isizwur 18
18
kraḍ irgazn lli‑d‑ibann i‑ibrahim
1izri ma‑izrin s‑d‑iban sidi rbbi i‑ibrahim ġ‑dar‑uṣġar n‑tasaft n‑mamra. trġa luqt ġ‑tuẓẓunt n‑wass, iskiws ibrahim ġ‑imi n‑uh̬iyyam‑ns. 2yall alln‑ns, ha kraḍ irgazn biddn‑d srs. lliġ‑tn‑iẓra inkr‑d zġ‑imi n‑uh̬iyyam, yazzl s‑darsn iknu ar akal 3yini: «a‑sidi, iġ‑ufiġ rrḍa ġ‑iẓri‑nk, ad‑ur‑tzrit ah̬ddam‑nk. 4ad‑awn‑d‑awiġ aman, tsirdm iḍarn‑nun, tsunfum ġ‑ddu‑uṣġar 5ard‑d‑awiġ imikk n‑uġrum f‑a‑tssdusm ulawn‑nun, tkmmlm ilmma f‑uġaras‑nun, ašku tuškam‑d ġilad s‑dar‑uh̬ddam‑nun.» inin‑as: «skr ġmklli‑s‑tnnit.» 6yazzl ibrahim s‑ugʷns n‑uh̬iyyam s‑dar sarah yini‑as: «ḥarru tasit‑d kraṭṭ lɛbrat mqqurnin n‑uggʷrn ifulkin, tɛjnt aġrum.» 7yazzl ibrahim s‑dar imugayn, yawi‑d yan igiz iḍnin ijjin, ifk‑t i‑yan ġ‑ih̬ddamn‑ns, iḥarru nttan a‑t‑ijjujad. 8yawi‑d ilmma tikkilt d‑ugʷfay d‑igiz lli‑issnwa, isrs‑t‑id ġ‑lgddam‑nsn ar‑šttan, ibidd ġ‑ddu‑uṣġar ar‑fllasn‑itsh̬h̬ar.
9sqsan‑t ilmma: «manza tamġart‑nk sarah?» yini‑asn ibrahim: «hattin ġ‑uh̬iyyam.» 10yini‑as‑d: «hati rad‑d‑dark‑wrriġ imal ġ‑tizi‑ad, yili ġ‑dar‑tmġart‑nk sarah yan‑warraw.» tsfld‑as sarah d‑nttat tbidd ġ‑tġurdin n‑ibrahim ġ‑imi n‑uh̬iyyam. 11han ibrahim d‑sarah mqqurn uwssrn ġ‑isggʷasn, d‑nttat tzri tizi n‑tarwa. 12lliġ tsfld i‑wawal‑an ar‑tḍṣṣa d‑ih̬f‑ns tini: «aylliġ hrmġ nkki, yuwssr‑urgaz‑inu, is‑rad‑sul‑fjjijġ?» 13yini sidi rbbi i‑ibrahim: «mah̬ aylliġ a‑tḍṣṣa sarah tini ‹izd ṣṣaḥt rad‑sul‑aruġ ġilad ġ‑uwssrġ›? 14is‑illa kra mi ur‑iẓḍar rbbi da‑bdda‑illan? ġ‑uzmz lli‑s‑nniġ, rad‑d‑dark‑wrriġ imal ġ‑tizi‑ad, yili dar sarah yan‑warraw.» 15imma sarah kšmnt‑stt‑tksaḍ trar‑as‑d: «ur‑a‑ḍṣṣaġ». irar‑as‑d: «uhu, ar‑tḍṣṣat.»
16nkrn ilmma irgazn‑an, imun didsn ibrahim a‑tn‑isafḍ ġ‑uġaras. ftun aylliġ lkmn yan mani yattuyn ġ‑a‑n‑tmnadn tamdint n‑sadum ġ‑tuggugt. 17yini sidi rbbi ġakudan: «is‑rad‑ssrgsġ f‑ibrahim ma‑rad‑skrġ? 18uhu, ra‑ig nttan aqbil imqqurn itjhhdn, d‑nttan a‑s‑rad‑barkġ kullu iqbiln n‑ddunit. 19hati ẓliġ‑t a‑yuṣṣa tarwa‑ns ula tarwa n‑tarwa‑ns ad‑amẓn aġaras n‑rbbi siditsn, ar‑bdda‑skarn ma‑ifulkin ula ma‑igan lḥqq, baš ad‑ssafuġ i‑ibrahim kullu ma‑s‑as‑nniġ.» 20yini‑as ilmma sidi rbbi: «han ayt‑tmdinin n‑sadum d‑ɛamura, ar‑srsn‑ssmummuyn mddn ar‑n‑srsn‑ssġuyyun s‑dari, ašku lh̬ʷšant lli‑tsalan, han tʷh̬šn bahra. 21ra‑n‑gguzġ ad‑ẓrġ izd ṣṣaḥt ar‑skarn kullu ġaylli‑s‑a‑d‑srsn‑ssġuyyun mddn s‑dari. iġ‑ur‑a‑skarn ġmkan, rad‑issanġ.»
aseqsi n‑ibrahim i‑rbbi f‑sadum
22nkrn irgazn ġakudan, zaydn s‑tsga lli‑ġ‑tlla sadum. imma ibrahim iqama ġin, ibidd ġ‑umnid n‑sidi rbbi. 23yakmur‑d srs ibrahim isqsa‑t: «is‑ra‑tn‑thlkt s‑sin, walli ifulkin ula walli yʷh̬šnn? 24iġ‑llan ġ‑tmdint‑an smmus id‑mraw (50) ifulkin, is‑ra‑thlkt tamdint kullutt? is‑ur‑ra‑stti‑tadjt f‑ssibt n‑smmus id‑mraw da‑gis‑illan fulkin? 25izd s‑ṣṣaḥt trit a‑tn‑thlkt s‑sin, walli ifulkin ula walli yʷh̬šnn, tskrt ġ‑ayt‑ufulki zund ayt‑lh̬ʷšant? walaynni ur‑ra‑tskrt ġmkan. kiyi da‑igan lqaḍi n‑ddunit kullutt, is‑ur‑ra‑tḥkamt s‑lḥqq?» 26yini‑as sidi rbbi: «iġ‑ufiġ ġ‑sadum smmus id‑mraw (50) ifulkin, rad‑adjġ tamdint kullutt f‑ssibt‑nsn.» 27yini‑as ibrahim: «ṣamḥ‑iyi nkki‑ad ur‑igin abla win‑ugdrur d‑iġd, iġ‑zɛmġ ad‑sawlġ d‑sidi. 28iġ‑laḥ smmus zġ‑smmus id‑mraw (50), is‑ra‑thlkt tamdint kullutt iġ‑zġ‑gis‑laḥ smmus?» yini‑as: «ur‑ra‑stt‑hlkġ iġ‑gis‑ufiġ kkuẓ id‑mraw d‑smmus (45).» 29yini‑as daġ ibrahim: «iġ‑gis‑llan kkuẓ id‑mraw (40)?» yini‑as: «ur‑ra‑stt‑hlkġ iġ‑gis‑ufiġ kkuẓ id‑mraw (40).» 30yini‑as daġ ibrahim: «wa sidi, ad‑ak‑ur‑flla‑ṭiyr iġ‑daġ‑sawlġ. iġ‑gis‑llan kraḍ id‑mraw (30)?» yini‑as: «ur‑ra‑stt‑hlkġ iġ‑gis‑ufiġ kraḍ id‑mraw (30).» 31yini‑as: «ṣamḥ‑iyi iġ‑zɛmġ ad‑sawlġ d‑sidi. iġ‑gis‑llan sin id‑mraw (20)?» yini‑as: «ur‑ra‑stt‑hlkġ iġ‑gis‑ufiġ sin id‑mraw (20).» 32yini‑as: «ad‑ak‑ur‑flla‑ṭiyr a‑sidi iġ‑sul‑nniġ yan‑wawal. iġ‑gis‑llan mraw?» yini‑as: «ur‑ra‑stt‑hlkġ iġ‑gis‑ufiġ mraw.» 33ġmkan a‑s‑isawl d‑ibrahim, iddu ilmma sidi rbbi. iwrri ibrahim s‑dar takat‑ns.
Jelenleg kiválasztva:
isizwur 18: SHILOT20
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Selected Old Testament in Tashelhayt (Latin script) © United Bible Societies, 2020.
Robert Bernard Dann.