Luk 11
11
Jisɔs ɔkpɛbɛ njɔm orirɔbɔ
1Reyi dinɛ, Jisɔs ɔra ɔrɔbɔ njɔm na kwa. Ndi owu yɛ, ɔnyɛgɛ-mɔ ŋɔnɛ ɔkanɛ mɔ ya, “Ɔkɔ-rokuku, kpɛbɛ yu kɔrɔbi njɔm, kɛmanci Jɔn ɔkpɛbɛ banyɛgɛ mɔ.” 2Jisɔs ɔkanɛ bɛ ya, “Ara minkɔrɔbi, rɔbɔ nu ya: “Mintɛ, yɔgɛ rejigɛ keriragi rirɨna riyɛ, yɔgɛ rɔrɛ-rɛkɨm rɔyɛ rowu. 3Jɛ yu reyi nandinɛ bedidi reyi. 4Gbɛ sugɛ yu na bobi boyua, kɛmanci rɛgbɛ resugɛ mbɛ basi yu bobi. Mɨnɛ karɔbɔ yu na eyumɛ.” 5Mɨnɛ Jisɔs ɔkanɛ banyɛgɛ mɔ ya, ara oni ŋɔnɛ na kɔrɔkonua orua ɛyɛ ɔcɛmɛ ɔmɔ manti jɔ ɔkakanɛ mɔ ya, “Fɔrɛ mi bɛkpɨn ɔyɔ bɛtaa. 6Ɔcɛmɛ omia ŋɔ osi ɛyɔ rɔcɛ oriɛnɛ ɛyɛ emia, mɨnɛ nkifɔnɔ bedidi mbi nkɔjɛ mɔ.’ 7Ara ɔcɛmɛ ɔyɛ kaŋɔ ɔkpɛɛ wu remu rika ɛtɔ ɛmɔ ya, ‘Botutu kajuŋanɛ mi! Nfin rɛma, bɔ bamia na ami rɛyɔmɛ. Nyɛŋɛ kɔgbɛ njɛ wu gba.’ 8Nkanɛ nu, ara okigbɛ ɔjɛ wu ɔyɔ ndi ara ɔcɛmɛ ɔmɔ, kuɔgbɛ ɔjɛ wu gbanambunɛ mbu aduga ndi gbobi bokisi wu kɔsɨn. 9“Mɨnɛ nkanɛ nu: Sɨna, mɨnɛ kuminfɔnɔ, gumɛ, mɨnɛ kuminfɛ, lɨba, mɨnɛ kubayirɛ nu rɛma. 10Mbɛ basɨna kubafɔnɔ, mɨnɛ mbɛ bagumɛ kubafɛ, mɨnɛ kubayirɛ okegere bajɛ bani mbɛ balɨba. 11“Baga mintɛ ŋɔ wɔ ɔmɔ ɔkɔsɨn mɔ eti-mani, ɔjɛ mɔ ɛjɔ? 12Yɛnɛ mɔ ɔkɔjɛ wɔ ɔmɔ nnaŋ ara ɔsɨna ecikɔgi? 13Ara anu mbɛ minra bani babi, mingbɨri kɛmanci minjɛŋɛ bɔ banua brika birɛ. Awufɛyɛ Mintɛ ŋɔ ɔra na kaju ŋɔ ɔkɔjɛ oni naŋɔnɛ ŋɔ ɔsɨna mɔ Keriragi-Kɛkɔ!”
Jisɔs na ɔkɨm bɔkɔ-bobi
(Mt 11:20-24)
14Jisɔs ɔra okpuŋɛ kɛkɔ-kebi nci kɛra nsɨl na ɛkpaju orumanɛ, mɨnɛ ndi kɛjaga, oni kaŋɔ ɔbɨnɛ kɔtanɛ. Ɛkpaju ɛba bani mbɛ babɨbi kafa. 15Nsu bani bajuju ya, “Ɔsaŋɛ nsɨm ɛyɛ Bɛlsɛbul, ɔkɨm bɔkɔ-bobi, adidi ɔyɛŋɛ kokpu bu.” 16Bajuju baduga koyumɛ Jisɔs, bakanɛ mɔ ya osigba kɔba-ɛkpaju kɔkɔgɛ ya nsɨm ɔmɔ osi ɛyɛ Ɛbrɔkpabi. 17Jisɔs ɔgbɨri mbu bɔra bɛ na botima, ɔkanɛ bɛ ya, “Rɔrɛ-rɛkɨm ndu royibanɛnɛ minɛ roju na ɛkpaju ɛmɔ rɔbara. Mɨnɛ kɛtɨbi nci kewu yibanɛnɛ, kɛtɔ. 18Ara rɔrɛ-rɛkɨm Sɔtan royibanɛnɛ, rɔrɛ-rɛkɨm rɔmɔ rokosi yɛ nyan rɔbara? Ntanɛ mbu ndi anu ya nkpuŋɛ bɔkɔ-bobi na nsɨm Bɛlsɛbul. 19Ara na nsɨm ŋɔ mbɛŋɛ nkpuŋɛ bɔkɔ-bobi, banyɛgɛ nu babɛŋɛ baga nsɨm bakpuŋɛ bu? Abɛ bɛ bakotibi nu. 20Nsu ara nkpuŋɛ bɔkɔ-bobi na nsɨm Ɛbrɔkpabi, na ɛjaga ya rɔrɛ-rɛkɨm Ɛbrɔkpabi rɔra nfa na anu. 21Ara oni ŋɔ otigiri tigiri, na birɛ reku bɛmɔ na ibɔ, ɔbabɛrɛ ɛtɔ ɛmɔ, gba bɔmɔ tum bunɛ irɨma bɔjaga. 22Nsu ara oni ŋɔ otigiri ocia mɔ otubi mɔ keria, ɔtama mɔ birɛ-reku kambi fɛb mbi bɛjɛŋɛ mɔ kɔfa etima, na okoyibanɛ birɛ mbi oji ɔjɛ bani bajuju. 23“Oni naŋɔnɛ ŋɔ ɔbɔ na ami ɔra na nami ɔra; oni naŋɔnɛ ŋɔ ɔbɔ okitɔnɛ mi ofigɛ, ɔnyananyana.
Kɛkɔ-kebi kɛŋbɨnɛnɛ
24“Ara kɛkɔ-kebi kɛjagi na ɛkpaju oni, keruŋɛ kanya keduga kwa kekoriɛnɛ. Ara kekifɛ kwa, kɛkanɛnɛ ya, ‘Nkɔŋbɨnɛnɛ na ɛtɔ nji nsi.’ 25Ara kɛŋbɨnɛnɛ kafa, mɨnɛ kɛkafɛ kwa kpɨraŋ, gbanambunɛ bɔra nansɛrɛ, 26kɛta yɛ kɛkayagi bacɛmɛ bɔkɔ-bobi bɛnabɛtaa mbi bekuba becia ci, abifɛb bewu riɛnɛ rika oni kaŋɔ, oni kaŋɔ okokubi ocia kɛbɛrɔsɔ.”
Brika kɔrɔmetima
27Ndi Jisɔs ɔra ɔtanɛ, ɔwanɛ ŋɔnɛ na rɛkaba ya, “Brika kɔrɔmetima kɔyɔmɛ kɔjɛ ɔwanɛ ŋɔ ɔma wu mɨnɛ ɔyɛ wu.” 28Nsu Jisɔs ɔfɛlɛ mɔ ramu ya, “Kɔrɔmetima kɔyɔmɛ kɔjɛ bani mbɛ bafugɛ remu Ɛbrɔkpabi mɨnɛ bayɔgɛ di.”
Basɨna kɔfɛ eriŋ kɔba-ɛkpaju
29Aya bani babɨbi bafɛrɛ Jisɔs, ɔkanɛ ya, “Kɛsɛ nci kunku kɛsɛ bakpu. Basɨna bafɛ eriŋ kɔba-ɛkpaju, nsu tum jinɛ mimfɛŋɛ, ekicia eriŋ kɔba-ɛkpaju nji Jona. 30Kɛmanci ɔkanɛ rotuma Ɛbrɔkpabi Jona ɔra eriŋ ɔjɛ bani Ninibɛ, na kɛmanci Wɔ Oni okotumɛ eriŋ na kɛsɛ nci kunku. 31Reyi itiba, ɔkɨm ɔwanɛ ŋɔ Sɛba kuɔbara ɔjɛ bani kɛsɛ nci bobi, ndi osugɛ rɔrɛ rɔmɔ kɛgbanta ɛyɔ koru ɔkafugɛ nkatid Sɔlɔmɔn; mɨnɛ gba bɔranka nfa, nkanɛ nu, mbu bocia Sɔlɔmɔn. 32Reyi itiba, bani Ninibɛ kubabara bajɛ nu bobi, ndi basugɛ bobi bɔbɛ ndi bafugɛ Jona ɔkanɛ bani ramu Ɔkɨm, mɨnɛ kunku, gba bɔranka nfa mbu bocia Jona.
Roku ɛkpaju
33“Oni ɔra ŋɔ ɔkɔŋamɛ roku ɔŋɨba, mɨnɛ ɔbɛŋɛ kɛcɛyɛ oyi du; ekicia ɔbarɛ du na kerigɛ nci basi ya babarɛ du, na esikafa bani bafɛ rɛjaɛ aya banɔŋɛ na ɛtɔ. 34Jɛnɛ rayɛ rara roku ɛkpaju ɛyɛ. Ara jɛnɛ rayɛ rara oyiyi, ɛkpaju ɛyɛ ndɨm ɛra na rɛjaɛ nsu ara jɛnɛ rayɛ rafɔn bofiɛ, ɛkpaju ɛyɛ ndɨm ɛra na keru. 35Si gbanambunɛ kɔfɛ yafɛŋɛ rɛjaɛ di rɛra wu na ɛkpaju keru nɛ. 36Mɨnɛ ara ɛkpaju ɛyɛ ndɨm ɛra rɛjaɛ, keru kɛra na kekpena tumcinɛ, na rokpin rɔyɛ ndɨm rɔra jaɛ, aya roku royuma wu.”
Ifiri Jisɔs na Bafarisi na bakpɛbɛ Ibina Mosis
37Ndi Jisɔs ɔyɛ na kɔtanɛ kɔmɔ, oni Farisi ŋɔnɛ ojia mɔ ya bakadi bedidi na ɛtɔ ɛmɔ; oruŋɛ ɔkatumɛ na keti kodi bedidi. 38Ɛkpaju ɛba orumanɛ Farisi ŋɔ ndi ɔfɛ Jisɔs odiŋɛ bedidi ibɔ okiru nansɛrɛ rɛmaɛ rɛbɛ rɛyɔmɛ rɛjɛ. 39Ɔkɔ-rokuku ɔkanɛ mɔ ya, “Anu Bafarisi minruŋɛ iba bokunɛ na minfu, nsu rika rinua minfɔnɔ ewud na bobi. 40Mansɨl bani! Ɛbrɔkpabi nji esi iba nɛ esi rika-ɛ? 41Jɛ nu mbɛ babɔ bakifɔnɔ mbu minfɔnɔ aya rɛjɛ, nabɔ esikafa Ɛbrɔkpabi ɛfɔnɔ kɔrɔmetima na anu na gbanambunɛ minsi. 42“Koyiba kɔjɛ nu Bafarisi! Minrakaka minjɛŋɛ rɛjɛ ndi rɛyɔmɛ rɛjɛ ya minjɛ na ɛtɔ-njɔm. Nsu mimmuɛ bani, mɨnɛ minkifɔnɔ rɔraganɛ Ɛbrɔkpabi. Kɔgɛ nu bacɛmɛ bani rɔraganɛ na boyi minkwɛ na mbi bɛyɔmɛ bɛjɛ ya minsi minkwɛ na mbi minra minsiŋɛ. 43“Koyiba kɔjɛ nu Bafarisi! Minduga botu rejubi na ɔsam-rɔrɛ mɨnɛ bani kɔyɛ nu na rejubi na kwa rɛfɨn. 44Koyiba kɔjɛ nu! Minra aya raba ndɛ rabɔ rakifɔnɔ eriŋ. Bani baciŋɛ baŋaga dɛ ndi babɔ bakigbɨra.” 45Ɔkpɛbɛ Ibina Mosis ŋɔnɛ ɔkanɛ mɔ ya, “Ɔkpɛbɛ, aya atanɛ kanya, asɛgɛlɛ yu mɨnɛ-e” 46Jisɔs ɔfɛlɛ bɛ ramu ya, “Koyiba kɔjɛ nu mɨnɛ bakpɛbɛ Ibina Mosis! Minsɔgɛ bani rasua ndɛ raruba racia bɛ, nsu minabɛ bininɔ binua kɔtɔnɛ bɛ minsɔgɛ dɛ. 47“Koyiba kɔjɛ nu! Minriŋɛ raba rejinɛ minrɔbɔ bakanɛ-rotuma Ɛbrɔkpabi mbɛ britɛ banua baŋua. 48Na anu minyiɛ mɨnɛ mimbari na mbu britɛ banua basi; baŋua bakanɛ-rotuma Ɛbrɔkpabi, anu minri raba rabɛ. 49Na mbu minsi nya, Ɛbrɔkpabi na nkatid ɔmɔ ya, ‘Kuntigɛ bakanɛ-rotuma na banyiɛ-rotuma njɛ nu; kubaŋua bajuju mɨnɛ basinkanɛ bajuju.’ 50Nsu kɛsɛ nci kunku kukɛfɛ okud na retu bakanɛ-rotuma Ɛbrɔkpabi fɛb mbɛ baboŋu bɨnɛ na kɛbɨnɛ kɛtɨbi rokuku, 51bɨnɛ na Ebɛl ta ajaga Sɛkaria, ŋɔ baŋua na kekpena nci kɛra manti kerigɛ nci bajɔmɔ-kɔya na eku ɛtɔ-Ɛbrɔkpabi. Ae, nkanɛ nu, bani kɛsɛ nci kubafɛ rasinkanɛ na ratu rabɛ fɛb. 52“Kokuba kɔjɛ nu bakpɛbɛ Ibina Mosis! Mimbɛ ɔgbɔgɔrɔ okegere ɛtɔ kɛgbɨra kɔtanɛ, anu ngaŋ minɔŋɛ, mɨnɛ minkpan mbɛ bajuŋɛnɛ kɔnɔ.” 53Ndi Jisɔs osugɛ kwa kancɛ, bakpɛbɛ Ibina Mosis na Bafarisi babɨnɛ kɔkpabɛrɛ mɔ, mɨnɛ babɨnɛ kɔsɨn mɔ rasɨn babaŋa birɛ ecii, 54bajuŋɛnɛ kɔkɨmɛ bafɛ kwa ɔkɔtɔ na kama.
Jelenleg kiválasztva:
Luk 11: Olulumo-Ikom
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
©️2022 Luke Initiative for Scripture Translation