SOERA MOZE I. FAZA 7.
FAZA 7.
I. Feʼamõi ba nowo jaw̃a. II. Bõrõta waʼanõnõ danõ. III. Ahori mate hadia ia zaoeri.
1I. Ba imane Jehowa chõ Noachi: Ae baowo, jaʼoegõ ba soroijomooe fefoe, me no satoelõ ndraʼoegõ fõnagoe, oeʼila, ba niha andrõ. 2Ba zaliw̃aliw̃a ba danõ, si lõ si lõ sõchi, ba fitoefitoe halõ, si matoea ba si alawenia; ba ba zi so si lõ sõchi ba doeadoea, si matoea ba si alawenia. 3Ba si manõ ba wofo ba daloe mbanoea, fitoefitoe, si matoea ba si alawenia, ba wangorifi tanõmõ ba goeli danõ maʼasagõrõ. 4Hatṍ fitoe bongi sa, ba moteoe ba goeli danõ oebeʼe, õfa woeloe ngaloeo ba õfa woeloe mbongi, ba oehori ba goeli danõ fefoe zi so andrõ, nifazõchigoe. 5Ba iʼoʼõ sibai Noachi niw̃aʼõ Jehowa chõnia. 6Ba no 600 fache Noachi, me anõnõ danõ idanõ. 7Ba mõi ba nowo Noachi, awõ nononia ba foʼomonia ba oemõnõnia, fõna waʼanõnõ danõ andrõ. (Loek. 17, 27. Fet. II. 2, 5). 8Ba saliw̃aliw̃a ba danõ, si lõ hadia ia si lõ sõchi, ba si so si lõ sõchi ba fofo ba sanananana ba goeli danõ, 9ba faedo weʼamõi baowo chõ Noachi, sarasara zi matoea ba sarasara zi alawe, si mane niw̃aʼõ Lowalangi chõ Noachi.
10II. Ba me no aefa zi fitoe bongi andrõ, ba ibõrõtaigõ waʼanõnõ danõ andrõ. 11Me 600 fache Noachi, me baw̃a si doea, ba zi mewelewitoe, daʼõ mbaw̃a, ba zangoemboengoemboe manõ nidanõ moroi ba namõ sabacha, ba teboka zandrela mbanoea si jaw̃a. 12Ba abõlõbõlõ sibai deoe ba goeli danõ, õfa woeloe ngaloeo ba õfa woeloe mbongi. 13Ba me loeo daʼõ mõi baowo Noachi ba Semi ba Chamo ba Jafeti, ono Noachi ba foʼomo Noachi ba oemõnõnia andrõ si datõloe, 14ba fao, jaʼira ba oetoe ndroeʼoe andrõ fefoe ba oerifõ niha fefoe, ngawangawalõ ba koeõkoeõ fefoe, sanananana ba danõ, ngawangawalõ, awõ ngawalõ wofo, fefoe zoʼafi. 15Daʼõ zi mõi chõ Noachi, baowo, doeadoea, fefoe nõsi goeli danõ, si so noso. 16Ba si mõi jaw̃a, ba sarasara zi matoea ba sarasara zi alawe, fefoe nõsi goeli danõ, si mane niw̃aʼõ Lowalangi chõnia. Ba ikoesi mbawandroehõ Jehowa, foerinia.
17III. Ba ibõrõtaigõ waʼanõnõ danõ andrõ, õfa woeloe ngaloeo. Ba tedooedooe molõ, ifazaw̃a nowo, alaw̃a jaw̃a danõ. 18Ba itoegoe eboea sibai molõ, tedooedooe sibai ba goeli danõ, ba hoelõ zolojo nowo ba molõ andrõ. 19Itoegoe eboea sibai nidanõ ba goeli danõ, tobali anõnõ hili salaw̃a fefoe, ba goeli danõ. 20Felelima siʼoe inõnõi hili idanõ, tobaloe manõ. 21Ba tekiko nõsi goeli danõ fefoe, saliw̃aliw̃a ba goeli danõ, he fofo ba he oerifõ niha ba he oetoe ndroeʼoe, fefoe hadia ia zanananana ba goeli danõ, ba dozi niha. 22Fefoe zi so noso ba nichoe, si so ba danõ jaw̃a, ba mate. 23Si manõ wangohorinia fefoe zi so ba goeli danõ, he niha, ba he oerifõ niha ba koeõkoeõ ba fofo ba daloe mbanoea; tehori ba danõ, tobali hatṍ Noachi zi tosai, awõ hadia ia zi fao chõnia baowo. 24Ba lõ alõʼalõ nidanõ ba goeli danõ, 150 wongi.
Արդեն Ընտրված.
SOERA MOZE I. FAZA 7.: NIA
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.