URA TIN AYRA 15
15
Lona vi Galamba u Abram
1Ŋgoo dla mayra li ay ndaɗta, Yawe di Abram hu doyra ana, «Li ndaaɗi anni mbari maŋŋa, warak maŋŋa hin li ŋgol cocoo.» 2Abram hoŋom dira ana, «Bu Suuna, Yawe, aŋ hin ɦanni mege? An kaki ni goo ka konɗi lay, sa yowon daa joonna ni Eliyezer ma Damasna.»
3Abram di olo ana, «Aŋ ɦan goo kaɗi. Sa ma vuɗ vo varanna hin yowon joonni namu.» 4Yawe hin dam ɗaŋŋi ana, «Hin ka yowoŋ jooŋŋi nambi, goroŋ ma aŋ vuɗum u taŋgana hin yowommi namu.» 5Nam kalam ay ki kiɗik dam ana, «Gol iriŋ koloo, ndum ciciwra gege lini aŋ ndak a ndumuɗu.» Yawe dam olo ana, «Njafaŋ hin li ni ko asina na.»#Rom. 4.18; Heb. 11.12 6Abram tin hurum kay Yawe, ni kay ndaɗta Yawe ŋgaam a sa ma ɗegeena.#Rom. 4.3; Gal. 3.6; Jak 2.23
7Yawe dam olo ana, «Anni Yawe ma kalaŋ ay ki hu Ur hu Kaldera a ɦaŋ ndaŋgara aŋ kaɗ wandara ni maŋu.» 8Abram hoŋom dira ana, «Bu Suuna Yawe, an hin wi ni u me ana ndaɗ ni varanu rage?» 9Yawe dam ana, «Vi mbutl wayra basaɗaɗ hindira, vi ɦura basaɗaɗ hindira, vi gamla ma basaɗam hindina, vi guk palaɗta u guk gaɓina may.» 10Abram yow yoori asina halaŋ, ŋgaɗasi irisi ki duk mba' mba', nam ɓorow ii layagina ka ki dukgi kama. 11Bakŋa mba a koɓosi tliwisiya ni Abram dikisi kiyo.
12Faɗta ndi ga ndini Abram irim lam senna ndaana lamu, ndufunda ŋgolla kuluɓ kamu.#Job 4.13,14 13Yawe di Abram ana, «Njafaŋ hin tuɗ ki ŋgayra hu mbassa daŋga, mbas ndaɗta ka ni masiraɗi, asi hin li mbaɓura fi lassa ta ta basara kis kis fiɗi.#Kal. 1.1-14; Sun. 7.6 14An hin kaɓakŋa kay suu ay lasasina, asi hin sel ay ki hu mbas ndaɗta u begera kosi cocoo.#Kal. 12.40-41; Sun. 7.7 15Aŋ may ni hin tuɗ eg somoyoŋ u heɓpa, aŋ may ni hin mbuɗ maara u furira miɗ u heɓpa. 16Gor ŋgologi maŋ suu fiɗina hin hoŋ ay tani ni asiya, kay cora vi suu Amorna bay ndak tuwa.» 17Faɗta ɗik ɗikŋi ndufunda ŋgolla kuluɓ bim, gola ni doyra gi kura hololol u sin kura jak duk tliw ma irimbi ɓorowi mbambana buyuk buyuk. 18Hu buu namma ni Yawe vi galamba u Abram di ana,
«An ɦal mbas ndaɗta maŋ gor ŋgologi maŋsina,
col ha fun lum ma Egiptena
ta ta fun lum ma ŋgolna Efratna,#Sun. 7.5
19mbassa Kenda, mbassa Kenizza, mbassa Kadmonda. 20Mbassa Hetta, mbassa Perizna, mbassa Refata. 21Mbassa Amorra, mbassa Kanaanda, mbassa Girgakka u mbassa Jebussa.»
Արդեն Ընտրված.
URA TIN AYRA 15: BMS
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Bible Moussey © Bible Society of Chad, 2002.