Mwanzo 5
5
Rikolo ra Adamu
1Eyi ndi waraka ya rikolo ra Adamu. Kwa ire suku ire wakati Mwenyezimungu wamumbire mwanadamu, kamumba kwa kulandana kwake iye Mwenyezimungu. 2Wanadamu wombiwe wawenye ndi nlume na muka. Pawombire, Mwenyezimungu kawajanliya na kawapa zina ra “Binadamu”. 3Adamu pawere na umuri wa myaka miya na talatini, akimpongola mwana wa kulandana naye, kwa wajii yake, akimwita Seti. 4Bandi yakumpongola Seti, Adamu kainshi myaka miya nane, kâwapongola wana wengine waka na walume. 5Adamu kafwa na humuri wa myaka miya kenda na talatini.
6Wakati Seti wawere na humuri wa myaka miya na mitanu, akimpongola Enoshi. 7Bandi yakumpongola Enoshi, Seti kainshi myaka miya nane na saba, kâwapongola wana wengine waka na walume. 8Seti kafwa na humuri wa myaka miya kenda na kumi na miwiri.
9Wakati Enoshi wawere na umuri wa myaka tuswini, akimpongola Kenani. 10Bandi ya kumpongola Kenani, Enoshi kainshi myaka miya nane na mitanu, kâwapongola wana wengine waka na walume. 11Enoshi kafwa na humuri wa myaka miya kenda na mitanu.
12Wakati Kenani wawere na humuri wa myaka sabini, akimpongola Mahalaleli. 13Bandi yakumpongola Mahalaleli, Kenani kainshi myaka miya nane na arubaini, na kâwapongola wana wengine waka na walume. 14Kenani kafwa na umuri wa myaka miya kenda na kumi.
15Wakati Mahalaleli wawere na humuri wa myaka sitini na mitanu, akimpongola Yaredi. 16Bandi yakumpongola Yaredi, Mahalaleli kainshi myaka miya nane na talatini, na kâwapongola wana wengine waka na walume. 17Mahalaleli kafwa na humuri wa myaka miya nane na tuswini na mitanu.
18Wakati Yaredi wawere na humuri wa myaka miya na sitini na miwiri, akimpongola Henoki. 19Bandi yakumpongola Henoki, Yaredi kainshi myaka miya nane, kâwapongola wana wengine waka na walume. 20Yaredi kafwa na humuri wa myaka miya kenda na sitini na miwiri.
21Wakati Henoki wawere na humuri wa myaka sitini na mitanu, akimpongola Metusela. 22Henoki ákipatana na Mwenyezimungu. Bandi ya kumpongola Metusela, Henoki kainshi myaka miya natu, kâwapongola wana wengine waka na walume. 23Henoki kainshi myaka miya natu na sitini na mitanu. 24Henoki ákipatana na Mwenyezimungu, nakisa akibanziwa awoneke tena, konta katwariwa na Mwenyezimungu mwanyewe.
25Wakati Metusela wawere na humuri wa myaka miya na tamanini na saba, akimpongola Lameki. 26Bandi ya kumpongola Lameki, Metusela kainshi myaka miya saba na tamanini na miwiri, kâwapongola wana wengine waka na walume. 27Metusela kafwa na humuri wa myaka miya kenda na sitini na kenda.
28Wakati Lameki wawere na humuri wa myaka miya na tamanini na miwiri, akimpongola mwana nlume. 29Mwana ire akimwita Nnu, akamba: “Eyu mwana-yu, ndi asaka kutauni kazi zetu za nguvu zatiri kukola na makono etu nkati ya eyi duniya yaalanire Mola wetu-yi.” 30Bandi ya kupongoriwa Nnu, Lameki kainshi tena myaka miya ntanu na tuswini na mitanu, kâwapongola wana wengine waka na walume. 31Lameki kafwa na humuri wa myaka miya saba na sabini na saba.
32Nnu wakati watimize humuri wa myaka miya ntanu, kawapóngola Shemu, Hamu na Yafeti.
Արդեն Ընտրված.
Mwanzo 5: wmwBI
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2013, Wycliffe Bible Translators, Inc. All rights reserved.