If you have would like a copy of this version please contact info@davarpartners.org

Pahari Mahasu New Testament, CC-BY-SA-4.0, The Love Fellowship (Text), Pahari Mahasu New Testament Audio Bible, CC-BY-SA-4.0, Davar Partners International, 2021 (Audio)

Pahari Mahasu New Testament

This work is licensed under Creative Commons Attribution-ShareAlike 4.0 License.

ज़ैबै यीशु और तेसरै च़ेलै यरुशलेमा रै नज़दीक पौउंच़ै और जैतूना री पहाड़ी माथै बैतफगे काऐ आशै, ता यीशुऐ दुई च़ेलै इणै बोलीयौ भेज़ै, “सामनै वाल़ै गांवा दी डैऔ। तिऐ पौउंच़िऔ ई तुमुकै एक गादी मिला खुंटी दी बानी औन्दी, और तिंया आइलै तियांरौ गौधेटु मिला। तिऊं खोलियौ मुं काऐ आणौ। अगर तुमु आइलै कोई कुछ़ बोलालै, ता तुमै बोलेऊ प्रभु कै एसरी ज़ुरत आ, तैबै सेऊ तेबी भेज़ा” इणौ एथलै हुऔ कि ज़ो वचन पुराणै ज़मानै रै गुरु रै तौरफा कु बोलौ औन्दौ थौ सेऊ पुरौ हुआ: “सिय्योना री छ़ोटुड़ी कु बोलौ, ‘देख, तैरौ राज़ौ ताऊं काऐ आशौ आ: सेऊ नीउलौ आ, और गौधेटु माथै बोशौ औन्दौ आ: पर गादी रै मांऊ माथै।’ ” च़ेलेउऐ डेइऔ, ज़िणौ यीशुऐ तिउंलै बोलौ थौ, तिणी ई किऔ। और गादी और तिंयारौ गौधेटु आणौ, तिऊं माथै आपणै जुड़कै छ़ाड़ै, और यीशु तेस माथै बोशी गौ। तैबै भौरी लोगुऐ आपणै जुड़कै बाटा दी बिछ़ाऊंदै लागै, और कुछ़ लोगुऐ पेड़ा रै शाऊंटै काटियौ बाटा दी बिछ़ाऐ। ज़ो भीड़ औगाड़िऐ और पिछ़ाड़िऐ आण्डदै थै लागै औन्दै, सै औटाइयौ बोलदै थै लागै औन्दै, “दाऊदा रै संताना री बौड़ाई हो होसाना, आशीष वाल़ौ ई तुमै ज़ो प्रभु रै नावां कौरीऐ आशै ई, सौरगा दी परमेश्‍वरा री बड़ाई हो होसाना।” ज़ैबै यीशु यरुशलेमा दी डैऔ, ता सारै शहरा दी हलचल माच़ी गोई, और लोग बोलदै लागै, “एऊ कुण आ?” लोगुऐ बोलौ, “एऊ गलीला रै नासरता रौ गुरु यीशु आ।”


यीशुऐ परमेश्‍वरा रै घौरा दी डेइयौ सै सौभी, ज़ो परमेश्‍वरा रै घौरा दी लेण-देण थै कौरदै लागै औन्दै, गाड़ी गौऐ, सर्राफो रै पीढ़ै और कबुतर बेच़णै वाल़ेऊ री रेढ़ी पौल्टी। और यीशुऐ बोलौ, “लिखौ औन्दौ आ, ‘मैरौ घौर प्राथना रौ घौर आ।’ पर तुमुऐ एऊ लुटणै वाल़ेऊ रौ आड्डौ चाणी गौ आ।” तैबै शेड़ै और लौंगड़ै, परमेश्‍वरा रै घौरा दी यीशु काऐ आशै, और यीशुऐ सै ठीक कियै। पर ज़ैबै बौड़ै याजकु और शास्त्रिउऐ एज़ै हैरान कौरणै वाल़ै काम, ज़ो यीशुऐ कियै, और छ़ोहरुऐ परमेश्‍वरा रै घौरा दी दाऊदा री संताना लै “होसाना” औटाउंदै बारै देखै, ता तिंउरै रोश आशी गोऐ, और यीशु लै बोलदै लागै, “का तू शुणाई कि इऐ का बोलाई?” यीशुऐ तिउंलै बोलौ, “ओ। का तुमुऐ इणौ केबी नाईं पौड़ौ, ‘लोल़ड़ै और दूध पिणै वाल़ै मांऊ कु ताइंऐ अपार स्तुति कौरा ई।’ ” तैबै यीशु तिऊं छ़ाड़ियौ तेस इलाकै कु बाइरै बैतनिय्याह लै डेवै और ब्याल़ी रौऔ तिदै ई।


दोअती ज़ैबै यीशु इलाकै कु डेउंदै थौ लागौ औन्दौ ता यीशु रै भूख लागी। बाटा दी यीशुऐ एकी भिलै फेड़ु रौ एक पेड़ देखौ और सेऊ तेस पेड़ा काऐ डैऔ, और पेड़ा दी पाचा छ़ाड़ियौ और कुछ़ नाईं थौ और तेसलै बोलौ, “आज़ा कु पोरु ताऊं दी केबी फल़ नाईं लागदै।” और फेड़ु रौ पेड़ खरकच़ार शुकी गौ। इणौ देखीयौ च़ेलै हैरान हुऐ और तिंउऐ बोलौ, “एऊ फेड़ु रौ पेड़ खरकच़ार किणौ शुकी गौ?” यीशुऐ तिउंलै ज़वाब दैऔ, “हाऊं तुमुलै सौच़्च़ौ बोलाऊ, अगर तुमै विश्वास छ़ाड़ा और शौक नाईं कौरालै, ता ना सिरफ इणौ कौरालै ज़ो एस फेड़ु रै पेड़ा लै किऔ आ, पर अगर एस पहाड़ी लै बोलालै, ‘तू उठ, और समुन्दरा दी डेऊ,’ ता इणौ हुआई। और ज़ो तुमै प्राथना दी विश्वासा कौरी मांगा ई सेऊ सौभी तुमुलै मिला सा।”


यीशु परमेश्‍वरा रै घौरा दी शिक्षा दैंदै थौ लागौ औन्दौ, ता बौड़ै याजक और स्याणै लोग यीशु काऐ आशै और बोलदै लागै, “तू इणै काम केज़ै हक्‍का कौरी कौरा ई? और ताउंकै एज़ौ हक्क कुणिऐ दैऔ आ?” यीशुऐ तिउंलै ज़वाब दैऔ, “हाऊं भी तुमु कु एक सवाल पुछ़ाऊ। अगर तुमै मुकै ज़वाब दिआ लै, ता हाऊं भी तुमुकै बोलाऊ कि इणै काम कासरै हक्क कौरीऐ कौराऊ। यहुन्ना रौ बपतिस्मौ किदरु कु थौ? सौरगा री तौरफा कु या आदमी री तौरफा कु?” तैबै सै आपु माझ़ियै चौपड़ीदैं लागै, “अगर आमै बोलु लै ‘सौरगा री तौरफा कु,’ ता एऊ आमुकु बोला, ‘तैबै तुमुऐ तेस माथै विश्वास कैलै ना कियौ?’ और अगर आमै बोलु लै ‘आदमी री तौरफा कु,’ ता आमुलै भीड़ा रौ डौर आ, कैलैकि इऐ सौभी यहुन्ना भविष्यवक्ता माना ई।” तैबै इउंऐ यीशु लै ज़वाब दैऔ, “आमै नाईं ज़ाणदै।” यीशुऐ भी तिउंलै बोलौ, “ता हाऊं भी नाईं बोलदौ कि एज़ौ काम केज़ै हक्‍का कौरीऐ कौराऊ।”

“तुमै का सौमझ़ा ई? कास आदमी रै दुई छ़ोहरु थै। तिणीऐ पैहलै छ़ोहरु लै बोलौ, ‘ओ छ़ोहरु, आज़ अंगुरा रै बौगिच़ै दी काम कर।’ तिणी छ़ोहरुऐ ज़वाब दैऔ, ‘हाऊं नाईं डेउंदौ,’ पर बासिऐ पछ़ताइऔ डैऔ। तैबै सेऊ दुजै छ़ोहरु काऐ डेइयौ तिणौ ई बोलौ, तिणी दुजै छ़ोहरुऐ बोलौ, ‘ओ हाऊं डिआऊ,’ पर नाईं डैऔ। इऊं दुई मांझ़िऐ कु कुणिऐ बाबा री इच़्छ़ा पुरी की? तिंउऐ बोलौ, ‘पैहलै।’ ” यीशुऐ तिउंलै बोलौ, “हाऊं तुमुलै सौच़्च़ौ बोलाऊ कि मामलै निणै वाल़ै और गान्दै काम कौरणै वाल़ै तुमु कु पैहलै परमेश्‍वरा रै राज़ा दी डिआई। कैलैकि यहुन्ना भौलाई री बाटा देखाउंदै तुमु काऐ आशौ, और तुमुऐ तेस माथै विश्वास ना कियौ। पर मामलै निणै वाल़ेउऐ और गान्दै कामा कौरणै वाल़ेउऐ तेसरी बुशु माथै विश्वास कियौ और तुमै इणौ देखीयौ बासिऐ भी नाईं पछ़ताऐ कि तेसरौ विश्वास कौरा थै।


“एक औज़ौ औनैणौ शुणौ: एक घौरा रौ मालिक थौ तिणीऐ अंगुरा रौ बौगिच़ौ लाऔ, तेसरै च़ारौ तौरफा दी तारबाड़ लाऔ, तेस बौगिच़ै दी एकी भिलै अंगुरा रै रस गाड़ने री ज़ागाह भी चाणी और छ़ोटी ज़ेई छ़ानी भी चाणी, और तेसरौ ठेकौ ज़िमदारु कै देइयौ आपु डैऔ परदेशा लै। ज़ैबै अंगुरा चोड़णै रौ बौगत आशौ, ता तिणी मालिकै आपणै नुकुरा लै फल़ आणना लै ज़िमदारु काऐ भेज़ै। पर ज़िमदारुऐ तेसरै नुकुर पाकड़ियौ, केज़ै पिटै, और केज़ै झ़ांगै पोरु, और केज़ै ढोल़ियाऐ। तैबै तिणी मालिकै पैहलै कु भौरी औज़ौ नुकुर भेज़ै, और तिंउऐ तिऊं आइलै भी तिणौ ई कियौ। बासिऐ तिणी मालिकै आपणौ छ़ोहरु तिऊं काऐ इणौ सुंच़ीयौ भेज़ौ कि सै मैरै छ़ोहरु री इज़्ज़त कौरालै। पर ज़िमदारुऐ सेऊ छ़ोहरु देखीयौ आपु मांझ़िऐ चौपड़िंदै लागै, ‘एऊ ता एस बौगिच़ै रौ मालिक आ, आशौ, आमै एस पोरु झ़ांगी, ताकी एऊ बौगिच़ौ आमारौ हुआ।’ तैबै तिंउऐ सेऊ छ़ोहरु पाकड़ौ और सेऊ अंगुरा रै बौगिच़ै कु बाइरै गाड़ीयौ पोरु झ़ांगौ। एथीलै ज़ेबी बौगिच़ै रौ मालिक आशा लौ, ता तिऊं ज़मीदारु आइलै का कौरा?” तिंउऐ तेसलै बोलौ, “सेऊ तिऊं लोग पोरु झ़ांगा और अंगुरा रौ बौगिच़ौ ओरी लोगु कै सौंभाल़ा, ज़ो बौगतै माथै तेसलै फल़ दिआ कौरा।” यीशुऐ तिउंलै बोलौ, “का तुमुऐ केबी पवित्रशास्त्रा दी इणौ नाईं पौढ़ौ कि: ‘ज़ेज़ौ पात्थर मिस्त्रिऐ बेकार ज़ाणौ थौ, सेज़ौ पात्थर कुणे दी लागणै वाल़ौ बौणौ? एज़ौ काम परमेश्‍वरा री तौरफा कु हुऔ, और एज़ौ आमारी नौज़री दी नोखौ आ।’ एथीलै हाऊं तुमुलै बोलाऊ कि परमेश्‍वरा रौ राज़ तुमु कु नींई बौल़िया आ और इणी ज़ाती लै ज़ो तेसरौ फल़ आणा, देई आ। ज़ो एस पात्थरा माथै पौड़ालौ, सेऊ च़ूर-च़ूर हुआ। और ज़ास माथै सेऊ पात्थर पौड़ालौ, सेऊ पिशीया पोरु पा।” बौड़ै याजकु और फरीसी लोग यीशु रै औनैणौ शुणिऐ सौमझ़ी गौऐ कि सेऊ तिंउरै बारा दी बोला आ। और तिंउऐ यीशु पाकुड़नौ च़ाऔ, पर सै लोगु कु डौरी गौऐ कैलैकि सै यीशु भविष्यवक्ता माना थै।

Լսել मत्ती 21