Эклц 48
48
Йосипин көвүдиг Яков әдслнә
1Невчкн цаг давхла, Йосипт әмтн иигҗ келнә:
– Чини эцк гемтә чигн.
Йосип бийләһән Манаше Эприм хойр көвүһән дахулад, эцк талан одна.
2– Тан тал тана Йосип көвүн ирв, – гиҗ Яковд келнә.
Эцкнь бәәсн чидләрн өндәһәд, орн деерән суув.
– 3Канана һазрин Луз балһсна хаҗуд Хамгин Күчтә Бурхн үзгдәд, нанд әдс өгәд 4иигҗ келлә: «Би чини хөөт үйнриг өслттә кенәв, тооһарн олн болхит, чамас олн келн-улс үүдәнәв. Эн һазриг чини хөөт үйнрт мөңкинд өгчәнәв», – гиҗ Яков Йосипт келнә. – 5Намаг Египет тал чамур ирхәс өмн төрсн чини хойр көвүн ода мини болцхах. Рубен Шимон хойрла әдл Эприм болн Манаше мини болцхах. 6Теднә хөөн төрсн бичкдүд чини болцхах. Өнч авхларн, тедн ахнриннь хүвәс өнчән авцхах. 7Намаг Падданас хәрҗ йовад, Эпратас хол биш хаалһдан йовхла, һундл төрхд, Рахелм Канана һазрт өңгрв. Тенд би терүг Эпрат тал һардг хаалһин хаҗуд оршавув. (Эпрат ода Бетлехем гидг нертә.)
8– Эдн кемб? – гиҗ Йосипин көвүдиг үзн, Израиль сурна.
9– Энд нанд Бурхна өгсн көвүд энтн, – гиҗ Йосип эцкдән хәрү өгнә.
– Нааран өөрдүл эднән, би әдс өгнәв, – гиҗ тер келнә.
10Израиль көгшрхлә, нүднә харань сулдад, сохрхдан шаху тер болв. Йосип көвүдән терүн тал өөрдүләд зогсана. Йосипин эцк тедниг үмсәд теврнә.
11– Чини чирә шинәс үзхүв гиҗ санҗасн уга биләв. Бурхн нанд чини көвүд үзх арһ өгв, – гиҗ Израиль Йосипт келнә.
12Йосип көвүдән Израилин өвдг деерәс буулһад, терүнә өмннь сөгдәд мөргнә. 13Дәкәд Йосип Эпримиг барун бий талан, Израилин зүн һар тал зогсана. Манашег зүн бий талан, Израилин барун һар тал зогсана. Йосип тедниг эцк талан өөрдүлнә. 14Болв Израиль хойр һаран кирсләд, барун һаран суңһад, хамгин бичкн дү Эпримин толһа деер тәвнә. Манаше терүнәс ах болсн бийнь, Израиль зүн һаран энүнә толһа деер тәвнә. 15Дәкәд тер Йосипиг әдсләд иигҗ келнә:
– Мини эцкнрин – Абрахам Ицхак хойрин Бурхн, эндр күртл наснам туршартм намаг хәләҗ йовсн Бурхн, 16зүсн-зүүл му йовдлас намаг харҗ хадһлсн Бурхна элч, бичкдүдиг әдслтхә. Эднд мини нерн, Абрахам Ицхак хойр мини эцкнрин нерд цаарандан делгртхә. Һазр деер тооһарн хөөт үйнрнь йир олн болтха.
17Эцкән Эпримин толһа деер барун һаран тәвсинь үзсн Йосип һундрхна. Эпримин толһаһас эцкиннь һариг авад, Манашен толһа деер тәвхәр тер седнә.
18– Уга, эцкм. Түрүн көвүн эн… Барун һаран энүнә толһа деер тәв, – гиҗ Йосип эцкдән келнә. 19Болв Яков һаран сольшго болад иигҗ келнә:
– Би меднәв, көвүм минь. Би меднәв. Ах Манашеһәс бас олн улс үүдх, тедн бас алдр болх. Болв Манашен дү терүнәс деегшлх, терүнә хөөт үйнр тооһарн олн улс болцхах.
20Тер өдр Йосипин көвүдиг әдсләд, Израиль иигҗ келнә:
– Тадна нердиг Израилин улс нег-негән әдслхләрн дуудх: «Бурхн Эприм Манаше хойрт сә кесн әдләр чамд сә кетхә».
Тиигҗ Эпримиг Манашен өмн тер һарһв.
21– Ода удлго би үкхүв. Болв Бурхн тадниг залх, таниг өвкнрин һазрт хәрү күргх. 22Би чамд ахнр-дүүнрәсчн үлүһәр хүвин икнкинь өгчәнәв. Үлд саадг хойрар амореймүдәс булаҗ авсн уулын Шехем гидг ташу бас өгнәв, – гиҗ эцкнь Йосипт келнә.
Jelenleg kiválasztva:
Эклц 48: ХКО_ӘБ
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Институт перевода Библии, 2002-2023