Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005

Chi je̱'e̱ Jesús yajmu̶dmu̶dyaaku̶ ajku̶xy tu'ug je̱'e̱ ijxpe̱jtu̶ñ; yajni'ixu̶'u̶waanu̶gu̶xyu̶ ko je̱'e̱ Dios mu̶baad mmu̶bu̶jktzoogu̶xy jaboom jaboom, y ka'p mu̶dzijpu̶gu̶xu̶ch. Ñu̶maayu̶ ajku̶xy: “Jii ijty jueez tu'ug ma tu'ug kajptu̶ñ, ni Dios ijty je̱'e̱ ka'awindzu̶gu̶'u̶y, y nan ni ja'ay ijty ka'atzu̶gu̶'u̶y. Nan ma je̱'e̱ kajptu̶ñ jim najty ku'o'ogytyo'oxyu̶jk tu'ug. Ja'anaam ja'atzojk najty je̱'e̱ myiin'o'ogy ma je̱'e̱ jueezu̶ñ, nu̶ma'ay najty: ‘Niwaangu̶ch ma u̶u̶ch je̱'e̱ nmu̶dzipu̶ñ.’ Y je̱'e̱ jueez ka'p je̱'e̱ tzojk nimu̶dooy. Chi je̱'e̱ jueez aa'ajt joot'ajtu̶, myu̶naañ jootjooty winma'añjyooty: ‘Oy u̶u̶ch je̱'e̱ Dios nga'awindzu̶gu̶'u̶y, ni je̱'e̱ ja'ay nga'atzu̶gu̶'u̶yu̶ch. Peru̶ je̱' ko adaa ku'o'ogytyo'oxyu̶jk ni'igyu̶ u̶u̶ch adaa xyjyanchnu̶ne̱'e̱mu̶y'adu̶'u̶ch, miñ u̶u̶ch n'okniwa'añ, ka'pu̶ myiin'o'ogu̶ch, y xyajku̶jxu̶chu̶ch je̱'e̱ nme̱kxtujku̶ñ.’ ”
Chi je̱'e̱ Windzú̶n Jesús myu̶naañ: “Mu̶doogu̶x adaa miich neby je̱'e̱ jueez ju̶bu̶kja'ay myu̶naañu̶ñ ko je̱'e̱ ku'o'ogytyo'oxyu̶jk najty tu̶ yajtzibyii. ¿Nej ka'p mdijy je̱'e̱ Dios jya'ay nandu'un niwa'anu̶ch mu̶dyiibu̶ tu̶ win'ixyu̶ñ, mu̶dyiibu̶ mu̶bu̶jktzoowu̶p xu̶u̶m tzum? ¿Nej je̱gu̶p je̱'e̱ da'a nu̶kxy kya'atzojk adzoyu̶? U̶u̶ch miich nnu̶maaygyu̶xypy ko je̱'e̱ Dios ñiwa'ane̱e̱mby je̱'e̱ jya'ay mu̶k'eemby. Peru̶ ko u̶u̶ch naty nwimbity yaa naaxwiiñ, u̶u̶ch je̱' je̱'e̱ ja'ay mu̶dyiibu̶ tzon tzajpjooty, ¿nej nbaadu̶byu̶ch je̱'e̱ mu̶bu̶jku̶ñ ya naaxwiiñ?”

Chi je̱'e̱ Jesús adayaaba ijxpe̱jt ja'adu'ug mu̶dyaaky, ko je̱'e̱ ja'ay nije̱' ku̶'u̶m jyanchnaygyu'umaayu̶gu̶xy ko y'oyjya'ayu̶ch ajku̶xy, y pe̱jxku̶xy je̱'e̱ myu̶gu'ugtu̶jk. “Nime̱tzk je̱'e̱ ja'ay y'ooygyu̶xy ma je̱'e̱ mu̶jtzajptu̶jku̶ñ Dios mu̶bu̶jktzoobu̶. Tu'ug fariseo ja'ay je̱'e̱ najty, y je̱'e̱ ja'adu'ukpu̶ yajkugube̱jtpu̶ ja'ay je̱'e̱ najty mu̶dyiibu̶ je̱'e̱ gobierno romano mu̶duumbu̶ñ. Chi je̱'e̱ fariseo ja'ay tyu̶naayu̶'ky, y chi je̱'e̱ Dios mu̶bu̶jktzodu̶gu̶u̶y, cham du'un jyanchmu̶na'añ: ‘Windzú̶n Dios nyajnajxypyu̶ch je̱'e̱ Dioskujuuyu̶p je̱' ko u̶u̶ch ka'p nbokytyuñ du'un neby je̱'e̱ mayjya'ay pyokytyuungu̶xyu̶ñ, ka'p u̶u̶ch nmeech, ka'p u̶u̶ch nju̶bu̶kja'ayu̶ch, ka'p u̶u̶ch je̱'e̱ wiingja'ay tyo'oxyu̶jk nmu̶gapxtu̶gooyu̶, y ka'p u̶u̶ch du'un nbokytyuñ neby adaa yajkugube̱jtpu̶ju̶ñ. Me̱jtz xu̶u̶ u̶u̶ch ayuu n'ity tu'ukpu̶ sumaan, y nmooby je̱'e̱ majkjátypyu̶ mu̶dyiibu̶ u̶u̶ch ku̶xyu̶ nganar'ajtypyu̶ñ.’ Peru̶ je̱'e̱ yajkugube̱jtpu̶ ju̶gue̱mduum je̱'e̱ wyu̶'u̶my, y ni kya'apa't'ijxy je̱'e̱ tzajpkú̶xy, je'eyu̶ je̱'e̱ kyach janchkoxy y myu̶na'añ: ‘¡Dios Teedy, pa'a''ayoogu̶ch, u̶u̶ch pokyjya'ayu̶ch!’ U̶u̶ch miich nnu̶maaygyu̶xypy ko je̱'e̱ yajkugube̱jtpu̶ wyimbijtnu̶ ma je̱'e̱ tyu̶jku̶ñ tu̶ najty je̱'e̱ Dios pyokywyinme̱kxyii, peru̶ je̱'e̱ fariseo ja'ay ka'p je̱'e̱ yajpokywyinmékxy. Je̱' ko je̱'e̱ mu̶dyiibu̶ ku̶'u̶m naygyu'umaayu̶p, tzo'oydyu'unbaadu̶p je̱'; y je̱'e̱ mu̶dyiibu̶ yuung naaxypy naybyu̶daaku̶p, je̱' ku'umaay idu̶p.”


Nan chi je̱'e̱ pi'k'ana'ktu̶jk yajnu̶kxy ajku̶xy ma je̱'e̱ Jesúsu̶ñ ko wan ku̶'u̶ni'ixajy ajku̶xy, peru̶ ko je̱'e̱ discípulotu̶jk du'un ijxy ajku̶xy, chi je̱'e̱ ja'ay ojtu̶gu̶u̶ygyu̶xpu̶ je̱'e̱ mu̶dyiibu̶ je̱'e̱ pi'k'ana'ktu̶jk najty mu̶dmiingu̶xpu̶ñ. Mu̶'it je̱'e̱ Jesús dyiscípulotu̶jk yaaxu̶, y nu̶maay ajku̶xy:
—U̶xmajtzku̶x, wan u̶u̶ch yu̶'u̶ pi'k'ana'ktu̶jk xyñimiingu̶xy, y ka'p m'agapxtujkku̶xy, je̱' ko je̱'e̱ ja'ay jiiby tu̶gu̶'u̶waangu̶xp ma je̱'e̱ Dios y'ane'emyu̶ñ je̱'e̱ mu̶dyiibu̶ du'un yajpaatku̶xpu̶ñ neby yu̶'u̶ pi'k'ana'ktu̶jk ajku̶xyu̶ñ. Janch tu̶y'ajtu̶ñ du'un nnu̶maaygyu̶xy ko pu̶n je̱'e̱ Dios y'ane̱'e̱mu̶ñ ka'p ku'ubu̶jku̶ du'un neby je̱'e̱ pi'k'ana'k tu'ug ku'ubú̶kyu̶ñ, ka'p je̱'e̱ du'umbu̶ ja'ay tyu̶gu̶'u̶wu̶ch ma je̱'e̱ Dios y'ane'emyu̶ñ.


Chi je̱'e̱ kumeeñjya'ay tu'ug yajtu̶u̶y je̱'e̱ Jesús:
—Miich oyjya'aybyu̶ Windzú̶n, ¿ti u̶u̶ch mu̶baad nduñ neby u̶u̶ch je̱'e̱ jugy'ajtu̶ñ nbaadu̶chu̶ñ je̱'e̱ mu̶dyiibu̶ ka'p nimu̶naaxu̶u̶ kyu̶xy tyu̶goyu̶ñ?
Chi je̱'e̱ Jesús y'adzoowu̶:
—¿Ti u̶u̶ch ko oyjya'ay xytyijy? Ni pu̶n kya'a'oyjya'ayu̶ch, je'eyu̶ je̱'e̱ Dios tu'kpajk y'oyjya'ayu̶ch. Miich mnejwu̶u̶by je̱'e̱ Dios y'ane̱'e̱mu̶ñ: ‘Ka'p je̱'e̱ wiingpu̶ to'oxyu̶jk mmu̶dtuuntu̶goyu̶ch, ka'p mja'ayyaj'o'ogu̶ch, ka'p mme̱e̱dzu̶ch, ka'p ni pu̶n mni'iwaambe̱du̶ch, y yajmu̶j'at je̱'e̱ mdaj mdeedy.’
Chi je̱'e̱ kumeeñjya'ay je̱'e̱ Jesús nu̶maay:
—Tu̶ u̶u̶ch adaa ku̶xyu̶ nguydyuunda'ay, y adaa u̶u̶ch tu̶ nmu̶mutzk'aty.
Peru̶ ko je̱'e̱ Jesús du'un mu̶dooy, chi nu̶maay:
—Ja'adu'ug je'eyu̶ xytyu̶goy'ajtu̶ mu̶dyiibu̶ ka'p mduñu̶ju̶ñ: tokta'a ku̶xyu̶ tijaty mmu̶dajtypyu̶ñ y ni'imo'o je̱'e̱ ayoobu̶du̶jk ajku̶xy. Mu̶'it je̱'e̱ m'oy'ajtu̶ñ jiiby tzajpjooty mbaadu̶ch. Y ko du'un mduunu̶ch, mu̶'ittu̶tz minu̶ch ma u̶u̶chu̶ñ y xypyanu̶kxu̶chu̶ch.
Ko je̱'e̱ kumeeñjya'ay adaa du'un mu̶dooy, chi mu̶k tyajtu̶gu̶u̶y myaaydyu̶gu̶u̶y, je̱' ko mu̶jkumeeñ je̱'e̱ najty. Ko je̱'e̱ Jesús du'un ijxy ko je̱'e̱ kumeeñjya'ay najty tu̶ tyajtu̶gu̶'u̶y myaaydyu̶gu̶'u̶y, chi myu̶naañ:
—¡Mu̶k jyanchtzipu̶ch tyu̶gu̶u̶ygyu̶xu̶ch je̱'e̱ kumeeñjya'aydyu̶jk ma je̱'e̱ Dios y'ane'emyu̶ñ! Ni'igu̶ ka'p je̱'e̱ camello tu'ug tzip ñaxu̶ch ma je̱'e̱ xu'uñdy'u̶jx xyutu̶chu̶ñ, jak tzip tyu̶gu̶'u̶wu̶ch tu'ug je̱'e̱ kumeeñjya'ay ma je̱'e̱ Dios y'ane'emyu̶ñ.
Je̱'e̱ mu̶dyiibu̶ je̱'e̱ ayuuk du'un mu̶doogu̶xu̶ñ, chi yajtu̶u̶y ajku̶xy:
—¿Y pu̶n je̱'e̱ y'aanu̶mu̶ da'a mu̶baad y'okni'idzo'ogy?
Chi je̱'e̱ Jesús y'adzoowu̶ ajku̶xy:
—Mu̶dyiibu̶ je̱'e̱ naaxwiiñjya'ay tzip jyu̶wu̶u̶ybyu̶ñ, mu̶u̶d je̱'e̱ Dios ka'p je̱'e̱ chipu̶ch.
Chi je̱'e̱ Pedro je̱'e̱ Jesús nu̶maay:
—Windzú̶n, u̶u̶ch tu̶ u̶u̶ch je̱'e̱ nbu̶da'agy ku̶xyu̶ n'u̶xyo'oydyaaygyu̶xy y miich nbanu̶kxku̶xypy.
Chi je̱'e̱ Jesús y'adzoowu̶ ajku̶xy:
—Janch tu̶y'ajtu̶ñ du'un nnu̶maaygyu̶xy ko wanpu̶nu̶ch pu̶n tu̶ ku'ugue̱e̱kku̶xyu̶ñ mu̶u̶d je̱'e̱ Dios y'ane̱'e̱mu̶ñ kyu̶xpu̶ je̱'e̱ tyu̶jk ajku̶xy, o je̱'e̱ tyo'oxyu̶jk ajku̶xy, o je̱'e̱ myu̶gue̱'e̱xk ajku̶xy, o je̱'e̱ tyaj tyeedy ajku̶xy, o je̱'e̱ y'ung y'ana'k ajku̶xy, pyaattu̶gajtzku̶xu̶py je̱'e̱ y'oy'ajtu̶ñ ni'igyu̶ ajku̶xy ma adayaaba naaxwiiñu̶ñ, y ma je̱'e̱ tzu̶naay jugy'ajtu̶ñ je̱'e̱ mu̶dyiibu̶ miimb ku̶daakpu̶ñ, pyaatku̶xu̶py je̱'e̱ jugy'ajtu̶ñ je̱'e̱ mu̶dyiibu̶ ka'p nimu̶naaxu̶u̶ kyu̶xy tyu̶goyu̶ñ.


Chi je̱'e̱ Jesús je̱'e̱ nimajme̱tzkpu̶ discípulotu̶jk abu̶ky woodzooñ, y nu̶maay ajku̶xy: “Cham jim Jerusalén nnu̶kxu̶m ajku̶xy, ma du'un ku̶xyu̶ yajkuydyúnu̶chu̶ñ neby je̱'e̱ Dios y'ayuuknajtzkapxu̶u̶ybyu̶du̶jk jekyu̶p kujaayu̶ñ ajku̶xy mu̶u̶d u̶u̶ch kyu̶xpu̶, u̶u̶ch je̱' je̱'e̱ ja'ay mu̶dyiibu̶ tzon tzajpjooty. Chi u̶u̶ch xykyu̶'u̶yé̱gu̶ch ajku̶xy ma je̱'e̱ ja'ay mu̶dyiibu̶ ka'p jyudíoja'ayu̶chu̶ñ ajku̶xy, xyñixi'ig xyajxi'igu̶bu̶ch ajku̶xy, xy'oju̶bu̶ch xya'axu̶bu̶ch ajku̶xy y xywyindzuj xyjyu̶jptzuju̶bu̶ch ajku̶xy. Xywyóbu̶bu̶ch xykyoxu̶bu̶ch ajku̶xy y xyaj'o'ogu̶bu̶ch ajku̶xy; peru̶ kudu̶gu̶u̶g xu̶u̶ u̶u̶ch ja'adu'ook njuugypyú̶gu̶ch.”
Y je̱'e̱ nimajme̱tzkpu̶ ajku̶xy ni du'uñdyu̶ adaa ayuuk ka'awinju̶wu̶u̶y ajku̶xy, y ni ka'anejwu̶u̶ygyu̶xy tii du'un ja'ayajmu̶dmu̶dyaaku̶gu̶xpu̶ñ, je̱' ko je̱'e̱ ayuuk najty je̱' je̱'e̱ mu̶dyiibu̶ ka'p mu̶baad yajmu̶winma'añbyaadyu̶ñ.


Ko je̱'e̱ Jesús kajpt tu'ug mu̶wingooñ mu̶dyiibu̶ xu̶u̶'ajtpu̶ñ Jericó, jim najty wiindzja'ay tu'ug y'u̶ña'ay tu'uba'a lyimoosnu̶ yujkwa'añ najty. Ko mu̶dooy ko je̱'e̱ mayjya'ay najty jim ñajxku̶xy, chi yajtu̶u̶y tii najty tuunu̶p jajtu̶p. Chi nu̶maay ajku̶xy ko je̱'e̱ Jesús Nazaretpu̶ najty jim najxp. Mu̶'it je̱'e̱ wiindzja'ay mu̶k yaaxkeeky:
—¡Jesús, David y'ok'ung y'ok'ana'k, u̶u̶ch pa'a''ayoog!
Je̱'e̱ mayjya'ay mu̶dyiibu̶ najty jayu̶jp nu̶kxku̶xpu̶ñ y'ojku̶xypy najty je̱'e̱ wiindzja'ay ko wan amoñ, peru̶ je̱' ni'igyu̶ najty je̱'e̱ mu̶k jyak'yaaxke'egy:
—¡David y'ok'ung y'ok'ana'k, u̶u̶ch pa'a''ayoog!
Chi je̱'e̱ Jesús tyu̶naayxyu̶jpy y niduungu̶u̶y oy yajwoyii. Ko je̱'e̱ wiindzja'ay jim myejch, chi yajtu̶u̶y:
—¿Ti mdzojkypy ndunu̶chu̶ch mu̶u̶d miich kyu̶xpu̶?
Chi je̱'e̱ wiindzja'ay y'adzooy:
—Windzú̶n, u̶u̶ch yajwiindu̶kxu̶'k.
Chi je̱'e̱ Jesús ñu̶maayu̶:
—¡Wiindu̶kxu̶'u̶g! Tu̶ mdzo'ogy, je̱' ko u̶u̶ch tu̶ xymyu̶bu̶ky.
Je̱'e̱ timymyu̶'ityu̶ je̱'e̱ wiindzja'ay wyiindu̶kxu̶'ky, y chi je̱'e̱ Jesús padu'ubu̶jky, cham je̱'e̱ xu̶u̶ Dios ja'aymyéch o'owu̶dáty. Y ku̶xyu̶ je̱'e̱ kajptja'ay pu̶njaty adaa du'un ijxku̶xu̶ñ, nan jya'aymye̱jtz y'o'owu̶dajtku̶x je̱'e̱ xu̶u̶ Dios nandu'un.

Լսել San Lucas 18