ಲೂಕ 9
9
ಯೇಸುನೆ ಭಾರ ಶಿಷ್ಯರ್‌ನ ಬೋಲಿ ಮೋಕ್‌ಲ್ಯೊತೆ
(ಮತ್ತಾಯ 10:5-15; ಮಾರ್ಕ 6:7-13)
1ಯೇಸುನೆ ಭಾರ ಜ಼ಣ ಅಪೊಸ್ತಲರ‍್ನ ಏಕ್‌ದಮ್ ಬುಲೈನ್, ಇವ್ಣುನ ಭೂತ್‌ಖ್ಹಾರು ಕಾಡಾನ ಅಜು಼ ರೋಗ್-ರಾಯೊ ಅಛ್ಛು಼ಕರಾನ ಶಕತ್‍ ಅಜು಼ ಅದಿಕಾರ್#9:1 ಹಕ್‌ ಕರೀಬಿ ಬೋಲೆಜಾ಼ಯ್ ದಿದೊ. 2ಅಜು಼ ದೇವ್ನಿ ರಾಜ್ಯನಿ ಬಾರೇಮ ಬೋಲಿವತಾಳಾನ ಅಜು಼ ರೋಗಿನ ಅಛ್ಛು಼ ಕರಾನ ಇವ್ಣುನ ಮೋಕ್‌ಲ್ಯೊ. 3ಮೋಕ್ಲಾನಿ ವಖ್ಹತ್‌ಮ ಇವ್ಣುನ, “ಜಾ಼ವಾನಿ ವಖ್ಹತ್‌ಮ ತುಮೆ ಶಾತ್ಬಿ ನಕೊ ಲೀಜಾ಼ವೊ: ಲಠ್ಠೊ ರ‍್ಹವೊ, ಝೋ಼ಳಿ#9:3 ಮಾಂಗಾನೊ ಬಟ್‌ವೊ ಕರಿ ಮತ್‌ಲಬ್ ರ‍್ಹವೊ, ಖಾಣಾನು ಬುತ್ತು ಅಜು಼ ಪೈಶಾ ರ‍್ಹವೊ ನಕೊ; ಬಿಜೇಕ್ ಕುಡ್‌ತು ಜಿನ್‌ಕುಬಿ ನಕೊ. 4ತುಮೂನ ಖೆವ ಘರ್‌ಮ ಬುಲೈಲೇಸ್ಕಿ, ಯೋ ಗಾಮ್‍ ಮ್ಹೇಲಿನ್ ಜಾ಼ವಾಲಗೂಬಿ ಯೋಸ್ ಘರ್‌ಮ ರ‍್ಹವಾಕರೊ. 5ಅಜು಼ ಖೆವ ಗಾಮ್ಮತೋಬಿ ತುಮೂನ ನಾ ಬುಲೈಲಿದುತೊ, ಯೋ ಗಾಮ್‌ನ ಮ್ಹೆಂದಿನ್ ಜಾ಼ವೊ ಅಜು಼ ತುಮಾರ ಗೋಡಾನ ಲಾಗಾತೆ ಧೂಳ್‌ನ ಝ಼ಟ್‌ಕಿ ದೆವೊ. ಯೋ ಇವ್ಣುನ ಝೇತಾವನು ಸಾಕ್ಷಿ ಹುಯಿರ‍್ಹಿಶೆ.
6ತದೆ ಶಿಷ್ಯರ್‌ಖ್ಹಾರು ಹಿಜ್ಜಾ಼ಥು ನಿಕ್ಳಿನ್, ಏಕ್‌ ಗಾಮ್‌ಥು ಬಿಜೇಕ್ ಗಾಮ್‍ ಜಾ಼ತುಹುಯಿನ್, ಹರೇಕ್‍ಆಡಿ ದೇವ್ನಿ ಸುವಾರ್ತೆನ ಬೋಲ್ತುಹುಯಿನ್, ರೋಗ್‌ಮ ರ‍್ಹಾವಾಳನ ಅಛ್ಛು಼ಕರ‍್ಯು
ಹೆರೋದನ ಗುಮಾನಿ ಹುಯೂತೆ
(ಮತ್ತಾಯ 14:1-12; ಮಾರ್ಕ 6:14-29)
7ಗಲಿಲಾಯ ತಬರ್‌ಖಾಮ ಅದಿಕಾರ್ ಚ಼ಲಾವವಾಳೊ ಹೆರೋದನೆ, ಚಾ಼ಲುಕರಾತೆ ಆ ಖ್ಹಾರಾನಿ ಬಾರೇಮ ಖ್ಹಮ್‌ಜಿನ್‌, ಇನ ಘಣು ಕಲಾವ್ಣಿ ಹುಯು. ಶನಕತೊ ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ ಪಾಛೊ಼ ಜಿವ್ತೊಹುಯಿನ್ ಐರ‍್ಹೋಸ್ ಕರಿ ಥೋಡು ಅದ್ಮಿ ಬೋಲುಕರ್ತೂಥು. 8ಅಜು಼ ಥೋಡು ಜ಼ಣು ಎಲೀಯ ಅಪ್ಣ ಇಚ಼್‌ಮ ಐರ‍್ಹೋಸ್ ಕರಿ, ಬಿಜು಼ ಥೋಡು ಜ಼ಣು ಜೂ಼ನ ಹಗಾಮ್‍ನೊ ಪ್ರವಾದೀಮ ಏಕ್‌ ಜ಼ಣೊ ಜಿವ್ತೊಹುಯಿನ್ ಉಠಿ ಐರ‍್ಹೋಸ್ ಕರಿ ಬೋಲಿಲೆವ್‍ಕರ್ತೂಥು. 9ಕತೋಬಿ ಹೆರೋದನೆ, “ಯೋಹಾನನು ಮುಡ್‌ಕ್ಯು ಕತ್ರಾಯೊತೆ; ಕತೋಬಿ ಆ ಕೋಣ್? ಅನಿ ಬಾರೇಮ ಅತ್ರುಖ್ಹಾರು ಮೇ ಖ್ಹಮ್‌ಜು಼ಸ್‌ನಿ?” ಕರಿ ಬೋಲಿನ್ ಯೇಸುನ ದೇಕ್ಣು ಕರಿ ಕರುಕರ್ತೊಥೊ
ಯೇಸುನೆ ಪಾಚ಼್ ಹಜಾ಼ರ್ ಅದ್ಮಿನ ಖಡಾಯೋತೆ
(ಮತ್ತಾಯ 14:13-21; ಮಾರ್ಕ 6:30-44; ಯೋಹಾನ 6:1-14)
10ಅಪೊಸ್ತಲರ್ ಖ್ಹಾರು ಪಾಛು಼ಫರಿ ಐನ್, ಇವ್ಣೆ ಕರ‍್ಯುತೆ ಅಖ್ಖಾನ ಯೇಸುನ ಖ್ಹಾಮ್ಣೆ ಬೋಲ್ಯು. ತದೆ ಯೇಸುನೆ ಇವ್ಣುನ ಅಲಕ್ ಕಾಡಿಲೀನ್, ಇನಜೋ಼ಡೆ ಬೆತ್ಸಾಯಿದ ಕರಿ ಗಾಮ್‌ನ ಬುಲೈಲಿ ಗಯೊ. 11ಅದ್ಮಿನಿ ಭೀಡ್ ಅನ ಖ್ಹಮ್‌ಜಿನ್‌, ಯೇಸುನ ಪೀಠೆ ಗಯು ಯೇಸುನೆ ಇವ್ಣುನ ಬುಲೈಲಿನ್,#9:11 ಸ್ವಾಗತ್ ಕರೀನ್ ಕರೀಬಿ ಹುವಾಸ್ ಇವ್ಣುನ ದೇವ್ನಿ ರಾಜ್ಯನಿ ಬಾರೇಮ ಬೋಲ್ಯೊ. ಅಜು಼ ಕಿನ-ಕಿನ ರೋಗ್‌ಥಿ ಅಛ್ಛು಼ ಹೋಣುಥೂಕಿ ಇವ್ಣುನ ಅಛ್ಛು಼ ಕರ‍್ಯೊ.
12ದನ್ ಡುಬಾಲಗ್ಯೋಥೊ, ತದೆ ಯೋ ಭಾರ ಜ಼ಣ ಶಿಷ್ಯರ್‌ ಯೇಸುಕನ ಐನ್, “ಆ ಅದ್ಮಿನಿ ಝೂ಼ಂಡ್‌ನ ಮೋಕ್ಲಿದೆ, ಅವ್ಣೆ ಅಶ್‌ಪಿಶ್‌ ಛಾ಼ತೆ ಖ್ಹಾರ ಗಾಂಬ್‌ಡಿಮ#9:12 ಗಾಮ್‍ಗೋಂಡೀಮ ಕರೀಬಿ ಬೋಲಾಸ್ ಜೈ಼ನ್, ಖಾವಾನ ಖಾಣು, ಖ್ಹುವ್ವಾನ ಝ಼ಗೋನ ಢೂಂಡಿಲ್ಯವಾದೆ. ಶನಕತೊ ಆ ಉಜ್ಜಾ಼ಡಿ ಝ಼ಗೊ” ಕರಿ ಬೋಲ್ಯ.
13ತದೆ ಯೇಸುನೆ, “ತುಮೇಸ್ ಅವ್ಣುನ ಖಾಣು ದೆವೊ” ಕರಿ ಇವ್ಣುನ ಬೋಲ್ಯೊ.
ತದೆ ಇವ್ಣೆ, “ಹಮಾರಕನ ಪಾಚ಼್ ರೋಟಾ ಅಜು಼ ಬೇ ಮಾಛ಼್‌ಲಾ ಮ್ಹೆಂದಿನ್, ಶಾತ್ಬಿ ಕೊಯ್ನಿ. ಹಮೆ ಜೈ಼ನ್ ಆ ಖ್ಹಾರ ಅದ್ಮಿನಖ್ಹಾಜೆ ಖಾಣು ಮೋಲ್‌ಲೀನ್ ಆವ್ಣುಕಿ ಶು?” ಕರಿ ಪುಛಾ಼ಯ. 14ಹಿಜ್ಜಾ಼ ಪರ್ಖ್ಹಾ ಅದ್ಮಿಸ್‌ ಪಾಚ಼್ ಹಜಾ಼ರ್‌ಜ಼ಣು ಥೂ.
ತದೆ ಯೇಸುನೆ ಇನ ಶಿಷ್ಯರ್‌ನ, “ಅದ್ಮಿನ ಖ್ಹಾರು ಏಕೇಕ್‌ ಶಾಲ್‌ಮ ಅಡೈವಿಖ್ಹ್‌-ಅಡೈವಿಖ್ಹ್‌ ಅದ್ಮಿ ಕರೀನ್ ಹೇಟ್ ಬೆಖ್ಹಾಡೊ” ಕರಿ ಬೋಲ್ತಾನ, 15ಇವ್ಣೆ ಇಮ್ಮಸ್ ಬೆಖ್ಹಾಡ್ಯ. 16ಬಾದ್‌ಮ ಯೇಸುನೆ ಯೋ ಪಾಚ಼್ ರೋಟಾ ಅಜು಼ ಬೇ ಮಾಛ಼್‌ಲಾನ ಪಾಡಿಲೀನ್, ಪರಲೋಕ್‌ ಭಣಿ ದೇಖಿನ್, ಯೋ ರೋಟಾ ಅಜು಼ ಮಾಛ್ಲಾ಼ವ್‍ನಟೇಕೆ ದೇವ್ನ ಧನ್ಯವಾದ್ ಕರೀನ್, ಇನ ತೋಡಿನ್, ಅದ್ಮಿ ಖ್ಹಾರಾವ್‌ನ ವಾಟ ಪಡಾನಟೇಕೆ ಶಿಷ್ಯರ್‌ನ ಹಾತ್‌ಮ ದಿದೊ. 17ಅದ್ಮಿಖ್ಹಾರು ಪೇಟ್‌ಭರಿ ಖೈನ್, ಬಶ್‌ಹುಯು#9:17 ಹಕ್ಲಾಲ್ ಹುಯು ಕರೀಬಿ ಬೋಲಾಸ್ ಅಜು಼ ಶಿಷ್ಯರ್‌ನೆ ಉಭ್‌ರ‍್ಯುತೆ ಟುಕ್ಡಾವ್‍ನ ಜ಼ಮಾಕರ್ತಖ್ಹತರ್‌ ಭಾರ ಟೋಕ್ರಾ ಭರಾಯ.
ಪೇತ್ರನಿ ವಿಶ್ವಾಸ್
(ಮತ್ತಾಯ 16:13-19; ಮಾರ್ಕ 8:27-29)
18ಏಕ್‌ ದನ್ನೆ ಯೇಸು ಎಕ್ಲೋಸ್ ಪ್ರಾರ್ಥನೆ ಕರುಕರಾನಿ ವಖ್ಹತ್‌ಮ, ಇನ ಶಿಷ್ಯರ್‌ ಇನಾಕನ ಆಯ. ತದೆ ಯೇಸುನೆ ಇವ್ಣುನ, “ಅದ್ಮಿಖ್ಹಾರು ಮೇ ಕೋಣ್ ಕರಿ ಬೋಲಾಸ್?” ಕರಿ ಬೋಲ್ಯೊ.
19ತದೆ ಶಿಷ್ಯರ್‌ನೆ, “ಥೋಡು ಅದ್ಮಿ ತುನ ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ ಕರಿ ಬೋಲಾಸ್, ಅಜು಼ ಥೋಡು ಜ಼ಣು ಎಲೀಯ ಕರಿ ಬೋಲಾಸ್, ಅಜು಼ ಥೋಡು ಜ಼ಣು ಜೂ಼ನ ಹಗಾಮ್‍ನೊ ಪ್ರವಾದೀಮ ಏಕ್‌ ಜ಼ಣೊ ಜಿವ್ತೊಹುಯಿನ್ ಐರ‍್ಹೋಸ್ ಕರಿ ಬೋಲಾಸ್” ಕರಿ ಜವಾಬ್‌ ದಿದಾ.
20ಕತೋಬಿ ಯೇಸುನೆ ಇವ್ಣುನ, “ತುಮೆ ಮನ ಕೋಣ್ ಕರಿ ಬೋಲೋಸ್?” ಕರಿ ಪುಛಾ಼ವಖ್ಹತರ್,
ಪೇತ್ರನೆ, “ತೂ ದೇವ್‌ನೊ ಕ್ರಿಸ್ತ” ಕರಿ ಜವಾಬ್‌ ದಿದೊ.
ಯೇಸುನೆ ಇನಿ ಖ್ಹತಾಪ್ಣಿ ಅಜು಼ ಮರಣ್ಣಿ ಬಾರೇಮ ಬೋಲ್ಯೋತೆ
(ಮತ್ತಾಯ 16:20-28; ಮಾರ್ಕ 8:30—9:1)
21ತದೆ ಯೇಸುನೆ ಇವ್ಣುನ ಅನಿ ಬಾರೇಮ ಕಿನಾಬಿ ನಾ ಬೋಲ್‌ನು ಕರಿ ಝೇತಾಯೊ. 22ಅನ ಬಾದ್‌ಮ ಯೇಸುನೆ ಇವ್ಣುನ, “ಅದ್ಮಿನೊ ಛಿಯ್ಯೊ ಘಣು ಲತಾಡ ಪಡ್ನು, ಯೆಹೂದ್ಯರ್‌ನು ಶಾಣಾವ್‍ಥೀಬಿ, ಗಲ್‌ಢಯಾಜಕರ್‌ಥಿ ಅಜು಼ ಮೋಶೆನಿ ಧರ್ಮಶಾಸ್ತ್ರ ಶಿಕಾಡವಾಳ ಶಾಸ್ತ್ರಿಯೇಥಿ ಧಕೇಲೈಜಾ಼ಶೆ, ಅಜು಼ ಇನ ಮಾರಿನಾಕ್‌ಶೆ, ಕತೋಬಿ ತೀನ್ ದನ್ನ ಬಾದ್‌ಮ, ಯೋ ಜಿವ್ತೊಹುಯಿನ್ ಉಠಿ ಆವ್‌ಶೆ” ಕರಿ ಬೋಲ್ಯೊ.
23ಅತ್ರೇಸ್ ಕಾಹೆತೆ ಯೇಸುನೆ ಇವ್ಣ ಖ್ಹಾರಾವ್‌ನ ಶಾತ್ ಬೋಲ್ಯೊಕತೊ, “ಕೋಣ್‌ತೋಬಿ ಮಾರ ಜೋ಼ಡೆ ಆವ್ಣುಕರಿ ಉಶೇತೊ, ಇನು ಯೋ ಭೈಕಿಜೈ಼ನ್, ಹರ್‌ದನ್‌ ಇನಿ ಶಿಲ್‌ಬೇನ ಪಳ್ಳಿನ್‌, ಮಾರ ಪೀಠೆ ಆವಾದೆ. 24ಕೋಣ್ ಇನೊ ಜಾನ್‌ ಬಚಾ಼ಡಿಲೇವ್ಣುಕರಿ ಕರಾಸ್ಕಿ, ಯೋ ಇನೊ ಜಾನ್‌ ಗುಮೈಲಿಶೆ, ಕತೋಬಿ ಮಾರಖ್ಹಾಜೆ ಕೋಣ್ ಇನೊ ಜಾನ್‌ ಗುಮೈಲಿಶೆಕಿ, ಯೋ ಇನೊ ಜಾನ್‌ ಬಚಿಜಾ಼ಶೆ. 25ಏಕ್‌ ಅದ್ಮಿ ಹಿಡಿ ಜಗತ್‍ನಾಸ್ ಜೂತಿಲೀನ್‌ಬಿ, ಇನೊ ಜಾನ್‌ ಗುಮೈಲಿದೊತೊ, ಇನ ಶನೀಸ್ ಫಾಯಿದೊ ಕೊಯ್ನಿ! 26ಕೋಣ್‌ತೋಬಿ ಮನಾಬಿ ಅಜು಼ ಮಾರಿ ವಚನ್ನಖ್ಹಾಜೆಬಿ ಖ್ಹರ್‌ಮಾಯೂತೊ, ಇನ ಅದ್ಮಿನೊ ಛಿಯ್ಯೊ ಯೋಬಿ ಇನ ಬಾನಿ ಪರಿಶುದ್ದ ದೂತರ್‌ನಾಬಿ ಛಾ಼ತೆ ಮಹಿಮೆನಿ ಜೋ಼ಡೆ ಆವಾನಿ ವಖ್ಹತ್‌ಮ ಇನಿ ಬಾರೇಮ ಖ್ಹರ್‌ಮಾವ್‌ಶೆ. 27ತುಮೂನ ಖ್ಹಾಚಾಮ ಬೋಲುಸ್ಕಿ, ಹಜ್ಜಾ಼ ಭಿಯುತೆ ಇವ್ಣಾಮ ಥೋಡು ಜ಼ಣು ದೇವ್ನಿ ರಾಜ್ಯ ದೇಖಾತೋಡಿ ಮರ್‌ಶೆಸ್ ಕೊಯ್ನಿ” ಕರಿ ಬೋಲ್ಯೊ.
ಯೇಸುನು ರೂಪ್ ಬದ್‌ಲ್ಯೂತೆ
(ಮತ್ತಾಯ 17:1-8; ಮಾರ್ಕ 9:2-8)
28ಯೇಸುನೆ ಆ ಖ್ಹಾರಿ ವಾತೇನ ಬೋಲಿನ್, ಆಟ್‍ದನ್ ಹುವಾನ ಬಾದ್‌ಮ, ಪೇತ್ರ, ಯಾಕೋಬ ಅಜು಼ ಯೋಹಾನ್ನ ಬುಲೈಲಿನ್ ಪ್ರಾರ್ಥನೆ ಕರಾನಖ್ಹಾಜೆ, ಪಹಾಡ್‌ಪರ್ ಗಯೊ. 29ಯೇಸು ಪ್ರಾರ್ಥನೆ ಕರುಕರಾನಿ ವಖ್ಹತ್‌ಮ, ಇನು ಮ್ಹೋಡು ಬದ್ಲಿಗಯು, ಅಜು಼ ಇನು ಲುಂಗ್ಡು ಧೋಳುಫಟ್‍ಹುಯಿನ್, ಝ಼ಮ್‌ಕಾಲಗ್ಯು. 30ತದ್ದೇಸ್ ಬೇ ಪರ್ಖ್ಹಾ ಇನಜೋ಼ಡೆ ವಾತೆ ಬೋಲುಕರ್ತಾಥ. ಅವ್ಣೆ ಕೋಣ್‌ಕತೊ, ಮೋಶೆ ಅಜು಼ ಎಲೀಯ. 31ಅವ್ಣೆ ಪರಲೋಕ್‌ನಿ ಮಹಿಮೆಥಿ ದೆಖೈನ್, ಯೆರೂಸಲೇಮ್ಮ ಯೇಸು ಮರಿನ್‌, ದೇವ್ನಿ ಮರ್ಜಿನ ಪೂರ ಕರ್‌ಶೇತೆ ಇನಿ ಬಾರೇಮ, ಇನಜೋ಼ಡೆ ವಾತೆ ಬೋಲುಕರ್ತೂಥು. 32ಪೇತ್ರ ಅಜು಼ ಇನ ಜೋ಼ಡ್ಮ ರ‍್ಹವಾಳು ಭರ್‌ನಿಂದರ್‌ಮ ಥೂ, ಕತೋಬಿ ನಿಂದರ್‌ಮಾಥು ಜಾ಼ಗಿ ಉಠೀನ್, ಯೇಸುನಿ ಮಹಿಮೆನ ಅಜು಼ ಇನಜೋ಼ಡೆ ಭಿಯಾಥಾತೆ ಯೋ ಭೇ ಜ಼ಣಾನಾಬಿ ದೇಖ್ಯು. 33ಮೋಶೆ ಅಜು಼ ಎಲೀಯ ಯೇಸುನ ಮ್ಹೆಂದಿನ್, ಜಾ಼ವಾನಿ ವಖ್ಹತ್‌ಮ, ಪೇತ್ರನೆ ಯೇಸುನ, “ಗುರು, ಹಮೆ ಹಜ಼್ಜಸ್ ರ‍್ಹವಾನು ಕೆತ್ರೇಕ್ಕಿ ಅಛ್ಛು಼! ಹಮೆ ಹಜ಼್ಜಾ ತೀನ್ ಡೇರಾ ಠೋಕೆಸ್, ಏಕ್‌ ತುನ , ಏಕ್‌ ಮೋಶೇನ ಅಜು಼ ಏಕ್‌ ಎಲೀಯನ ” ಕರಿ ಬೋಲ್ಯೊ. ಪೇತ್ರನ, ಯೋ ಶಾತ್ ಬೋಲುಕರಾಸ್‌ ಕರಿ ಇನಾಸ್ ಮಾಲುಮ್ ಕೋ ಥೂನಿ.
34ಪೇತ್ರ ಆ ಬೋಲುಕರಾನಿ ವಖ್ಹತ್‌ಮ, ವಾದ್‌ಳು ಐನ್, ಇನೊ ಛಾ಼ಳೊ ಇವ್ಣಾಪರ್ ಢಪಾಯು. ಅನೇಥಿ ಶಿಷ್ಯರ್‌ ಡರಿಗಯು. 35ತದೆ ಯೋ ವಾದ್ಳಮಾಥು, “ಆ ಮಾರೊ ಛಿಯ್ಯೊ, ಮೇ ಚೂ಼ಣ್ಯೋತೆ ಅನಾಸ್, ಅನಿ ವಾತೇನ ಖ್ಹಮ್‌ಜೊ಼!” ಕರಿ ಏಕ್‌ ಅವಾಜ಼್ ಆಯೊ.
36ಯೋ ಅವಾಜ಼್ ಭೀರಿಜಾ಼ವಾನ ಬಾದ್‌ಮ, ಯೇಸು ಎಕ್ಕಸ್ ಜ಼ಣಾನ ದೇಖ್ಯು. ಯೋ ಶಿಷ್ಯರ್‌ ಇವ್ಣೆ ದೇಖ್ಯುತೆ ಇನಿ ಬಾರೇಮ, ಏಕ್‌ ಜ಼ಣಾನಾಬಿ ಯೋ ದನೂಮ ಬೋಲ್ಯುಕೊಂತೆ ಖ್ಹೊಪೊ ಪಡಿಗಯು.
ಯೇಸುನೆ ಭೂತ್ ಧರಿರಾಖ್ಯುಥೂತೆ ಏಕ್‌ ಛೋ಼ಕ್ರಾನ ಅಛ್ಛು಼ ಕರ‍್ಯೊತೆ
(ಮತ್ತಾಯ 17:14-18; ಮಾರ್ಕ 9:14-27)
37ತಿನ ಅಗ್‍ಲ್ಯ ದನ್ನೆ ಯೇಸು ಅಜು಼ ಇನ ತೀನ್ ಶಿಷ್ಯರ್‌ ಪಹಾಡ್ ಉತ್ರಿನ್ ಆಯ. ತದೆ ಅದ್ಮಿನಿ ಮೋಟಿ ಭೀಡ್ ಯೇಸುನ ಖ್ಹಾಮ್ಣೆ ಆಯಿ. 38ಯೋ ಭೀಡ್‌ಮಾಥು ಏಕ್‌ಜ಼ಣಾನೆ, “ಗುರು, ಮಾರ ಛಿಯ್ಯಾನ ದೇಕ್‌ಕರಿ, ತುನ ಗಿಂಗಾವುಸ್. ಮನ ಆ ಎಕ್ಕಸ್ ಛಿಯ್ಯೊ ಛಾ಼ತೆ. 39ಅನ ಭೂತ್ ಧರಾಸ್, ಧರ್‌ತಾಸ್‌ನ ಆ ಬಳೆಳಾಲಗಸ್, ಮ್ಹೋಡವಾಟೆ ಜ಼ಲ್‌ಭು ನಿಕ್ಳಾ ಏತ್ರೆ ಅನ ಧಡಾಶ ಮರಾವಸ್, ಅಜು಼ ಘಣು ಖ್ಹತೈನ್, ಝ಼ಗ್‌ದಾಶೆ ಯೋ ಭೂತ್ ಅನ ಮ್ಹೇಲಾಕೊಯ್ನಿ! 40ಯೋ ಭೂತ್‌ನ ಕಾಡೊ ಕರಿ, ತಾರ ಶಿಷ್ಯರ್‌ನ ಗಿಂಗೈಲಿದೊ. ಕತೋಬಿ ಇವ್ಣ ಹಾತೆ ಕೋ ಹುಯೋನಿ” ಕರಿ ಚಿಕ್ರಿನ್ ಯೇಸುನ ಬೋಲ್ಯೊ.
41ತದೆ ಯೇಸುನೆ, “ಏ ವಿಶ್ವಾಸ್‌ಕೊಂತೆ ಖರಾಬ್ ಪಿಳ್ಗಿಯೆ, ಮೇ ಬಿಜು಼ ಕೆತ್ರ ದನ್ ತುಮಾರ ಜೋ಼ಡೆ ರ‍್ಹೀನ್, ತುಮೂನ ಖ್ಹಮಾಳ್‌ಣು?” ಕರೊ ಜ಼ವಾಬ್‌ದಿದೊ. ಅಜು಼ ಯೋ ಅದ್ಮಿನ, “ತಾರ ಛಿಯ್ಯಾನ ಹಜ಼್ಜಾ ಬುಲೈಲಿ ಆವ್” ಕರಿ ಬೋಲ್ಯೊ.
42ಯೋ ಛೋ಼ಕ್ರು ಆವ್‍ಕರಾನಿ ವಖ್ಹತ್‌ಮ, ಯೋ ಭೂತ್ ಇನ ಜ಼ಮೀನ್‌ಪರ್ ರಡ್‌ಕೈನ್‌, ಘಣು ಧಡಾಶ ಮರಾಯು. ಕತೋಬಿ ಯೇಸುನೆ ಯೋ ಭೂತ್‌ನ ಗುರ್‌ಕೈನ್, ಯೋ ಛೋ಼ಕ್ರಾನ ಅಛ್ಛು಼ ಕರೀನ್, ಇನ ಬಾನ ಹಾತ್‌ಮ ದಿದೊ. 43ಅನ ದೇಖಿನ್ ಅದ್ಮಿಖ್ಹಾರು ದೇವ್ನಿ ಮಹಾನ್ ಶಕತ್ನಖ್ಹಾಜೆ ಆಶ್ಚರ್ಯಖಾದು.
ಯೇಸುನೆ ಇನಿ ಮರಣ್ಣಿ ಬಾರೇಮ ಬಿಜೇಕ್ ಹಲ್ಲ ಬೋಲ್ಯೊತೆ
(ಮತ್ತಾಯ 17:22-23; ಮಾರ್ಕ 9:30-32)
ಅದ್ಮಿಖ್ಹಾರು ಯೇಸುನೆ ಕರ‍್ಯೊತೆ ಖ್ಹಾರಿಸ್ ಕಾಮ್ನಿ ಬಾರೇಮ ಬಿಜೂ಼ಬಿ ಆಶ್ಚರ್ಯ ಕರುಕರಾತೆ ತದ್ದೇಸ್, ಯೇಸುನೆ ಇನ ಶಿಷ್ಯರ್‌ನ, 44“ಮೇ ಬೋಲುಕರುಸ್ತೆ ವಾತೇನ ಭೈಕ್‌ಶು ನಕೊ; ಅದ್ಮಿನ ಛಿಯ್ಯಾನ ಅದ್ಮಿಖ್ಹಾರಾನ ಹಾತ್‌ಮ ದೆವೈಜಾಶೆ” 45ಕತೋಬಿ ಇನ ಶಿಷ್ಯರ್‌ನೆ ಅನಿ ಮತ್ಲಬ್‌ನ ಪರ್‌ಖ್ಯುಕೊಯ್ನಿ. ಯೋ ವಾತೆ ಇವ್ಣೇಥಿ ಲಪೈರ‍್ಹೀಥೀತೆ ಇನಖ್ಹಾಜೆ, ಇವ್ಣೆ ಮಾಲುಮ್ ಕರ‍್ಯುಕೊಯ್ನಿ. ಅಜು಼ ಅನಿ ಬಾರೇಮ ಯೇಸುನ ಬೋಲಾನ ಡರಿಗಯು.
ದೇವ್ನಿ ರಾಜ಼್‌ಮ ಕೋಣ್ ಮೋಟು?
(ಮತ್ತಾಯ 18:1-5; ಮಾರ್ಕ 9:33-37)
46ಶಿಷ್ಯರ್‌ಮ ಕೋಣ್ ಮೋಟೊ ಕರಿ ಬೋಲಾನಿ ಬಾರೇಮ ವಾತೆ ನಿಕ್ಳಾಲಗಿ. 47ತದೆ ಯೇಸುನೆ ಇವ್ಣಿ ದಿಲ್ನಿ ವಾತೇನ ಮಾಲುಮ್ ಕರಿಲೀನ್, ಏಕ್‌ ಅಡ್ಡಾಣಿ ಲಡ್ಕಾನ ಬುಲೈನ್, ಇನ ಪಾಕ್ತಿಮ#9:47 ಶೇಡೆ ಕರೀಬಿ ಬೋಲಾಸ್ ಭಿರಾಖಿನ್, 48ಇವ್ಣುನ ಬೋಲ್ಯೊಕಿ, “ಕೋಣ್‌ತೋಬಿ ಏಕ್‌ ಜ಼ಣು ಮಾರ ನಾಮ್‌ಪರ್‌ ಆ ಅಡ್ಡಾಣಿ ಲಡ್ಕಾನ ಬುಲೈಲೇಸ್ಕಿ, ಇವ್ಣೆ ಮನ ಬುಲೈಲ್ಯವಾದಾಖ್ಹಲ್‌; ಅಜು಼ ಕೋಣ್ ಮನ ಬುಲೈಲೇಸ್ಕಿ, ಯೋ ಮನ ಮೋಕ್‌ಲ್ಯೊತೆ ಇನಾಸ್ ಬುಲೈಲ್ಯವಾದಾಖ್ಹಲ್‌. ಇನಖ್ಹಾಜೇಸ್ ತುಮಾರಾಮ ಕೋಣ್ ನ್ಹಾನೋಕಿ ಯೋಸ್ ಖ್ಹಾರೇಥಿ ಮೋಟೊ ಹುಯಿರ‍್ಹಿಶೆ” ಕರಿ ಬೋಲ್ಯೊ.
ತುಮಾರಪರ್ ವಹೇರ್‌ ಕರಾಕೊಯ್ನಿತೆ ಇವ್ಣೆ ತುಮಾರ ಭಣಿವಾಳುಸ್
(ಮಾರ್ಕ 9:38-40)
49ಯೋಹಾನನೆ, “ಗುರು, ಕೋಣ್ಕಿ ಏಕ್‌ ಜ಼ಣು ತಾರು ನಾಮ್ ಬೋಲಿನ್ ಭೂತ್ ನಖ್ಹಾಡುಕರ್ತುಥೂತೆ ಹಮೆ ದೇಖಿನ್, ಯೋ ಹಮಾರ ಭಣಿವಾಳು ಕಾಹೆತೆ ಇನಖ್ಹಾಜೆ, ಹಮೆ ಇನ ‘ಭಿರಾಕಡ್ ಕರಿ ಬೋಲ್ಯ” ಕರಿ ಬೋಲ್ಯೊ.
50ಅನ ಖ್ಹಮ್‌ಜಿನ್‌, ಯೇಸುನೆ ಯೋಹಾನ್ನ ಅಜು಼ ಬಿಜಾ಼ಖ್ಹಾರ ಶಿಷ್ಯರ್‌ನ, “ಇನ ನಕೊ ಭೀರಾಖೊ. ಶನಕತೊ ತುಮೂನ ವಹೇರ್‌ ಕರಾಕೊಂತೆ ಇವ್ಣೆ ತುಮಾರ ಭಣಿವಾಳುಸ್ ಹುಯಿರ‍್ಹೂಸ್” ಕರಿ ಬೋಲ್ಯೊ.
ಸಮಾರಿಯಾನು ಗಾಮ್‌ವಾಳು ಯೇಸುನ ಬುಲೈಲಿದುಕೊಂತೆ
51ಯೇಸು ಪರ್‌ಲೋಕ್‌ಮ ಪಡೈಲೆವಾನಿ ವಖ್ಹತ್ ಖನ್ನೆ ಆವಲಗಿಥೀತೆ ಇನಖ್ಹಾಜೆ, ಯೋ ಯೆರೂಸಲೇಮ್‌ನ ಜಾ಼ವಾನಟೇಕೆ ಘಟ್‌ಜಾನ್ ಕರಿಲೀನ್, 52ಇನೇಥಿ ಅಗಾಡಿ ಟಪಾಲ್#9:52 ಖಬರ್ ಪೋಚ಼ವಾಳನ ಕರೀಬಿ ಬೋಲಾಸ್ ದ್ಯವಾಳಾನ ಮೋಕ್‌ಲ್ಯೊ. ಅವ್ಣೆ ಜೈ಼ನ್ ಯೇಸುನ ಹೋಣುತೆಖ್ಹಾರು ಖ್ಹವಾರನಖ್ಹಾಜೆ ಸಮಾರ್ಯವಾಳಾನು ಗಾಮ್ಮ ಆಯು. 53ಯೇಸು ಯೆರೂಸಲೇಮ್‌ನ ಒಳೆಜಾ಼ತೊಥೋತೆ ಇನಖ್ಹಾಜೆ, ಹಿಜ್ಜಾ಼ನು ಅದ್ಮಿ ಇನ ಬುಲೈಲಿದುಕೊಯ್ನಿ. 54ಅನ ದೇಖಿನ್, ಯೇಸುನು ಶಿಷ್ಯರ್‌ ಯಾಕೋಬ ಅಜು಼ ಯೋಹಾನನೆ, “ಪ್ರಭು, ಪರಲೋಕ್‌ಥು ಆಗ್ ಪಡೀನ್, ಅವ್ಣುನ ಬರ್ಬಾತ್ ಕರ್‌ ಕರಿ, ಹಮೆ ಹುಕುಮ್ ದೇವ್ಣು ಕರಿ, ತೂ ಆಖ್ಹ್‌ಕರಾಸ್ಕಿ ಶು?” ಕರಿ ಪುಛಾ಼ವಖ್ಹತರ್,
55ಯೇಸುನೆ ಫರಿನ್, ಇವ್ಣುನ ಗುರ್‌ಕಾಯೊ. 56ಬಾದ್‌ಮ ಇವ್ಣೆ ಬಿಜ಼ ಗಾಮ್‌ನ ಗಯು.
ಯೇಸುನ ಶಿಷ್ಯರ್‌ ಕಿಮ್ ರ‍್ಹೇಣು ಕರಿ ಬೋಲಾನಿ ಬಾರೇಮ
(ಮತ್ತಾಯ 8:19-22)
57ಇವ್ಣೆ ವಾಟ್‌ಪರ್ ಜಾ಼ತುರ‍್ಹವಾನಿ ವಖ್ಹತ್‌ಮ, ಕೋಣ್ಕಿ ಏಕ್‌ ಜ಼ಣು ಯೇಸುನ, “ತು ಕಿಜ್ಗಾ಼ ಗಯೊತೋಬಿ ಮೇ ತಾರ ಪೀಠೇಸ್ ಆವ್‌ಸ್” ಕರಿ ಬೋಲ್ಯೊ.
58ತದೆ ಯೇಸುನೆ ಇನ, ‘ನ್ಹೋರಿಯೆನ ಘವಿಯೆ ಛಾ಼, ಅಜು಼ ಆಬ್‌ಪರ್ ಉಡಾತೆ ಜಿನಾವರ್‌ನ ಖ್ಹಾರು ಮ್ಹಾಳೊ ಛಾ಼, ಕತೋಬಿ ಅದ್ಮಿನ ಛಿಯ್ಯಾನ ಮುಡ್‌ಕ್ಯು ಟೇಕಯೆವ್ಡಿ ಝ಼ಗೋಬಿ ಕೊಯ್ನಿ” ಕರಿ ಬೋಲ್ಯೊ.
59ಅಜು಼ ಇನೆ ಬಿಜೇಕ್ ಜ಼ಣಾನ, “ಮಾರ ಪೀಠೆ ಆವ್” ಕರಿ ಬೋಲ್ಯೊ.
ಕತೋಬಿ ಇನೆ, “ಪ್ರಭು, ಮೇ ಪಹಿಲೆ ಜೈ಼ನ್ ಮಾರ ಬಾನ ಧಪ್‌ನೈದೀನ್‌ ಆವಾನ ಮನ ಹುಕುಮ್ ದೆ” ಕರಿ ಬೋಲ್ಯೊ.
60ತದೆ ಯೇಸುನೆ ಇನ, “ಮರ‍್ಯಹುಯಾಸ್‌ ಇವ್ಣಮ ಮರಿಗಯೂತೆ ಇನ ಮಾಟಿ ಕರಾದೆ! ತೂ ಜೈ಼ನ್, ದೇವ್ನಿ ರಾಜ್ಯನಿ ಬಾರೇಮ ಬೋಲಿವತಾಳ್” ಕರಿ ಬೋಲ್ಯೊ.
61ಬಿಜ್ಜೇಕ್‌ ಜ಼ಣಾನೆ, “ಪ್ರಭು, ಮೇ ತಾರ ಪೀಠೆ ಆವುಸ್, ಕತೋಬಿ ಮಾರ ಘರ್‌ವಾಳಕನ ಪಹಿಲೆ, ‘ಜೈ಼ನ್ ಆವುಸ್’ ಕರಿ ಬೋಲಿನ್ ಆವುಸ್” ಕರಿ ಬೋಲ್ಯೊ.
62ತದೆ ಯೇಸುನೆ ಇನ, “ನಾಗರ್‌ಪರ್#9:62 ಖೇತರ್‌ಮ ನಾಗ್ರಾನ ಶುರು ಕರಾನ ಬಾದ್‌ಮ, ಪೀಠೆಫರಿ ದೇಖಾವಾಳು ದೇವ್ನಿರಾಜ಼್‌ನ ಖ್ಹಾಜೆ ಕಾಮ್ ಕರಾನ ಲ್ಹಾಯಕ್‌ನು ಕಾಹೆ ಕರಿ ಬೋಲಾನುಸ್ ಅನಿ ಮತ್‌ಲಬ್. ಹಾತ್‌ ನಾಖಿನ್, ಪೀಠೆಫರಿ ದೇಖಾವಾಳು ಕೋಣ್‌ಬಿ, ದೇವ್ನಿ ರಾಜ್ಯನ ಲ್ಹಾಯೇಕ್‌ನು ಕಾಹೆ” ಕರಿ ಬೋಲ್ಯೊ.
Jelenleg kiválasztva:
ಲೂಕ 9: NTWVe23
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
The New Testament in Waghri Language © The Word for the World International and Waghri Translation Samiti, Karnataka, 2023.