Лука 19
19
19-НЭ ЕДЗЫГЪУЭ
Хьисэрэ Закхейрэ
1Абы и ужькӀэ Хьисэ Ерихон къалэм дыхьэри, зэхикӀухьащ. 2Закхей зи цӀэ гуэр дэст абы. Ар хьэкътын ахъшэ хэзыххэм я пашэхэм щыщт, бейт. 3Хьисэ и щыфэлӀыфэ зригъэлъагъуну хуеят ар, арщхьэкӀэ езыр лӀы лъахъшэ цӀыкӀути, цӀыху гупышхуэм яхэту зыри илъагъун лъэкӀакъым. 4Арати, цӀыхухэм япэ ищри, ахъуо жыгым дэпщеящ, Хьисэ зригъэлъагъун папщӀэ, сыт щхьэкӀэ жыпӀэмэ Хьисэ а гъуэгумкӀэ блэкӀын хуейт.
5Хьисэ а щӀыпӀэм щынэсым, дэплъейри, Закхейм жриӀащ:
– Закхей, псынщӀэу къех, уи унэм сынеблэгъэн хуейщ нобэ.
6Закхей псынщӀэу къехыжри, и гуапэ хъуауэ, и унэм Хьисэ иригъэблэгъащ. 7Ар щалъагъум, цӀыхухэм мыарызыуэ жаӀащ:
– Гуэныхь зыщӀэ цӀыхум и унэ хьэщӀэу ихьащ.
8Закхей къэтэджри, Зиусхьэн Хьисэ къыжриӀащ:
– Зиусхьэн! Мис, си мылъкум и ныкъуэр тхьэмыщкӀэхэм яхуэзгуэшынущ. ЦӀыху гуэр къэзгъэпцӀаӀамэ, хуэдиплӀ естыжынущ.
9КъегъэлакӀуэр мы унагъуэм нобэ къэкӀуащ, – жриӀащ Хьисэ Закхей. – Мы лӀыри Ибрэхьим къытехъукӀа цӀыхухэм ящыщщ. 10ЦӀыху Лъэпкъым и Къуэр къыщӀэкӀуар кӀуэдыпӀэ ихуа цӀыхухэр къилъыхъуэурэ, мыкӀуэду къригъэлыну аращ.
МинэкӀэ зэджэ ахъшэхэм ятеухуа ущие хъыбарыр
(Маттэ 25:14-30)
11Хьисэ жиӀэхэм цӀыхухэр едаӀуэ щыхъум, мы ущие хъыбарри къыпищащ; сыт щхьэкӀэ жыпӀэмэ Хьисэ Ерусалим и гъунэгъуу щытт икӀи Тхьэм и Тепщэныгъэшхуэр асыхьэтым къэлъэгъуэну цӀыхухэр гугъэрти. 12Апхуэдэу щыхъум, Хьисэ жиӀащ:
– Къэрал жыжьэ гуэрым кӀуэну мурад ищӀащ пщы гуэрым, езым и къэралым щхьэкӀэ а пащтыхьыгъуэр къиубыду къигъэзэжын гугъэр иӀэу. 13Ежьэн и пэкӀэ, и унэӀутхэм ящыщ цӀыхуипщӀ къриджэщ, минэ#19:13 минэ – лэжьакӀуэм мазищ лэжьапщӀэу ирату щыта дыщэ ахъшэщ. зырыз яритри, яжриӀащ: «Къэзгъэзэжыху, мы ахъшэр вгъэбагъуэ».
14Ауэ мы пщыр и къэралым ис цӀыхухэм фӀыуэ къалъагъуртэкъыми, «Мы лӀыр пащтыхь къытхуэхъуну дыхуейкъым», жрагъэӀэну, лӀыкӀуэхэр пщым и ужь иту а къэралым ягъэкӀуащ.
15АрщхьэкӀэ а пщыр пащтыхьу ягъэуващ. Пщым къыщигъэзэжым, ахъшэхэр зрита унэӀутхэр къриджащ. Абыхэм ящыщу дэтхэнэми щэн-къэщэхун ӀуэхукӀэ къилэжьар зригъэщӀэну хуейт ар.
16Япэрей унэӀутыр къакӀуэри, жиӀащ: «Зи щӀыхь ин, къызэпта минэмкӀэ хуэдипщӀ къэзлэжьащ».
17Пщым абы жриӀащ: «ФӀыуэ пщӀащ, си унэӀутыфӀ. Ӏуэху мащӀэмкӀэ сызыщыгугъ хъун цӀыхуу узэрыщытам щхьэкӀэ, къалипщӀ уэ пӀэщӀэслъхьэнущ».
18ЕтӀуанэ унэӀутри къакӀуэри, жиӀащ: «Зи щӀыхь ин, къызэпта минэмкӀэ хуэдитху къэзлэжьащ».
19Пщым абы жриӀащ: «Къалитху уэ пӀэщӀэслъхьэнущ».
20Ещанэ унэӀутри къакӀуэри, жиӀащ: «Зи щӀыхь ин, мис уи минэр. Ар хъыданым кӀуэцӀыслъхьэри щызгъэлъащ. 21УзэрылӀы пхъашэм щхьэкӀэ сыпщышынащ. Уэ умыгъэтӀылъар къыбощтэж, тумысари къытыбохыж».
22Пщым абы жриӀащ: «Уэ уи псалъэхэмкӀэ узгъэкъуэншэжынщ, унэӀут бзаджэ. Уэ пщӀэрт сэ сызэрылӀы пхъашэри, сымыгъэтӀылъар къызэрысщтэжри, тезмысар къызэрытесхыжри. 23АтӀэ сыт си ахъшэм хагъэхъуэн щхьэкӀэ, сатуущӀэхэм щӀумытар? Апхуэдэу пщӀамэ, сэ сыкъэкӀуэжа нэужь, си ахъшэм хэхъуауэ къызэптыжынт».
24Пщым къыбгъэдэтхэм яжриӀащ итӀанэ: «Мы лӀым минэр къеӀыфхи, минэу пщӀы зиӀэм ефт».
25«Зи щӀыхь ин, абы минэу пщӀы иӀэкъэ?» къыжраӀащ абыхэм.
26«Сэ нывжызоӀэ, ар хэти ирехъу, зиӀэм нэхъыбэ къритынущ Тхьэм, ауэ зыри зимыӀэм иӀэ тӀэкӀури Ӏихыжынущ Тхьэм», жиӀащ пщым. 27«Сэ пащтыхь сахуэхъуну хуэмея си бийхэр къафши, си пащхьэм деж щывукӀ иджы».
ЩӀыхьышхуэ иӀэу, Хьисэ Ерусалим зэрыдыхьар
(Маттэ 21:1-11; Марк 11:1-11; Иуан 12:12-19)
28А псалъэхэр жиӀа нэужь, Ерусалим кӀуэну, Хьисэ и гъуэгу техьэжащ. 29Елеон зи цӀэ Ӏуащхьэм и лъапэм тес жылитӀым Виффагиерэ Вифаниерэ щынэблагъэм, Хьисэ и гъуэгу ирикӀуэхэм ящыщ цӀыхуитӀ япэ иригъэщащ, 30мыпхуэдэу яжриӀэри:
– Фяпэ ит жылэм фыдыхьэ. Фызэрыдыхьэу, цӀыху зэи зытемытӀысхьа шыд шыщӀэ епхауэ фрихьэлӀэнущ. Ар къыкӀэрыфтӀэтыкӀи, къафшэ. 31«Сыт къыщӀыкӀэрыфтӀэтыкӀыр?» жиӀэу зыгуэр къывэупщӀмэ, мыпхуэдэу жефӀэ: «Зиусхьэныр хуейщ абы».
32А лӀыкӀуитӀыр кӀуэри, Хьисэ зэражриӀам хуэдэу, шыдыр епхауэ къагъуэтащ. 33Шыд шыщӀэр къыщыкӀэратӀэтыкӀым, ар зейхэм къыжраӀащ:
– Сыт шыд шыщӀэр къыщӀыкӀэрыфтӀэтыкӀыр?
34– Зиусхьэныр хуейщ абы, – жаӀащ лӀыкӀуэхэм.
35Шыд шыщӀэр Хьисэ деж къашэщ, я щыгъынхэр тралъхьэри, Хьисэ ягъэшэсащ. 36Хьисэ шыд шыщӀэм тесу здэкӀуэм, цӀыхухэм я щыгъынхэр зыщахыурэ гъуэгум хутраубгъуэрт.
37Ерусалим и гъунэгъуу, гъуэгур Елеон Ӏуащхьэм къыщех щӀыпӀэм Хьисэ щынэсым, ялъэгъуа Ӏуэху телъыджэ псом щхьэкӀэ гуфӀэрэ макъышхуэкӀэ Тхьэм щӀыхьышхуэ хуащӀу, Хьисэ и гъуэгу ирикӀуэ гуп псоми мыпхуэдэу жаӀэу щӀадзащ:
38«Зиусхьэным и цӀэкӀэ къакӀуэ
пащтыхьым щӀыхьышхуэр ейщ!
Уафэм мамырыгъэ щыӀэщ!
Тхьэуэ Лъагэм щӀыхьышхуэр ейщ».#19:38 Зиусхьэным … щӀыхьышхуэр ейщ – еплъ Сабур (Псалтыр) 117:25-26.
39ЦӀыху гупышхуэм яхэт фарисейхэм ящыщ гуэрхэм Хьисэ къыжраӀащ:
– Дин егъэджакӀуэ, уи гъуэгу ирикӀуэхэм щагъэтыну яжеӀэ.
40– Сэ нывжызоӀэ, – жиӀащ Хьисэ, – абыхэм щагъэтмэ, мывэхэр къэгуоунущ.
41Ерусалим пэгъунэгъу хъууэ, къалэр щилъагъум, абы хуэгъыурэ, Хьисэ жиӀащ:
42– Мамырыгъэ къыпхуэзыхьыну Ӏуэхугъуэхэр нобэ уэри пщӀэуэ щытыгъатэмэ, сыгуфӀэнт, ауэ уи нэхэм ахэр ящыбзыщӀауэ щытщ зэкӀэ; 43сыт щхьэкӀэ жыпӀэмэ уи бийхэм быдапӀэхэмкӀэ укъыщыщаувыхьын махуэхэр къыпхуэкӀуэнущ. Абыхэм укъаухъуреихьынущ, дэнэ лъэныкъуэкӀи къыщыптеуэнущ. 44Уэри уи быну къалэм дэсхэри уи бийхэм фагъэкӀуэдынущ, мывитӀ зэтелъу къагъэнэнукъым, Тхьэм умыкӀуэду укъыщригъэлыну зэманыр къэсауэ къызэрыбгурымыӀуам щхьэкӀэ.
Хьисэ сатуущӀэхэр Тхьэм и унэшхуэм къызэрыщӀихуар
(Маттэ 21:12-17; Марк 11:15-19; Иуан 2:13-22)
45Абы и ужькӀэ Хьисэ Тхьэм и унэшхуэм щӀыхьэри, сатуущӀэхэр#19:45 сатуущӀэхэр – абыхэм къурмэныпхъэ былымхэр Тхьэм и унэшхуэм и пщӀантӀэм щащэрт. къыщӀихуу щӀидзащ. 46Абыхэм яжриӀащ:
– Тхьэм къызэрыжиӀар и псалъэу тхахэм хэтщ:#19:46 Тхьэм и псалъэу тхахэм хэтщ – еплъ Ешайа бегъымбарым и тхылъым 56:7. «Сэ си унэр тхьэлъэӀупӀэу щытынущ». АрщхьэкӀэ фэ ар «хъунщӀакӀуэ тӀысыпӀэм»#19:46 хъунщӀакӀуэ тӀысыпӀэ – еплъ Иеремие бегъымбарым и тхылъым 7:11. ещхь фщӀащ.
47Тхьэм и унэшхуэм щӀэту, Тхьэм и псалъэхэр махуэ къэс яригъащӀэрт Хьисэ цӀыхухэм. Дин пашэшхуэхэри, торэт егъэджакӀуэ пашэхэри, цӀыхухэм яӀэ адрей пашэхэми Хьисэ зэрагъэкӀуэдыну щӀыкӀэм егупсысу щӀадзащ, 48ауэ цӀыху псори я гуапэу Хьисэ едаӀуэу щытти, иращӀэн мыхъумыщӀагъэ лъэпкъ ягъуэтакъым.
Jelenleg kiválasztva:
Лука 19: KbdNTGP2017
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Библиер зэдзэкӀыным елжь Институт, 1993, 2007, 2011, 2017