Tobit 3
3
Ik'ajtiya Tobit
1Che' weñ ch'ijiyem jiñi kpusik'al, jajay uk'oñ tsa' kaji kpejkañ jiñi Lak Yum, tsa' ksu'be:
2«KYum kcha'añ, weñ tojetbä,
yik'ot ti' ak'uxbiya mi' alaj mel chukitak añ.
¡Jatet jach jiñi tojbä xmeloñel ti' pejtelel pañämil!
3»KYum kcha'añ, ña'tañoñ yik'ot koltañoñ.
¡Mach awäk'oñ ti chämel cha'añ ti' ikaj kmul,
yik'ot la' ñajayik acha'añ ijoñtolil imul kñojte'elob!
¡Ma'añik tsa' kña'ta lojoñ chuki woli kmel lojoñ!
4»Tsa' kñusa lojoñ atik'ojel;
jiñ cha'añ tsa'ix awäk'äyoñ lojoñ ti chilbeñtel kchu'bä añ,
yik'ot cha'añ mik lok'säñtel lojoñ ya' ti tejklum
cha'añ ka'bäl mik tsänsäñtel lojoñ.
Tsa' achokoyoñ lojoñ majlel ti ñajtakbä tejklum,
baki tsa' weñ wajleñtiyoñ lojoñ.
5»Isujmäch kYum cha'añ tojäch pejtelel ameloñel,
awilañ, tsa' kcha'le mulil ti' atojlel.
Ma'añik juñtiklel tsa'bä ich'ujbi axik'ojel
mi tsa'ik ixuk'choko ipusik'al ti' atojlel.
6Mele che' bajche' awom awik'otoñ:
Mi' awom atsänsañoñ, ¡tsänsañoñ!
Che'äch mik lok'el majlel ila ti pañämil,
cha'añ mik cha' sujtel ti ts'ubejñ.
»¡Ñumeñ uts'at che' mik chämel
cha'añ ma'añix mik chäñ u'biñ wajleñtel,
kome jiñi wajleya mi' ibujt'esañ ti ch'ijiyemlel kpusik'al!
»KYum,
¡Lok'sañoñ ti ili wokolil!
Mach amäy awut ti ktojlel.
¡La'ix ak'äyoñ majlel ti' ichumlib xsajtelob!
¡La' chämikoñ cha'añ ma'añik mik chäñ ubiñ wokol!
¡La' chämikoñ cha'añ ma'añik mik chäñ ubiñ wajleñtel!»
Iwokolil Sara
7Ti jiñi jachbä k'iñ, juñtikil x-ixik ik'aba' Sara, yalobil Ragüel chumulbä ya' ti Ecbatana ti Media, woli iyu'biñ ka'bäl ts'a'leñtel tilembä ti xch'oktakob x-etelo'bä icha'añ itat. 8Jiñi x-ixik Sara tsa'ix ajk'i ti ñujpuñijel yik'ot wuktikil wiñik. Ixku jiñi xi'baj Asmodeo tsi' tsäñsa jiñi wiñikob che' mu'to ikajel ipi'leñob ibä. Jiñi xch'oktakob x-e'telob tsa' kaji isu'beñob Sara:
«¡Jatetäch mu'bä atsäñsañ añoxi'alob! Tsa' ajñi awik'ot wuktikil wiñik yik'ot mi juñtikilik tsa' ajñi ijol ik'aba' awik'ot. 9¡Mach kmul lojoñ che' ma'añik añoxi'al! ¡Mach achäñ ak'oñ lojoñ ti wokol! ¡Yom che' muk'ix achämel che' ma'añix ma' awilañ awalobilob!» Che'ob.
10Che' tsi' yu'bi ili t'añ Sara, weñ ch'ijiyem jax tsa' käle, tsa' kaji ti uk'el. Tsa' letsi ba'añ ik'aj-o itat, cha'añ ya'ix mi' jich' ibä. Che' tsi' weñ ña'ta chuki yom imel, tsi yälä ti' ipusik'al:
«Mach uts'atik cha'añ mi' kjich'bä, mi tsa' kmele bajche' woli kña'tañ, muk'ix kajel käk' ti kisiñ jiñi ktat. Mi kajel iyälob: “Jiñi kojachbä xch'ok awixik'al k'uxbibilbä, tsa'ix itsäñsa ibä, ti' kaj cha'añ ma'añik tsi' ilät'ä ikuch ka'bäl wokolil”. Mi tsa' ktsäñsa kbä, mi kaj käk' ti chämel ti' ch'ijiyemlel ipusik'al ktat. Mi kaj jk'ajtibeñ Lak Ch'ujutat cha'añ mi' itsänsañoñ. Che' jiñi ma'añix mi' kchäñ u'biñ ts'a'leñtel».
11Jiñ cha'añ Sara tsa' kaji ipejkañ Lak Ch'ujutat, tsa' kaji iletsañ ik'äb ti alä ti' otot, tsi' yälä:
«Ch'ujulet jatet ti' pejtelel k'iñ,
k'uxbiyajetbä kYum.
Ch'ujuläch jiñi ak'aba'.
La' ik'äyiñet ti' pejtelel k'iñ,
pejtelel chuki tak añ ti pañämil.
12»Wäle kañal kwut ti' atojlel
cha'añ woli ksajkañ koltäñtel.
13¡Awokolik, chilbeñoñix kuxtälel!
¡Mach komix kchäñ u'biñ wajleñtel!
14»Awujil, kYum,
cha'añ joñoñ xch'okoñ;
ma'añik ba' kwis pi'le wiñik.
15Ma'añik bakibä k'iñ tsa' kbi'besa jiñi jk'aba'
mi jiñik ik'aba' ktat, ila ti yumäñtel baki kächäloñ.
Juñtikiloñ jachbä xch'okbä iyalobil ktat;
ma'añik ch'itoño'bä iyalobil
cha'añ mi' mejlel ti p'ojlel ipak'il.
Ma'añik ti tajol kpi'älob
cha'añ mi' mejlel kñox-aliñ.
Wuktikil wiñik tsa'ixbä ich'ämäñoyob,
yik'ot ti ila pejtelel tsa' chämiyob;
¿Chuki ik'äjñibal che' chäñ kuxuloñ?
»Ixku mi mach awom cha'añ mik kchämel,
¡Mele ap'uñtaya ti ktojlel yik'ot u'biñ kt'añ!
¡Jisañix jiñi wajleñtel ti k'amel!»
16-17Jiñi jk'ajtiya yik'ot ik'ajtiya Sara lajal tsa' jak'beñtiyoñ lojoñ: Che'bä tsa' ochiyoñ ya' ti kotot, yik'ot che' tsa' ju'bi jiñi Sara ya' ti chañ ik'ajob oj itat, jiñi Lak Ch'ujutat machbä añik ip'isol ip'ätälel tsi' ilaj sujmetesa, che' tsa' ichoko tilel ángel Rafael cha'añ mi its'äkañoñ lojoñ. Joñoñ tsa' kcha' ila pañämil yik'ot tsa' kcha' k'ele ik'äk'al Lak Yum. Jiñi joñtolbä xi'baj Asmodeo tsa' ikäyä itäklañ Sara, ya'i jiñi x-ch'ok tsa' mejli ti ñujpuñijel yik'ot kalobil Tobías cha'añ mi' ichäñ k'el ip'olbal. Jiñi Tobías jiñäch kojachbä wiñik mu'bä imejlel ipäy jiñi x-ixik che' bajche' yaño'bä.
Jelenleg kiválasztva:
Tobit 3: CholDc
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Biblia Chol de estudio con DC- Derechos reservados por SBM