If you have would like a copy of this version please contact info@davaraudiobibles.org

Text: Halbi New Testament, CC-BY-SA-4.0, The Love Fellowship. Audio: Halbi New Testament Audio Biible, CC-BY-SA-4.0, Davar Partners International, The Love Fellowship, 2023

Halbi New Testament

Halbi Bible by The Love Fellowship is licensed under Creative Commons Attribution-ShareAlike 4.0 License.

छय दिन चो पाचे ईशु पतरस आउर याकूब आउर हुनचो भाई यूहन्ना के संगे धरलो, आउर हुनमन के चिमचाम कोनी डेंग डोंगरी थाने निलो। हुता हुनमन चो पुरे हुनचो रूप बदलली, आउर हुनचो थोमना बेर चो असन बरली आउर हुनचो फटीई ज्योति चो असन उजर होली। आउर मूसा आउर एलिया हुनचो संगे गोठयाते-गोठयाते हुनमन के दका दिला। ऐ थाने पतरस ईशु ले बल्लो, “हे परबु, आमचो ऐथा रतोर अच्छा आय। अगर तुचो इच्छा होओ तो मय ऐथा तीन ठान तम्बू बनायेंदें; गोटक तुचो काजे, गोटक मूसा काजे, आउर गोटक एलिया काजे।” हुन बलते रलो कि गोटक उजर बादरी हुनमन के छांई होली, आउर हुन बादरी थानले ऐ शब्द निकरली, “ऐ मोचो लाड़रा बेटा आय, जेचो ले मय हरिक आंसे: ऐचो सुना।” चेलामन ऐ सुनुन भाती पाटा पडुन घसरला आउर एकदाय डरला। ईशु लगे ऐऊन भाती हुनमन के छिंवलो, आउर बल्लो, “उठा, डरा नाई।” तेबे हुनमन आपलो आँईक उठाला आउर ईशु के छांडुन आउर कोकीई नी दकला। जिदलदाय हुनमन डोंगरी ले उतर ते रवत तेबे ईशु हुनमन के ऐ हुकुम दिलो, “जिदलदाय ले माने चो बेटा मरलो थानले नी जीव उठेदे, हुदलदाय ले जोन काई तुमी दकलासास कोचीई ले नी बोला।” ऐ थाने हुनचो चेलामन हुनचो ले पचारला, “फेर शास्तरीमन केंव बोलु आत कि एलिया चो पयले ऐतोर जरूर आय?” हुन जबाप दिलो, “एलिया जरूर ऐयेदे, आउर सपाय काई सुदरायदे। मान्तर मय तुमचो ले बलेंसें कि एलिया ईलो, आउर लोगमन हुनके नी चिताला; मान्तर जसन चाहला असने ची हुनचो संगे करला। ऐई रीति ले माने चो बेटा बले हुनमन चो हाथ ले दुख उठायदे।” तेबे चेलामन समजला कि हुन आमचो ले यूहन्ना डूबन देतो बिता चो बारे ने बल्लो से।

जिदलदाय हुनमन भीड़ चो लगे अमरला, तेबे गोटक माने हुनचो लगे ईलो, आउर मांडी पाडून भाती बोलुक मुरयालो, “हे परबु, मोचो बेटा उपरे दया कर! कसनबल्लोने हुनके बापुर ऐऊ आय, आउर हुन खुबे दुख उठाऊ आय; आउर घन-घन आईग ने आउर घन-घन पानी ने घसरु आय। मय हुनके तुचो चेलामन चो लगे आनु रले, मान्तर हुनमन हुनके चेंगा करूक नी सकला।” ईशु जबाप दिलो, “हे अन्दबिश्वासी आउर टेनाहा लोगमन, मय केब ले तुमचो संगे रयेंदें? केबे तक तुमचो सहेंदें? हुनके ऐथा मोचो लगे आना।” तेबे ईशु दुष्टआत्मा के खिजलो, आउर हुन हुनचो थानले निकरून गेली; आउर पिला हुनी समया चेंगा होलो।
तेबे चेलामन चिमचाम ने ईशु चो लगे ऐऊन भाती बल्ला, “आमी हुनके केंव नी निकराऊक सकलु?” हुन हुनमन ले बल्लो, “आपलो बिश्वास चो कमी चो लागुन, कसनबल्लोने मय तुमचो ले सते बलेंसें, अगर तुमचो बिश्वास राई चो बीज चो बराबर बले होती, तेबे ऐ डोंगरी ले बोलुक सका से, ‘ऐथा ले सरकुन भाती हुता जा’, तो हुन जायेदे; आउर कोनी गोठ तुमचो काजे मशकिल नी होये। मान्तर ऐ जाति बिन पारथना आउर उपास चो नाहलोर नी निकरे।”

जिदलदाय हुनमन गलील ने रवत, तेबे ईशु हुनमन ले बल्लो, “माने चो बेटा मानेमन चो हाथे धराया जायेदे; हुनमन हुनके मारून पकादे, आउर हुन तीसर दिने जीव उठेदे।” ऐ थाने हुनमन खुबे मुरमुरा होला।

जिदलदाय हुनमन कफरनहूम अमरला, तेबे मंदिर चो कर धरतो बितामन पतरस चो लगे ऐऊन भाती पचारला, “काय तुमचो गुरू मंदिर चो कर नी देऊ आय?” हुन बल्लो, “हव, देऊ आय।” जिदलदाय हुन घरे ईलो, तेबे ईशु हुनचो पचारतोर पयले ची हुनचो ले बल्लो, “हे शिमोन, तुय काय बिचार सीस? धरतनी चो राजा कर कोचो ले धरू आत? आपलो बेटामन ले नाहले दुसरमन ले?” पतरस हुनचो ले बल्लो, “दुसरमन ले।” ईशु हुनचो ले बल्लो, “तो बेटा बाचुन गेलो। तेबले बले ऐईकाजे कि आमी हुनमन के ठोकरना नी खुआऊं, तुय झील चो रेटे जाऊन भाती गरी लाट पकाव, आउर जोन मछरी पयले निकरेदे, हुनके धर; हुनचो मुंह खोललो ने तुके गोटक सिक्का मिरेदे, हुनी के धरून भाती मोचो आउर आपलो पलटा हुनमन के देऊन देस।”

Լսել मत्ती 17