Mose I, 2
2
1Bɔ nɛ Mawu pee nɛ e kɛ bɔ hiɔwe kɛ zugba, kɛ nɔ́ tsuaa nɔ́ nɛ ngɛ je ɔ mi ji nɛ ɔ nɛ. 2#Heb 4.4, 10 Mawu tsu ní ligbi ekpa, nɛ ligbi nɛ ji kpaago ɔ, e jɔɔ e he. #Mose II, 20.11 3E gbaa ligbi nɛ ji kpaago ɔ, nɛ e pee lɛ ligbi klɔuklɔu; jamɛ a ligbi ɔ nɛ e bɔ je ɔ gbe nya, nɛ e jɔɔ e he, ejakaa ní tsumi nɛ e tsu kɛ bɔ je ɔ, e gbe nya. 4Sane nɛ ɔ gbaa wɔ bɔ nɛ Yawɛ Mawu bɔ je ɔ.
Ngmɔ ɔ nɛ ngɛ Eden ɔ
Benɛ Yawɛ Mawu bɔ je ɔ, 5tso ko tso ko be zugba a nɔ, nɛ nga ko hu puɛ́ ngɛ nɔ; ejakaa e ha we nɛ hiɔmi nɛ nɛ ngɔ pue zugba a nɔ lolo; nɛ nɔ ko hu be nɛ ngɛ zugba a nɔ hue. 6Se ke pee ɔ, nyu jeɔ zugba a mi kɛ ba pɔɔ zugba a hɛ mi tsuo.
7 #
Kor I, 15.45
Jamɛ a be ɔ mi ɔ, Yawɛ Mawu ngɔ zugba zu kɛ puɛ nɔmlɔ, nɛ e mu mumi nɛ haa nɔ wami ngɔ wo nɔmlɔ gugwɔ puɔ mi; nɛ nɔmlɔ pee adesa hɛngmengmletsɛ.
8Yawɛ Mawu pee ngmɔ ko ngɛ Eden, ngɛ beleku je, nɛ lejɛ ɔ e ngɔ nɔmlɔ nɛ e puɛ ɔ ngɔ to. 9#Kpoj 2.7; 22.2, 14 E ha tso slɔɔtoslɔɔtohi puɛ ngɛ ngmɔ ɔ mi: tsohi nɛ ngɛ fɛu, kɛ ní nɛmɛ nɛ woɔ yiblii nɛ a yeɔ. Tso nɛ haa nɔ wami, kɛ tso nɛ haa nɔ leɔ kpakpa kɛ yayami maa si ngɛ ngmɔ ɔ kpɛti tutuutu.
10Pa ko je Eden kɛ ba gu ngmɔ ɔ mi, nɛ e haa ngmɔ ɔ nyu. Kɛ je lejɛ ɔ, pa a gba kɔni eywiɛ. 11A tsɛɛ kekleekle kɔni ɔ ke Pishon. Lɛ ji pa nɛ bɔle Havila zugba a tsuo, he nɛ a naa sika tsu ngɛ ɔ. 12A naa sika tsu ngmingmiingmi, nu kɛ e he via, kɛ tɛhi nɛ a he jua wa ngɛ lejɛ ɔ. 13Pa kɔni enyɔne ɔ biɛ ji Gihon; lɛ ji pa nɛ bɔle Kush zugba a tsuo. 14Pa kɔni etɛne ɔ biɛ ji Tigris; e bee ngɛ Asiria beleku je. Kɔni eywiɛne ɔ ji Yufrate.
15Jehanɛ Yawɛ Mawu ngɔ nɔmlɔ ɔ kɛ ya to Eden ngmɔ ɔ mi, konɛ e hu mi nɛ e hyɛ nɔ. 16E wo lɛ mlaa ke, “Tso ɔmɛ nɛ ngɛ ngmɔ ɔ mi ɔ, o ma nyɛ maa ye eko tsuaa eko yiblii faa, 17ja tso ɔ nɛ haa nɔ leɔ kpakpa kɛ yayami ɔ pɛ. Koo ye jamɛ a tso ɔ yiblii; ligbi nɛ o maa ye eko ɔ, o ma gbo.”
18Enɛ ɔ se ɔ, Yawɛ Mawu de ke, “E hí kaa nyumu ɔ nɔ kake too nɛ hi si; ma ha lɛ he piɛlɔ nɛ sa lɛ.” 19-20Yawɛ Mawu de nɔ́ nɛ ɔ, ejakaa benɛ e ngɔ zugba zu kɛ puɛ je nɛ ɔ mi lohwe ɔmɛ tsuo gbe nya a, ekoeko be nɛ sa nɔmlɔ kaa e he piɛlɔ. Nɔmlɔ ɔ wo lohwe ɔmɛ tsuo biɛ: we mi lohwehi, pu mi lohwehi, kɛ lohwe pɛlitsɛmɛ. Bɔ tsuaa bɔ nɛ e tsɛ eko ɔ, jã pee e biɛ. Se lɛ nɔmlɔ ɔ nitsɛ lɛɛ a na we he piɛlɔ nɛ sa we lɛ lolo.
21Lɔ ɔ he ɔ, Yawɛ Mawu ha mahe vii ko ba nɔ nyumu ɔ nɔ, nɛ benɛ e ngɛ mahe ɔ mi kɛ mwɔɔ ɔ, Mawu je nyumu ɔ kasa wu kake nɛ e kɛ he lo tsi lejɛ ɔ. 22Yawɛ Mawu ngɔ kasa wu ɔ nɛ e je ngɛ nyumu ɔ he ɔ kɛ pee yo, nɛ e ngɔ lɛ ba ha nyumu ɔ. 23Nyumu ɔ de ke,
“Ɛhɛɛ! Jehanɛ lɛɛ i na
ye henɔ tutuutu:
imi nitsɛ ye muɔ ji nɛ ɔ nɛ.
A je lɛ kɛ je nyumu mi;
a ma tsɛ lɛ yo.”
24 #
Mat 19.5; Mar 10.7-8; Kor I, 6.16; Efes 5.31 Enɛ ɔ he je nɛ nyumu siɔ e tsɛ kɛ e nyɛ, nɛ e ngɔɔ e he ya mɛtɛɛ e yo he nɛ a peeɔ nɔ kake ɔ nɛ.
25Nyumu ɔ kɛ e yo ɔ tsuo hɛɛ a he gu, se zo pee we mɛ.
Jelenleg kiválasztva:
Mose I, 2: Dangme
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Bible in Dangme © Bible Society of Ghana, 2018.