देखर ईसु बाऊँ बुज्यो, “के थानै बिस्वास ह क म थानै ओज्यु आँख्या दे सकूँ हूँ?” बे बोल्या, “हाँ म्हराज!” जणा ईसु बाकी आँख्या क हात अड़ार खयो, “जंय्यां थारो बिस्वास ह बंय्यांई थारै सागै होवै।” अर बे आँदा देखबा लाग्या। अर ईसु बानै अंय्यां चेतायो क, “इकै बारां म खिनई मना खिज्यो।” पण बे बठैऊँ जार बि झघा म बा बाता को ढींढोरो पिट दिओ।

जद ईसु बठैऊँ जार्या हा जणा लोग एक गुँगानै जिकै फेंट होईड़ी ही बिनै ईसु कनै लेर आया। अर जद बिकै मांयनैऊँ बी ओपरी बलायनै काड दिनी जणा बो मिनख बोलबा लाग्यो, जणा बठै भीड़ ही जखी ताजूब कर खेबा लागी, “म्हें इजरायल म अंय्यां को काम पेली कदैई कोनी देख्यो।” पण बठै खड़्या फरिसी खेबा लाग्या, “क ओ भूता का नाथ की सक्‍तिऊँ ओपरी बलायानै काडै ह।”

ईसु नगरी-नगरी गाँव-गाँव जार अरदास करबाळी झघा म सीखातो हो अर परमेसर क राज क बारां म चोखा समचार को हेलो पाड़तो, लोगा का रोगनै दूर करतो होयो फिर्या करतो हो। अर ईसु जद बी भीड़नै देखतो बानै बापै तरस आतो क्युं क बे बि लल्डी की जंय्यां हा जिको गुवाळ्यो कोनी होवै ह जिकै बजेऊँ बा अठिनै-बठिनै रूळती फिरै ह। जणा ईसु आपका चेलानै खेबा लाग्यो, “लावणी आएड़ा खेत तो बोळा हीं पण ध्यानग्या थोड़ा हीं। इ ताँई थे खेत का धणी परमेसरऊँ अरदास करो जिऊँ बे लावणी करबा ताँई ध्यानग्यानै भेजै।”

Hallgasd meg मत्ती 9