Luki 21
21
1Jezu kpɔ́n mɛ lɛ́ɛ tlítlí, bó mɔ dɔkunnɔ lɛ́ɛ ɖo akwɛ́ sɔ́ dó akwɛ́gbá sinsɛnxɔ mɛ tɔn ɔ́ mɛ wɛ. 2É ka lɛ́ mɔ asúkúsi wamamɔnɔ ɖé, bɔ é sɔ́ gankwɛ́ kpɛví kpɛví we dó gbǎ ɔ́ mɛ. 3Ée Jezu mɔ mɔ̌ ɔ́, é ɖɔ nú yě ɖɔ: “Má ɖɔ nǔgbó nú mi; akwɛ́ e asúkúsi wamamɔnɔ élɔ́ ná ɔ́, é hú mɛ ɖě lɛ́ɛ bǐ tɔn. 4Đó mɛ ɖě lɛ́ɛ bǐ sésé ɔ́, nǔ e kpé yě kpo ɔ́ mɛ wɛ yě kpɔ́n bó wá ná nǔ dó gbǎ ɔ́ mɛ; éyɛ́ ɔ́, nǔ e hu dó e ɔ́, nǔ e ɖo así tɔn, bɔ é ná ɖu, bó nɔ gbɛ ɔ́ bǐ wɛ é sɔ́ wá d'é mɛ.”
Jezu ɖɔ è nǎ gba sinsɛnxɔ ɔ́
(Matíe 24.1-2; Maki 13.1-2)
5Ée mɛɖé lɛ́ɛ ɖo awǐnnya ɖagbe ɖagbe lɛ́ɛ xó ɖɔ wɛ, bó ɖo nǔ e mɛ lɛ́ɛ ná Mawu, bɔ è dó ɖó acɔ́ nú sinsɛnxɔ ɔ́ xó ɖɔ wɛ ɔ́, Jezu ɖɔ: 6“Nǔ énɛ́ lɛ́ɛ e mɔ wɛ mi ɖe din ɔ́, hwe ɖé nu ná wá su, bɔ awǐnnya lɛ́ɛ ɖě sɔ́ ná kpo ɖo ɖě jí ǎ; bǐ wɛ è nǎ mu.”
Jezu ɖɔ xó dó nǔ nyanya e ná wá jɛ lɛ́ɛ wú
(Matíe 24.3-14; Maki 13.3-13)
7Yě kanbyɔ́ Jezu ɖɔ: “Mɛ̌si, hwetɛ́nu wɛ nǔ énɛ́ lɛ́ɛ ká ná wá jɛ? Wuntun tɛ́ ká ná ɖe xlɛ́ mǐ ɖɔ nǔ énɛ́ lɛ́ɛ ko ɖo nǎ jɛ wɛ?”
8Jezu ka yí gbe nú yě ɖɔ: “Mi hɛn ayi nú mɛɖé má wá flú mi ó. Đó mɛ gěgé ná sɔ́ nyǐkɔ ce, bó ná wá xwetɔ́n, bó ɖɔ: ‘Nyɛ wɛ nyí Klísu ɔ́;’ hwenu e gbɛ ná vɔ dó ɔ́ ko sɛ yá kɛ́nnɛ́kɛ́nnɛ́; mi ma xwedó yě ó. 9Hwenu e mi ná wá se bɔ è nǎ ɖo ahwanfunfun kpódó gǔfínfɔ́n kpó xó ɖɔ wɛ ɔ́, ado ní ma hu mi ó, ɖó nǔ wɛ nyí, bó ɖó ná tó jɛ hwɛ̌; lo ɔ́, vivɔ gbé wɛ gbɛ ɔ́ kó ja nɛ́ ǎ.”
10Jezu ka lɛ́ ɖɔ nú yě ɖɔ: “Togun ɖě ná sí te dó ɖě jǐ; axɔ́súɖuto ɖě ná sí te dó ɖě jǐ. 11Ayǐkúngban ná dán wǔ ɖésú, bɔ adɔ kpódó jɛmɛjí kpó ná wá gbɔn fí tɛnmɛ tɛnmɛ. Nǔ baɖabaɖa gěgé ná jɛ, bɔ wuntun ɖaxó ɖaxó lɛ́ɛ ná tɔ́n ɖo jǐxwé.
12“Amɔ̌, cóbónú nǔ énɛ́ lɛ́ɛ ná jɛ ɔ́, alɔ ná jɛ mi wú, bɔ è nǎ dó ya nú mi, bó ná dɔn mi yi kplɔ́ngbasá Jwifu lɛ́ɛ tɔn, bó ná sɔ́ mi dó gankpá mɛ; è nǎ ylɔ́ hwɛ mi ɖo axɔ́sú lɛ́ɛ kpódó tokpɔngán lɛ́ɛ kpó nukɔn, ɖó nyɛ wú. 13Nǔ énɛ́ lɛ́ɛ ná jɛ dó mi jí, bɔ mi ná ɖó d'é wú, bó ná ɖe kúnnu nú mì. 14 Mi ka tunwun ɖɔ xó e mi ná yi ɖɔ dó hwlɛ́n miɖée ɔ́, mi kún ná ba ɖ'ayǐ ó. 15Đó un ná sɔ́ xó e mi ná ɖɔ é kpódó nǔnywɛ́ e mi ná zán é kpán bǐ dó ayi mɛ nú mi, bɔ kɛntɔ́ mitɔn lɛ́ɛ ɖěbǔ ná sixú mɔ xó ɖé, bó dó gba mitɔn ɔ́ ná ǎ. 16Mɛjitɔ́ mitɔn lɛ́ɛ lɔ kpódó nɔví mitɔn lɛ́ɛ kpó, mɛ mitɔn lɛ́ɛ kpódó xɔ́ntɔn mitɔn lɛ́ɛ kpán ná jó mi, bɔ è nǎ hu mɛ gěgé ɖo mi mɛ; 17mɛ bǐ ná gbɛ́ wǎn nú mi ɖó nyɛ wú. 18Lo ɔ́, ɖa mitɔn lɛ́ɛ ɖokpó ná hwe ǎ. 19Ényí mi ka dɛ ɖo ya énɛ́ lɛ́ɛ nu ɔ́, Mawu ná hwlɛ́n mi gán.”
Jezu ɖɔ xó dó lě e è nǎ gba Jeluzalɛ́mu gbɔn é wú
(Matíe 24.15-21; Maki 13.14-19)
20“Hwenu e mi ka ná wá mɔ kɛntɔ́ lɛ́ɛ nyi ahwan, bó ján Jeluzalɛ́mu toxo ɔ́, mi nywɛ́ ɖɔ hwenu e è nǎ gba dó ɔ́ kó sɛ yá. 21Énɛ́ ɔ́, mɛ e ná ɖo Judée gbé jí lɛ́ɛ ní hɔn yi só lɛ́ɛ jí; mɛ e ná ɖo toxo ɔ́ mɛ lɛ́ɛ ní hɔn tɔ́n, bónú mɛ e ná ɖo gleta lɛ́ɛ ní má sɔ́ lɛ́ kɔ wá toxo ɔ́ mɛ ó. 22 Đó hlɔnbiba sín azǎn wɛ azǎn énɛ́ lɛ́ɛ ná nyí, bɔ nǔ e è ko wlán ɖ'ayǐ é bǐ ná jɛ. 23Azǎn nyanya wɛ azǎn énɛ́ lɛ́ɛ ná nyí nú nyɔ̌nu e ná ɖo xo, kpódó ée ná ɖó vǐ anɔ̌nu hwenɛ́nu lɛ́ɛ kpán; ɖó to ɔ́ bǐ ná jɛ lele mɛ, bɔ Mawu ná ɖe xomɛsin tɔn xlɛ́ togun ɔ́. 24Yě ná kú hwǐ kú; ahwan ná wlí kannumɔ yětɔn yi to lɛ́ɛ mɛ to lɛ́ɛ mɛ, bɔ mɛ e ma nɔ sɛn Mawu ǎ lɛ́ɛ ná gbídí Jeluzalɛ́mu dó afɔ wú, káká yi jɛ hwenu e gan mɛ yětɔn ná vɔ dó é.”
Gbɛtɔ́ví ɔ́ ná lɛ́ kɔ wá
(Matíe 24.29-31; Maki 13.24-27)
25 “È nǎ mɔ wuntun ɖo hwesivɔ́ mɛ, bó ná mɔ ɖo sun kpódó sunví lɛ́ɛ kpó mɛ. Đo ayǐkúngban jí ɔ́, akɔta lɛ́ɛ ná ɖo adohu adohu jí, bɔ zǐngídi e ɖú wɛ xu ɖe é, kpódó lě e xo gbɔn wɛ é ɖe é kpán ná gba hǔn dó nú yě. 26Gbɛtɔ́ lɛ́ɛ ɖo nǔ e ná jɛ dó gbɛ ɔ́ wú ɔ́ kpɔ́n sɛ́ dó wɛ ɔ́, xɛsi ná ɖi yě, bɔ yě ná kú dó te. Hlɔ̌nhlɔ́n jǐxwé tɔn lɛ́ɛ ná dán wǔ. 27 Énɛ́ ɔ́, è nǎ mɔ Gbɛtɔ́ví ɔ́ ɖo akpɔ́kpɔ́ mɛ jǎwe, kpódó hlɔ̌nhlɔ́n kpán, ɖo susu ɖaxó ɖé mɛ. 28Nǔ énɛ́ lɛ́ɛ jɛ jijɛ jí hǔn, mi jlɔ́, bó kpɔ́n jǐ, ɖó hwenu e Mawu ná hwlɛ́n mi é kó sɛ yá.”
Jezu kplɔ́n nǔ mɛ dó fígitín wú
(Matíe 24.32-35; Maki 13.28-31)
29Jezu ka dó lǒ nú yě, bó ɖɔ: “Mi kpɔ́n fígitín, kpódó atín ɖě lɛ́ɛ bǐ kpán: 30Ényí yě jɛ ama zɔ́n jí, bónú mi mɔ ɔ́, mi ɖésúnɔ nɔ tunwun ɖɔ xwejí nɛ́ ɖo nǎ wɔ́ wɛ nɛ́. 31Mɔ̌ ɖokpó ɔ́, ényí mi wá mɔ nǔ énɛ́ lɛ́ɛ ɖo jijɛ wɛ hǔn, mi nywɛ́ ɖɔ axɔ́súɖuɖu Mawu tɔn kó sɛ yá. 32Má ɖɔ nǔgbó nú mi: mi mɛ e ɖo gbɛ din lɛ́ɛ bǐ ná kó kú cóbónú nǔ énɛ́ lɛ́ɛ ná jɛ ǎ. 33Jǐnukúnsin kpódó ayǐkúngban kpán ná vɔ, amɔ̌ xó ce lɛ́ɛ ná vɔ gbeɖé ǎ.”
Mɛɖěbǔ tunwun hwenu e Jezu ná lɛ́ kɔ wá dó ɔ́ ǎ
34“Mi bo cɔ́ miɖée, bónú nǔ ɖu díngan, ahan nu díngan, kpódó gbɛmɛ tagba lɛ́ɛ kpán má wá cyɔ́n ayi mitɔn jí, lobo nú azǎn énɛ́ ɔ́ wá fyán mi ó; 35ɖó azǎn énɛ́ ɔ́ ná wá fyán mi, lě e mɔ nɔ fyán kanlin gbɔn é. 36Mi bo nɔ wunzɛn hwebǐnu, bó nɔ ɖo ɖɛ xo wɛ hwebǐnu, bó ná mɔ hlɔ̌nhlɔ́n dó gló nǔ énɛ́ lɛ́ɛ e ná jɛ lɛ́ɛ bǐ, lobo ná sigǎn nɔ te ɖo Gbɛtɔ́ví ɔ́ nukɔn.”
37 Kéze ɔ́, Jezu nɔ ɖo nǔ kplɔ́n mɛ wɛ ɖo sinsɛnxɔ ɔ́ mɛ; zǎn mɛ ɔ́, é ka nɔ yi cí só e è nɔ ylɔ́ ɖɔ olívutín só ɔ́ jí. 38Ayǐ ká hɔ́n lě tlóló ɔ́, togun ɔ́ bǐ nɔ́ wá sinsɛnxɔ ɔ́ mɛ, bó nɔ́ se xó tɔn.
Vɔ̌sánú-xwlémawutɔ́gán lɛ́ɛ blá Jezu gbé
(Matíe 26.1-5; Maki 14.1-2; Jǎan 11.45-53)
Jelenleg kiválasztva:
Luki 21: Fon13
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
La Bible en langue fon © Alliance Biblique du Bénin, 2012.