ປັຣນາຍ ປາລີ່ ພາຍາ 2

ເກືາ ແຕ ຣາໄງ່ອ໌ ຣາລັ່ງ

1ກອນ ເອີຍ! ອຶງເຄາະ ໄມ່ ອີດ ມັຮ ຊັນຕອຍ໌ ເກົາ ອາຕີ,

ກະ ອຶນໂຈຍ ຊາລີຣ ມັຮ ຣາມຶ່ຮ ເກົາ ແປຣີ ໄມ່ ຕະ.

2ອຶງເຄາະ ໄມ່ ປາແຈງ ກູຕູຣ ຊາງັດ ມັຮ ເງ່ ຣາໄງ່ອ໌ ຣາລັ່ງ,

ກະ ອຶງເຄາະ ໄມ່ ກູຕົງ ອຶນແຍ່ະ ຣາງຶ່ຮ ໂອນ ດັງ ແຕ ເງ່ ກັອຍ.

3ອຶງເຄາະ ໄມ່ ກູໂກຼຍ໌ ແຊອ໌ ໂອນ ດັງ,

ກະ ຊາບາວ ຈໍ່ອ໌ ໂອນ ຊາປຸ່ຮ.

4ອຶງເຄາະ ໄມ່ ຈໍ່ອ໌ ຣາໄງ່ອ໌ ຣາລັ່ງ ນ່ະ ໄມ່ ຈໍ່ອ໌ ປຣະ,

ແຕີລາ ມັຮ ມູ່ນ ເນົ່າ ປາໂຕ່ະ ດໍອ໌.

5ຄັນ ໄມ່ ຕະ ນ່ະກັອຍ, ລາ ໄມ່ ດັງ ຢຳນັ່ບ ອຶນເຈົາ ໄຮ;

ກະ ເຕ່ອ໌ ຣາມົຮ ກະ ດັງ ເງ່ ເຢືາງ ເຈົາຣາຊີ.

6ເຢືາງ ເຈົາຣາຊີ ລາ ອັນ ກາ ໂອນ ຣາໄງ່ອ໌ ຣາລັ່ງ;

ຊັນຕອຍ໌ ແຕ ແບອ໌ ອັນ ຕະ ໂອນ ກວາຍ ເຕ່ອ໌ ດັງ ກະ ເຕ່ອ໌ ຊາປຸ່ຮ.

7ອັນ ເນ່ ມັຮ ກວາຍ ກາ ເບີນ ຣາງຶ່ຮ ຕານັ່ອງ ອໍ,

ອັນ ຊາລີອ໌ ມັຮ ກວາຍ ກາ ຕະ ປຍາຍ໌ ເລືອຍໆ.

8ອັນ ກຸ່ມກຍາອ໌ ມັຮ ກວາຍ ຕະ ຣານະ ຕານັ່ອງ ຕາປຶ່ງ,

ກະ ກູຣຍາອ໌ ດໍອ໌ ໄລ່ ກາ ຊາອຳ ອັນ ປຍາຍ໌ ລາລື່.

9ຄັນ ໄມ່ ຊາງັດ ເກົາ, ເຈີ່ ໄມ່ ເຕ່ອ໌ ດັງ ຣານະ ຕານັ່ອງ ອໍ, ຣານະ ປຍາຍ໌, ກະ ຣານະ ມັນຕັ່ດ ມັນດຍາຮ.

ກູ່ ຣາມຶ່ຮ ອໍ ກັອຍ ລາ ໄມ່ ເຕ່ອ໌ ຕະ ອຶນແຍ່ະ.

10ນ່ະກັອຍ ລື່ ໄມ່ ແກີດ ກວາຍ ຣາໄງ່ອ໌ ຣາລັ່ງ,

ກະ ຣາງຶ່ຮ ໄມ່ ຊັອງ ຣໍ່ອ໌ ຍ່ອນ ແຕ ມັຮ ເງ່ ໄມ່ ດັງ.

11ຍ່ອນ ໄມ່ ດັງ ເງ່ ຕະ ກຣັ່ກ ອໍ ກະ ໄມ່ ຊາປຸ່ຮ ແຕ ມັຮ ເງ່ ປຍາຍ໌,

ລື່ ມັຮ ຣາມຶ່ຮ ກັອຍ ກູຣຍາອ໌ ໄມ່,

12ກະ ກາຕັງ ໄມ່ ຕາ ໂອນ ຕະ ຣານະ ໂລ່ຍຮ.

ກະ ຣານະ ໄນ່ ຈ່ອຍ ໄມ່ ໂອນ ແວັດ ແຕ ກວາຍ ແຣັ່ງ ກາ ຕະ ອຶນຕີ ຕຳໄບອ໌ ຕຳບັອງ.

13ກວາຍ ກັອຍ ຕັຮ ເຈີ່ ຣານາ ຕານັ່ອງ ອໍ

ອີ ເປາະ ຕຶ່ງ ຣານາ ການຳ ແອັນ;

14ກວາຍ ກັອຍ ຊັອງ ຣໍ່ອ໌ ຕຶ່ງ ຣານະ ຕາ ອໍ,

ກະ ມັ່ກ ຕະ ກູຈົກ ກູຈີວ ກູວີວ ກູວາວ;

15ຕຶ່ງ ແດີຍ ອາມົ່ງ ໄລ່ ຕະ ແອີງ ໂກ່ະ ກີ່ ຊັອງ,

ກະ ຣານາ ໄລ່ ຕາ ເບີນ ຕານັ່ອງ.

16ໄມ່ ເຕ່ອ໌ ວຍາຣ ແຕ ມັນແຊມ ກາ ເປາະ ປັຣລື່ຍ,

ລາ ມັນແຊມ ກາ ປິ່ ປຣຸ່ງ ໂອນ ປັອງ ຕໍ ຊາຣັອງ ໂອນ ຈວາດ ຕຶ່ງ ຣານະ ໂລ່ຍຮ.

17ມັນແຊມ ໄນ່ ຕາ ເບີນ ຕານັ່ອງ ໂຈະ ກາຢາອ໌ ອັນ ແຕ ຕາແບິ,

ກະ ອັນ ຊາລີຣ ມັຮ ຊັນຕອຍ໌ ກາ ອັນ ປັຣຄັນ ຢັ່ຮ ເມືາງ ເຢືາງ ເຈົາຣາຊີ.

18ຄັນ ໄມ່ ມາ ເປາະ ປໍ ອຶນຕຸ ມັນແຊມ ກັອຍ ແອີດ, ລາ ນ່ະ ໄມ່ ເປາະ ຕຶ່ງ ຣານາ ກູຈີດ,

ຍ່ອນ ຣານາ ກັອຍ ເປາະ ປໍ ອຶນຕຸ ກວາຍ ກູຈີດ ແອີດ.

19ອາແລ່ະ ກາ ເປາະ ລາເງີ່ບ ມັນແຊມ ກັອຍ ລາ ຈວາຍ໌ ຊັຣລຸ ໂບະ ກັລ.

ແດີຍ ອາມົ່ງ ອັນ ແກີດ ແກຼິກຼູ່ ຣູ່ບາ ເລີຍ.

20ຍ່ອນ ນ່ະກັອຍ, ໄມ່ ອຶງເຄາະ ດວຍ໌ ເຕຣ່ງ ກວາຍ ອໍ,

ກະ ຕະ ເປາະ ຕຶ່ງ ປັຣຊັອຮ ອາແລ່ະ ກາ ຕອຍ ປັຣຮອຍ ອາແລ່ະ ກາ ປຍາຍ໌.

21ຍ່ອນ ແອີງ ມັຮ ກວາຍ ຊາເບິງ ກະ ກວາຍ ຕານັ່ອງ ອໍ ຊັອງ ເບີນ ແອີດ ຕຶ່ງ ກຣວາງ ກູແຕອ໌ ໄນ່.

22ມາ ລື່ ເຢືາງ ເຈົາຣາຊີ ຕູ່ຍຮ ອາລັ່ອຮ ມັຮ ກວາຍ ຕາ ອໍ ແຕ ກູແຕອ໌ ກັອຍ,

ກະ ປູ່ຍ໌ ອຶນແຍ່ະ ມັຮ ກວາຍ ໂລ່ຍຮ ນ່ະ ເນົ່າ ເຣີ່ອ໌ ກັ່ລ ອາລ່ອງ.

Արդեն Ընտրված.

ປັຣນາຍ ປາລີ່ ພາຍາ 2: ກາຕາງ

Ընդգծել

Կիսվել

Պատճենել

Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք

Իմացեք ավելին ປັຣນາຍ ເຢືາງ ເຈົາຣາຊີ ປັຣຄັນ ຕາໄມ ປັຣນາຍ ກາຕາງ (ພາສາກາຕາງ)ປັຣນາຍ ເຢືາງ ເຈົາຣາຊີ ປັຣຄັນ ຕາໄມ ປັຣນາຍ ກາຕາງ (ພາສາກາຕາງ)-ի մասին