 If you would like a copy of this version please contact info@davaraudiobibles.org

Text: Noiri New Testament, CC-BY-SA-4.0, The Love Fellowship. Audio: Noiri New Testament, CC-BY-SA-4.0, Davar Partners International, The Love Fellowship, 2023

Noiri New Testament

Noiri (नोयरी) Bible by The Love Fellowship is licensed under Creative Commons Attribution-ShareAlike 4.0 License.

ती वेले चेले येशुउ आहाने आवित फुसुहू लागे होर्गा राजोमेहे वोडू कोडू होय? तेहलाम तिये होमला पोऱ्याहा आप आरी हादाडये, अने माय उभे कोईत कोयु, आय तुमामे खोरोज कोत्लू का जो पर्यंत फासाडी फिरीही नाहा अने पोऱ्याहोस बोनणारू नाहा तुमु होर्ग्याआ राज्याम खोरोज प्रवेश कोअनारू नाहा. जो कोडु माह आव पोऱ्याहोस नम्र बोनेहे तोज होर्ग्याआ राज्याम आखा रोत वोडू होय. अने जो कोडु माआ नावामेहे एहलो होमला पोऱ्याहा ग्रहण कोअत्लू, तो माहु ग्रहण कोअत्लू.


पण जो कोडु आव हानामेहरोअत हानू ला जे मापो विश्वास मेकात्ले एकाहा पण ठोकायू पोताळिहि ताहा ओ हाजो होय का तियाआ गोलाम वोडो कोअटी तेलो बादिते तियाहा समुद्राआ उंडो बुडालीत आप्लु ओते. अडखळल्या मुळे जगाला धिक्कार होय अडखळण ताहा आवेहेज पण तियाअ माहुहू धिक्कार रोतो ज्याआ त्यापोरत अडखळण आविलो. जर ताआ आथे किंवा गुडू ठोकायू पोताळिहि ताहा तियाहा तोडीत टाकी आप, काहाके ता कोअता लेगडे बोणीत जीवनामे प्रवेश कोअला यापोरोत हाजो होय का तू बेन आथे किंवा बेन गुडू घेऊन अनंत आगीम टाक्यू जाइअलो. जर ताआ डोउ ताहु ठोकायू पोताळिहि ताहा तियाहा काढीत टाकी आप, काहाके ता कोअता आंदलू बोणीत जीवनामे प्रवेश कोअला यापोरोत हाजो होय का ताआ बेन डोआं ओमेत ए तू नरकाआ जानारू.


पाला, तुमु आव आयताम कोडोबी तुच्छ माणू नाहा काहाके आय तुमामे कोत्लू का स्वर्गाआ त्याआं स्वर्गदूत माआ स्वर्गाआ बाहाआ सोब कायम पालीत रोत्ले. काहाके माहाआ पोऱ्या टाकाल्याहा वासाडूहु आवल्यु होय. तुमामे कि लागेहे? कोडू होमला माहाआरी होव मेंढे ऐहेली, अने त्यामेरोत एखादे भटकिल्यो, ताहा तियाअ नव्याण्णव ला जंगलूम सोडीत तियाअ टाकाईत गोल्याहा होद कोईलाकाजे तो जानारू नाहा नाहाकोत? अने जर एहलो उवे का ती तियाहा जोडीत जानारू ताहा आय तुमामे खोरीज कोत्लू का तो त्यांकोअता तियाअ नव्याण्णवपेक्षा जे टाकत ग्येल्यू निमिले, त्यापेक्षा जाखा आनंद कोअत्लू. तेहलूज तुमाआ बाह्हू जो होर्गाम होय एह्ली इच्छा नाहा का आव हाणाम एकाआ पण नाश उवे.


जर ताआ पाही किबी पाप कोईत होय ताहा जात तियाहा एखालुज होमाजळ जर तो ताआ होमले ताहा तू तियाहा मिलवीत लेधलो होय. पण जर ताआ तो होमलीनारू नाहा ताहा आपाआरी एक किंवा बेन मांहे फासी लेत जा यकोअता का बेन किंवा तीन साक्षीई सोबिमरोत शब्दावाही ते निच्छित कोल्यु जाइअलो. जर तो तियाआ पण होमलीनारू नाहा ताहा मंडली मांहोहो कोअलो जर तो तियाआ पण होमलीनारू नाहा ताहा तो ताहु अन्यजाति अने जकातदार सारखू ओवे.

आय ताहु खोरो कोत्लू की जे किबी तुमु धोरतीपो बानदेहे ते होर्गाम बानदल्यो जाइअलो अने जे किबी तू धोरतीपो उगाडीही ते होर्गाम उगाडनारो. आय तुमामे फासी कोत्लू जर जो तुमामे बेन जोओ धोरतीपो एगदा मांगणीकोता एक मोन होय ताहा ते माआ होर्गाआ बाह्हाप रोत त्याकोअता ओत जानारू. काहाके इंही बेन किंवा तीन माआ नावामेहे एकठे ओये तीही आय तीयाम होय.

तेहलाम पेत्राई आविलो येशुहू कोयु प्रभू माआ पाही केतीवा माआ विरूध अपराध कोअनारू अने आय तियाहा क्षमा कोईत रोही नाहाकोत सात टायमोपोजा? येशु तियाहा कोयु आय ताहु ओ कोईत नाहा का सात टायमोआ इहीजा पण साताआ सोत्तर टायमोआ पर्यंत. त्यापोत होर्ग्याआ राज्याआ तुलना एगदा एहलो राज्याआरी कोअयी जाहो जीआ आपाआ नोकराहारोत हिशोब लेअला ओतु. जांहा तो हिशोब लेऊ लाग्यू ताहा तियाआ आगाडी एक माहुहू घेऊन आवयू, ज्यापो मेंढा रुपयां कर्ज ओतु. पण जांहा त्याजागे कर्ज फेडीलाकाजे किबी निमिले तेहलाम राजाआ आज्ञा कोअयी का तियाआ लाडी, पोऱ्ये अने जे किबी त्याजागे होय आखे वेसेत कर्ज सुकाडीत आपलो. यापो पावरो गुडू पोडीत नमन कोल्यु अने कोयु मालक धीरज तो आय आखे किबी आपित आपी. तेहलाम दास मालक्योहो तियापो दया कोईत तियाहा सोडीत आप्लु अने तिया कर्ज पण क्षमा कोईत आप्यू. पण तो पावर बारथे निघाल्यू अने तियाआ भेट तियाआ होमला आथे नोकरा बरोबर उवी जो तिया होव रुप्याआ कर्जदार ओतु तिये तियाहा तोओईलो अने तिया गोलु दाबीन तियाहा कोयु माआ कर्ज फेड. योपो तिया हेगातीई पावर तिया गुडू पोडीत विनंती कोहू लाग्यू का धीर तो आय आखे कर्ज फेडीत आपी. तेबी पण तिये तियाआ होमल्यु नाहा तोपोरोत तियाहा जेलूम ठाणाम टाकीत आप्लु का तो कर्ज फेडीत आपी नाहा. ओ पालीत तिया हेगातीई पावर अतिशय दुखित ओवयू अने तिये जात ए घटना आपाआ मालकोहू कोल्यी. तेहलाम तिया मालक्योहो हादीत कोयु, ओ खराब पावोरआ यकोअता का तू माहु विनंती कोअयी आयताआ आखे कर्ज क्षमा कोईत आप्यू ओतु. दिहरे ज्यपोरोत आय तापो दया कोअयी त्याप्रमाणे त्याहेगात्यो नोकरापो दया कोअला नाहा नाहाकोत? फासाडी तियाआ मालक्योहो तियापो रागावीत तो आखे कर्ज आपलो चकवे ताहुजा तियाहा यातना आपणाराहा होफहोपिन आप्लु. कोईत जर तुमु हर एक जोओ आपु आपाआ पाहीही मोनामोरो माफ कोअनारू नाहा ताहा माआ होर्गामेऱ्ये बाह्हू ए तियाआ प्रमाणोओ तुमाआ कोआ.

Լսել मत्ती 18