एैसे आकास और पृथ्‍वी और उनमें जो सब कछु आय, उनहों बनाओ जाबो पूरो भओ। यहोवा परमेसुर ने अपनौ काम जीहों ऊ करत हतो सातवें दिना पूरो करो, और ऊने अपने करे भए सबरे काम सें सातवें दिना आराम करो। यहोवा परमेसुर ने सातवें दिना हों आसीस दई और पवित्र ठैराओ; कायसे ऊमें ऊने पृथ्‍वी के रचबे के अपने सबरे काम सें आराम लओ।

आकास और पृथ्‍वी के सिरजे जाबे कौ बिवरण जौ आय कि जब बे रचे गए
मतलब जौन दिना यहोवा परमेसुर ने पृथ्‍वी और आकास हों बनाओ: तब मैंदना कौ कोऊ पेड़ धरती पै नें हतो, और नें मैंदना कौ कोऊ हल्‍को पौधा ऊगो हतो, कायसे यहोवा परमेसुर ने पृथ्‍वी पै पानूं नें बरसाओ हतो, और जमीन पै खेती करबे के लाने कोऊ मान्‍स सोई नें हतो; तब भी कोहरा पृथ्‍वी सें उठत हतो जीसें पूरी धरती सिंच जात हती। तब यहोवा परमेसुर ने आदम हों धरती की माटी सें बनाओ, और ऊके नकुओं में जीवन की सांस फूंक दई; और आदम जियत प्रानी बन गओ।

तब यहोवा परमेसुर ने पूरब कुदाईं अदन में एक बगिया लगाई, और उतै आदम हों जीहों ऊने बनाओ हतो, रख दओ। यहोवा परमेसुर ने धरती सें सब भांत के पेड़, जो हेरबे में सुन्‍दर और जिनके फल खाबे में नोंने आंय उगाए, और बगिया के मजारें जीवन के पेड़ हों और अच्‍छे और बुरय के ज्ञान के पेड़ हों भी लगाओ।
ऊ बगिया हों सींचबे के लाने एक महानदिया अदन सें कड़ी और उतै सें आंगू बहकें चार धाराओं में बंट गई। पैली धारा कौ नाओं पीशोन आय; जा ओई आय जो हवीला नाओं के पूरे देस हों जितै सोना मिलत आय, घेरे भए आय। ऊ देस कौ सोना चोखो होत आय; ऊतै सोना, गुग्गुल और सुलैमानी पथरा भी मिलत आंय। दूसरी नदिया कौ नाओं गीहोन आय, जा ओई आय जो कूश के पूरे देस हों घेरे भए आय। तीसरी नदिया कौ नाओं हिद्देकेल आय, जा ओई आय जो अश्‍शूर के पूरब कुदाईं बहत आय। चौथी नदिया कौ नाओं फरात आय।
जब यहोवा परमेसुर ने आदम हों लैकें अदन की बगिया में रख दओ, कि बौ ऊमें काम करे और ऊकी देखभाल करे। तब यहोवा परमेसुर ने आदम हों जौ हुकम दओ, “तें बगिया के सब पेड़ों कौ फल बेखटकें खा सकत आय; परन्‍त अच्‍छे या बुरय के ज्ञान कौ जो पेड़ आय, ऊकौ फल तें कभऊं नें खईयो: कायसे जी दिना तें ऊकौ फल खाहै ओई दिना तें पक्‍कौ मर जैहै।”

फिन यहोवा परमेसुर ने कई, “आदम कौ अकेलो रैबो ठीक नईंया; मैं ऊके लाने एैसो साथी बनाहों जो ऊसें मेल खाए।” यहोवा परमेसुर ने धरती में सें सब जाति के बनैले पसुओं, और आकास के सब भांत के पक्‍छियों हों बनाकें आदम के लिगां ल्‍याओ कि तकें कि बौ उनकौ का-का नाओं रखत आय; और जौन-जौन जियत प्राणी कौ जो-जो नाओं आदम ने रखो ओई उनकौ नाओं हो गओ। तब आदम ने सब जाति के घरेलू पसुओं, और आकास के पक्‍छियों, और सब जाति के बनैले पसुओं के नाओं रखे; परन्‍त आदम के लाने एैसो साथी नें मिलो जो ऊसें मेल खा सके। तब यहोवा परमेसुर ने आदम हों भारी नींद में डाल दओ, और जब ऊ सो गओ तब ऊने ऊकी एक पसली काड़कें ऊकी जागां मांस भर दओ। यहोवा परमेसुर ने ऊ पसली हों जो ऊने आदम में सें काड़ी हती, बईयर बना दओ; और ऊहों आदम के लिगां ल्‍याओ। आदम ने कई,
“अब जा मोरी हड्डियों में की हड्डी और मोरे मांस में कौ मांस आय;
ई लाने ईकौ नाओं नारी हुईये, कायसे जा नर में सें काड़ी गई आय।”
ई कारन मान्‍स अपने मताई-बाप हों छोड़कें अपनी घरवारी सें मिलो रैहै, और बे एकई तन बने रैहें। आदम और ऊकी घरवारी दोई नंगे हते, परन्‍त लजात नें हते।

Լսել - उत्पत्ति 2