Liike 23
23
Ɓɛ̀ dàa Yiezu ɛ́ dàa van ɔ̀ kuvɛrɛnɛɛre Pilaate viì
Mat 27.1-2; 27.11-14; Mar 15.1-5; Zãn 18.28-38
1Ɛ́ ɓɛ́ lìe lèriè ɛ́ páaníɛ síɛ hĩ́nà ɓɛ́kùi ɛ́ fɔ́ Yiezu ɛ́ dàa van ɔ̀ kuvɛrɛnɛɛre Pilaate viì. 2Ɛ́ ɓɛ́ van ɛ́ Yiezu ɲunù ɛ̀ ɓúukɛ nɛ làa: «Ké van yú-o pe nùún sɔ lɛ kɛ́ á ɓɛ̀ nìnbirìe ɛ̀ vĩ́iní, à nɛ ɓɛ́ bí sàaní hɔ́ lànpóo ɛ̀ lɛ́ á Rɔmu bɛ́zu-bɛhɔ́ Sezaare ǹ, à nɛ mípe kùusɔ iè Kirisa, lɛ iè ɔ̀ bɛ́zuú.» 3Ɛ́ Pilaate ɛ́ zɔn ɛ́ ɔ̀ dìenin nɛ làa: «Hãà kɔ́ iè Zuifuɓɛ bɛ́zuú?» Ɛ́ Yiezu zɔn kɔ̃́niɛ ɔ̀ nɛ: «Kɔ́ khɛ́ hɔ́.» 4Ɛ́ Pilaate khie bie lɛ́ ɓɛ́ khɛ̃́ndàariè hándíe ǹ àá ɓɛ́ nìzã̀amáa lɛ hṹn wi yán ǹ ɛ́ nɛ làa: «Ń yí loo bɔ̀koohɔ́ dɔ̀ lɛ ápe nùún sɔ lɛ ɛ́ wɔ́ ɛ́ mí dàa nɛ pie lìe fɔ́ɓán ɛ̀ hɔ̀ lè wɛ̀.» 5Ɛ́ ɓɛ́ den wóokɛa zɔn bie àá pànkɛ́ nɛ làa: «À ɛ́ ɓɛ́ nìnbirìe sùkún nɛ ɓɛ pĩ́ ɓɛ́ pànkɛ́ ɓàasiè bòo àá mí kɛ̀ránlɔ́. À ɓɛ́ mí kɛ̀ránlɔ́ sɔ fìi hɔ̀ Kalile pɛ̃̀hɛ̃ hũn, ɛ́ khie van lɔ́ hɔ́ Zudee pɛ̃̀hɛ̃ míkùi hũn, ɛ́ kɛ̀a sáalɛ, á ɓɛrɛ dɛ̃un hũ̀nún.»
Ɓɛ̀ dàa Yiezu ɛ́ dàa van Herɔɔde viì
6Ɛ́ hɔ́ lɛ á Pilaate ɛ́ ɲɛ́ hɔ́ biehĩ́ sɔ, á zɔn dìe iè pe nùún sɔ lɛ iè wìe ɛ́ lé Kalile? 7Ɛ́ hɔ́ lɛ á ɲɛ́ ɛ̀ ɓɛ̀ nɛ Yiezu ɛ́ lé Kalile lɛ wi le viì lɛ á Herɔɔde ɛ́ te bòo húi hũn, á tɔniɛ ɔ̀ viɛniɛ ɔ̀pe Herɔɔde viì, iè hɔ̀ lɛ ápe Herɔɔde den hàarí ɓɛrɛ wi hɔ̀ Zerizalɛɛmu hũn pehɔ̀ yìi hũn. 8Ɛ́ hɔ́ lɛ á Herɔɔde mɔn Yiezu, á wɛniɛ míte cɛ̃̀un, iè hɔ̀ lɛ á den hàarí ɛ́ Yiezu bòo lɛ ɛ́ ɓɛ́ bie ɛ̀ ɲí, á den hàarí wɛ ɛ́ mii mi-ɛ. À hàarí cɛ̀ nɛ a wé yéréké bòo dɔ̀ ɛ̀ mí mi. 9Ápe Herɔɔde ɛ́ hɛ̀ dìekɛa Yiezu ǹ àá bòo cɛ̀rìɛɛ, kɛ́ Yiezu ɛ́ dú mí ɲunù à kɛ́ á. 10Ɛ́ ɓɛ́ khɛ̃́ndàariè hándíe àá ɓɛ́ làndɛ́ kɛ̀ránliè hándíe ɛ́ hṹn wi yán ɛ́ can ɓɛ́ kuò ɛ́ Yiezu ɲunù ɓúukɛ nɛ a wɔ́ bɔ̀koohɔ́. 11Ɛ́ Herɔɔde àá mí sɛ̃̀nɛ̀dɔ́síɓɛ́ ɛ́ khie dɔ́ lé lùwiè Yiezu ǹ, ɛ̀ ɓɛ̀ khie zooniɛ ɔ̀ àá pɔ̀nkɔ̀-sãanù dɔ̀ ɛ̀ ɓɛ̀ yáakɛa yáakɛa ɔ̀, ɛ̀ ɓɛ̀ khũ̀a tɔniɛ ɔ̀ ɛ́ viɛniɛ Pilaate viì. 12Ɛ́ pehɔ̀ zɔǹ, ápe Pilaate àá ɔ́ Herɔɔde lɛ hũn iè ɓɛ̀ ńbíyanliè ɛ́ khũ̀a wɔ́ pàáɓɛ́.
Ɓɛ̀ nɛ Yiezu fɔ́ɓán à hí
Mat 27.15-26; Mar 15.6-15; Zãn 18.39; 19.1-16
13Á Pilaate ɛ́ vɔn ɓɛ̀ khɛ̃́ndàariè hándíe àá ɓɛ́ lóo hándíe àá ɓɛ́ nìnbirìe ɛ́ ɓen koo ɓánlɔ̀n, 14à bie lɛ́ ɓà ǹ nɛ làa: «Mí dàa ɔ̀pe nùún sɔ lɛ ɛ́ dàa ɓɛrɛ niǹ viì, ɛ̀ mì nɛ á ɓɛ̀ nìnbirìe ɛ̀ vĩ́iní. Ɛ́ ń dìekɛa ɔ̀ ǹ mì yìe hũn hɔ̀pe bɔ̀koohɛ̃ lɛ ɛ́ mí nɛ á wé bòo hũn, ɛ́ ń yí mi hɔpe bɔ̀koohɛ̃ sɔ dɔ̀ lɛ á wɔ́ wɛ̀. 15À Herɔɔde lò ɓiɛ̀ yí mi bɔ̀koohɔ́ dɔ̀ ɔ̀ ǹ wɛ̀. Iè hɔ̀ lɛ á khũ̀aniɛ ɔ̀ ǹ ɛ́ ɓɛrɛ lɛ́ kiè ǹ. Ápe nùún sɔ lɛ ɛ́ den yí wé bòo dɔ̀ lɛ á dàa fɔ́ɓán à hí wɛ̀. 16Ɛ́ nin bie nɛ ɓɛ nàa ɔ àá hɔ́ ńhùiehĩ́, kɛ́ pehɔ̀ máahṹ, ɛ̀ ǹ fùansí è ǹ.» [ 17Lè Nyiewɛlɔn sɛ́rí ɛ́ hṹn wóo ɓen dɛ̃un, à Pilaate fɔ́ɓán à leń ɔ́ kɛ̀sí nùún dɔ̀ ɛ̀ fùansínin.] 18Ɛ́ ɓɛ́ nìzã̀amáa ɓɛ́kùi ɛ́ páaníɛ zɔn bénkɛ ɛ́ nɛ làa: «Ɓí-e pe nùún sɔ lɛ, à Barabaasi iè pe kɔ́ leń fùansínin ɛ̀ lɛ́ kie ǹ.» 19Àpe Barabaasi sɔ hàarí zɔn lè kɛsí ɓɛ̀ nìnbirìe lɛ á hàarí sùkúrɛ ɛ́ ɓɛ́ hĩ́nà pɛ̃́ ɓɛ́ Rɔmu siè bòo hũn, àá nìnbírɔ dɔ̀ lɛ ɛ́ ɓɛ́ hàarí ɓɔ́ bòo hũn. 20Kɛ́ hɔ́ lɛ á Pilaate den wɛ mii fùansí Yiezu ǹ, á sĩ̀n zɔn bie àá ɓɛ́ nìzã̀amáa nɛ mí yí mi bɔ̀koohɔ́ dɔ̀ lɛ á wɔ́ wɛ̀. 21Kɛ́ ɓɛ́ den zɔn bénkɛ nɛ: «Ɓáa wɔ́ lè ɓáalén dãanù lɔ̀n, ɓáa ɔ́ lè ɓáalén dãanù lɔ̀n!» 22Ɛ́ kɛ̀a yìehɛ̃̀tĩlán, á Pilaate ɛ́ zɔn ɛ́ ɓɛ̀ dìenin nɛ: «Kɛ́ hɔ́ bɔ̀koohɔ́ lɛ á den wɔ́ iè hɔ̀ hɔ́sɔ? Ń yí mi bɔ̀koohɔ́ dɔ̀ lɛ á wɔ́ ɛ́ mí dàa nɛ a fɔ́ɓán à hí wɛ̀. Ɛ́ nin bie nɛ ɓɛ nàa ɔ̀, ɛ̀ ǹ fùansí-e ǹ.» 23Kɛ́ ɓɛ́ den pɛwi ɛ́ wookɛa ɛ́ bénkɛ nɛ a ɓáa Yiezu lè ɓáalén dãanù lɔ̀n. Ɛ́ peɓɛ̀ bénkɛà ɛ́ te hɔ pànkɛ́ yú. 24Ɛ́ Pilaate ɛ́ tɛ̀ nɛ mii wé hɔ́ bòo lɛ ɛ́ ɓɛ́ cànkɛ ɛ̀ lɛ́ ɓà ǹ. 25Á nìnbírɔ lɛ ɛ́ ɓɛ́ nìzã̀amáa nɛ a lɛ́ ɓá ǹ iè pe á lerɛ lɛ́ ɓà ǹ, àpe nùún lɛ hàarí zɔn lè kɛ̀sí ɓɛ̀ nìnbirìe lɛ á hàarí ɛ́ sùkún àá nìnbírɔ dɔ̀ lɛ ɛ́ ɓɛ́ hàarí ɓɔ́ bòo hũn, iè pe á fúɛrɛ̀sínin ɛ́ lɛ́ ɓà ǹ, ɛ̀ Yiezu á khie dɔ́ ɓɛ́ sɛ̃̀nɛ̀dɔ́síɓɛ́ núnú hũn, nɛ ɓɛ wé hɔ́ bòo lɛ ɛ́ ɓɛ́ nìnbirìe ɛ́ wɛ àá ɔ́.
Yiezu ɓáarɔ́ lè ɓáalén dãanù lɔ̀n bòo
Mat 27.32-44; Mar 15.21-32; Zãn 19.17-27
26Ɛ́ hɔ́ lɛ ɛ́ ɓɛ́ fɔ́ Yiezu dàa cɔ́, ɛ́ ɓɛ́ van sɛ̃́ nùún dɔ̀ híɛhɔ́ lɛ yèrè ɛ́ ɓɛ́ nɛ Simɔn lɛ ɛ́ lé Sirɛnɛ lóo, kɛ́ á van lɔ́ hɔ́ maa ɛ́ ɓen. Ɛ́ ɓɛ́ sɛ̃̀nɛ̀dɔ́síɓɛ́ ɛ́ khie ɓaa ɔ̀ nɛ a tìé Yiezu ɓáalén dãanù ɛ̀ dàá bè piè máahṹ. 27Ɛ́ nìnbí-kùi hàarí bɔ̀ Yiezu máahṹ. Ɓɛ̀ nìnbí-kùi sɔ ɛ́ ɓɛ́ hã́a dɔ̀ hàarí wi tĩ́ihṹ ɛ́ wírí kɛ́ ɓɛ̀ ɛ́ cãamɛkɛ piè bòo hũn. 28Ɛ́ Yiezu ɛ́ bĩniɛ míte ɛ́ khie bie lɛ́ ɓà ǹ nɛ làa: «Zerizalɛɛmu hã́a, mì bí wírí niǹ bòo hũn wɛ̀. Kɛ́ mí wírí mípe àá mí nìɛ bòo hũn. 29Iè hɔ̀ lɛ ɛ́ pɛ̃̀hṹ dɔ̀ ɛ́ vaá-ɓen ɛ̀ ɓɛ̀ nìnbirìe wóo ɓén bie lɛ́ ɓɛ́ hã́a lɛ yí dɛ̀ nìɛ yá te ǹ nɛ ɓɛ́ ɲúuhɛ̃ ɛ́ tĩ, ɛ̀ ɓɛ̀ ɛ́ bie lɛ́ ɓɛ́pe hã́a lɛ ɲɛùn yí te yí mi ǹ, ɛ̀ zĩncáahɔ́ lò ɲɛùn yí yìɛ́ ɓà ǹ yí mí, nɛ ɓɛ ɲúuhɛ̃ ɛ́ tĩ. 30Ɛ́ pehɔ̀ yìi hũn, ɛ̀ ɓɛ̀ nìnbirìe ɛ́ wóo ɓén bie ɛ́ lɛ́ hɔ́ ɓúkùo nɛ hɔ kùenkɛ síɛ ɓɛ́ lɔ̀n, ɛ̀ ɓɛ̀ ɛ́ bie lɛ́ hɔ́ ńdɔ̀nɓùó ǹ nɛ hɔ ɓen síɛ híɛ ɓá ǹ. 31Kɛ́ ɓɛ́ ɓen hɔ̀pe bòo lɛ ɛ̀ wé àá ńpe lɛ iè lè dãa-tiì, ɛ̀ ńɓùo kɛ́ iè pe ɛ́ ɓɛ́ yá ɓén wé àá hɔ̀ dãahĩ́ lɛ dãa-herà?» 32Ɛ́ bɔ̀konwériè bìɛ ɲu dɔ̀ ɛ́ ɓɛ́ sɛ̃̀nɛ̀dɔ́síɓɛ́ ɛ́ bĩniɛ hṹn fɔ́ ɛ́ ɓɛ páaní vɛ ɓé àá Yiezu. 33Ɛ́ bòo lɛ ɛ́ ɓɛ́ van dɛ̃un lè viì lɛ ɓɛ́ wóò ve nɛ «ɲún ɓɔ̀ɓɔ́khiɛ̀ viì», ɛ́ ɓɛ́ khie ɓáa Yiezu lè ɓáalén dãanù lɔ̀n yán ɛ̀ ɓɛ̀ lò bĩniɛ khie ɓaà ɓɛ̀ bɔ̀konwériè bìɛ ɲu sɔ hɔ̀ ɓáalén dãahĩ́ dɔ̀ lɔ̀n yán. À wìcóoní ɛ́ wi piè ńdóonín, á sí kɛ́ ɛ́ wi piè ńmiinín. 34Ɛ́ Yiezu zɔn bie nɛ làa: «Yàá, dé sɛ́wɛ́rí lɛ́ ɓà ǹ iè hɔ̀ lɛ ɛ́ ɓɛ́ yí dũ bòo lɛ ɛ́ ɓɛ́ wé wɛ̀.» Ɛ́ ɓɛ́ khie lenkɛa hɔ̀ bòo ɛ́ dàa sankɛa piè tĩ̀ɛ. 35Ɛ́ ɓɛ́ nìnbirìe ɛ́ hàarí dɛ̃̀ yán ɛ́ húi. Ɛ́ ɓɛ́ Zuifuɓɛ hándíe ɛ́ khie ɔ̀ yáakɛ ɛ́ nɛ làa: «À iè ɔ̀pe lɛ te ɓɛ nìnbirìe ɛ́ fueniɛ nin. Kɛ́ á ɓen iè ɔ̀pe Kirisa àá bɔ̀bín, àpe lɛ ɛ́ Dɔfĩn munɛ, à fuení míte míte ǹ lò!» 36Ɛ́ ɓɛ́ sɛ̃̀nɛ̀dɔ́síɓɛ́ ɛ́ lò ɓiɛ̀ ɔ̀ yáakɛ, ɛ́ wóò khɛ̃̀ún vɛ lúwiniɛ ǹ ɛ̀ ɓɛ̀ yòó zɛ̃́ní hɔ́ divɛ̃n lɛ ɲiì ɔ̀ ǹ nɛ a ɲu. 37Ɛ̀ ɓɛ̀ zɔn bie lɛ́ à ǹ nɛ làa: «Kɔ́ ɓen iè ɓɛ̀ Zuifuɓɛ bɛ́zuú ɛ̀ kɔ̀ fuení kɔ́te ǹ lò!» 38Ɛ́ ɓɛ́ wɛ̃́ hɔ́ bòo dɔ̀ lè dìɛ dɔ̀ lɔ̀n ɛ́ yòó ɓáa piè ɲún hũn lè ɓáalén dãanù lɔ̀n ɛ́ nɛ: «Lɛ iè ɓɛ̀ Zuifuɓɛ bɛ́zuú.» 39Ɛ́ ɓɛ́pe bɔ̀konwériè bìɛ ɲu lɛ ɛ́ ɓɛ́ ɓiɛ̀ ɓáa hɔ̀ ɓáalén dãahĩ́ lɔ̀n, ádɔ̀ ɛ́ ɔ̀ tòokɛ nɛ làa: «Hɔ̀ yí kɔ́pe ɛ́ temu iè ɔ̀pe Kirisa, ɔ̀pe lɛ ɛ́ hɔ́ Dɔfĩn ɛ́ tɔrɛ, ɛ́ kɔ́ fuení kɔ́te ǹ ɛ̀ kɔ̀ ɓiɛ̀ fuení kie ǹ lò!» 40Ɛ́ ɓà ńkɔ̀nù sí kɛ́ ɛ́ zɔn ɔ̀ wãaní ɛ́ nɛ làa: «Kɔ́ wiɛ dàa yá Dɔfĩn ɛ̀ zán? Kèpe ɛ́ ɓɛ́ ɲɛkɛ̃̀a ɛ̀ vɛ́ kɛ̀a ɔpe, 41kɛ́ képe ké bòo ɛ́ pe temí yìe, hɔ̀ iè kè bòo lɛ ké wɔ́ sàanín. Àpe ɛ́ yí wé bɔ̀koohɔ́ dɔ̀ lò!» 42À khie bie lɛ́ Yiezu ǹ nɛ làa: «Yiezu, kɔ́ ɓen kɔ ɓen dí kɔ́ bɛ́záanú yìi lɛ hũn, ɛ̀ kɔ̀ bí ninsiní niǹ bòo ǹ wɛ̀.» 43Ɛ́ Yiezu ɛ́ zɔn kɔ̃́niɛ ɔ̀ nɛ làa: «Nin bie hɔ lɛ́ kɔ̀ ǹ àá bɔ̀bín nɛ hɔ̀pe zoòni lɛ, ɛ́ kɔ ɓén kań àá mi hɔ̀ Hɛrɛcinɛ hũn.»
Yiezu húmú bòo
Mat 27.45-56; Mar 15.33-41; Zãn 19.28-30
44Ɛ́ bòo lɛ ɛ́ lé wurù ɛ́ mii yòó dɛ̃ le sí tĩ́ihṹ, lè wísɔndáabíi hũn, ɛ́ lé pan pan ɛ̀ lè yòó húrun, ɛ́ hɔ́ síbínú ɛ́ yòó hiɛ lè sṹsùnù ǹ míkùi fúu ɛ́ van dɛ̃un lè wuháalé. 45Ɛ́ lé fúrɛ́ dɛ̀bɛhɔ́ lɛ zɔn cénkɛa lè Dɔfĩn zũ-bɛhɔ́ tĩ́ihṹ ɛ́ zɔn khã̀a àá mí tĩ́ihṹ. 46Ɛ́ pehɔ̀ yiì hũn, ɛ́ Yiezu zɔn berɛ cɛ̃̀un nɛ: «Yàá ǹ dɔ́ niǹ mɛkɛ̃nì kɔ̀ núnú hũn.» Ɛ́ pie ǹbie hɔ vé lòo, à wo húrun. 47Á sɛ̃̀nɛ̀dɔ́síɓɛ́ ɲúnsɔ ɛ́ mɔn hɔ̀ bòo lɛ wɔ́, á ɓàaniɛ Dɔfĩn ɛ́ bie nɛ: «Àá bɔ̀bín, ɔ̀pe nùún sɔ ɛ́ hɛ̀ hṹn iè nìnbírɔ lɛ́ ɛ́ cã̀aní.» 48Ɛ́ ɓɛ́ nìzã̀amáa lɛ ɓɛrɛ nɛ ɓɛ́ mi mu bòo lɛ ɛ́ wé, ɛ́ mɔn hɔ̀, ɛ́ ɓɛ́ khũ̀a síɛ ɓɔn kɛ́ ɓɛ́ tĩɛ̀ ɛ́ hɛ̀ yáa yáa fúu ɛ́ ɓɛ́ ɛ́ ɓɛ́ ɲúuhɛ̃ ɛ̀ vĩ́. 49Ɛ́ ɓɛ́ nìnbirìe lɛ hàarí dũ Yiezu ɓɛ́kùi àá ɓɛ́ hã́a lɛ hàarí bɔ̀ piè máahṹ ɛ́ dàa lɔ́ hɔ́ Kalile pɛ̃̀hɛ̃́ hũn, ɛ́ hàarí khɛ̃̀nɛ van lɔ́ dɛ̃̀, ɛ́ hɔ̀ bòo lɛ ɛ́ wé ɛ̀ húi.
Yiezu wũ̀nlɔ́
Mat 27.57-61; Mar 15.42-47; Zãn 19.38-42
50Nùún dɔ̀ hàarí wi yán lɛ yèrè ɛ́ ɓɛ́ nɛ Zozɛɛfu, kɛ́ á iè nìnbírɔ lɛ sãa à lò cã̀aní. À hàarí iè ɓɛ̀pe Zuifuɓɛ lìe lèrɔ dɔ̀. 51À hàarí ɛ́ lé ɓɛ́ Zuifuɓɛ lóo dɔ̀ lɛ ɓɛ́ nɛ Arimatee, à hàarí ɛ́ Dɔfĩn bɛ́záanú ɛ̀ hìé. À den hàarí lerɛ mí zeǹ ɛ́ lɔ́ ɓá ńkɔhĩ́ bòo lɛ ɛ́ ɓɛ́ khɛ́ bèrɛ lɔ̀n nɛ ɓɛ́ wé àá Yiezu. 52Ápe Zozɛɛfu sɔ ɛ́ hĩ́nà van Pilaate viì, ɛ́ van hɛnɛ Yiezu nìheemu. Á Pilaate ɛ́ tɛ̀. 53Á Zozɛɛfu ɛ́ van lerɛ Yiezu nìheemu ɛ́ lɔ́ lé ɓáalén dãanù lɔ̀n, ɛ́ síɛ bɛ́nin àá lé pɔ̀nkɔ̀-núnú ɛ́ mɔ̀ van dɔ́ lé búi dɔ̀ lɛ ɛ́ ɓɛ́ cɛ̃́ lé lɛnù hũn, lɛ ɛ́ nìnbírɔ ɛ́ ɲɛùn yí dé hũn yí mi wɛ̀. 54Hɔ̀ hàarí wɔ́ yɛ̀zumɛ́ zɔn, lɛ kɛ́ lé wurù ɛ́ ɓen síɛ lú, ɛ̀ ɓɛ̀ Zuifuɓɛ ńvũùnín sí ɛ́ wo fìi mii ɓɛ́. 55Ɛ́ ɓɛ́ hã́a lɛ hàarí bɔ̀ Yiezu máahṹ ɛ́ dàa lɔ́ hɔ́ Kalile ɛ́ bɔ̀ɓán àá Zozɛɛfu, ɛ́ van húie lè búi, ɛ̀ ɓɛ̀ mɔn bòo lɛ ɛ́ ɓɛ́ dàa síɛ daaniɛ Yiezu nìheemu pelè hũn. 56Ɛ́ pehɔ̀ máahṹ, ɛ̀ ɓɛ̀ khie khũ̀a ɓɔn, ɛ́ van sɛ́sɛ́a hɔ̀ yurɔ́ lɛ tũnù tĩ lɛ ɓɛ ɛ̀ kóo Yiezu nìheemu lɔ̀n. Ɛ́ hɔ ńvũùnín sí zɔn, ɛ́ ɓɛ hĩ́nà vũùniɛ kɛ̀a bòo lɛ ɛ́ hɔ́ làndɛ́ dàa nɛ hɔ́ fɔ́ɓán ɛ̀ hɔ̀ wé.
Jelenleg kiválasztva:
Liike 23: bwj
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2023 L’Association Nationale pour la Traduction de la Bible et l’Alphabétisation