Эклц 31
31
Яков Лаванас зулна
1– Мана эцкд бәәсиг цугтаһинь Яков авчкв, эцкд бәәснәс бийдән зөөр хоршав, – гиҗ Лавана көвүд келҗәсиг Яков соңсна. 2Лаван урдкасн оңдарҗ одсиг Яков медәд бәәв.
3– Эцкиннь һазр тал, эврәннь төрл-садн тал хәр. Би чамла йовхув, – гиҗ Деед Эзн Яковд келнә.
4Хөд бәәсн тег тал Рахел Лия хойр иртхә, гиҗ Яков келүлнә.
5– Тана эцк нанла урдк кевәрн хәрлцдгән уурсиг би үзҗәнәв. Болв мини эцкин Бурхн нанла бәәнә. 6Би тана эцкд чидлән әрвллго заргдсиг тадн меднәт. 7Тана эцк намаг мекләд, арв дәкҗ мини авх көлснә хәрү – мөңгиг – сольв. Болв Бурхн терүнд намаг һундах зөв өгсн уга. 8«Чини көлснә хәрүд ачлврнь толвта мал болх», – гиҗ тер келхлә, цуг мал толвта төл һарһдг билә. Тер «Чини көлснә хәрүһин – мөңгнә ормд цоохр мал өгнәв» гихлә – цуг мал цоохр төл өгдг билә. 9Тиигҗ Бурхн тана эцкәс малынь авад, нанд өгв, – гиҗ Яков күүкд улст келнә. – 10Нег дәкҗ, малын оруһин цагт, нанд иим зүүдн орна: ямад көөҗәх текмүд цоохр, толвта болн алг бәәдлтә болҗ үзгднә. 11Бурхна элч зүүдндм намаг иигҗ дуудна: «Яков». «Би эндв», – гиҗ хәрү өгчәнәв. 12Тер келнә: «Хәләлч, чи үзхич: ямад көөҗәх текмүд цугтан цоохр, толвта болн алг, яһад гихлә Лаван чамд ю һарһад бәәсиг кевтнь би үзүв. 13Би – Бет-Эльд чамд үзгдсн Бурхмб. Чи санлын чолун деер тос кеһәд, нанд андһар өгләч. Ода эн һазриг үлдәһәд, эврәннь төрл-садна бәәсн һазр тал хәрү йов».
14– Эцкин үлдәсн зөөрт мана хүв ода уга. 15Мадниг күүнә улст тер тоолҗаснь үзгдҗәхший? Мадниг тер хулдла, хулдад авсан һарһчкв. 16Эцкәсмдн Бурхна булаҗ авсн цуг зөөр мана болн мана үрдин болҗахнь маһд уга. Тер учр деерәс Бурхн ке гисиг күцә, – гиҗ Рахел Лия хойр хәрү өгнә.
17Темән деер күүкдән болн гергдән суулһад, 18Яков өмнән цуг малан тууһад, Паддан-Арамд хоршасн зөөрән авад, Кананд бәәх эцк талан һарад йовна. 19Лаваниг хөөдән кирһхәр һархла, Рахел терүнә герт бәәсн шүтәсиг хулхалҗ авна. 20Яков һарад зулснаннь тускар келл уга, арамей Лаваниг меклнә. 21Яков бәәсән цугтаһинь авад зулна. Епрат һол һатлад, Гилад гидг уулта һазр тал тер йовна.
Лаван Яковиг мөрднә
22Һурвдгч өдртнь Яковиг зулҗ одсинь Лаванд күргҗ келнә. 23Лаван төрлмүдән бийтәһән авад, Яковиг көөлдәд, дола хонад Гилад гидг уулта һазрт терүг күцнә. 24Арамей Лаванд сөөһәр зүүднднь Бурхн үзгдәд иигҗ келнә:
– Сагл, Яковд сә чигн, му чигн бичә ке.
25Лаван Яковиг күцнә. Гилад уулын һазрт Яков хошлҗ, Лаван төрлмүдтәһән тенд бас бәәрлнә. 26Лаван Яковд иигҗ келнә:
– Чи ю кеснчнь энви? Чи намаг мекләд, мини күүкдиг дәәнд кел бәргдсн улс кевтә авч йоввч. 27Яһад чи нуувчар, намаг мекләд зулвч? Чи нанд келсн болхла, би чамаг байртаһар, кеңкргин болн ятхин айст ду дуулад үдшәх биләв. 28Зеенрән болн күүкдән йовх деернь нам үмсх зөв нанд чи өгсн угач. Чи тоолвр уга йовдл һарһвч. 29Би таднас өшәһән авч чадх чидлтәв, болв давсн сөөһәр чини эцкин Бурхн нанд иигҗ келв: «Сагл, Яковд сә чигн, му чигн бичә ке». 30Эцкиннь герүр хәрү одхар тесч чадад чи йоввч, болв мини шүтәс чи яһад хулхалҗ аввч?
31– Таниг күчәр нанас күүкдән булаҗ авхит гиһәд би әәвүв. 32Кемр энд кенәднь болвчн эврәннь шүтәсән та олҗ авхла, тер күн әмд бәәшго. Төрл-саднаннь нүүрт эврән негҗәд хәләтн, кемр тана юмн бәәхлә, хәрү автн, – гиҗ Яков Лаванд келнә.
Шүтәсиг Рахел хулхалҗ авсиг Яков медҗәсн уга бәәҗ.
33Лаван Яковин шатр негҗнә, Лиян шатр негҗнә, хойр зарцин сег негҗнә, болв юм олҗ чадсн уга. Лиян шатрин дару Рахелин шатр негҗнә. 34Рахел гериннь шүтәсиг темәнә эмәл дотр бултулчкад, деернь һарад сууна. Лаван шатриг кевтнь негҗнә, болв юм олҗ чадсн уга.
35– Мини нойн, намаг өмнчнь босч эс зогсснд бичә уурлтн. Бийм тас уга бәәнәв, сарин кир эклв, – гиҗ Рахел эцкдән келнә.
Лаван хәәҗ-хәәҗ, гериннь шүтәсән олҗ чадсн уга.
36Яков дегд уурлна:
– Би ямаран хаҗһр йовдл һарһсмби? Намаг ямаран килнц һарһсар та мини ардас көөлдҗ йовхмт? 37Та мини зөөриг кевтнь негҗвт – эврәннь зөөрәс ю энд олвт? Олҗ авсан, та эврәннь болн мини төрл-садна өмн һарһад үзвт, тедн мана зарһ кетхә. 38Би 20 җилдән танад бәәвв: тана хөд, ямад хурһ-ишкән хайсн уга, тана сүргәс хуцмуд би идсн угав. 39Зерлг аңгуд шуучад тасчсн мал би тана тал авч ирдго биләв, эврән һаруһинь даадг биләв. Та болхла өдрәр чигн, сөөһәр чигн цуг хулхалгдсн юмна ял нанас некдг биләт. 40Би иим бәәдләр бәәләв: өдртнь һаң халунд шатх, сөөднь киитнд хавшх, нүдән «хум» гиҗ аньдго биләв. 41Тана герт 20 җилдән би тиигҗ бәәләв. Тана хойр күүкнә төлә би 14 җилдән көдлүв, 6 җилдән малын төлә көдлүв, та болхла, арв дәкҗ мини авх көлснә хәрүг сольвт. 42Кемр нанла мини өвкнр Абрахамин болн Ицхакин Бурхн уга болсн болхла, та намаг йирдән хоосн нудрмим атхулад йовулх биләт. Болв мини зовлңгиг болн һаринм көлсиг Бурхн үзәд, урҗ сө намаг харсв, – гиҗ кевшҗ Лаванд тер келнә.
43– Эн күүкд – мини күүкд, үрд – мини үрд, сүрг мал – мини сүрг, чини үзҗәх тоот – цугтан мини. Болв мини күүкдиг, эс гихлә теднә һарһсн үрдиг би ода яахмб? 44Бидн хойр бооца кей, тер бооцан ма хоорнд герч болтха, – гиҗ Лаван Яковд хәрү өгнә.
45Яков чолу өргәд, терүгәр санлын темдг тәвв. 46Эврәннь төрл-саднд тер иигҗ келнә:
– Чолуд цуглултн.
Теднь чолу цуглулад, ова кенә, тер ованнь хаҗуд хот эдлхәр цугтан сууцхана. 47Тер һазрт Йегар-Сахадута гидг нер Лаван өгнә, Яков болхла терүг Гал-Эд гиҗ нерәднә#31:47 Арамей келәр Йегар-Сахадута, еврей келәр Гал-Эд гидг үгмүд «герч болҗах ова» гидг чинртә..
48– Эн чолун ова – эндр мана герч болҗана.
Тер төләд энүнд Гал-Эд гидг нер өгв, 49бас Мицпа#31:49 Мицпа – эн нерн «манаһин бәәрн» гидг чинртә. болв.
– Бидн нег-негән эс үзхләг, тегәд Деед Эзн чамаг болн намаг мантха. 50Кемр чи мини күүкдиг мууһар бәрхлә, эс гихлә мини күүкдәс талдан гергд бийдән авхла, тер цагт мана хаҗуд күн уга болв чигн, тодлад авчк: мана хоорнд герч болҗахнь – Бурхн, – гиҗ Лаван немнә.
51Лаван Яковд бас иигҗ келнә:
– Чи ма хойрин хоорнд тәвсн ова чолун болн санлын темдг эн бәәнә. 52Эн чолуд болн эн санлын темдг – герч. Эн чолун оваһас давҗ, чамур дәврх му юм би үзүлшго болҗанав. Чи бас эн санлын темдг болн чолун оваһас давҗ, нан тал дәврҗ му юм бичә үзүл. 53Чини өвк Абрахамин болн мини өвк Нахорин Бурхн мадна хоорндк зарһ кетхә.
Яков эврәннь эцк Ицхакин шүтдг Бурхарн андһар өгнә. 54Тенд, уул деер тер тәкл тәкәд, эврәннь төрл-садан хотд орлцтха гиҗ дуудна. Тедн хотыг эдләд, доран хонна. 55Өрүн өрлә Лаван зеенрән, күүкдән үмсәд, тедниг әдслнә. Тиигәд тер герүрн хәрү ирнә.
Jelenleg kiválasztva:
Эклц 31: ХКО_ӘБ
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Институт перевода Библии, 2002-2023