If you would like a copy of this version please contact info@davaraudiobibles.org

Lahuali New Testament, CC-BY-SA-4.0, The Love Fellowship. Lahuali New Testament Audio Bible, CC-BY-SA-4.0, Davar Partners International, The Love Fellowship, 2022.

Lahuali New Testament

Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.

गेह केतंङ साते हेले कुट्रातग, कि अरीला पितंङ ज़ि त्रैंईतु पोंङा रिंङ माह य्वाह, पर ऊई अमज़ि अपत, दुह चोर ए डाकू शुह। पर अरीया पितंङ च़ि तोंखा अपा दुह त्रैंईतु पोहाल शुह। दोऊ थल्जी पहरेदार ज़ि पितंङ अल्ज़ातोर दंङ त्रैंई ज़ि दोऊ सग सेहचातोर दोई एनोह मांतू मिन लेहपच़ी बुलाएचा दंङ धखतेका रेंज़ा शिलज़ा। अपेहल दोई एनोह भत्ते त्रैंईरे रे धखतेका हुंच़े च़रच़ा, दंङ दोतु तुई-तुई जोआ, दंङ दोऊ त्रैंईरे रे दोऊ थल-थल शुहचे य्वातोर; छना कुचे दोच़ी दोऊ सग सह्चातोर। दोरे ऊईतु थले माह जोज़ी, पर दोतु दोरच़ी ऊईतार पोह्कपोर, छना कुचे दोच़ी ऊईतु सग माह सेहच़ी।” यीशु ज़ि दोतिंङ दिह कथा कुंई, पर दोरे माह समझेक्तिर कि दोऊ कुट्रिमी मतलब छि शुह।

दंङ यीशु ज़ि दोतंङ यच़ाह कुंई, “गेह केतंङ हेले कुट्रातग, कि त्रैंई ञेंए च़रपोतो कि पितंङ गेह शुगाह। अंयों ला गिहबे तुहई अंज़े तोतोर; दोरे भत्तेर चोर ए डाकुरे शुहरे पर गिऊ त्रैंई ज़ि दोतु माह रेड्रिर। पितंङ गेह शुगाह; गिऊ दोरच़ी तोंखा अंजा दोतु परमेश्वर उद्धार लोहतो दंङ तोंखा धकतेखा इवा अपा लोहतो दंङ ज़ेइमी थल्जी चारा ला खोकपोतो। चोर ऊई कमो थल्जी माह पर सिर्फ चोरी लहज़ी ए हत्या लेही दंङ नाश लहज़िमी थल्जी अपि। गेह दिऊ थल्जी अंज़े शुगाह कि दोतिंङ जीवन रमोग।
रूठे पोहाल गेह शुगाह। रूठे पोहाल ए एनोह त्रैंईतु थल्जी एनोह जहानो ला रें चरच़ि। परगर अरी माह पोहाल तोह माह त्रेंईतु मालिक, भेड़िया अपि खांई, त्रैंईरे केट्रा पोक्शे इबि, दंङ भेड़िया झुण्डो टोईच़ी हमला लोहतो दंङ दोतिंङ देखा नोखा लेह च़रपोतो। दुह दिऊ थल्जी पोक्शे इबि छना कुचे दुह परगर शुह, दोबि त्रैंईतु चिंद माह। रूठे पोहाल गेह शुगाह; गेह घेंङौ मा रेसेहका, दंङ गिऊ मा रे ला गिह्बी सेहचातोर। छना पिता परमेश्वरे ए गिह्बी सेहच़ा दंङ गेह पिता परमेश्वर बि सेहचातग। दंङ गेह दोतु थल्जी सीमी ला तेयार तोतग। गिऊ ऊई ला त्रैंईर तोतोर, अरी दिह पोङों माशुहरे; गिह्बी दोरे ला हपि ज़रूरी तोह, दोरे गिह्बी सेहपोर; दंङ इच्च़ा ए थाच ए इच्च़ा पोहाल शोतो। गेह घेंङौ जहान रंड्रातग दिऊ थल्जी पिता परमेश्वरे गेरंङ साते दाह लहज़ा, कि गेह यह्च़ा षीङे योग। अच़िला गिऊ जहानो गिऊ दोरच़ी खुल्जे मरपोर। दुह गेह घेंङौ हिटी रंङ रंड्री। गिह्बी दुह प्राण रड्रीमी ए यह्च़ा वापिस लेहप्च़िमी ला हक तोह। गिह्बी घेंङौ पिता परमेश्वरो दोरच़ी हुकुम खोकसी तोह।”
यीशु ऊ दिह गप्पातु बजह च़ि यहुदी मीहतु बिचंङ यच़ाह फूट अच़ा इलि। दोतु बिचंङ महसे ज़ि कुट्री लहतिरे, “दोऊ अंद्रेग मांजी आत्मा तोह दंङ दुह बमजी शुह; दोऊ थाह रेड्रुंई।” रेह मीहरे कुट्री लेहतिर, “दि गप्पारे मांजी आत्माओ टेहची मीहू शुबी मरपोतो। मांजी आत्माज़ि अपेहला काणे मीहबी ठीक लेह मरच़ि!”

दुह ध्याड़ा रिंङ यरूशलेम शहरंङ यहुदी मंदिरो प्रतिष्ठान त्यार लेह्की तोहई। दुह सोई ऊ टेम तोहई। दंङ यीशु यहुदी मंदिरंङ रज्ज़ा सुलेमानो ल्वाड़िंङ जोई लेह्की तोहई। दंङ यहुदी शास्त्री ज़ि दोऊ फेरे ठ्रोहका शुहचे दुह रुहक्च़ी, “केई ञेंहरे महस टेम तचेक धोखा रिंङ तचेक मरपोंन, दा ञेंतिंङ साफ-साफ कंज़े च़रतु, छि कांह मसीह शुनाह?” यीशु ज़ि दोतिंङ जुबाब रेंई, “गेह केतिंङ कुचे च़रतग, पर केहच़ी विशवास ए माह लहज़ातंई, अंऊ कम गेह घेंङौ बाहो अधिकारंङ लहज़ातग दुह ए गिऊ गवाह शुह। पर केहच़ी दिऊ थल्जी विशवास माह लहज़ातंई कि केरे गिऊ त्रैंईतु बिचंगज़ि माह शुई। गिऊ त्रैंई ज़ि गिऊ सग सेहचातोर दंङ गेह दोतिंङ सेहचातग, दंङ दोरे ला गिऊ थल-थल जोज़ातोर। दंङ गेह दोतिंङ अनंत जीवन रंड्रातग, दंङ दुह अपेहला माह योहसतो, दंङ अच़िला दोतिंङ गिऊ दोरच़ी खुल्जे मरपोर। गिऊ पिता परमेश्वर, अच़ि गिह्बी दोरे रांहषी ततो, भत्ते बे मोह्ड़े तोह, दंङ अच़िला दोतिंङ बाहऊ गुहटे शिली मरफोर। गेह ए गिऊ पिता परमेश्वर इच्च़ा शुई।”
दिरंङ यहुदी सेंहणा ज़ि यच़ाह यीशु बि रघ द्रले बाहाएच़िमी थल्जी रघटे उठाएतिर। दिरंङ यीशु ज़ि दोतंङ साते कुंई, “गेह केतिंङ घेंङौ पिता परमेश्वरो दोरच़ी अंयों शुहदा रूह्ठे कम कांहषी तातग, दोतु बिचंङ च़ि अंऊ कमो थल्जी केहच़ी गिह्बी रघटे बाहाच़तोंई?”
यहुदी सेंहणा ज़ि दोबि जुबाब रेंईर, “रूठे कमो थल्जी ञेंहच़ी कनिंङ रघ द्रले माह केट्री पर परमेश्वरो बुराई लहज़िमी थल्जी ए दंङ दिऊ थल्जी कि कांह मीह शुहचे केनाबि परमेश्वर शुहबिमी दावा लहज़ातन।” यीशु ज़ि दोतिंङ जुबाब रेंई, “छि पवित्र शास्त्रा रिंङ झांह च़ेहसी माह, कि परमेश्वरे एनोह मीहतु सेंहणातिंङ कुंई, ‘गेह केतंङ साते कुट्रातग, कि केहरे सद शुई?’ ” अगर दोई दोतिंङ सद कुहतो अतु कछंङ परमेश्वरो बचन पिचाते, दंङ पवित्रशास्त्रो गप्पा हप्सी शुहबी मरच़ि। अपेहल गेह कुट्रातग, “गेह परमेश्वरो योह शुगाह” ता केहरे गिह्बी छिला कुट्रातंई कि, “केई बुराई लहज़ातन।” गेह दुहए शुगाह अच़ि पिता परमेश्वरे शत्‌ह लहतो दंङ गिह्बी संसार रिंङ चरच़तो। “अगर गेह घेंङौ पिता परमेश्वरो कम माह लहज़ातग, ता गिऊ विशवास था लांही। पर अगर गेह कुट्रातग, ता गिऊ विशवास ला था लांही, पर दुह कमो टोहकठे विशवास लोहनी दंङ केतिंङ पता लेह्पोतो कि परमेश्वर गेरंङ तोह दंङ गेह परमेश्वरारंङ।” दंङ दोच़ी यच़ाह यीशु बि च़ुमज़िमी थल्जी कोशिश लहरिर पर दुह दोतु दोरच़ी ऊईतार अच़ा इलि।
दंङ यीशु यरदन बेंडी ऊ नुरेच़ि दुह ठहरि रिंङ अच्च़ा इलि अंऊर यूहन्ना बपतिस्मा रंड्रा तोहई, दंङ दोर्तिंङ ए बंङज़िरी। दंङ महस मीहरे दोऊ कछंङ अंज़े कुट्रातेर, “यूहन्ना ज़ि ता इच्च़ा ला चिह्न चमत्कार माह कंजते, पर अंऊ ला धिर यूहन्नाज़ि दिऊ पाहठी कुहते भत्ते हेले तोहई।” दंङ दोच़ि महसे ज़ि यीशु ऊ टोहकठे विशवास लहरिर।

Լսել यहून्नो 10