Exodo 2
2
Nan Naiyanakan Moses
2:1-10
1Issan deey ay timpo et nin-asawa nan kap-owan din si Levi id kasin dadat omanak. 2Dat kasin maliton san babai et omanak is lalaki. Idi nailana ay gawis ya nabaked san onga danat igagago is tolo ay bowan. 3Ngem masiksiksiken san onga et maligatan san inana ay mangigagago isonga dat omala is linaga ay tampipi et ponitana am-in nan somgepan di danom. Danat ippey san onga isnan leemna danat iyey et taynana isnan kad-an di anando ay tannobong isnan benget di ginawang. 4Isnan ad-addawi bassit et intatakdeg nan iyon-ana ay babai ta ilaena nan ommat isnan innodina.
5Maaw-awni pay daet omey nan babai ay anak di ali ay men-emes issan ginawang dapay mendad-aan nan babaana ay bababai issan bengetna. Dat ilaen san anak di ali san tampipi issan kad-an di tannobong danat ibaa nan esay baana ay mang-ala. 6Daet tokaban san anak di ali san tampipi et ilaena san onga ay men-ag-aga isonga daet maseg-ang. Danat kanan en, “Anak di Hebreo na.” 7Dat somag-en san iyon-an san onga et kanana issan anak di ali en, “Kadya, no kaytem et omeyak omayag is Hebreo is mangpasoso isnan sana ay onga?” 8“Owen enka,” kinwanin san anak di ali. Daet omey san iyon-an san onga et ayagana si inana. 9Daet kanan san anak di ali issan in-ina en, “Alaem nan naay ay onga ta talaknem pala ken sak-en et esak lagbowan sik-a.” Danat alaen san anakna et talaknena.
10Masiken pay san onga dat isagong inana issan anak di ali et inbilang et san anak di ali ay anakna. Danat kanan en, “Gapo tay dinas-ak isnan kad-an di danom isonga ngadnak is Moses.”
Nan Inmayan Moses Id Midian
2:11-25
11Nallos nan ado ay tew-en et nasiken et si Moses. Isnan naminsan ay agew ay inmey isnan kad-an nan iib-ana ay Hebreo et nailana nan mangpalpaligatan nan iyEgipto ken daida ay men-obla is mendagsen ya inilana pay nan mangsogsogtowan nan esay iyEgipto isnan esay kailyana ay Hebreo. 12Isonga dat menmolimoli si Moses et idi mailana ay maid mangiila ken siya danat pateyen san iyEgipto danat ikaob isnan lagan.
13Kawakgatana pay dat kasin omey issan kad-an san Hebreo ay kakailyana danat ilaen nan dowa ay Hebreo ay mensapsape danat kanan issan nakabasol en, “Ayta dakan sogsogtowen nan ib-am?” 14Dat songbatan san nakabasol et kanana en, “Ay sino nan nangdotok ken sik-a ay mentolay ya mang-banag ken dakami? Ay pateyem abes sak-en ay kaneg san inikkam issan esay iyEgipto?” Dat inmegyat si Moses et kanana isnan nemnemna en, gintekda et obpay san inikkak.
15-16Idi dinngen nan ali san inikkan Moses, kaytena ay ipapatey si Moses ngem dat tomagtag si Moses ay komaan id Egipto et omey isnan addawi ay ili ay Midian et mentee isdi.
Isnan esay agew ay tomotokdo si Moses isnan sag-en di bobon isdi daet omey nan pito ay bababai ay an-ak Jetro ay padi id Midian ta somakdoda. Ponowenda koma nan pagpain-inoman di kalnilo ya kalding ay talaken amada 17ngem dat domateng nan menpaspastol isnan talaken di teken ay ipogaw et pakaanenda san bababai isonga daet omey si Moses et badangana san bababai danapay painomen nan talakenda.
18Idi somaa san bababai dat mensoot si amada ay si Jetro et kanana en, “Ayta dakayon nasapa ay sinmaa id wani?” 19Dadat kanan en, “Wada nan iyEgipto ay nangbadang ken dakami issan mangipakaanan san menpaspastol ken dakami isnan pagsakdowan. Insakdowana dakami danapay binadangan dakami ay mangpainom issan talaken tako.” 20Dat sooten san amada en, “Into pay nan kad-ana? Dakayon aped tinaynan isdi? Enkayo ayagan ta makikan ken datako.”
21Inmeyda inayagan si Moses et makkey isnan baeyda et makitee isdi. Dat ipaasawan Jetro ken Moses nan anakna ay si Sefora. 22Daet omanak si Sefora is lalaki. Dat kanan Moses isnan nemnemna en, sangailiyak isna isonga ngadanak nan naay onga is Gersom.#2:22 Nan kayat ay kanan nan ngadan Gersom et sangaili.
23Nallos pay nan kaat ay tew-en dat matey san ali id Egipto. Gapo tay dadama ay maligligatan kayet nan Israelita isnan ipaob-oblan di iyEgipto ken daida et ninseg-angda ken Apo Dios. 24Et dinngen Apo Dios nan dawatda. Danat nemnemen nan nakitolagana isdin alal-apoda ay da Abraham, Isaac yas ken Jacob. 25Gintekna nan mapalpaligatan nan Israelita danat seg-angan daida.
Արդեն Ընտրված.
Exodo 2: xnn
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.