Эклц 46
46
Яков өрк-бүләрн Египет орна
1Израиль эврәннь цуг зөөрән цуглулҗ авад, һарад йовна. Беэр-Шева гидг балһснд ирн, тер эцк Ицхакин мөргдг Бурхнд тәкл тәкнә. 2Сөөһәр терүнд Бурхн үзгдәд, иигҗ дуудна:
– Яков, Яков!
– А, а, – гиһәд Израиль хәрү өгнә.
3– Би Бурхмб, чини эцкин Бурхмб. Египет орхасн бичә ә. Тенд чини хөөт үйнрәс Би алдр улс үүдәнәв. 4Би Эврән таднла Египет орнав. Би Эврән чини хөөт үйнриг тендәс дахулҗ хәрү һарһнав. Йосип эврәннь һарарн чини яс бәрх, – гиҗ Бурхн келнә.
5Яков Беэр-Шеваһас һарад йовна. Хаана илгәсн аца зөөх тергд деер көвүднь Яковиг, бичкдүдиг, күүкд улсиг суулһна. 6Тедн малан тууһад, Кананд хоршасн зөөрән ачҗ йовв. Тиигҗ Яков цуг эврәннь хөөт үйнртәһән Египет тал нүүҗ одв: 7көвүдән, ачнран, күүкдән, зеенрән – цуг уңг-тохма улсан Египетд авч ирв.
8Египетд нүүҗ ирсн Израилин өрк-бүлин нерд эн:
Яков болн терүнә хөөт үйнр.
Яковин түрүңк көвүн – Рубен. 9Рубена көвүд: Ханок, Паллу, Хецрон, Карми.
10Шимона көвүд: Емуэл, Ямин, Охад, Якин, Цохар, Канана күүкд күүнә көвүн Шаул.
11Левин көвүд: Гершон, Кахат, Мерари.
12Йудан көвүд: Ээр, Онан, Шелә, Пәрец, Зерах. Ээр Онан хойр Кананд өңгрҗ одла, Пәрецәс Хецрон болн Хамул төрв.
13Исахарин көвүд: Тола, Пуа, Яшув, Шимрон.
14Завулуна көвүд: Серед, Элон, Яхлэл.
15Паддан-Арамд Лияһас һарсн Яковин көвүд эннь. Терүнәс Дина күүкн бас һарла. Яков Лия хойрин көвүд, күүкднь ут турштан 33 күн.
16Гәдин көвүд: Цифион, Хагги, Шуни, Эцбон, Эри, Ароди, Арели.
17Ашерин көвүд: Имна, Ишва, Ишви, Бэриа. Теднә дү күүкн Серах. Бэриан көвүд: Хевер болн Малкиэл.
18Эннь эврәннь күүкн Лияд зарц кехәр Лавана өгсн Зилпаһас һарсн Яковин хөөт үрд. Ут турштан эдн 16 күн.
19Рахеләс һарсн Яковин көвүд: Йосип болн Бенямин.
20Он гидг балһсна гелң Поти-Перан күүкн Аснат Египетд Манаше болн Эприм гидг көвүд Йосипт һарһҗ өгнә.
21Беняминә көвүд: Бела, Бехер, Ашбел, Гера, Нааман, Эхи, Рош, Муппим, Хуппим, Ард.
22Эдн Рахеләс һарсн хөөт үрд. Ут турштан 14 күн.
23Данан көвүн: Хушим.
24Напталин көвүд: Яхцел, Гуни, Ецер, Шиллем.
25Эннь эврәннь күүкн Рахелд зарц кехәр Лавана өгсн Билхаһас һарсн Яковин хөөт үрд. Ут турштан 7 күн.
26Яковла Египетд ирсн һал хөөт үйнр – берәчүдинь тоод эс авхла – 66 күн болҗ һарна. 27Египетд энүнә өмн Йосипас бас хойр үрн төрлә. Яковин уңг-тохма улс Египетд нүүҗ ирәд бүүрлхләрн 70 күн болв.
28Яков Йудаг Йосип тал түрүләд йовулна. Тиигхләрн Йосип тедниг Гошенд тостха гиҗ келүлнә.
Тедн тиигәрән ирнә. 29Йосип мөр татдг гиигн тергән зүүлһәд, Гошенд одад, Израилиг тосхар йовна. Эцкән теврәд, тер удан уульна. 30Израиль иигҗ келнә:
– Ода чамаг әмд-менд йовхичнь үзсн би үкҗ чигн чадхв.
31– Кананас нан тал мини ахнр-дүүнр, цуг мини тохма улс ирв гиҗ хаанд би одҗ келхүв. 32Эдн малчнр, хөд хәрүлнә, бийләһән бог болн бод малан авч ирцхәв, эврәннь зөөрән авч ирцхәв гиҗ терүнд келнәв, – гиһәд Йосип ахнр-дүүнртән болн цуг тохма улстан зәңглнә. – 33Хан таднас ю кедвт гиҗ сурхла, 34иим хәрү өгтн: «Бидн, тана мухлас, бичкн наснасн, мана эцкнрлә әдл, мал хәрүлдг улсвидн». Тиигхлә тер тадниг Гошен һазрт үлдәх. Яһад гихлә мал хәрүлдг улсиг египетихн бузрдҗ одсн улс гиҗ тоолцхана.
Jelenleg kiválasztva:
Эклц 46: ХКО_ӘБ
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Институт перевода Библии, 2002-2023